Efêsusemiunut 1
1
Gudib ᴋaitanginik saimanartoᴋsoarnik Kristusikut. Aglisivalliaᴋojaunermik tamakkoa atorlugit.
1Pauluse, Jêsusib Kristusib Apostelinga, Gûdib pijomajanganut, ivjornaitunut Efêsusemêtunut, okpertunullo Kristuse Jêsusemut.
2Gûdib Atâtapta, Nâlekablo Jêsusib Kristusib saimarsautingata ullapirsautingatalo illagilisetôᴋ!
3Nertortaule Gûde Nâlegaptalo Jêsusib Kristusib Atâtanga, saimausermatigut anernilingnut saimanartunut sunatuinarnut, ᴋilaub pinginik illangiutitiluta Kristuseme.
4Sorlo taipsomûna (Kristusikut) anerilaungmatigut, silaᴋsoaᴋ tunganilijauᴋârtinago, ivjornaiᴋovluta pidlaraksauᴋonatalo sângane naglingnerme.
5Issumasimagame ᴋitorngautitsomavluta ingminut, Jêsuse Kristusikut, taimâk ᴋuviagijaminut pijomagame,
6Saimarsautine ânanaujoᴋ nertortauᴋovlugo, tamattomunga ᴋuviagijautingmatigut erdlingnartome.
7Tâpsomane piulijauviksaᴋarapta aunganut, tamadja ajornernit issumagijaujungnainermik, saimarsaumik akluiningagut;
8Tamattominga angijomik pititaujogut sunatuinarnik illisimatitauvluta silatutitauvlutalo.
9Kaujitilaungmatigut pijomajame nalonarninganik, ᴋuviagijaminut, taimâk issumasimagame,
10Naliutikpatta uvlut oᴋautigijauᴋovlugo, tamaita ᴋilangmêtullo nunamêtullo atautsemut niaᴋomut katititsomavlugit Kristuseme, tâpsomuna nangmineᴋ;
11Tâpsomûna uvaguttauᴋ kingormgujijuksautitauvogut, sivorngagut anerimajogut issumasimaninganut, tamaitaᴋsoarnik piniartub pijomajame issumasimaninga maliklugo;
12Tâpsoma ânanaunersoangata nitornarninganut ilingaᴋovluta; uvagut Kristusemik sivorngagut nerriuktogut.
13Tâpsomûna ilipsetauᴋ oᴋauseᴋ mikseᴋârtoᴋ tussaumagapsiuk, tamadja oᴋautsit tussarnertut piulijauviksapsingnik; tâpsomûnatauᴋ okpilerapse, Anernermik ajunginermik angerutaumajomik naᴋititsiviovose.
14Tâmna kingormgutijaksaptingnut nalunaikutarivavut, inuᴋotingita piulijauviksangat tikidlugo, ânanauninga nertortauᴋovlugo.
15Tamanna pivlugo uvangatauᴋ, tussaumagama okpernermik ilipsingnêtomik Nâlekamut Jêsusemut, naglingnipsingniglo ivjornaitunut tamainut;
16Soraingilanga (Gûde) ᴋujagivlugo pivluse erᴋaumavluselo tuksiarnimne;
17Nâlegapta Jêsusib Kristusib Gûdinganut, ânanaunerub Atâtanganut, tunitjivioᴋovluse Anernermik illisimanartomik nalonaititsijomiglo, tâmna (Kristuse) illitaritsiarlugo.
18Illisimanipsigut ijeᴋartitauᴋovluse ᴋaumarsarsimajunik, nelojungnairᴋovluse ᴋaiᴋojaumajut nerriugijaksanginik, kingormgutijaksaniglo ânanaudlartunik akluiniliksôjunik ivjornaitune,
19Pitsartuningatalo angininganik naleᴋangitomik uvaptingne okpertune, pitsartuninga tungavigivlugo.
20Tamanna piniutigilauᴋpâ Kristuseme, tupaktinamiuk toᴋungajunit, talerpingminelo iksivatidlugo ᴋilangme.
21Anginersangordlugo nâlegaunernit tamainit, sôngonernillo, pitsartunernillo, ataniotinernillo, tamainillo taijaujungnartunit, silaᴋsoarme tamattomane kissianeungitoᴋ, pijomârtomeletauᴋ.
22Tamaitaᴋsuillo tâpsoma itigangita atânnut pitilauᴋpait, tamainelo niaᴋôtilauᴋpâ illagênut,
23Tagva timinganut, ilumersimajomut tâpsominga, tamainik tamaine ilumertitsijomik.
Currently Selected:
Efêsusemiunut 1: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
