Temel kerra ma 9

Hon fareba ge Sawul ne

(Tkm 22:6-16, 26:12-18)

1Swaga mbe go, Sawul ka uusiya swaga ke naa ge ame hateya ge Bageyal ne ma yál ne hun nama go, mbo ɓol kep tuwaleya, 2ele na na ho̰ na maktub ne Sinagog ge ne suwal Damas go ma pe, ne da pe na kadɗa na ɓol naa ge ne bi koo pul mbe ma ya, naa sonmo ko naa zaab, na ba gene nama ya Ursalima go fetɗa ne zul. 3Swaga mborra go, yan’a gwa ne suwal Damas, tukcuk, kwaya̰l a̰me zen ne digi ya na ziyar go, 4na sḛ det se, za̰ ka̰l a̰me jan na go: «Sawul! Sawul! Kyaɗa mo ba ka ke mbi yál go ɗaa?» 5Na sḛ ele swaga go: «Bageyal, a mo wuɗi ne ɗaa?» Ka̰l na jan go: «A mbi Jeso ge mo ne ke na yál ne. 6Ɗage digi, mbo suwal diŋ ya, a ma̰ jan mo kaŋ ge mo ba mbo kerra.» 7Na kaam ge a ne nama ne ka mborra ma, a mḛ wak ɗamal, a ka za̰ ka̰l, amma a kwa ndu a̰me to. 8Sawul ɗage ne se digi, ne jo̰ na ndwara fa̰ ma ka hageya puy ɗe, ka kwa swaga to, amma a wa̰ na tok wan a gene na ya suwal Damas diŋ no. 9Ke dam ataa be kwa swaga, ka zam kaŋzam, ko njot mam to bat.

10Bage ame hateya a̰me ka suwal Damas go, a tol na Ananiyas, Bageyal tol na daalam zi go: «Ananiyas!» Na sḛ gwan ne na vinna go: «Mbi no, Bageyal!» 11Bageyal jan na go: «Ɗage digi, mbo viya̰ ge a ne tol na Temel ya, ge Yuda yadiŋ, ele ndu a̰me ge a ne tol na Sawul ge suwal Tarsis pe, kaɗe ya go. 12Daalam zi, kwa ndu a̰me ge a ne tol Ananiyas, wat ya na ta zi, é na tok na pal, ne da pe, na gwan kwar swaga.» 13Ananiyas jan go: «Bageyal, mbi za̰ naa gḛ jan fare ndu mbe pal, ne yál ge ne ke naa ge mbegeya ge ne Ursalima go ma. 14Mbo ya go go no da ne viya̰ ge naa ge ke tuwaleya ma ga̰l ma ne ho̰ na ne da pe na vwa nama ge ne tol mo dḭl ma pet.» 15Bageyal jan na go: «Mbo, ago ndu mbe no mbi tá na tal ne temel ge mbi ne pe, ne da pe, na e mbi dḭl kwarra pehir ge ɗogle ma ta, ne gan ma ta, ne Israyela vya ma ta me. 16Mbi mbo ŋgay na yál ge na sḛ ne mbya njotɗa ne dḭl pe.»

17Ananiyas mbo, wat yadiŋ, e na tok na pal, jan na go: «Mbi ná vya Sawul, Bageyal Jeso, na ge ne dya̰ tene mo ta viya̰ zi swaga mborra ya go, teme mbi ya ne, ne da pe mo gwan kwa swaga, O̰yom ge mbegeya wi mo me.» 18Se se no, kaŋ a̰me ma det ne na ndwara zi ya se dimma ne sii osor ma go, ga kwa swaga. Ɗage digi, a ke na baptisma. 19Swaga ge ne za kaŋzam ɓol pool. gwan kat poseya ne naa ge ame hateya ge ne Damas go dam ma kwaɗa lwak.

Fare oyya ge Sawul ne suwal Damas

20Se se no, ɗage waage fare Sinagog ma zi go, Jeso Dok vya ne. 21Nama ge a ne ka za̰ na ma pet, a ka ke ajab, a ka jan go: «Te na ka á tene ke ho̰l ne nama ge a ne ka tol dḭl mbe ge Ursalima go ne to’a? Te be mbo ya go go ndwara fet nama ne zul ndwara gene nama mbo hon naa ge ke tuwaleya ma ga̰l ma to’a?» 22Amma Sawul ka gwan ɓol pool waɗeya, ka dol Yuda ge a ne ka ne Damas go ma ne fare, ka ŋgay nama go Jeso Kris ne fareba.

