San Lucas 23

1Upemaramo opa umi oñembyatŷ vaecue opuâmba ja ogueraja Ichupe Pilato rendape, 2ja oñypyru omoî vai Ichupe jeivo: Covape royuju omboyabŷvo ore retâmeguape ja ore yocosévo oreve romeê ŷ jaguâ pe Cesar remimeêucápŷ ja jeivo Jae Cristojá mburuvicha guasu. 3Upei catu Pilato oporandu Ichupe jeivo: ¿Ndepa umi Judio ruvicha guasu? Ja Jae jei ichupe: Upeicha, nde ere jaichante. 4Ja Pilato jei umi pai ruvichape ja umi oñembyatŷvape jicuai: Che ndayujui mbaeve ñamoî vaí jaguâicha co caraípe. 5Ja jaecuera iñâcâ jâtâ jâtâve, ja jei: Oime Jae omboaŷbúpa co tetâmeguape omboe pype opa Judea retá yerecuévo Galilea guive yepe upe oñypyrú jague voi, co tetâ meve yepe. 6Ja Pilato ojenduma ramo upea, oporandu ichupe cuera Galileaŷguápa pe caraí? 7Ja oicuaama ramo Jae Herodes poguypegua retâmeguájá, omondo Ichupe Herodes rendape. Sapya upéva oi avei Jerusalempe umi jaárape.

8Ja Herodes ojechama ramo Jesúspe, obya tuvichaité: aréma ojechase jague Ichupe ojendu jague gui jêrâcuâ guasu Ichugui, ja ojaarô jague gui ojecha oyeyapo ramo iporupi mbaeguasu jechapyrâ. 9Ja oporandu yeby yeby Ichupe jeta ñeême. Ja Jae ndeiri mbaeve ichupe, okîrîrînte. 10Upeyave oime oñemboŷ umi pai ruvicha ja umi iñarandúva oñejaâ icatu jagueicha omoî vaí Ichupe. 11Upei catu Herodes ja umi jembiyocuai ogueroŷrô Ichupe ja oñembojorŷ Jese, ja omonde Jese ao verápe ja ombou yeby Ichupe Pilato rendape. 12Ja upe jaárape oñoñyrô oñondive Pilato ja Herodes, yma voi nda iyaei rae oyuejecuera.

13Upei catu Pilato ojenôiucá umi pai ruvicha ja umi mburuvichape pe tetaŷguape, 14ja jei ichupecuera: Peê peru cheve co cuimbaepe omombia vaicha co tetâmeguape, ja coina ape aporandu randu ramo Ichupe pene renondepe ndayujui mbaeve amoî vai jaguâicha co caraípe umi mbae pemboyáva Jesé. 15Ja upeicha avei pe Herodes. Jae avei ombou yeby Ichupe ñandeve, ja peê pejecha ndiporijá mbaeve oyapo vaecue oyeyuca jaguâicha. 16Tainûpâminte Ichupe apoí jaguâ Ichugui. 17(Tecôtevê voi upe arete árape oyepoi peteî umi ybyracua rogape oiva gui.) 18Ja osapucai jâtâ yoa jeivo: Eipeá catu jecove, ja epoínte oreve Barabbás gui. 19Upéva voi ybyracua rogape oñemoî vaecue omopuâ jague reje juvicha reje pe tetaŷguape, ja oporo yuca jague reje. 20Upei catu Pilato opoise gui Jesús gui oñemongueta yeby jendive cuera. 21Upeicha ramo yepe jaecuera osapucai jâtâ yeby ja jei: Emoîucá Ichupe curusu reje, Emoi Ichupe curusu reje! 22Ja jei ichupecuera mbojapy yeby jápe; ¿Mbaerejepa? ¿Mbae ivaiva pa oyapo raé Jae? Che voí ndayujui mbaeve ipype icatu jaguâicha yayucá Ichupe. Tainûpânte Ichupe, upeicharamo, ja tapoi Ichugui. 23Ja jaecuera oyopŷ yopŷve jese osapucai jâtâjápe oyerurévo oyeyuca jaguâ curusu reje. Ja ipuaca jese isapucai jague. 24Ja Pilato omboaye ichupecuera, oyapoucávo imbae yerure, 25ja opoí ichupecuera upe oñemoingué vaecue gui ybyracua rogape opuâ jague reje juvicha reje, ja oporo yuca jague reje, pe jaecuera oyerure jague, ja Jesúspe omeê ipope cuera oyapo jaguâ Jese oyapose vaerâ.

26Ja ogueraja ramo jina Ichupe, oipyjy peteî cuimbae Simon pe Cireneŷguape, ouva jina ocára gui ja omoî ichupe, iyapé reje pe curusu ogueraja jaguâ Jesús rapycueri.

