1Gan ma 20
20
Gan ge Siriya ma ne ver suwal Samariya se
1Ben-Hadad, gan ge Siriya ma ne, kote na asagar ma ya pet, poseya ne gan ma tapolɗu para azi na pe go, ne tisi ma, ne pus pore ma. A mbo ver Suwal Samariya se ndwara det na pore mballa. 2Teme naa ya suwal diŋ ne fare mbo jan Achab. 3A jan Achab go: «Ben-Hadad jan go, mo bware ma, mo dinar ma, mo gwale ma ne mo vya ge siŋli ma, a ge mbi ne ma ne.» 4Gan ge Israyela ma ne gwan ne na janna go: «O gan, mbi bageyal, mo fare janna pal, i ne mbi kaŋ ma, i ge mo ne ma ne.» 5Naa ge temel ma gwan’a jan na go: «Ben-Hadad jan go: ‹Mbi teme naa ya jan mo go, mo ho̰ mbi mo bware ma, mo dinar ma, mo gwale ma, ne mo vya ma. 6Kwap, swaga ge swaga mbe ma̰ mbyatɗa go tem ɗe, mbi ma̰ teme naa ya ɓyare aŋ zok ma pul, a ma̰ twat kaŋ ge siŋli ma ge ne detɗa nama ndwara zi ma›.» 7Gan ge Israyela ne tol naa ga̰l ge suwal ne ma ya se pet, jan nama go: «Aŋ kwa go ndu mbe ɓyare fare ndwara ke nee yál. Ago, teme naa ya jan mbi go, mbi ho̰ na mbi gwale ma, mbi vya ma, mbi bware ma, ne mbi dinar ma, mbi be kuri na fare to.» 8Naa ga̰l ma mwaɗak poseya ne ɓase ma pet, a jan Achab go: «Za̰ na to, vḭ na fare mbe to.» 9Achab jan temeya ma ge Ben-Hadad ne ma go: «Aŋ mbo jan mbi bageyal gan go, na fare ge ne jya̰ mbi ge ndwara zaŋgal mbi vin na ya go, amma ge hṵsi ge no, mbi vin na to.» Temeya ma gwan mbo jan Ben-Hadad fare mbe ma. 10Ben-Hadad gwan teme naa mbo jan Achab go: «Dok ma na ke ne mbi kaŋ ge na ne ɓyare kerra, kadɗa mbi ya̰ kuci a̰me ya suwal Samariya go ge mbyat mbi naa ge ne mbi pe go ma tok pul go gul.» 11Gan ge Israyela ne gwan ne nama janna go: «Aŋ mbo jan na go: ‹Ndu ge mo gale ne há na to, kaage mo tol wak tew na pal to!›» 12Swaga ge Ben-Hadad ne za̰ fare mbe no, jan na asagar ma go: «Nṵsi me ta mbal pore.» A nṵsi ta se ndwara mbal suwal Samariya. A jya̰ na fare mbe swaga njot jiya̰l go, ka njot jiya̰l poseya ne gan ge ne na pe go ma gur zi.
