San Mateo 14

1Uperamo pe mburuvicha guasu Herodes ojendu jerâcuâ guasújá Jesús, 2ja jei jembiguai cuerape: Cóba pe Juan Bautista oicové yebŷneraé umi omano vaecue paûgui, ja upeareje co ipuacajá oñatoî ichupe. 3Pe Herodes oipyjyucá racaé pe Juanpe ja oñapytîucá ja omoingué racaé ichupe ybyracuá rógape amo Herodias, tybyra Felipe rembirecócué rejejápe. 4Juan voí jei racaé ichupe: Na ipôrâi ndeve rerecó ichupe. 5Ja jiâ ichupe oyucá Juanpe, ja ndicatui, okyjŷyé gui pe tetâŷgua gui, oguereco járeje jaecuera ichupe oñemoñeêjára ramo. 6Upei catu oico ramo pe Herodes areté ára, oyeroky jenondépe pe Herodias memby, ja oguerojorŷeté Herodes ichupe. 7Ja upegui oicuameê ichupe Ñandeyára rérape omeê jaguâ ichupe oimeraêva mbae oyeruré jaguâichaguánte. 8Ja jae oñeñatoî pypé isy rupi, jei: Emeêmi cheve coápe voí ñaembépe pe Juan Bautista âcângué. 9Upei catu ombyasŷ eterei ramo yepe pe Herodes mburuvicha guasu, oicuameê jaguérejénte yepe Ñandeyára rérape ja umi ambuecuera pe caruguasujápe oiva rejejápe, jeiuca oñemeê jaguâ ichupe. 10Ja omondo ja iñâcâóucá Juanpe pe ybyracuá róga oijape. 11Ja iñâcângué oyererú ñaembé guasupe, ja oñemeê pe cuñatâíme, ja jae ogueraja isype. 12Uperire ou jemimboecue cuera pe oi jaguepe ja ojupi jetecue ja oñotŷ ja ojo voí omomarandúvo Jesúspe.

13Ja Jesús ojenduma ramo upea, oyeí upegui mbayrupe, ja ojo ñûme jaeñojápe. Ja umi ambuecue cuera ojenduma ramo Jae oyei jague, osê oguetâ gui ja ojo japycuéri yby rupi. 14Upei catu Jae ogueyŷma ramo ybype ojecha jetáma eterei iyatŷ jague ja oiporiajuvereco ichupecuera, ja omojesâi umi oiva ipaûmecuera jasyvape. 15Uperire caaruma ramo ôguajê Jendápe jemimboe cuera jeivo: Coápe catu ñûme, ja caarúma jina. Emondonte umi iyatŷbape jicuai ojo jaguâ umi ogajárupi oyoguávo joú vaerâ. 16Ja Jesús jei ichupecuera: Natecôtevêi ojo. Peê catu pemongarú ichupecuera. 17Ja jaecuera jei Ichupe: Ndo roguerecoi mbaeve coápe, cinco mbuyape mante, ja mocoî piráí. 18Ja Jae jei ichupecuera: Perúnte Cheve ape. 19Ja jei umi iyatŷvape oguapŷ jaguâ pe capiípépe. Ja Jae oipyjy umi cinco mbuyape ja umi mocoî piráí, ja omaê yvaga cotŷ ja ojovasá ichupecuera ja oipejaâ umi mbuyape ja omeê jemimboe cuerape, ja jemimboe cuera omeê umi ambuecue cuerape. 20Ja jou opavavé ja jyvâtâ, ja ojupi pe mbuyape cuí jembŷ vaecue doce ayacá renyjê ngue. 21Ja umi jou vaecue retacue ojupity cinco mil, ja umia rejeve oime yoá cuña ja mitâ etá avei.

22Upei catu Jae omondo jemimboecuerape oyupi jaguâ mbayrupe, ojo jaguâ jenonde mboypŷri, omondo aya Jae umi ambuecue cuerape. 23Upei catu omondoma ramo umi oñembyaty vaecuepe, Jae oyupi pe itáatŷra ári jaeñojápe oñemboe jaguâ. Ja pyjarema ja Jae oime jaeño upepe. 24Upeyave pe mbayru oima pe ŷguasu mbytepe, ja ipochŷeté pe ŷ ja oguereco vaí ichupecuera oipeyú vaí gui ybytu. 25Ja pyjare ramo gueteri coê mboyve voí, ojo Jae Jendápe cuera oguata ojovo pe ŷ rová ári. 26Ja umi jemimboe cuera, ojechama ramo Ichupe oguata ramo ojovo ŷ rová ári oñemondŷi ja jei pórajá upéva, ja osapucai okyjŷyé gui. 27Upevove oñeê Jesús ichupecuera jeivo: Pende pyá guasúkena! Chente jae! Ani pekyjŷyé! 28Upei catu oñeê Pedro ja jei Ichupe: Ore Yára! Nde ramo jae añeté, erénte taja che Nerendape co ŷ rová ári. 29Ja Jae jei: Eyonte. Ja Pedro ogueyŷ mbayru gui ja oguata ojovo pe ŷ rová ári ojo jaguâ Jesús rendape. 30Upei catu ojecha ramo oipeyú jâtâjá pe ybytú, sapyaite okyjŷyé ja oñypyrû ramo joŷguŷvo, osapucai jeivo: Che Yára, che renojê. 31Upemaramo Jesús oipyso ipo ja oipyjy ichupe ja jei: Nde pya mîrî! ¿Mbaerejepa reñemongüé? 32Upei catu oyupi vove pe mbayrúpe, okîrîrî pe ybytú. 33Ja umi oiva pe mbayrúpe oñesû Ichupe jeivo: Añeteté Nde Tûpâ Ñandeyára Raŷ.

34Ja ojasama ramo mboypŷri, ôguajê pe Genesaret retâme. 35Ja umi ybypóra upepegua ojechacuaa Ichupe, ja omo maranducá pe tetâ yerecuereje oparupi. Upei catu oguerupá Ichupe umi jasŷvape, 36ja oyeruré Ichupe topocominte iyao rembeŷ reje, ja umi opoco vaecue guive Jesé oñemo jesâimba.

Currently Selected:

San Mateo 14: GRN1913

Highlight

Copy