Galâtsiamiunut 2
2
Paulusib ilinganinganik Apostelinut assiminut, Pêtrusemullo. Okpernermut idluartitaunermik.
1Mattoma kingorngagut jârit 14 nait nângmatta, ama Jerusalemut ailaurivunga, Barnabase aiparilugo; Tituselo neksalauᴋparatauᴋ.
2Takotitjutikulle perᴋojauvlunga takpaungalauᴋpunga oᴋaᴋatigivlugit oᴋautsit tussarnertut pitjutigilugit, oᴋautigijakka nelojunut; angajoᴋaunersaᴋutaujulle piluarlugit, sulinanga aᴋpangeromananga aᴋpangeromalaungnangalônêt.
3Titusele aipara kipijauᴋojaungilarlônêt Grîᴋeogalloartilugo.
4Katangutille nelangaitut terliarsivlutik akornganut pingmatta, pingitsertorlutik kiglisiniaromavlugo kivgaunginivut Jêsuse Kristusikut pijavut, kivgaulertitsomavluta,
5Anikitoarsungmiglônêt taipkununga sâlagijaujomanata nâlelaungilavut, oᴋautsit tussarnertut mikseᴋârningit ilipsingnêtsainarᴋovlugit.
6Ipkoale angajoᴋaunersaᴋutaujut ᴋanoᴋ ilingalaungmangâta sivorngagut, uvanga kamangilanga; Gûde inub tautuanik kamangimat. Angajoᴋaunersaᴋutaujut taipkoa ajoᴋertuinera illalaungilât.
7Kissianele tukkisileraminga oᴋâlaᴋojaujunga oᴋautsinik tussarnertunik kipimangitunut, sorlo Pêtruse (oᴋâlaᴋojaungmat) oᴋautsinik tussarnertunik kipimajunut,
8(Pêtrusib illagilauᴋtangata pitsartudlarlune Aposteliotilugo kipimajunut, tâpsoma uvangatauᴋ pitsartudlarlune illagilaurivânga nelojune,)
9Taipkoalo Jakobusib Kêfasiblo Johannesiblo aulatsijungortitaujut tunitsivionera saimanartomik tukkisilauramitsuk, tagva aggamnik Barnabasiblo agganginik talerpingminut tigusivut, adsigêktomiglo issumaᴋaᴋatigivâtigut uvagut nelojunut oᴋâlajuksaugapta, taipkoale kipimajunut.
10Kissiane aklujut issumagijauᴋovlugit uvaptingnut; tamattomingalo ataruililunga pinialauᴋpunga.
11Pêtrusele Antiochiamut pingmat, akkerartulauᴋpara takoane; passijaungmat.
12Jakôbusemit illangit tikerᴋârtinagit, (Pêtrusib) nelojôlauᴋtut nerreᴋatigingmagit; tikingmattale pijomairlune ᴋemakpait; kipimajut illeragigamigit.
13Jûdillo assingita (Pêtruse) maliklugo takkormôᴋatigivât; Barnabase aglât uivêrijaulauᴋpoᴋ takkormôᴋatigivlugit.
14Takogapkille, oᴋautsit tussarnertut mikseᴋârningat maliklugo idluartomik arvertangimatta, Pêtruse oᴋarvigivara, ilûnatik tussâtilugit: Igvit Jûdeojotit nelojôlauᴋtutitut inôniaravit Jûdetullo iluseᴋanginavit; sôᴋ nelojôlauᴋtut inerterlugit inôniarᴋovigît Jûdit ilusingititût?
15Uvagut Jûdeogalloarapta inûlerniptingnit idluitulijionata nelojunit.
16Kaujimagaptale, inuk idluartitaujungnangimat perᴋojat piniarᴋojanginut, okpernermulle Jêsuse Kristusemut; uvaguttauᴋ Jêsuse Kristuse okpervigivavut, idluartitaulerᴋovluta okpernermut Kristusemut, perᴋojallo piniarᴋojanginu-ungitoᴋ; uvinilik idluarsijungnangimat perᴋojat piniarᴋojanginut. #Img. 143:2.
17Uvagulle idluartitaunasuartogut Kristusemut, nangmineᴋ sulle idluitulijutitut naipitaunajarupta, tagva Kristuse ajortomut kivgaunajarpoᴋ. Taimaitsangilaᴋ.
18Nangmineᴋ asserortakka ama âᴋiksorupkit tapatotipunga uvamnik.
19Perᴋojanulle toᴋungavunga perᴋojanit, Gûdemut inôjomavlunga; Kristuse kikiaktortauᴋatigivara.
20Inôvunga, uvangaungitorle, Kristusele ilumne inôvoᴋ. Mânale uviningme inôsera inôserivara okpernerme Gûdib erninganut, nagliktimnut, ingminiglo tunijomut pivlunga.
21Gûdib saimarsautâ pijungnaitiniangilara; perᴋojanulle idluarsititauneᴋ pikpat, Kristuse sulinane toᴋonajalauᴋpoᴋ.
Currently Selected:
Galâtsiamiunut 2: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
