San Lucas 12

1Upeyave ou oñembyatŷ jetaeterei ybypóra atŷra oyoápá reí jicuaí oñopyrû reí jaguâicha oyoejecuera, ja Jae oñypyrú ramo oñeê, jei raê jemimboe cuerape: Peyererecóke umi fariseo reco mbobujágui pe jovámocoî recó gui voí. 2Ndipori voí mbaeve oyeyajoí vaecue oyeyajoyáó ŷ vaerâ, ja ndipori mbaeve oñeñomí vaecue oyecuaáucá ŷ vaerâ. 3Upevareje oimerâeva mbae peye vaecue pytûnguŷpe oñejendú vaerâ arasâcâ jápe, ja oimeraêva mbae peñeê vaecue iyapysápe cotypype oyerero sapucai vaerâ oga ári guive voí. 4Anga taémi peême, peê Che raŷjupára cuérava, ani pekyjŷyé jaguâ umi oyucáva gui ñande rete ja upe gui ndo guerecovévái oyapo vaerâ ñande reje. 5Tamombeumi peême aváguipa peê pekyjŷyé vaerâ. Pekyjŷyéke upe oguerecóva ipópe gui pende yucá jaguâ peême ja uperire avei pende reitŷ jaguâ añaretâme. Añete Che jae peême, upeva catu pe pekyjŷyé jaguâ. 6¿Na ñañemûipa cinco guyrámimi peteî mbaerepŷ reje? Upeicha ramo yepe ndipori peteîmi ichuguicuérava oyejesaraíjá Tûpâ Ñandeyára ypype. 7Ja peê pende áva pene âcâ rague yepe oyepapapa. Upeicha ramo ani pekyjŷyé, peê pende repŷetevé jeta guyrámí gui. 8Anga Che jae peême opa pe Che mombeú baecue Cheve umi ybypóra renondepe, upevape avei co Caraí Raŷ omombeu vaerâ umi Tûpâ Ñandeyára rembiyocuai yvapegua renondepe. 9Upeicha avei opa pe Che momârâ vaecue umi ybypóra renondepe, upéva oñemomârâ vaerâ umi Tûpâ Ñandeyára rembiyocuai yvapegua renondepe. 10Upeicha avei oime ramo jei vaecue ñeê co Carai Ray coty coty, oyejeyá rei vaerâ ichupe. Oime ramo voí oñeê vaí vaecue pe Espiritu Santo coty coty omomârâvo Ichupe, ndiporichene oyejeya rei jaguâ ichupe upeá. 11Ja pende reru ramo tûpâope ja umi mburuvichaí ja umi mburuvicha guasu renondepe, ani peyepyapŷeté mbaéichapa terâpa mbae peñeê vaerâ reje pende yeje, terâpa mbae peye vaerâ. 12Pe Espiritu Santonte upepe voí uperamo penemboe vaerâ pe peye vaerâ reje.

13Uperamo oñeê peteîva umi upepe jicuaiva ja jei: Ore poromboejá, eremi che rykeŷpe tomboyao cheve pe ore ru amyryi ojeya vaecue oreve. 14Ja Jae jei ichupe: ¿Mbae nipo? cuimbae! ¿mávapa Che moingo raé Cheve mburuvicha ramo terâ oporomboyaojára ramo pene paûme? 15Upei catu jei umi ambuecue cuerape: Pemaêke, peñeñangarecóke opaichagua mbaepotá potavégui! Upe ñañembo mbae guasuetéjá árape yepe ndajaei ñanembae ñongatupyré gui ñande recové jaetéva. 16Ja upei catu omombeu avei ichupecuera peteî ñeê guaúvape jeivo: Oime guaú peteî caraí guasu mbaererecojá jiá pôrâite vaecue iñû gui. 17Upéva jei ipyápe: ¿Mbaépa ayapota? Ndarecovei ambyaty jaguâ che remityacue. 18Ja jei oyupe: Tayapónte cóicha. Tamboyaparó co che mbae ñongatú jague ja tamopuâ yeby pyajú tuvichavéva, ja upépe ambyatyne che coga ja opa che racateŷjá pôrâva avei. 19Ja upeicha guaú jaéne che ángape: Nde, che ânga, jetambae ipôrâva rereco iñongatupyré jeta roŷ rôguârâ. Eropytuúnte, erocarú, erocaú, ja erobŷá! 20Upei catu jeine guaú ichupe Tûpâ Ñandeyára: Nde taby! co pyjare voí oyeyerure vaerâ ndeve ne anga reje, ja umimbae rembuesacoí vaecue ¿avá mbaerâpáne? 21Upeicha vaerâ voí umi oñongatu vaecuepe jacateŷjarâ iyupeguârânte, ja noñongatu vaecuei mbaererecojarâ Tûpâ Ñandeyára peguârâ.