Achab hál gan ge Siriya ma ne
13Swaga mbe go, anabi a̰me mbo ya ɓol Achab, gan ge Israyela ne, jan na go: «Bage ɗiŋnedin jan go: ‹Mo kwa naa ge ne tabe mbe ma no ya go’a? Ma̰ no, mbi ma ɓyan nama mo tok go, ne da pe, mo kwa go, mbi Bage ɗiŋnedin ne›.» 14Achab jan na go: «Bage ɗiŋnedin ɓyan nama wuɗi tok go ɗaa?» Anabi gwan ne na janna go: «Bage ɗiŋnedin jan go, na ɓyan nama ge asagar ge bool ge giya̰l ma ge mo lew ma ne ma tok go.» Achab gwan ele na go: «A wuɗi e pore pe mballa ne ɗaa?» Anabi gwan jan na go: «A mo!» 15Achab dol na ndwara ndil asagar ge bool ge giya̰l ma ge na lew ma ne, ɓol naa kikis azi para tapolɗu para azi. Uwale dol na ndwara ndil asagar ge Israyela ne ma, ɓol naa dudubu ɓyalar. 16Gyala pala tat a wat zum mbal pore. Ben-Hadad poseya ne gan ge tapolɗu para azi ge a ne na pe go ma a ya swaga fere ta ne jiya̰l go gale. 17Asagar ge giya̰l ge bool ma a ɗage ya zḛ det pore mballa. Ben-Hadad teme naa ya mbo njole swaga, a gwan’a jan na go: «Naa zut ja zum ne Samariya diŋ ya.» 18Jan nama go: «Ko a zú ya zum da ne ɓyare halas, ko ne pore mballa pe, aŋ wa̰ nama ya ne ndwara.» 19Asagar ge bool ge giya̰l ma zut ne suwal diŋ ya zum zḛ, asagar ge may ma ka bí nama. 20Ndu ge daage gyabe ndu na ndwara zḛ ɗu hunna, Siriya ma kusi so Israyela ma ndwara zḛ. Ben-Hadad, gan ge Siriya ma ne, ndwar na tisi pal má tene, poseya ne naa ge ne tisi ge may ma. 21Gan ge Israyela ne zut ya zum, hun tisi ma, vḛne pus pore ma, hal Siriya ma digi. 22Swaga mbe go, anabi mbo ya gan ge Israyela ne ta, jan na go: «Mbo zḛ, wa̰ mo dulwak, do mo ndwara kwaɗa, ndi kaŋ ge mo ba kerra, ago demle, gan ge Siriya ma ne mbo gwan’a det mo.»
Halla ge ndwara azi ge Achab ne Siriya ma pal
23Gan ge Siriya ma ne dore ma jan na go: «Nama Dok a Dok ge njal ma ne ne, da ne pe no, a há nee no. Ne gá ne zḛ no ɗe, dé me nee nama pore babur pul go, a fareba nee mbo hal nama. 24Ke fare ge i ne jan mo mbe no: Yá̰ gan ma uzi, é nama ne naa ge lobre suwal ma, 25abe asagar ge giya̰l ɓase dimma ne asagar ge mo dḛ ne ba̰ nama go, mo ɓyare tisi ma ne pus pore ma mbe go ca me. Go no, mbo me nee mbo det nama ge babur pul go, a fareba, nee mbo hal nama.» Ben-Hadad vin nama wak, ke mbe go tem. 26Del ge azi pul zi, swaga ge a ne mbá pore mbe pul zi tem, Ben-Hadad dol na ndwara ndil asagar ge Siriya ne ma, a mbo ya ndwara det Israyela vya ma pore mballa suwal Afek go. 27Israyela vya ma dol ndwara ta pal ndilla, mbyatɗa ne bama kaŋzam ma, a mbo nama ndwara zi ya. Israyela vya ma kat nama ndwara go ŋga, ɓase ge nama ne ka dimma ne gii vog azi go baŋ, amma Siriya ma kat suwar zi tabeya gḛ ge be to.
28Ndu ge Dok ne mbo ya gan ge Israyela ne ta, jan na go: «Bage ɗiŋnedin jan go: ‹Ne jo̰ Siriya ma jan go Bage ɗiŋnedin a Dok ge njal ma ne ne, a be Dok ge babur ne ne to, ɓase ge ɓaŋlaŋ mbe no, mbi ɓyan nama ya aŋ tok go, aŋ mbo kwa go mbi Bage ɗiŋnedin ne›.» 29A goɗe se katɗa ta ta ndwara zi ɗiŋ dam ɓyalar. Dam mbe ge ɓyalar go, a det ta pore mballa, Israyela vya ma hun Siriya ma asagar ge ne koo ma naa dudubu kis dam ge ɗu ge go. 30Naa ge ne ga ma a syat so mbo suwal Afek ya. Gulum ga̰l ge suwal Afek ne gul naa dudubu wara azi para ɓyalar pal. Ben-Hadad sya mbo suwal diŋ ya, wat yàl a̰me diŋ, ka woy tene soya na zok pul ma zi.
