Apostelit Piniarningit 9
9
Saulusib sâgiartitauninganik. Tabêab ômartitauninganik Pêtrusemut.
1Saulusele sule ᴋinigiarpok silungnermut toᴋotsinermullo Nâlekab iliniartinginik, ajoᴋertuinerojomullo aivok,
2Kenuvigivâlo aglangnik pijuksanik Damaskusemut katimavingnullo tagvanêtunut, ilanginik okpertunik naipitsinajarune, taipkoa angutit arnallônêt ᴋelaksorᴋârdlugit tikiutsomagamigit Jerusalemut.
3Apᴋomêtilugolo, Damaskusib ᴋanitanganêdlune, tagvainak ᴋaumajub ᴋilangmit pijub ᴋaumarsarpâ.
4Nunamullo ochovok, nipemiglo tusarpok oᴋautjijomik ôminga: Saul, Saul, sôk unangmivingâ?
5Oᴋautivâle; Nâlegak, kinauvêt? Nâlegak oᴋarpok: Jêsuseovunga unangmijat.
6Makilerille ailutillo iglugasaksoarnut, tagvane oᴋautjaulârpotit piniaraksarnik.
7Angutille ingergaᴋatingit ᴋoaksângavlutik nangerput, nipe tusaramitsuk inuksinatiglo.
8Saulusele makipok nunamit, uitaleramelo tautungilak sumik, aggangitigulle tiguvât, tasiorpâllo Damaskusemut.
9Uvlunelo pingasune tautugane narrinanelo imingilak.
10Damaskusemele iliniartoᴋalaukpok Ananîasemik atilingmik; tâpsomunga Nâlegak oᴋarpok takotitjutikut: Ananîase! Oᴋarporlo: Ovanêpunga Nâlegak.
11Nâlekab oᴋautivâ: Nikovilerit, ailutillo apᴋosinermut Naggojomik taijaujomut, Jûdablo iglungane Saulusemik atilik aperᴋotigiuk Tarsusemiok; ahâk tuksiarpok.
12Takotitjutikut takolaukpok angumik, Ananîasemik atilingmik, iteriartortiminik, aggangminullo patingmijiminik tautulermerᴋovlugo.
13Anasîasible kiovâ: Nâlegak, angut taimna unuktunit tusaumavara okpertoᴋotingnik kappiasuktitseᴋattalauktok angijomik Jerusaleme.
14Ajoᴋertuijoksuillo perᴋovait ovane ᴋelaksorlugit tamaita aternut tuksiartut.
15Nâlekable oᴋautivâ: Ainiarit, tâmna uvamnut anerimajok, atortuksauvlune atera oᴋautigilugo nalojunut, atanersoarnullo, Israêliblo ᴋitornganginut.
16Kaujititsomavara, ᴋanok angijomik kappiasuktitaujomârmat atera pivlugo.
17Ananîasele aivok iterlunelo iglomut; aggangminullo patingmivâ oᴋarlunelo: Naglingnartok ᴋatangut Sauluse, Nâlekab Jêsusib, takotitub ilingnut apᴋome tamaungartilutit, tilivânga tautuktitauᴋovlutit ilumertauᴋovlutillo Anernermik ajunginermik.
18Tagvainarlo kavisitun-itunik kataktoᴋarpok ijîgingnit, tautulerivorlo;
19Makilunelo baptitaulerpok, nerrilarmelo nakoksijauvok. Saulusible uvlut ilanginik ilinniartut Damaskusemêtut najulerpait.
20Mânakullo tagva Kristuse oᴋautigivâ katimavingne Gûdib Ernerijanganik oᴋarlune.
21Tamattomingale tusartut ilûnatik tataminiarput oᴋarpullo: Aserorterilauktoungitôk una ilûnainik Jerusaleme tuksiartunik Jêsusib atinganut, tamaungalauktorlo ᴋelaksorsimatilugit pititsomavlugit ajoᴋertuijoksoarnût?
