San Mateo 12

1Uperamo oguata oicovo Jesús umi cocue rupi peteî sabado areté árape, ja iñembyajŷi umi jemimboe cuera ja oñypyrû jaecuera oipoo pe jiá ja jou. 2Ja ojecha ramo upea umi fariseo jei ichupe: Maêke! umi Ne remimboe cuera oyapo jina pe nda iyaiva yayapo co sabado arete árape. 3Ja Jae jei ichupecuera: ¿Na pene manduaichépane pe Santa Escriturape oiva reje pe oyapo vaecue David iñembyajyi ramo guare jae ja umi jendive oi vaecue. 4Jae oike pe Tûpâ Ñandeyára rogape, ja jou pe mbuyape carai, nda iyái vaecue ichupe, ja umi jendiveguápe jou, umi pai añópente iya vaecue. 5¿Ja napene manduaipa pe oi vaecue pe Moises ñeême reje, umi sabado arete árape umi pai yepe, ombuai ramo yepe pe sabado arete, avave nomboyai jesecuera. 6Che jae peême catuetei oimejá coápe peteî tuvichavéva pe tûpâo gui yepe. 7Ja peicuaa rire peê mbaépa jeise coa ñeê: Aipota peê peporo poriajuvereco ja ani peñembopaí recó jaguâ, napemoî vai moraei coa jecopotîvape. 8Co sabado arete ára yára vointe co Carai Ray catu jae.

9Ja ojo upegui ja ou itûpâope cuera. 10Ja sapya oime upepe peteî cuimbae ipo iyŷpíva, ja jaecuera oporandú Ichupe jeivo: ¿Ipôrâpa oñepôjânó sabado areté árape? Upeicha jei omoîvaí potávo Ichupe. 11Ja Jae jei ichupecuera: ¿Oimepa cuimbae peêcuérava oguerecóva peteî ovechá, sapya joá ramo ybycuápe co sabado areté árape, oipyjy ŷ vaerâ ichupe ôguenojê jaguâ upegui. 12¿Upeicha ramo na peimoaipa peteî cuimbae ipôrâitevéjá peteî ovechá gui? Upeva reje ipôrâ yayapo tembiapo pôrâ umi sabado areté árape yepe. 13Upemaramo jei pe cuimbaepe: Eipysó nde yŷvá. Ja jae oipysó voí, ja oñemyatyrô iyŷva jesâimba pe ambueicha. 14Upei catu umi fariseo oyeí, ja oñomonguetá ñemi oñondive oyuca jaguâ Ichupe. 15Ja Jesús oicuaa vove upea, oyeí upegui, ja jeta ojo japycueri ja Jae omojesâimbá ichupecuera, 16ja oyerure ichupecuera ani jaguâ omojerâcuâ Ichugui. 17Ja upeicha oico jecope pe oyeé vaecue pe ñemoñeêjaré Isaias yurú rupi: 18Coina ape Che rembiguai, Che rembiporavó, cóva Che ajaŷjúva, ja oguerobyájá Che ânga. Che amoinguéne ipype Che Espiritu, jae omojêrâcuâne umi ybypóra icaraiŷvape pe ñandeve oñembojecoviá jaguâ áragui. 19Jae noñejââichene avavé ndive ja noñeê jâtâichene, ja avavé nojenduichene iñeê umi tapé iyatyjá rupi: pe tacuapí icârâpâva nomopêichene, 20ja pe jobycá jatatîva nombogueichene, omoingopá peve jecope pe ñande recocue recoviajarâ oñembo puacáiteve jaguâ Jae ae. 21Ja umi ybypóra icaraiŷva ojaârône Jéra rupi ojupitŷ jaguâ imârâ ŷ jaguâ.