27Ja oime iyatŷ yoa pe tetaŷgua ja ojo japycueri cuera ja cuñaetá oyepytiánûpâva ja oyajeóva jicuai Jesé. 28Ja Jesús oyere ichupecuera ja jei: Peê Jerusalem rayŷ cuera, ani peyajeo Chereje! Peyajeónte pendeyeje ja pene membŷ reje. 29Peina oune ára oyee jaguâ: Ipoaite umi imemby ŷ vaecue ja umi cuña ipuruá ŷ vaecue ja umi omocambu ŷ vaecue. 30Uperamo voi oñypyrúne jei umi itá atŷrape: Peá oreari! ja umi ybŷatŷrape: Ore yajoi! 31Co ybyrá râcâ iyŷbŷravape oyapo ramo âmbae, ¿iyŷpivapema catu mbaépa oyeyapone?

32Ja oyereru avei mocoî mbaevaí apojaré oyeyuca jaguâ Jendive. 33Ja ouma ramo pe âcâ cangue renda oyeejápe, upepe omoî Ichupe pe curusu reje, ja umi mbaevaí apojarépe, peteîme iyacatua coty ja pe ambuepe iyasu coty. 34Ja Jesús jei: Che Rú, ani reñemŷrô ichupecuera. Umiva ndoicuaai voí co oyapova jicuai. Ja oime oitŷ poá jicuai oñomboyaóvo iyaocue reje. 35Ja oime oñemboŷ omaê jicuai pe tetâŷgua, ja umi mburuvicha oñembo jorŷ Jesé jeivo: Ambuecuepe voí omojesâi, toñemboínte oyejegui Jae Cristo ramo añete Tûpâ Ñandeyára poravópyré. 36Ja omboyarú Ichupe umi jerújaré avei, ja oñemboya Jese ja ojupitŷucá Ichupe pôjâ rycue jâi, 37ja jei: Nde ramo umi Judio ruvicha guasu, eñemboí ndeyejegui. 38Ja oime avei iñâcâ ári peteî cuatia jeijá griego ja latin ja hebráico ñeême: Judio cuera ruvicha guasu cova.

39Ja peteîva umi mbaevaí apojaré oñemosaingo vaecue jina, oyao Ichupe jeivo: ¿Ndajaéipa Nde pe Cristo? Eñemboínte, upeicharamo, ja ore mboí oreve avei. 40Ja pe ambue oñeê ichupe ipochŷ ja jei: ¿Ja nde rekyjŷyéipa Tûpâ Ñandeyáragui co reñemoî vaí jápe nde avei Jaeicha? 41Ñandeve voí añetejápe iya jecope ñaime vaí ñane rembiapó vaícue recoviá co. 42Cova voí mbaeveté jecoŷme ndo yapói raé. Ja jae jei avei: Nde, Jesús, emanduámína chereje rêguajêma ramo Nde reco tuvichajápe mburuvicha guasu ramo. 43Ja Jae jei ichupe: Añeteté, Che jae ndeve, angaite voí reimene Chendive Paraísope ne angapyjŷ jaguâme.

44Ja ára mbyte rupima ja iñypytûmba opa yby yere cuevo asaye caaru peve, 45pe cuarajy oguépá gui, ja pe ao tûpâo ryepy ajoyá osoró mbytépe. 46Ja Jesús osapucai jâtâ ja jei: Che Ru, Nde pópente amoî Che anga. Ja jeipávo upea oyejekyi. 47Ja pe mburuvicha ojechama ramo pe oyeju vaecue, ombuete Tûpâ Ñandeyárape jeivo: Añeteté co carai imarangatu raé. 48Ja opa umi oñembyatŷ vaecue ojecha jaguâ co mbae jechapyrâ, ojechapáma ramo pe oyeju vaecue oyeói oyepytiánûpâ. 49Opytánte opa umi oicuaa vaecue Ichupe ja umi cuña ou vaecue japycuéri Galilea guive oñemboŷ mombyrymi jicuai omaêvo umi mbae reje.

50Oime avei peteî carai, jérava José, iñarandúva umi mburuvicha rejeguava, caraí imbae pôrâva ja iyojeipyré 51(jae voí ndo yejeai raé umi ambuecue cuera reje jemiñomongueta ja jembiapocue pe), pe Judio retâ Arimateaŷgua jae, ojaarôva ou jaguâ Tûpâ Ñandeyára reco marangatu yvapegua. 52Upéva ôguajê Pilato rendape ja oyerure Jesús retecue reje. 53Ja ombogueyŷma ramo Ichupe oñuâ peteî ao ipôrâitévape ja oñotŷ peteî itacuá oyeyoó vaecue pe itá tuvichavareje avave noñeñotyi jague gueteri. 54Upe jaára voí pe areté renonderâ ja coêmbotama pe sabado ára. 55Oime umi cuña carai, omoîrû vaecue Ichupe Galilea guive, ojo japycueri cuera ja ojecha pe itacuá ja mbaeichapa omoî raé jetecue. 56Upei catu oyeby jaecuera ja ombosacoí pôjâ ja ñandŷ jyâcuâ pôrâ.

Ja upeicha omboaye pe sabado areté ára oyeyapouca jagueicha pe Ñandeyára rembiapoucapŷpe.

Currently Selected:

San Lucas 23: GRN1913

Highlight

Copy