Lukase 22
22
Ajoᴋertuijoksuit kajusininganik Jêsuse toᴋotsomavlugo. Komunionib ilijauninganik. Ilinniartit anginersautitsomaninginik. Jêsusib oᴋâlaninginik kingorlerpânik. Tuksiarninganik Getsêmaneme; pititauninganik Jûdasemut, pijauninganiglo. Misiarutauninganik Pêtrusemut. Toᴋotaksaunerartauninganik.
1Pudjusauteᴋangitunigle ᴋakᴋôjaktorviksak ᴋaglilerpok, aularviksiorvingmik taijaujok.
2Ajoᴋertuijoksuillo aglangniglo ilisimajut pinasuarput ᴋanok ilivlutik toᴋodlugo; inuille erᴋsigivait.
3Sâtanasele Jûdasemut Iskâriotemik atelingmut, 12 it ilanganut, pulamajarêrpok.
4Ajoᴋertuijoksoarnullo angajoᴋânullo aivok oᴋaᴋatigijomavlugit, ᴋanok ilivlune pititsomavlugo tâpkonunga.
5ᴋuviasulerput tagva kênaujaniglo tunitsivigijomavlugo angerpât.
6Angerporlo tagva, pitjutiksarsiorlunelo pititsomavlugo pikablâdlarneᴋarane.
7Pudjusauteᴋangitunigle ᴋakᴋôjaktorviub uvlunga naliutingmat, saugârsub aularviksiorutiksab toᴋotaujuksauvia,
8Pêtruselo Johanneselo tilivak, oᴋautivlugik: Aᴋiksuijartoritik saugârsungmik aularviksiorutiksamik nerᴋiksaptingnik.
9Apersorpâgle: Nane âᴋiksortauᴋoviûk uvaptingnût?
10Oᴋautivak: Ahâk, iglugasaksoarnut iteruptik, inuk iliptingnik pâksiniarpok imektartok; tâmna maliktiko iglomut taipsoma itervigijanganut.
11Iglublo inuanut oᴋaritik: Ajoᴋertuijub oᴋautjauᴋovâtit: Iglo nanêᴋâ, saugârsungmik aularviksiorutiksamik nerriviksara, ilinniartikka ilagilugît?
12Iglomiglo angijomik âᴋiksorsimatsiartomik iglub ᴋolâne unnertûtilârpâtik; tagvane âᴋiksortiko.
13Aivuk tagva, sorlolo oᴋautingmagik naipipâk, saugârsuglo aularviksiorutiksak âᴋiksorpâk.
14Neliutingmallo ingipok Apostelit 12 it ilagilugit.
15Oᴋautivaillo: Kilanâdlalaukpunga, saugârsuk una aularviksiorutiksak nerrijomavlugo ilagiluse âniaᴋârnanga.
16Oᴋaupapsele, kingorngagut mattominga nerriniarungnairpunga, Gûdib nâlegauvingane nâmakserᴋârtinago.
17Ermgusiarsuglo tiguvâ, ᴋujalivlunelo oᴋarpok: Tâmna tigusiuk aviklugolo ilipsingnut.
18Oᴋaupapse, imerniangilanga napârtub vaineliksab iptinganik, Gûdib nâlegauvia tikerᴋârtinago.
19ᴋakᴋôjarlo tiguvâ, ᴋujalivlunelo avgorpâ tâpkonungalo tunivâ oᴋarlunelo: Tagva timiga tunijauniartok pivluse; taimailioritse erᴋaumajauniksamnut.
20Taimâktauk ermgusiarsuk tigugiva, nerrijarêramik, oᴋarlunelo: Tagva Testamentitâk aumne, tâmna kovijauniarpok pivluse.
21Ahâgle, uvamnik pititsiniartub aggangit ilagivlunga nerrimârvimnêput.
22Inûble Erninga aileralloarpok, sorlo issumasimautaungmat. Inugle tâmna kappianamêk tâpsominga pititsijok.