Achab ke wak tuli ne gan ge Siriya ma ne
31Ben-Hadad dore ma jan na go: «I za̰ go, gan ge Israyela ma ne ma, a naa ge ne kwar naa a̰se gḛ ma ne. Ya̰ i ka̰ kasigir ma i ta, i vwa i swaga pe ma, i ka̰ táál ma i ka̰l ma zi, i mbo ɓol na, tamekyala ma̰ ya̰ mo katɗa ne ndwara.» 32A kan kasigir ma bama ta, a kan táál ma bama ka̰l ma zi, a mbo ya ɓol gan ge Israyela ma ne, a jan na go: «Mo mo̰r Ben-Hadad jan go mo ya̰ na katɗa ne ndwara nde!» Achab ele nama go: «Gale ya go ne ndwara’a? A mbi ná vya ne!» 33Naa mbe ma he fare mbe, a har ta ndwara he gan ka̰l na fare janna pal, a jan na go: «Ben-Hadad, a mo ná vya ne.» Jan nama go: «Aŋ mbo me ne na ya.» Ben-Hadad wat ne na swaga woy tene zi ya mbo ya ɓol Achab, é na nde na pus pore digi. 34Ben-Hadad jan na go: «Mbi mbo gwan ne suwal ma ge mbi bá ne ame nama ne mo bá tok go ma digi, mo mbo é mo swaga suk ma suwal Damas go dimma ne mbi bá ne é suwal Samariya go go.» Achab gwan ne na jan na go: «Mbi ya̰ mo digi suli.» A ke wak tuli ta buwal zi, ya̰ na mborra.
Dok mḛre Achab ne na taŋgay pe
35Fare janna ge Bage ɗiŋnedin ne pal, anabi a̰me ɗu jan na kon go: «Hṵ mbi.» Amma na kon mbe kuri be hun na. 36Anabi mbe jan na go: «Ne jo̰ mo kuri fare ge Bage ɗiŋnedin ne, swaga ge mo má̰ ɗage ya ne mbi ta mborra, sonne ma wan mo.» Swaga ge ne ɗage ne na ta mborra sonne wan na, hun na. 37Na sḛ mbo ɓol ndu ge ɗogle jan na go, hṵ mbi. Ndu mbe iyal na, hon na jwaŋ. 38Anabi mbe twar na pala ne kadmul, mbo mḛ́ viya̰ go, gan koo-pul go. 39Swaga ge gan ne ɗage kaleya, oy na, jan na go: «Ndi mo dore ka swaga pore zi, ndu a̰me ɗu wa̰ ndu ya hon mbi no, jya̰ mbi no go: ‹Koy ndu mbe no kwaɗa, kadɗa mo ma̰ ya̰ na ya ban tene, mo ma er na byalam, ko mo pot bware sile dudubu ataa!› 40Swaga ge mbi ne e mbi haŋgal temel ge ɗogle ma pe go kerra, ndu mbe fa swaga no.» Gan ge Israyela ne, jan na go: «Mo kun sarya ya kun tene pal zoo.» 41Sese no, anabi fage kadmul ne na pal uzi, gan ge Israyela ne kwar na yaɗat go na anabi a̰me ne. 42Jan gan go: «Bage ɗiŋnedin jan go: ‹Ne jo̰ mo ya̰ ndu ge mbi ne ɓya̰ na mo tok go, mo burmi na uzi, mo yá̰ na no, mo mbo er na byalam, mo naa mbo er na naa ma byalam me›.» 43Gan ge Israyela ne gwan di, suwal Samariya ɗiŋ ya sḛ suya leɗet.
Currently Selected:
1Gan ma 20: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.