Genesis 6
6
Ullitornivaksûb oᴋautauninganik.
1Inuille unuksivallialermatta nuname panniktârmattalo,
2Tagva Gûdib erningita inuit panningit ᴋemergolerpait pinnarnarasugivlugit, annerijamiglo nallît nuliarivait.
3Tagva Nâlegaᴋ oᴋarpoᴋ: Anernera inungnêtsainaromângilaᴋ, uviniongmatta illa; nalliata uvluksangit tagva jârit 120
4Taipsomane nuname inukpaᴋarpoᴋ kingornganelo, Gûdib erningita inuit panningit nuliarigamigit ᴋitorngaᴋarlutiglo tâpkonangat; tamadja pitsartujoᴋsuit itsaᴋ tussaumajaudlartut.
5Nalegarle takovoᴋ inuit uivêtoᴋsôninginik nuname, ômatingitalo issumangita sanajangit idluênarmatta ᴋaut tamât.
6Tagva Nâlegaᴋ ᴋaᴋᴋialerpoᴋ, inuit pingortigamigit nuname, ômatimigullo kiksarutigivâ.
7Nâlegarlo oᴋarpoᴋ: Inuit pingortitakka pêjaromavakka nunamit inuillo nergjutillo pâmgortullo tingmitjallo aglât ᴋilaub atânêtut, ᴋaᴋᴋialerama pingortigapkit.
8Noale saimaneᴋsivoᴋ Nâlekab ijîgingne.
9Tamadja unipkautsit Noamik: Noa angutauvoᴋ idluartoᴋ, pidlaraksausuertoᴋ inôᴋatime akornganne; Gûde aiparivlugo Noa arvertarpoᴋ.
10Pingasuniglo Noa ernertârpoᴋ: Sememiglo, Hamemiglo, Jafetemiglo.
11Nunale asserorsimavoᴋ Gûdib sângane, idluitulinermik tatavlune.
12Tagva Gûdib nuna ullernaigivâ, sunaubva asserorsimavoᴋ, uvinilît ilûnamatsiatik apᴋutigijatik asserormattigik nuname.
13Tagva Gûde Noamut oᴋarpoᴋ; Uvinilît ilûnamatsiatik naggatiksangat nalliutivoᴋ uvamnut, nuna idluitulinermik tatamat, ahâk, asseroromavakka nuna illagivlugo.
14Illingnut umiaᴋsoaliorit pingermik, takamanelo iglunik sanavlutit, kutsorlugolo kutsumik illuagut sillatâgullo.
15Imâk senajaksarivat; tallertut 300tut takitigijok, tallertut 50tut silliktigijoᴋ, tallertut 30tut poᴋtotigijoᴋ.
16Igalâᴋartitaksarivat umiaᴋsoaᴋ, tallertut poᴋtotigijoᴋ sanavlugo ᴋollânit, upkoaᴋartilugolo umiaᴋsoaᴋ sanirangagut, ᴋollerêktoᴋartilugolo allermik ᴋetterdlermiglo ᴋollermiglo.
17Ahâk, ullitornivaksoarmut nuna tikkitaurᴋojomavara, asseroromavlugit uvinilît tamaita ômanartomik anernelît ᴋilaub atânêtut. Ilûnamatsiatik nunamêtut nungutaksauvut.
18Igville angervigivagit, umiaᴋsoarmullo ikijariaᴋarpotit igvit, ernitillo, nuliallo, ernivit nuliangillo illagivlugit.
19Umiaᴋsoarmullo itertitsijuksauvotit ômajut ilûnatik nerᴋelît illanginik, attunit aiparêngnik angumiglo arnamiglo toᴋotailititaurᴋovlugit ilingnêdlutik.
20Tingmitjat ingmikut pitjutilît, nergjutillo ingmikut pitjutilît, pâmgortullo sunatuinait nunamêtut ingmikut pitjutilît illangit, attunit aiparêklutik itertuksauvut illingnut toᴋotailititaurᴋovlugit.
21Nerᴋiksanik sunatuinarnik nerᴋiksauvaktunik naksartuksauvotit torᴋorlugillo, nerᴋiksaurᴋovlugit illingnut tâpkonungalo.
22Noablo Gûdib perᴋojangit tamaita nâlatsiarlugit piniarutigivait.
Currently Selected:
Genesis 6: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
