Rembiapocue 16

1Uperire ôguajê Derbepe ja Listrape ja oi upepe peteî Cristo remimboe rejeguava, jérava Timoteo, peteî cuña caraí memby, co cuña carai Judia oyeroviava Cristo reje, itúva voí Griego. 2Co cariay jerâcuâ pôrâite umi jeŷícuera Listra ja Iconiope jicuaiva ndive. 3Upevape voi Pablo oipota omoîrû ichupe ja oipyjy ichupe ja omongaraíucá ichupe umi Judio reco rupi, oime járeje Judio cuera upepe: opava oicuaa voi ituva Griegojá. 4Ja ojasavo umi tetâ rupi omboe ichupecuera ombuaye jaguâ reje umi tembiapoucapŷ omboe jague umi Apostol cuera ja umi carai ituyáva jicuaiva Jerusalempe. 5Upeichavo umi Iglesia Cristo rejeguáva oñemo mbaraeté ojovo oyerovia jâtâvo ja opa árape oñembo jetá jetávé.

6Ja upegui ojasa Phrygiape ja pe Galicia retâ rupi, pe Espiritu Santo oyoconte ichupe cuera ani jaguâ oñemoñeê pe Ñeê gui Asiape. 7Ja ôguajêma ramo Misiape oñejaâ ojo Bitiniape, ja oyoco yeby ichupecuera Jesús Espiritu. 8Upévareje ojasa Misia ypy rupi ja ôguajê Troaspe. 9Ja peteî pyjarepe Pablo ojecha iképegua peteî cuimbae Macedoniaŷguaicha oñemoî guaú jenondepe oyerurévo ichupe guaú ja jeivo ichupe: Eyo coa cotŷó co Macedonia peve ore pytyvô jaguâ. 10Upei catu ojechama ramo pe iképegua upevove roñejaâ rojo Macedoniape rogueroviávo añetejá Tûpâ Ñandeyára ore renoîucá jague remojerâcuâ jaguâ pe Evangelio ichupecuera.

11Upei catu rosê Troas gui ja roipyjy tapé careŷva rojo jaguâ Samotraciape. Ja pe ára ambuepe roguajê Neapolispe, 12ja upegui rojo Filipospe, pe tetâ tuvichavéva Macedoniapegua, ja pytagua renda voí. Ja ropyta upepe pe tetâme mboby ára. 13Ja peteî sabado árape rosê pe tetâ rokê gui ocape pe ŷ cotŷvo roimôa jague oiméjá ñemboejá renda. Ja roguapy upepe ja romongueta umi cuña carai oñembyaty vaecuepe upepe. 14Ja oime peteî cuña carai jérava Lidia ao joby ñemûjára pe Tiatira retâŷgua, cuña iñemboecatúva ombuetéva Tûpâ Ñandeyárape, ojendú jiconi. Ja Ñandeyára oipea ichupe ipya oyapysacá pôrâ jaguâ Pablo ñemoñeê reje. 15Ja oñemongaraima ramo ja umi jogaŷgua, jae oyerure oreve jeivo: Perovia ramo añetéjá che ayeroviajá jecópe Ñandeyára reje peiké che rogape pepyta jaguâ che mbojupá ramo. Ja upeicha omojêjê catuetei roiké jaguâ.

16Ja peteî ára sapya ore rojo ramo roina roñemboe jaguâ osê ore ruvâiti peteî cuña taí payécuaáva. Upeva ôguenojê jeta mbaerepy iyára cuera peguârâ ojaûvô pype. 17Uperamo ojo Pablo rapycueri ja ore rapycueri osapucai jeivo: Coâva co carai Tûpâ Ñandeyára yvapegua rembiguai co omojerâcuâva peême pe Tapé peñembo jecomarangatu jaguâ. 18Upeicha oyapo jeta ára, ja uperire oñembo cuerái Pablo, ja sapyaite opyta oyere ja jei pe mbaepochy ipype oivape: Che royocuai ndeve Jesu Cristo rerape resê jaguâ ichugui. Ja sapyaite osê uperamo voí.

