San Lucas 14

1Peteî sabado areté árape oiké Jae peteî mburuvicha fariseo rejeguava rogape ocaru jaguâ, ja jaecuera omaña Jese jicuai. 2Ja sapya oime jenondepe voí peteî cuimbae jasyva irurúpáva. 3Uperamo Jesús oporandu umi iñarandúvape ja umi fariseo cuerape jeivo: ¿Iyápa ñandeve ñamojesâi jasŷvape co sabado areté árape? 4Ja jaecuera okîrîrî. Upei catu Jae oipyjy ichupe ja omojesâimba ichupe ja opoí ichugui ja omondó. 5Upegui Jae oyere ichupe cuera ja jei: Oime ramo pende raŷ terâ pene mburica terâ pende buey oimeraêva pene rymbá joa vaecue ybycua pe, ¿na pende pyaeichépane penôjê jaguâ upegui pe sabado areté árape yepe? 6Ja oñeê pype âmbae Jae, ndicatui jaecuera ombojovai Ichupe.

7Upei catu Jae ojecha ramo umi oñejenôi vaecue pe carujápe oiporavó meme jicuai umi tenda guapyjá itenondéva, jei ichupecuera co mbae guaujápe: 8Reñejenoîucá ramo peteî caruguasú mendajápeguápe, ani reguapŷ pe guapyjá tenondevévape, sapya oime ramo guârâ ambue oñejenôi vaecue oyererojorŷvéva ndejegui, 9ja sapya ou ramo guârâ pe pene renôi vaecue ndeve ja upévape jeivo ndeve: Nde, emeêmo co tenda co caraípe. Uperamo nde retîne, ja reváne reguapy jaguâ pe tenda ipajápeguape. 10Upévareje reñejenôi ramo carujápe terejo eguapŷnte pe ipajapegua tendápe voí, ou ramo guârâ pe nerenôi vaecue: icatu jae jeine ndeve: Nde, Che rayjupára, eyupimi yvatevé. Uperamo nde reyererojorŷetévéne umi oguapŷva nendive pe carujápe renondepe. 11Oimeraêva voí oñembo tuvicháva oyupe, oñemo mîchîne, ja oimeraêva oñemo mîchîva oyupe, oñembo tuvicháne.

12Jei avei pe ojenôijarépe: Ja nde, reyapo ramo caru guasu árape terâ pyjarépe ani rejenôiucá umi nde rayjupára cuérapente, terâ umi nde reje cuera guape nte, terâ neanáma cuérapente, terâ nde roga ypypegua mbae rerecoja pente, anitere umiva avei nerenôi yeby ndeve iyejegui cuera ja oyapo ndeve ombo jecovia vaicha ramo. 13Upea rângue nde reyapo ramo caru guasu ejenôiucá umi mboriajupe cuera ja umi ipo ŷ vape ja umi ipy carêvape ja umi jesapyso ŷ vape cuera. 14Upeicharamo, nde poaite vaerâ ja rerojoryeté vaerâ: umiva voi ndo guerecoi ombo jecovia vaerâ ndeve: upe oicove yeby jaguâ árape umi imarangatu vaecue, oñembo jecoviáne ndeve jecópe.

15Upei catu peteîva umi oguapŷva jicuai Jendive, ojendu ramo upea, jei Ichupe: Jeco orŷeté vaerâ umi ocaru vaerâ pe caru guasu Tûpâ Ñandeyára renda yvapegua rejeguape. 16Upei catu Jae jei ichupe: Oime guaú peteî caraí oyapo vaecue caru guasu ja ojenôiucá jetape. 17Ja oicopáma ramo guaú pe caru guasu rôguârâ jae omondo jembiguaipe jei jaguâ umi oñejenôi vaecuepe: Peyúnte, oime oicopáma. 18Upei catu guaú opavavé oñypyrú oñembojecórei. Oime peteîva jeiucáva ichupe: Oime ayogua râmô peteî ñû, ja tecôtevê aja ajecha jaguâ. Ayerure ndeve ani reipyjy vaí cheve. 19Oime ambue jeiucáva: Oime ayogua curi cinco yunta buey, ja ajata ajaâvo ichupecuera. Ayerure ndeve ani reñemyrô cheve ndicatui járeje aja. 20Oime ambue jeiucáva: Oime amendápá râmô aina ja upegui ndicatui aja. 21Upei catu guaú oyeby pe tembiguai ja oicuaaucá co âmbae icaraipe. Uperamo ipochŷeté pe ogayára ja jei jembiguaipe: Nde pyaé, terejó umi mbae ñemûja rupi ja co tetâ oga paû rupi ja eru emoingué coápe umi mboriajúpe cuera, ja umi ipo ŷ vape ja umi ipy carêvape ja umi jesapysoŷvape. 22Upeguirire guaú ou yeby pe tembiguai jeivo: Che carai oyeyapópáma jecópe pe nde ere jagueicha cheve, ja upea rejeve yepe oime gueteri iyávé jaguâ. 23Upei catu guaú jei pe carai jembiguaipe: Terejó umi tapé rupi ja umi caaguŷ cupé rupi ja emoingue catuetékena myâtâjápe yepe jenyjêmba jaguâ che roga. 24Che jae peême avave umi cuimbae oñejenôi vaecue nojaâi chene che caru guasu gui.

25Oime sapya peteî ára ojo Jendive ybypóra atyra omoîrûvo Ichupe tapepe, ja Jae oyere ichupecuera ja jei: 26Oime ramo ouva Che rendape oñamotarey ŷ va itúvape ja isŷpe ja jembirecópe ja taŷra cuérape ja tybyra cuérape ja teindyra cuerape ja upeicha avei oguecové voínte, upeichagua cuimbae ndicatui oico Che remimboe ramo. 27Ja oimeraêva ogueraja ŷ va icurusu voínte ja ou ŷ va Che rapycueri ndicatui oico Che remimboe ramo. 28¿Mávapa peêcuerava omopuâse ramo peteî oga yvate, ndoguapy raêi pa oipapá jaguâ mbobypane jepŷrâ, 29ani jaguâ omoî rire japorâ ndicatui omomba ja upegui oimene oñypyrú oñembo jory jesé opa umi ojechava, 30jeivo: Oime co carai oñypyrú omopuâ oga ja ndicatui omombá. 31¿Terâpa máva tetâ ruvicha osê vaerâ oñorayrô jaguâ ambue tetâ ruvicha ndive, ndoguapy raêipa ojecha jaguâ icatûpane diez mil cuimbae rejeve osê ojuvâitivo upe veinte mil cuimbae oúvape oñorayrô jaguâ jendive. 32Upeicha ŷ ramo icatu mombyry ramo gueteri, pe ambue omondo Jendápe tembiyocuai cuerape oporandu jaguâ ndicatuipa oñoñyrô jaguâ oñondive. 33Upeicharamo oimeraêva peêcuérava oyepease ŷ va opambae jacateŷjá gui, ndicatui oico Che remimboe ramo. 34Ipôrâ voí pe yuky. Upeicharamo yepe, ocañŷ ramo pe yuky gui yepe jeêngue, ¿mbaepa peiporúta pemojeê yeby jaguâ? 35Naipôrâvei ñambuavevó jaguâ yby terâ yaity yty atyra reje yepe: ñamombó mante ocape. Oime ramo iyapysáva ojendu jaguâ tojendúnte.

Currently Selected:

San Lucas 14: GRN1913

Highlight

Copy