22Upei catu jei jemimboe cuerape avei: Upeareje Che jae peême ani peyepyapy reí jaguâ pende recové reje mbaépa peu vaerâ reje terâ pende rete reje mbaépa pemonde vaerâ reje. 23Ñande recové nico tuvichavé tembiú mbae gui, ja ñande rete ñande aó gui. 24Pemaê umi yrybú reje. Umiva noñemitŷvái ja nomonoôvái temityacue, umiva ndoguerecoi coty monoô jaguâ terâ oñongatú jaguâ. Opaichavévonte Tûpâ Ñandeyára omongarú ichupecuera jecópe. ¿Ja peê pico? ¿Na pende repŷetevéipa umi guyra gui? 25Upeicha avei máva peêcuérava peyepyapy pype icatune pembopucu jaguâ pende recové sapyamimi yepe? 26Upeicharamo ndicatui ramo peyapo pe mîchîveva yepe, ¿maerâpa peyepyapy umi mbae ambue reje? 27Ta pejecha umi yboty râcâ mbaéichapa ocacuaa. Umiva nombaapóvái ja noipóvái. Upeicharamo yepe Salomon yepe opa oyeguacá rejeve noñemondei vaecue peteîva umivacuéra ráicha. 28Ja upeicha omondé ramo Tûpâ Ñandeyára co caavó pe ñûme oiva coanga, ja coêramo oñemombó vaerâ tatacuápe ¿mbaéichapa na pene mondeichene peême, peê peyerovia mîrîva? 29Upeicharamo ani peñejaâ reí pe pecaru vaerâ reje ja pe peŷú vaerâ reje avei, ja ani peyepyapŷ eté peicovo. 30Oime oyejecá jecáva opa âmbae reje, umiva catu umi ybypóra reí icaraiŷva. Oime pende Ru yvapegua oicuaa pôrâ peê peicôtevêjá coa mbae reje. 31Peñejaânte peê pe teco marangatu yvapegua rejegua reje ja opa mbae ambue oñembo yuapŷ vaerâ peême. 32Ani pekyjŷyé peê, peê Che atyra mîchî! Ipya pôrâ pende Ru omeê jaguâ peême pe teco marangatu yvapegua. 33Peñemû pene mbaeteé reje ja pemeê tûpâmbaerâ. Peyapo pende yupe guârâ mbaerepy ryrúrâ oyeyaró ŷ vaerâ ituyá gui, pene racateŷjárâ ñongatupyrâ yvágape opaŷvaera, upe mondajára ôguajê ŷ jaguâme terâ umi tiguaâ omongui ŷ jaguâme. 34Upe oijape nico pene racateŷjá ñongatupyré upepe avei pende pyapy oi vaerâ.

35Peñembosacoi peê peyecúacuá pôrâke ja pemyandy pene rataendŷ, 36ja peicóna cuimbae ojaârôvaicha jicuai omañajápe icaraipe oyeby ramo guârâ imendaja gui, icatu jaguâ ou ramo guârâ ja ombota ramo guârâ okê oipeá voí jaguâ ichupe pe okê. 37Ipoaité vaerâ umi tembiguai, icaraí ou ramo ja oyuju ramo ichupecuera omañajápe jina. Añete Che jae peême jae jaeté oyecúacuáne ja omboguapŷne ichupecuera icarujápe ja jae ae ôguajêne Jendápe ja oyeyocuáiucá ichupecuera. 38Ja ou ramo yepe jae pe ryguasu sapucai peteî yave terâ mocoî yave, oyuju ramo ichupecuera upeicha oicovo ipoaité vaerâ umi tembiguai. 39Cova avei peê pene mandua vaerâ, oicuaa rire pe ogayára aracaérupipa oune pe mondajára jae mo omaña rae catuetei ja mo ndojeyai che ombocuá joga. 40Peê avei peñembosacoíke, upe jaára peimoâ ŷ jápe peê oune co Caraí Raŷ pene rendape.