22Uperamo ogueru Ichupe peteî aña rembitarová ojechaŷva ja oñeeŷvape, ja Jae omojesâi ichupe, ja upeichavó oñeê yeby ja ojechá yeby pe iñeêngu vaecue. 23Ja ojecharâmô jicuai yoa umi ambuecuecuera ja jei: ¿Icatúnepa cóva David Ray? 24Ja ojendu ramo upea, umi fariseo jei: Ndajaei oyejegui voínte cóva oitŷva mbaepochype, Beelzebul rupínte umi mbaepochy ruvicha. 25Ja Jae, ojechacuaa pype pe oimoâva ipyapecuera, jei ichupecuera: Oime ramo mburuvicha guasu retâ oyeyuabyjape oyuejegui oñembuaipáne, ja oime ramo tetâ terâ oga oyeyuabyjápe oyuejegui ndopytaichene, 26ja co Satanás oity ramo Satanáspe jae oyuaby oyejegui vointe, ja ¿mbaeichapa, upeicharamo, opytá jâtâne jetâ? 27Ja añeté ramo Che aity mbaepochype pe Beelzebul rupi, ¿avárupípa oity ichupecuera pende ray cuera? Jaecuera vointe, upeicharamo, penemojendane peême. 28Anga añete ramo co Tûpâ Ñandeyára Espiritu rupi Che aity umi mbaepochype, añete jiâguimanerae pendejegui Tûpâ Ñandeyára reco marangatu. 29Upeicha avei ¿mbaeichapa oimene icatúva oike pe ipuacaitéva rogape oyapyjy jaguâ jemiñongatupyré oñapytî ŷ rire pe ipuacávape? Upeicharamonte oyapyjypáne opa pe ogape oiva. 30Upe Chendive oicoŷva, oico vaí Chendive, ja pe Chendive omonoôŷva omosarambi. 31Upearâ voí Che jae peême opaichagua angaipa ja opaichagua ñeê tieŷ gui oñemopôtímba jaguâ umi cuimbae. Upeicharamo yepe, oime ramo oñeê tieŷva omomârâvo pe Espiritu Santope, noñemopôtíchene upeagui. 32Ja oime ramo jeiva ñeê co Carai Ray reje, oñemopôtíne ichugui. Opaichavévo oime ramo jeiva ñeê pe Espiritu Santo reje, máramo noñemopôtíchene upéva ichugui mbaevéicharamo co yby ári terâ pe tetâ ambue yaja jaguâme yepe. 33Tecotêvê raê peyapo pe ybyrá ipôrârâ jiá pôrâ jaguâ. Upeichaŷramo, peyapo ramo tuyu vaíva ramo jiá jasypá vaerâ. Jiacue reje voi oyecuaa voi pe ybyra râcâ. 34Peê mbói rejegua! ¿Mbaéichapa icatu peñeê pôrâ pene ñaña jápe peê? Pe jembŷpá reiva ñande pyape voí oiva gui oñeê ñande yuru. 35Pe cuimbae pôrâva umi mbae pôrâ iñongatupŷ ipyápe oiva gui ôguenojê mbae ipôrâva, ja pe cuimbae iñañáva umi mbae ivaiva iñongatupŷ ipyápe oiva gui ôguenojê mbae ivaíva. 36Che catu jae peême, oime ramo ñeê reí jei vaecue umi ybypóra, oñembo jecoviápá vaerâ ichupecuera pe ñande recocue recoviá jaguâ árape. 37Neñeê reje voí reñemojendáne jecopegua rejegua ramo, ja neñeê reje avei reñemojendáne jecopeguaŷ rejegua ramo.

38Uperamo oñeê Ichupe umi escríva cuera iñarandú reíva ja fariseo cuera jaecueranteséva, jeivo: Nde, oremboejára, roipota rejechauca oreve mbaeguasu jechapyrâ. 39Ja Jae jei ichupecuera: Oime co ivaíva rejegua ja itieŷva rejegua, oyeruréva mbaeguasu jechapyrâ. Ndipori catu mbaeguasu jechapyrâ oyejechauca vaerâ ichupecuera, pe ñemoñeêjaré Jonás mbaeguasu jechapyrâ mante. 40Oi jagueicha pe Jonás pe pirá guasu rygué pype mbojapŷ ára ja mbojapŷ pyjaré, upeicha avei oi vaerâ co Caraí Raŷ co yby guype mbojapŷ ára ja mbojapŷ pyjaré. 41Umi cuimbae Nineveŷgua opuâne pe ñandeve oñembo jecovia jaguâ árape co cuimbae coangagua ndive, ja omoî vaine ichupecuera, umiva voí oñembyasŷ vaecue pe Jonás ñemoñeê reje, ja coápe voínte oime peteî tuvichavéva Jonás gui. 42Pe cuña caraí mburuvicha guasu ybycotŷogua opuâne pe ñandéve oñembo jecovia jaguâ árape co cuimbae coangagua ndive ja omoî vaíne ichupecuera. Upéva voí ou vaecue co yby rûâ gui ojendú potávo pe Salomon aranducué, ja coápe voínte oime petei tuvichavéva Salomon gui. 43Osê vove pe mbaepochy tieŷ peteî cuimbae rete gui, oguata oicóvo umi tenda icâjárupi ojecávo opytuú jaguâ ja ndoyujui. 44Upei catu jei oyupe: Tayebŷ yebŷ che rogape asê jague. Ja ou ramo oyuju nandí oyetypeipá ja oñemyatyrômba. 45Upei catu ojo yeby ja oguerú yeby ondive siete mbaepochy ambue ivaívéva ichugui voínte ja oike ja opyta upépe, ja pe cuimbae reco ipajapegua ivaívé pe iñypyrûmbŷpe guaré gui. Upeicha avei oico vaíne co tetâŷgua iñañáva coangagua.

46Oñeê pype jina Jae umi iyatŷvape jicuai upepe, sapya ou isy ja tybyra cuera ja opyta oñemboŷ ocape oñejaâvo oñemongueta jaguâ Jendive. 47Ja oime jeiva Ichupe: Peina oi ocápe Nde sy ja Nde ryby cuera oñemonguetasé Nendive jina. 48Ja Jae oñeê pe jei vaecuepe Ichupe ja jei: ¿Avápa Che sy? 49¿Mávapa Che ryby cuera? Ja oipysó ipo jemimboe cuera reje, ja jei: Coina ape Che sy ja Che ryby cuera. 50Oimeraêva voí oyapóva jecope Che Ru yvapegua rembipota, upéva catu Che ryby ja Che reindy ja Che sy.

Currently Selected:

San Mateo 12: GRN1913

Highlight

Copy