23Ingmingnullo apersôtilerput, kinaungmangât akunermingne taimailiorniartok.
24Akkerartûtilerputtauk ingmingnut, kina akunermingne anginerongmangât.
25Oᴋautivaille: Atanersuit nunamêtut ataniotivut, pitsartuneᴋadlartullo taijauvut atanernik saimajunik.
26Ilipsele taimailerniarase: ilasele angnek nukardlitunituksauvok, angajoᴋaunerojorlo kivgatut-idlune.
27Kina atanionersauvâ? Nerrimârvingme iksivajok, kivgartortorlônêt? Taimnaungitok, nerrimârvingme iksivajôᴋ? Uvangale akunapsingne kivgatun-ipunga.
28Ilipsele najutsainalaukpapsinga kappiasungnimne.
29Nâlegauviglo tunijomavara ilipsingnut, sorlo Atâtama ᴋailaungmago uvamnut.
30Nerriluselo imertuksauvose nerrimârvimne nâlegauvimnêtome, iksivaluselo iksivautane, Israêlib kinguvângit ᴋitorngarêt 12 it erᴋartorlugit.
31Nâlegarle oᴋarpok: Simon, Simon, ahâk Sâtanasib pijomagalloarpâse sannêjaromavluse sorlo ᴋakᴋôjaksatitut.
32Uvangale pivlutit tuksialaukpunga, okpernît sorairᴋonago. Kingorngagullo ama sâgiaruvit, ᴋatangutitit nakoᴋsitiniakit.
33Oᴋautivâle: Nâlegak, opalungairsimavunga aiparilutit, parngnanairsimavingmut toᴋomullo aiᴋatigijomavlutit.
34Kiovâle: Pêtruse, oᴋaupagit, angutaunek uvlomeni perniangilak, misiarᴋârtinak pingasuertorlutit, ilitarsigavit uvamnik.
35Oᴋautivaillo: Tilijaᴋattalaurapse pôᴋarase, ikpiârsoᴋaraselo, itigaguteᴋaraselo, taipsomane ajoksalauᴋisê? Kiovât: Aukak.
36Tagva oᴋautivait: Mânale pôᴋartub neksarliuk, taimâktauk ikpiârsuk. Taimaitoᴋangituble annorâne pisiniutigiliuk, saviksoarsiniarlunelo pile.
37Oᴋaupapsele: Nalautsijariaᴋarivut aglaksimajut uvamnik: Idluitulijut akornganut pititaujok. Aglait uvamnik aglaksimajut nâmaksiniarput.
38Kiovâlle: Nâlegak, ahâk, tagva saviksoâk maggûk. Oᴋautivaille: Nâmakpok.
39Ilusimitullo anivlunelo aularpok ᴋakᴋamut orᴋsoᴋtalingmut. Ilinniartingitalo malikpât tagvunga.
40Tagvungalo pigame, oᴋautivait: Tuksiaritse, ôktortaulungnermut perᴋonase.
41ᴋemakpait tagva millûtib tupvingatun ᴋanitigijomut, sêrᴋortorlunelo tuksiarpok.
42Oᴋarlunelo: Atâtak, pijomaguvit ermgusiarsuk una pêruk uvamnit; pijomajaraungitorle, pijomajat pile!
43Engelille ilangata ᴋilangmit sakᴋervigivâ nakoksilugolo.
44Toᴋomullo aulaumajartitaugame tuksialualerpok. Kiagungningille kutititut auktun-itut nunamut katalerput.
45Tuksiarnermille makiname, ilinniartine kiksarnermut siniktut naipipait;
46Oᴋautivlugillo: Sôk sinikkisê? Makititse tuksiarluselo, ôktortaulungnermut perᴋonase.