41Upei catu Pedro jei Ichupe: ¿Ore Yara, erépa nde coa mbae raânga ñeê oreveguârânte terâpa opavave peguârâ avei? 42Ja jei ichupe Ñandeyára: ¿Mávapa pe mbae ñangarecojá yeroviajá ja iñâcâ pôrâva pe ogayára omoingo vaerâ umi jembiguai rerecuarâ omeê jagua ichupecuera jembiurâ jecope? 43Ipoaite pe tembiguai icarai oyujúva oyapo ramo upeicha ou ramo jae. 44Añete Che jae peême omoingóne ichupe opa oguerecova rerecuáramo. 45Ja sapya oime ramo tembiguai jeiva ipyápe: Che caraí jiaré jina ou jaguâ, ja oñypyrúva oinûpâ umi tembiguai ambuecuepe cuimbaeva ja cuñávape avei, ja ocaruete ja ocaúeté oñemotieŷ meve, 46sapyaite oune pe tembiguai caraí upe jaárape jae ojaârôŷme, ja pe hora oicuaaŷme, ja ombuepotíucáne ichupe ja omondone ichupe umi iyeroviaŷva rejegua paûme. 47Upe tembiguai oicuaa vaecue voí icarai rembipota ja oñembosacoi ŷ ramo ja oyapo ŷ ramo jembipota jeta oñenûpâne. 48Ja oime ramo oicuaa ŷ vaecue ja oyapo vaecue mbae ivaíva oñenûpâucá jaguâicha, oñenûpâ mbobŷne. Oime ramo oñemeê jague jetá, jetá yeby oyeyerurene ichugui jecoviárâ, ja oime ramo oyeyeroviá jague jetá mbae reje jetave oyeyeruréne ichugui.

49Che ayu amboyá jaguâ tata co yby ári. ¿Ja coanga mbaépa pe aipotáva? Mbaeicha tamo jendyma rae! 50Oime gueteri peteî oñemongaraíjá tecôtevê añemongaraí jaguâ, ja Che ayepyapy catuetei oicopa peve jecópe upéva. 51¿Peimoâpa peé Che ayu jague co yby ári amoingo pe teco kîrîrî? Ajaniri nda upeichai, Che jae peême, ayu oyuaby jaguâ oyuejegui. 52Coaguirire nico oimene cinco peteî ogape oyuabyva oyuejegui, oimene mbojapy umi mocoî coty coty ja mocoî umi mbojapy coty coty. 53Oiméne pe tuva oñemoî tayra coty ja pe taŷra itúva coty coty oyuabŷvo oyuejegui, oimene pe sy imemby cuña coty coty, ja pe imemby isy coty coty, oimene ndesy nerembireco coty coty, ja nerembireco ndesy coty coty.

54Ja jei Jae avei umi oñembyaty jicuaivape: Pejecha ramo pe arai opuâ ouvo cuarajy reikejá guio, upevove peê peye: Ou ama. Ja upeicha voi oyeju. 55Ja oipeyu ramo ybytu peê peye: Mbyryaita jina. Ja upeicha oyeju. 56Peê pende rovamocoîva! Peê pejechacuaa pôrâ co yby rová ja pe ára rová rejegua, ¿ja mbaéichapa nda pejechacuaai co coangagua rejegua mbae? 57¿Mbaeguípa avei nda pejechacuaai pendeyejegui vointe pe teco jecopegua? 58Sapya pejo ramo peina pe mburuvicha rendape upe ndereje omboyáséva ndive, eñejaâ icatu jagueicha jae oñyrô jaguâ ndeve pe tapepe voí ani nde rerajá jaguâ pe mburuvicha rendape ja ani pe mburuvicha nembo jasa jaguâ pe ybyracua rerecuápe ja pe ybyracua rerecuá nemoingue pe ybyracuápe. 59Che jae ndeve resê ŷ jaguâ upegui rembo jecoviápáite peve pe rembojecoviá vaerâ.

Currently Selected:

San Lucas 12: GRN1913

Highlight

Copy