Efêsusemiunut 5
5
Kaiblainernik arvertatsiarᴋojijunik. Nuliarêt ilingajuksauninginik ᴋanoᴋ.
1Tagva mâna Gûdemik malikteoleritse ᴋitorngatitut naglingnartutit.
2Naglingnermelo arvertaritse, sorlotauᴋ Kristusib nagligilaungmatigut, ingminiglo tunilaungmat pivluta, tunergutiksaujomavlune toᴋotaksamik, Gûdemut tipitsiariksautiksamik.
3Assiniarnermigle maᴋojungnartullo nalênik, pijomatudlarnermiglo oᴋautauniarase, ivjornaitut taimâk pijariaᴋarmatta.
4Sumiglônêt oᴋauseluâlungmik, ᴋuksalainermiglo mitautiksanermiglo oᴋauseᴋarasetauᴋ; idluijutaungmatta, ᴋujalingârlusele pititse.
5Kaujimagapsiuk tamanna, assiniartoᴋ, maᴋojungnartulijorlênêt, pijomatudlartortorlônêt (Gûdeungitunut kivgartortorteogame) Kristusiblo Gûdiblo nâlegauvinganik kingormgujijuksaungimatta.
6Naliata oᴋausinginut piungitunut uivêrijauniarase: taimaitut pivlugit okpinginerub ᴋitornganginut Gûdib ningausinga pingmat.
7Tamanna pivlugo illagijaksaringilase.
8Mattoma sivorngane târmiolaurapse, mânale ᴋaumaniovose Nâlekame.
9Arvertaritse ᴋaumajub ᴋitorngangititut. Anernerub perortitangit tamadsa: Sunatuinarnik ajungituliniarneᴋ, idluarnerlo, mikseᴋârnerlo.
10Kiglisiniaritselo, suna idluarijaungmangât Nâlekamut.
11Tâᴋtublo pingit suksaungitut ilangiutiviginiarasigik, sugiangârsigigle.
12Sagvangitome piniartangit taivlugit aglât kangunadlarpoᴋ.
13Tamakkoale tamaita sakᴋerniarput pidlartaukpatta ᴋaumajomut. Sakᴋersimajut tamaita ᴋaumangmatta.
14Taimaimat oᴋarpoᴋ: Tupalerit siniktotit, makilutillo toᴋungajunit, tagva Kristusib ᴋaumarsarniarpâtit.
15Tagva mâna kamatsiaritse arvertarnipsingnik, silaitutitut pinase: silatujutitulle pititse.
16Atutsiarlugolo nelliutoᴋ, (angijomik) ajormatta uvlut.
17Tamanna pivlugo silairgotoniarase, tukkisilerlusele Nâlekab pijomajanganik.
18Tallaniaraselo vainetornermut; tamanna idluangilutaungmat, Anernermigle ilumertauleritse;
19Oᴋaᴋatigêngniaritselo imgerutinut nertordlerutiksanut tuksiarutsinullo anernilingnut, imgerdluselo nipjausijaritse Nâlekamut ômatipsingne.
20Tamaitalo ᴋujalijutiginiarsigik sorairase Gûdemut Atâtamullo, Nâlegapta Jêsusib Kristusib attingane.
21Nâlektigêgitselo Gûde sivôragilugo.
22Arnat okoᴋse! uise nâleksigik, sorlo Nâlegaᴋ.
23Arnab uine niaᴋoringmago, sorlotauᴋ illagêt Kristuse niaᴋoringmatsuk; tâmna piuliklertiogivoᴋ timiminut.
24Sorlole illagêt Kristuse nâlegaringmatsuk, taimaktauᴋ arnat uitik nâlegaksarivait ilûnainik.
25Ilipse angutit, nuliase nagligisigik, sorlo Kristusib illagêt nagligilaungmagit, ingminglo tunivlune tâpkoa pivlugit,
26Ajorungnaititsomavlugit, epᴋêjalaungmagit ubvaumut (imiojomut) oᴋautsemik illalingmut.
27Ingminut pititsomavlugit illagêt ânanaujut, ivsornartoᴋangitut, imulloᴋangitullo, taimaitomiglônêt assianik peᴋangitut, ivsornaiᴋovlugille pidlaraksausuerlutik.
28Taimaktauᴋ angutit nuliatik nagligijaksarivait, sorlo timitik nangminitik. Nuliaminik naglingniktoᴋ, nangminerminik naglikpoᴋ.
29Uvingminik nangminerminik ômisuktoᴋalauᴋsimatsangimat, nerritilugolo pairivâ, sorlotauᴋ Nâlekab illagêt pairingmagit.
30Tâpsoma timingata avatigingmatigut, uvininganit sauninganillo pijogut.
31Taimaimat angutib atâtanelo anânanelo ᴋemangniarpak, nuliane ungagivlugo, tâpkoalo magguk uvinioniarpuk atautsemik. #Gen. 2:24.
32Nalonartoᴋ tamanna angijôvoᴋ: Kristusele illagêllo oᴋautigivakka.
33Ilipsetauᴋ, ilûnase atunit, angutib nuliane nagligiliuk ingmitut. Uiliuble uine atanerilugo pile.
Currently Selected:
Efêsusemiunut 5: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