47Sulle taimâk oᴋartilugo, ahâk, inugasaksuit ᴋaglilerput; 12 illo ilangat, Jûdasemik atilik sivorlerivât; tâpsoma Jêsuse ᴋanilerpâ kunigomavlugo.
48Jêsusible oᴋautivâ: Jûdase, Inûb Erninga kuniklugo nalonailiviûk?
49Najortingitale, ᴋanok iliortoᴋalermat takogamik, oᴋautivât: Nâlegak saviksoarmik atortuksauvitâ?
50Ilangatalo, ajoᴋertuijoksûb kivganga ulimavlugo, siutâ talerpia nakappâ.
51Jêsusible kiovait oᴋarlune: Issumamingnik pilit. Siutâlo aktorlugo mamitipâ.
52Jêsusible ajoᴋertuijoksuit, angajoᴋaujullo katimavingme, angajoᴋaunerojullo, tigujartortine oᴋautivait: Sorlo inuartomut tikipose, saviksoalijarluse ajaupialijalapselo.
53Uvlut tamaita najortigilaukpapse katimavingme, aktulaungilapsingalo aggangmut atautsemullônêt; tamadjale stundise, tâktublo pitsartuninga.
54Tigulerpâlle, aularutivlugolo ajoᴋertuijoksûb igloᴋsoanganut pitipât. Pêtrusible alivasiklune malikpâ.
55Ikomamigle ikitsivut avalut iluata ᴋerᴋane, tagvanelo iksivalerput, Pêtruselo akornganut ingipok.
56Kivgallo arnat ilangata ikomab saniane iksivajok takogamiuk, takunâlerpâ oᴋarlune: Tâpsomatauk ilagilaukpâ.
57Misiarporle oᴋarlune: Arnak, ilitaringilara.
58Kingorniarsutuinangagut, assiata kivgab takogivâ oᴋarlune: Igvittauk taipkoa ilagivatit. Pêtrusible kiovâ: Inuk, taimnaungilanga.
59Ama Kingorngagugiagalak, stundeovaluktub atautsib kingorngagut, taipsoma assia oᴋarivok: Âhamarik, tâpsoma ilagilaurivâ: Galilêamiôgame.
60Pêtrusele oᴋarpok: Inuk oᴋautsitit nalovakka. Sulle taimâk oᴋartilugo angutaunek niplerpok.
61Nâlekable ᴋeviarlune Pêtruse takusarpâ. Petrusiblo Nâlekab oᴋausinga erᴋarpâ, oᴋautilaungmago: Angutaunek niplerᴋârtinago misiarutigilârparma pingasuertorlutit.
62Pêtruse tagva anivok ᴋeavlunelo kiksadlarlune.
63Angutille Jêsusemik tigusijut mitautigivât annaudlalâllo.
64Matuvlugolo, kênangagut erᴋsârdlugo aperivât oᴋarlutiglo: Nelautalertigut, kia erᴋsârpâtît?
65Assinginuttauk unuktunut oᴋausilungnut oᴋautigivât.
66ᴋaulermallo, inuit angajoᴋângit, ajoᴋertuijoksuillo aglangniglo ilisimajut ᴋaggimiolerput, kiglisiniarviksoamingnullo âpât.
67Oᴋarlutiglo: Kristûseoguvit oᴋautitigut. Oᴋautivaille: Oᴋautigupse, okperiniangilapsinga;
68Aperigupsele, kioniangilapsinga, aularᴋoniangilapsingalônêt.
69Tamanna pivlugo mattoma kingorngane Inûb Erninga iksivajomârpok Gûdib ajugaᴋangitub talerpiata tungâne.
70Tagva ilûnamatsiatik oᴋarput: Gûdib Ernerivâtît? Oᴋautivait: (Nalâgut) oᴋarpose, taimnauvunga.
71Tâpkoalo oᴋarput: Kigligiutjuteᴋariaᴋarungnairpogut, nangminek ᴋaninganit tussaraptigo.
Currently Selected:
Lukase 22: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
