Temel kerra ma 1

Fare pala hageya

1O! Tewfilus, ge mbi maktub ge zḛ ge zi, mbi wa̰ kaŋ ge Jeso ne e pe kerra ma, ne na hateya ma pe pet, 2diŋ mbo ya dam ge a ne hé na mbo digi go. Ne ɗage mbo digi, ho̰ nà naa ge temeya, ge nà ne tá nama ma wak ne pool ge O̰yom ge mbegeya ne ta. 3Go̰r siya ge na ne go, Jeso ŋgay tene nà naa ge temeya ma ta ne viya̰ ma hini hini ndwara ke nama kwarra go nà da ne ndwara. Dya̰ tene nama ta dam wara anda, ka jan nama fare ge muluk ge Dok ne. 4Swaga zam kaŋzam dagre ne nama go, ho̰ nama nà wak go: «Mbo me ne Ursalima diŋ uzi ya kaal to, ka me da̰re wak tuli ge mbi Bá ne ke, na ge mbi ne waage aŋ na#Luk 24:49.. 5ago Yohanna ke baptisma mam se, amma aŋ ɗe, dam mbe ma no pul zi, a mbo ke aŋ baptisma O̰yom ge mbegeya zi.»

Mborra digi ge Jeso ne

6Nama swaga koteya mbe go, a ele Jeso go: «Bageyal, a swaga mbe go no mo ba gwan ne muluk ge Israyela ne ya ɗaa?» 7Gwan ne nama janna go: «Kwa swaga ma ne dam ma ge Mbi Bá ne e nama pool ge na ne zi da ne aŋ pe to. 8Amma aŋ mbo ɓol pool swaga ge O̰yom ge mbegeya ne mbo mbo ja aŋ pal. Aŋ mbo gá mbi naa ge sayda ma Ursalima go, ne suwal ge Yahudiya ne ma go pet, ne suwal Samariya go, diŋ mbo dunya pe aya dab#Mat 28:19, Mar 16:15, Luk 24:47-48..» 9Swaga ge ne jya̰ fare mbe ma, mbo digi ya nama ndwara go pet, pḭr mbo ya fat na ne nama ndwara zi swaga. 10A gale ne swaga ndil swaga digi go, Jeso ne mbo digi, naa azi a dyan ya nama ta ne ba̰r saal, 11a jan nama go: «Galile ma, aŋ te mḛ ndil swaga digi go kyaɗa ɗaa? Jeso mbe ge ne mbo digi ne aŋ buwal zi no, mbo gwan dḛ ya mbe go no ca dimma ne aŋ ne kwa na mbo digi go.»

Ndu ge er Yuda byalam

12A ɗage ne njal ge a ne tol na njal olive ne ya, a gwan’a Ursalima diŋ. Swaga mbe ka gwa ne Ursalima, na kaal mbya viya̰ mborra ge ndu ne mbyat mbo na dam ɗigliya go. 13Swaga ge a ne dé ya suwal diŋ, a ndé burgu digi, swaga ge a ne kote ne go ɗaɗak zi. Ka Bitrus, Yohanna, Yakub ma ne Andrawus, Filibus ma ne Toma, Bartalamawus ma ne Matta, Yakub ge Alfa vya, Siman ge Zelot ma ne Yuda ge Yakub vya. 14Nama sḛ ma mwaɗak, ne dulwak ɗu, a ka dwage ke kaɗeya poseya ne naa zaab ma, ne Maryam ge Jeso ná, ne na ná vya ma me.

15Dam mbe ma pul zi, ɓase ge a ne kote ma ka naa kis para wara azi. Bitrus ɗage ná vya ma buwal zi digi, jan nama go: 16«Ná vya ma, a ŋgat go fare njaŋgeya ge O̰yom ge mbegeya ne jya̰ na ne Dawda wak zi zḛ tek Yuda pal, na ge ne ɗame naa mbo ya wan Jeso wak wi. 17Na sḛ ka nee buwal zi, a ho̰ na temel kerra dimma ne nee go me. 18Na sḛ yá swaga ne na sḛ pe ne bware ge na ya̰l ne mbe. Na sḛ mbá ya se ne na pala, na laar fó no, na laar zaaso ma busugi ya zum no#Mat 27:3-8.. 19Naa ge ne Ursalima diŋ ma pet, a ka ne fare mbe kwarra, a go no, a ho̰ swaga mbe dḭl ne bama wak no go ‹Hakeldama›, na sḭ go: swaga ge swama ne. 20Ago a njaŋge ne maktub kaŋ mballa zi go:

‹Na yàl ga pṵṵl, ndu gwan kat na diŋ to.›

jya̰ go uwale:

‹Ndu ge ɗogle è na byalam temel zi#Kmb 69:26, 109:8..›

21A kwaɗa go, ne nama ge a ne ka mbo dagre ne nee swaga ge nee Bageyal, Jeso ne ka ɗame nee go, 22ne baptisma ge Yohanna ne ya day, ɗiŋ mbo ya dam ge a ne hé na mbo digi ne nee buwal zi go, nee ɓo ndu ɗu ne nama buwal zi na ka sayda ge tanna ge na ne ne nee.» 23A ɓol naa azi: Yusuf na ge a ne tol na Barsabbas, na dḭl syalla Justus, ne Mattiyas me. 24Uwale, a kaɗe go: «Bageyal, mo ge ne kwa naa dulwak ma pet, ŋgay i ne nama ge azi mbe ma no buwal zi, ndu ge mo ne tá na, 25ne da pe na ame temel ge ndu ge temeya ne, na ge Yuda ne ya̰ na se, hé na viya̰ na pal no.» 26A uusi baare, baare uusiya det Mattiyas. Mattiyas gá ke temel dagre ne nama ge wol para ɗu ma.

Currently Selected:

Temel kerra ma 1: FGN2013

Highlight

Copy