Wat zum 9

Kaŋ ŋgayya ge anuwa̰y: Purra ge kavaar ma ne

1Bage ɗiŋnedin jan Musa go: «Mbo ɓol Faraon, mo jan na go: Bage ɗiŋnedin Dok ge Ibriniya ma ne jan go: Ya̰ mbi ɓase ma mbo ke mbi temel mo̰r. 2Kadɗa mo vin ya̰ nama mborra to ɗe, 3Bage ɗiŋnedin mbo pur aŋ kavaar ge ne ful zi ma: Moy ge haŋle mbo bwat aŋ tisi ma, ne aŋ kwara ma, ne aŋ jambal ma, ne aŋ nday ma, ne aŋ gii ma pe. 4Bage ɗiŋnedin mbo caɗe kavaar ge Israyela ma ne ne kavaar ge Masar ma ne buwal se. Kavaar ge Israyela ma ne myalam ɗu kikit puy mbo su to bat.» 5Bage ɗiŋnedin hal swaga ya go, jan go: «Kwap, mbi mbo ke kaŋ mbe ma no suwal go.»

6Dam ge kwap ge go, Bage ɗiŋnedin ke go no. Kavaar ge Masar ma ne ma mwaɗak a su, amma kavaar ge Israyela ma ne ma a̰me ɗu kikit puy su to. 7Faraon teme naa mbo hale fare pe, a za̰ go, ne kavaar ge Israyela ma ne ma buwal zi a̰me ɗu kikit puy be su to. Go no puy ɗe, Faraon gwan togre na dulwak, ya̰ ɓase ma mborra to bat.

Kaŋ ŋgayya ge myanaŋgal: Sulgu ma

8Bage ɗiŋnedin jan Musa ma ne Aaron go: «Abe me sḭḭm ne sagar pul zi, wi tok pul ŋgul, Musa na ka̰ na digi Faraon ndwara go. 9Sḭḭm mbe mbo saŋge kuci, dasare suwal Masar pal pet. Mbo ka mbal naa dasana ma ne kavaar ge ne suwal Masar go ma duur, a ka fol jwaŋ se.»

10A abe sḭḭm ne sagar pul zi, a mbo Faraon ndwara se ya. Musa kan na digi, sḭḭm mbe mbal naa dasana ma ne kavaar ma duur, a ka fol ta jwaŋ se. 11Mbole ma ɓol pool ge mbo ya Musa ta to, ne ɓuy pe. Ago ɓuy mbe mbá mbole ma ne naa ge ne suwal Masar go ma pet.

12Bage ɗiŋnedin sirsi Faraon dulwak, za̰ Musa ma ne Aaron to bat dimma ne Bage ɗiŋnedin ne jya̰ Musa go.

Kaŋ ŋgayya ge ɓyalar: Mam swarra ne tuwar-ndaar

13Bage ɗiŋnedin jan Musa go: «Ɗage cya̰wak vḛ mbo ɓol Faraon, mo jan na go: Bage ɗiŋnedin Dok ge Ibriniya ma ne jan go: Ya̰ mbi ɓase ma mbo ke mbi temel mo̰r. 14Ago, ne gá ne zḛ no, mbi mbo teme yál ge daage hir ya aŋ ne mo naa ga̰l ge temel ma ne mo ɓase ma pal pet, go no, mo mbo kwar go dok a̰me ge mbyatɗa ne mbi go ne suwar pal to. 15Te go mbi e mbi tok aŋ ne mo naa ma ta, mbi iya aŋ ne mbogom ma ɗe, aŋ te ya burmi ne suwar pal uzi. 16Amma kadɗa mbi ya̰ mo ya go ne ndwara ɗe, ago mo kwa mbi pool, mbi dḭl na dasare suwar pal pet me#Rom 9:17.. 17Kadɗa mo gage mbi ɓase ma, mo ya̰ nama mborra to ɗe, 18kwap, cya̰wak mbe go no tem, mbi mbo é mam swarra ne tuwar-ndaar. Ne pe dolla ge suwal Masar ne ya day ɗiŋ ma̰ no, mam swarra ne tuwar-ndaar hir mbe no be swar suwal Masar go to. 19Se no ka̰ mo kavaar ma, ne kaŋ ge mo ne ma ge ne ful zi ma pet zok zi. Ago naa dasana ma ne kavaar ge ne gá ful zi ya, be ge a kote nama ya yadiŋ to ma, tuwar-ndaar mbo swar nama pal, a mbo su.»