23Dam ma lwak go̰r go, Yuda ma za̰ ta go bama hṵ na. 24Amma Sawul za̰ fare mbe. Ago ko viya̰ wak ma puy, a ka koy nama koy ɗaal ne gyana, ne da pe bama ba hun na. 25Ɗaal a̰me zi, na naa ge ame hateya ma a her na, a surbi na gulum ga̰l go̰r zum ya ge gum zi.

Mborra ge Sawul ne ya Ursalima go

26Swaga ge ne dé ya Ursalima diŋ, ɓyare go na ɓan tene da ne naa ge ame hateya ma, amma nama sḛ ma pet a ka sya na vo, a be hon fareba go na ndu ge ame hateya ne to. 27Barnabas wan na na ta, gene na ya naa ge temeya ma ta, wan nama viya̰ gyana ge Sawul ne kwa Bageyal swaga mborra go, ne fare ge Bageyal ne jya̰ na, ne wanna ge ne ka wan fare ge Jeso ne suwal Damas go pe ne ndaar me. 28Swaga mbe go no, gá poseya ne nama, ka mborra ne gwanna ya Ursalima go, ka waage fare ge Jeso ne ne ndaar me. 29Ka jan fare, ne gage ta fare ne naa ge ne far wak grek ma, amma nama sḛ ma ka ɓyare hun na. 30Swaga ge ná vya ma ne za̰ fare mbe, a mbo ne na suwal Sezare ya, ne swaga mbe go, a teme na mbo suwal Tarsis.

31Ɓase ge Dok ne ma ɓol halas suwal ge Yahudiya ne ma go pet, ne suwal Galile go, ne suwal Samariya go pet me, a ka moɗege ta, ne mborra vo ge Bageyal ne zi, a zam zḛ sirsiya O̰yom ge mbegeya zi.

Zonna ge Ayne ne

32Ne jo̰ Bitrus ka luwaɗe suwal ma go pet, mbo ya naa ge mbegeya ge ne Lidda go ma ta. 33Ɓol ndu a̰me ge a ne tol na Ayne. Na sḛ ke ya daŋ pul se fiya moy del tiimal. Ka looɗeya. 34Bitrus jan na go: «Ayne, Jeso Kris zon mo ya go, ɗage digi, mo sḛ he mo kaŋ fiya!» Swaga mbe go juju, ɗage digi. 35Naa ge ne suwal Lidda go ma pet poseya ne naa ge ne suwal Saron go ma, swaga ge a ne kwa na, a saŋge ya Bageyal ta.

Tanna ge Dorkas

36Ge suwal Yafa diŋ, ndu gwale a̰me ge ame hateya ka naa ge ame hateya ma buwal zi, na dḭl Tabita, ndwara go Dorkas, na sḭ go Maaɗe. Gwale mbe ka ke temel ge siŋli ma gḛ ge be to, ka mbar naa ge a̰se ma me. 37Dam mbe ma pul zi, det moy, su. A son na, a mbo dol na burgu digi ya. 38Ne jo̰ suwal Lidda gwa ne Yafa ɗe, naa ge ame hateya ma za̰ go Bitrus ya suwal Lidda go, a teme naa azi mbo jan na go, na há tene ya avun cap mbo ya ɓol bama. 39Bitrus ɗage ya nama pe go avun cap. Swaga ge a ne yá̰ ya, a ndé ne na burgu digi ya. Kumur ma ne fyalla na ziyar go, a ka ŋgay ba̰r ge pul zi ge ma, ne ba̰r ga̰l ma ge na sḛ ne ka tit bama nama, swaga ge na sḛ ne ka ne ndwara go. 40Bitrus yan naa ya zum mwaɗak, gur na koo se, ke kaɗeya, go̰r go, saŋge tene ya na duur ta, jan go: «Tabita, ɗage digi!» Hage na ndwara, swaga ge ne kwa Bitrus, ɗage digi katɗa. 41Tyare na na tok, wan na digi. Tol naa ge mbegeya ma ne kumur ma ya, hon nama na ne ndwara. 42Naa ge ne suwal Yafa go ma pet, a za̰ fare mbe, naa gḛ a hon fareba Bageyal ta. 43Bitrus ga katɗa dam ma gḛ Yafa diŋ, ge ndu a̰me ge a ne tol na Siman diŋ, na sḛ ka bage wan kwalce.

Currently Selected:

Temel kerra ma 9: FGN2013

Highlight

Copy