19Ja ojecha ramo iyára cuera ndiporivéimajá ôguenojêucá ichupe mbaerepy, oipyjy Pablo ja Silaspe ja ogueraja ichupecuera pe tetâ mbytepe umi juvicha cuera rogape. 20Ja omoingue ichupecuera umi mburubicha renondepe, ja jei: Coa cuimbae Judiova omboaybu ñaneretâme, 21ja omboe oicovo ogueco cuera reje, naipôrâi ñande yaicuaa ja ñambuaye, ñande cuera Romano voi. 22Upei catu iyatypa pe tetaŷgua jiari cuera ja umi mburuvicha omondoro iyao cuera ja oinûpâucá ichupecuera ybyrape, 23ja jeta ombuepotíucá ichupecuera ja omoinguéucá ichupecuera ybyracuá rogape, ja jeíucá pe ybyracua rerecuápe oñangareco jâtâ jaguâ jesecuera. 24Ja jae ojendu ramo pe jeiuca vaecue ichupe omoingue ichupecuera pe ybyracua roga cotypy peve ja oyopy jâtâ ipy pe ybyracuape. 25Ja pe pyjare pyte Pablo ja Silas oñemboe jina ja opurajei Tûpâ Ñandeyárape ja umi jicuaiva avei ybyracua rogape ojendu jicuai. 26Upegui sapyaite oico peteî yby ryryi tuvichava omomyi jaguâicha pe oga rapó ja sapyaite umi okê oyepeapá rei ja umi ybyracuápe jicuai vaecue oyepoípa iñapytî jaguegui. 27Ja pe iñangarecójára opaŷ ja ojechama ramo umi okê nandi, ôguenojê ikyse pucu oyeyucápotávo oyupe, oimoâjape umi ybyracua rogape jicuai vaecue oyeóipá jague. 28Upei catu Pablo osapucaijape jei: Ani reyapo mbaeve ndeyeje! Ore nico roimemba coápe. 29Upei catu jae ojenoî oyerurévo tataendy reje ja oiké pyae pe cotypype ja oryryijápe oyeity Pablo ja Silas renondepe. 30Upegui ôguenojê voí ichupecuera pe coty gui ocape, ja jei: ¿Carai cuera, mbaépa tecôtevê ayapo anichene jaguâ che mârâ? 31Upevove jei jaecuera: Eyerovia Ñandeyára Jesú Cristo reje ja na ne mârâi chene nde ja nde rogapegua. 32Ja upévo oicuaáucá ichupe Tûpâ Ñandeyára Ñeê ja opa umi jogapeguape. 33Uperire oipyjy ichupecuera upe pyjarepe yepe ja oyojei ichupecuera pe oñenûpâ jague. Ja upei jae oñemongarai ja opa jesegua cuera. 34Ja jae ogueraja ichupecuera jogáteépe ja omoî ocaru jaguâme, ja oguerojory eterei oyeroviama jaguereje Tûpâ Ñandeyára reje opa umi jogapegua rejeve.

35Ja coêma ramo umi mburuvicha omondo umi jembiyocuáipe jeiucávo opoí jagûa umi carai gui. 36Ja pe ybyracua roga rerecúa oicuaaucá umi ñeê Pablope ja jei: Umi mburuvicha ombou curi jeiucávo oyepoi jaguâ pendejegui. Upeicharamo ipôrâ coanga pesê ja peyeói kîrîrîjápe. 37Upei catu jei Pablo: Ore nûpâ rae oreve opava resape ore moñeê ŷ rire ja Romano ramo yepe ore ore moingue ybyrácuápe. ¿Ja coángapa oremosêse oreve ñemijápe. Mbaeveicharamo. Tou jaecuera ja tore renôjê. 38Ja umi tembiyocuai oyeby ja jei umi mburuvichape umi ñeê gui, ja jaecuera okyjŷyé ojenduma ramo Romanojá. 39Upevareje ou ja oñyrôse ichupecuera, ja ôguenojê voi ichupecuera ocape ja oyerure osê jaguâ upe tetâgui. 40Upei catu osê upe ybyracua jágui, ja oiké pe Lidia rogape, ja ojecha ramo umi jeŷicuerape ombo pyaguapy ichupecuera ja upegui osê ojo.

Currently Selected:

Rembiapocue 16: GRN1913

Highlight

Copy