20Naa ga̰l ge temel ge Faraon ne ma ge ne sya fare ge Bage ɗiŋnedin ne vo ma, a kan bama dore ma ne bama kavaar ma zok ma zi. 21Amma nama ge a ne ndi fare ge Bage ɗiŋnedin ne solom ma, a ya̰ bama dore ma ne bama kavaar ma ful zi ya.

22Bage ɗiŋnedin jan Musa go: «Tyare mo tok digi! Ya̰ tuwar-ndaar na swa ya suwal Masar pal pet, ge naa dasana ma, ne kavaar ma, ne kaŋ ge ne don ne ful zi ge ne suwal Masar go ma pal pet.» 23Musa tyare na calaŋ digi, Bage ɗiŋnedin é dok ba̰yya, swar tuwar-ndaar ma ne ol ya suwar pal. Bage ɗiŋnedin swar mam ne tuwar-ndaar suwal Masar pal pet. 24Ne swaga ge suwal Masar pe ne dó go day, Masar ma be kwa tuwar-ndaar ne ol hir mbe no swar suwar pal to bat. 25Ge suwal Masar go pet, tuwar-ndaar hun naa dasana ma ne kavaar ge ne ka ful zi ya ma, tuwar-ndaar karge sugur ma ne uwara ge ne ful zi ma pet. 26Tuwar-ndaar be swa to suwal Gochen go ɗeŋgo, suwal ge Israyela ma ne ka ne go.

27Faraon dol temel a tó na Musa ma ne Aaron ya, jan nama go: «Ge no mbe ɗe, mbi ke sone. A Bage ɗiŋnedin bage dosol ne, i ne mbi ɓase ma i naa ge ya̰l ma ne. 28Kaɗe me Bage ɗiŋnedin, na tele dok ba̰yya ma ne tuwar-ndaar be swarra. Mbi mbo ya̰ aŋ mborra, amma ndu a̰me ge tele aŋ mbo kat to.» 29Musa jan na go: «Swaga ge mbi ma̰ watɗa ne suwal diŋ zum, mbi ma̰ tyare mbi tok digi kaɗe Bage ɗiŋnedin, ago dok ba̰yya ma ne tuwar-ndaar swarra ma̰ á. Go no, mo ba kwa go suwar ya Bage ɗiŋnedin tok go. 30Mbi kwa kwa go, aŋ ne mo naa ga̰l ge temel ma, aŋ gale sya Bage ɗiŋnedin Dok vo ne go to ba.» 31Lin#9:31: Lin: A dimma ne ɓoso go, a ke ba̰r da ne na. ma ne gḛme ge fogor vḛne uzi, ne da pe, gḛme ge fogor ka kan na pala, lin ka ɓoy na wak me. 32Amma gḛme ge dṵṵl ma be vḛne uzi to, ne da pe, a zon avun to.

33Musa wat ne Faraon diŋ ya zum, ne suwal diŋ ya zum me, tyare na tok Bage ɗiŋnedin pe digi, dok ba̰yya ma ne tuwar-ndaar abe. 34Swaga ge Faraon ne kwa go, mam swarra ne tuwar-ndaar ma ne dok ba̰yya abe go ɗe, gwan ke na sone mbe iya, a ne na naa ga̰l ge temel ma gwan togre bama dulwak ndiŋ ndiŋ. 35Faraon gwan togre na dulwak ndiŋ ndiŋ, ya̰ Israyela vya ma mborra to, dimma ne Bage ɗiŋnedin ne jya̰ Musa go.

Currently Selected:

Wat zum 9: FGN2013

Highlight

Copy