Sefania 3
3
1Kapianarmek iglugasaksuit ᴋunutojoksôjut salumaitullo ᴋunutitsijullo!
2Nâlelaungilat nippemik; ilaliolungilat inerterutaujunik; Nâlegak sungertutigilungilât; Guditik najoromangilât.
3Angajoᴋâᴋsuit tâpkonanêtut loeveovut ᴋalingoartut; idluarsaijungit amarôvut unuksiortut; piksaᴋumitârilungilat.
4Nelautaijoᴋotingit ᴋuksalaiput tunganailutiglo; ajoᴋertuijoᴋotingita ivsornaitovik sujukpât, perᴋojallo mumikpait.
5Nâlegak tagvanêtok idluartôvok; tâmna idluituliniangilak; ᴋaujarangat idluarsainine ᴋaumajomut pitipâ, nipotilungilak; idluitulle kangusulungilat.
6Uvanga inôᴋatigêksuit kipipakka, nuvuguseksoangit nungunikungorput; apᴋosineâlungit asserortauvut, tagvûnârtoᴋangilak; iglugasaksoangit, serᴋomitauvut, inuêrutivut, tagvanêtoᴋarungnaiporlo.
7Oᴋarpunga: Âhamarik, erᴋsiginiarpalukparma, inertertauniarpalukpotit; ininga piniarvioᴋonago kajusijutigilauktamnik tâmna pivlugo: uvlârolaukpulle asserornartulijomavlutik.
8Tamanna pivlugo tikitsiarisinga, oᴋarpok Nâlegak, uvlok neliutiᴋârtinago nikovivigilârtara pinniniaromavlunga; kajusigama inôᴋatigêksuit katersoromavlugit, ataniovillo ilagêktitsomavlugit, ᴋaningaumajârnera kovijomavlugo tâpko nunga, ilâ, ningaumajârnersoara katsungaitok tamât; nunaksoak ilûnât nungutaujomârmat ilungertornima ikomanganut.
9Taimanganit tagva ᴋangasinâk ivsornaitok sâtitsomârpara inôᴋatigêksoarnut, ilûnatik Nâlekab atinganut ᴋaigarsuᴋovlugit, ilagêklutiglo tâmna kivgartoromavlugo.
10Etiopiab kôksoangita ungatânit tuksiartima siamartitaujut paningita tunergusiaksakka ᴋaijomârpait.
11Uvlorme tâpsomane kangusûtiginiangilatit piniarnitit tamaita, idluitulinerijatit uvamnut: taipsomane ilupsingnit pêjaromârapkit piojorinerit pingijaitoksônerillo, kingornganelo pingijaijungnairomârpotit ᴋaᴋaᴋotimne ivsornaitome.
12Ilingnele amiakoᴋartitsijomârpunga inungnik nikanartunik aklujuniglo, tâpkoalo Nâlekab atinga tatigijomârpât.
13Israêlib amiakungit idluituliniangilat, saglutiksaniglo oᴋauseᴋarniangilat; oᴋarlônêt uivêriklertok naipitauniangilak ᴋaningine; nerrilârmatta innilalutiglo, ᴋaggaijoᴋarniangilarlo tâpkoninga.
14Imgitsiarit, Zionib pania; ᴋaggudlarit, Israêle; erᴋiêrtorit ᴋuviasudlarlutillo ômamut tamanut, Jerusalemib paninga.
15Nâlekab erᴋartortaunît sorairtipâ, ômigijîllo pingujârpâ; Nâlegak, Israêlib ataninga ilingnêpok: idluitomik sivôrajariaᴋarᴋonak kingorngane.
16Uvlorme tâpsomane Jerusalem oᴋautijaulârpok: Sivôraniarnak; Zione, aggatit ᴋasuniaratik.
17Nâlegak Gûdît ilingnêpok, pitsartudlartok piulikleromajok: ᴋuviasungnermut serrijûtigilârpâtit, nagligosungnermine nunanijâlârpok, imgerutinut serrijûtigilârpâtit.
18Katersoromârpakka katimaniksanik kiksasungnartunik kiksauteᴋartut, ilingnit pijovinît; tâpkoa oᴋumaijutigijat naggonautigilauᴋpât.
19Ahâk, neliutome tâpsomane tamaita oᴋumaiksartitsijut ilingnik piniarvigijomârpakka: tusiaktullo piulijomârpakka, ajaktortaujullo katersorlugit; ipkoalo kangusûtaulauᴋtut nuname ilûnâne, nertornautiksangortitsomârpakka opinartungortilugillo.
20Neliutome tâpsomane tikiutijomârpapse, neliutomelo tâpsomane katersoromârpapse; opinartungortitsomârapse nertornautiksangordluselo inôᴋatigêksoarne tamaine silaksoarme, aularutjaunise tikiutilermigupkit ijipse sângine, oᴋarpok Nâlegak.
Currently Selected:
Sefania 3: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