22Saulusele sôngosivalliavok, Jûdillo Damaskusemiut nippangertipait, Jêsuselo Kristuseojoᴋ oᴋautigitsiarlugo.
23Uvlullo unuktut kingorngatigut Jûdit ᴋaggimiolerput toᴋotsomavlugo.
24Saulusele oᴋautjaulerpok, unangmijomangmatsuk. Itertarvingnele udjertorput uvlôtilugo unnuamelo, toᴋotsomavlugo.
25Tagva ilinniartut unnuame tiguvât amârgaujakut ningitipât avaloksuit silatânut.
26Saulusele Jerusalemut tikiname, ilinniartut ilaginasualerpait; Ilûnatigle erksigivât, okperatiglo ilinniarteoninganik.
27Barnabasible ingminut pitipâ, âlâllo Apostelinut, unipkautivlugillo, ᴋanok Paulusib Nâlegak takolaungmago, tâpsomalo oᴋautilaungmago, ᴋanorlo sivôranane oᴋâlalaungmat Jêsusib atinganik Damaskuseme.
28Najugarilerpaillo Jerusaleme, anivigiᴋattarlugillo itervigiᴋattarpait, sivôrananelo oᴋâlavok Nâlekab Jêsusib atinganik.
29Oᴋâlavlunelo apersoᴋatigivait Grîkit; tâpkoale toᴋonasualerpât.
30Katangutigêlle tamattominga tusaramik, Zesarêamut ᴋanilârpât, tagvangallo Tarsusemut aiᴋovât.
31Ilagêktut mâna unangmijaujungnairput Jûdêame ilûnâne, Galilêamelo Samâriamelo, sôngosivalliavlutiglo, Nâlegarlo nâleklugo inôvut, Anernerublo ajunginerub manigoininganik ilumertaulaukput.
32Pêtrusele ilunaitigut ingergarame, okpertunut Liddamêtunuttauk pigivok.
33Tagvane angumik naipitsivok Enêasemik atilingmik; tâmna jârinik sitamaujortunik nalainalaukpok, tumângalaurame.
34Pêtrusiblo oᴋautivâ: Enêase, Jêsusib Kristusib pijungnaitipâtit; makitit, aumititillo nangminek âᴋikit! Tagvainarlo makipok.
35Liddamêtullo Saronemêtullo ilûnatik takovât sâgiarlutiglo Nâlekamut.
36Joppemele ilinniartoᴋalaukpok arnamik Tabêamik atilingmik, Grîkit taijangannik Dorᴋasemik; tâmna ajungituliᴋattalaukpok pitsiarlunelo aklujunut.
37Taipsomanele ᴋanimalerpok toᴋolarmelo. Tagva tâmna ubvarpât illivâllo iglut ᴋolerpânganut.
38Liddale Joppib ᴋanitanganêngmat, ilinniartut tusaramik Pêtrusemik tagvanêtomik, angutîngnik maggungnik tiliklerput tâpsomunga, ᴋenuvigivâllo, ᴋununane tikerᴋovlugo taipkonunga.
39Pêtrusele nikovilerpok ilagivaglo. Tikisimangmallo, tassiorpât iglut ᴋolerpânganut, uigarnerillo ilûnatik ilumavât, ᴋugviorlutiglo, uliksuillo annorâllo sakᴋertipait tâpsomunga, Dorkasib sanajaviningit, najortigingmatsuk.
40Pêtrusiblo tamaita anitinamigit, sêrᴋortorlune tuksiarpok, timelo tagva sâdlugo oᴋarpok: Tabêa, makitit! Uipok tagva; Pêtruselo takogamiuk, makilune ingipok.
41Tâpsomale aggane isaklugit nikovitipâ; okpertullo uigarnerillo iterᴋovait, ômartorlo takojautipâ.
42Tamannalo tusaumajaulerpok Joppeme ilûnâne; unuktullo okpilerput Nâlekamut.
43Uvluniglo unuktunik Joppeme uvlivok Simoneme ᴋetumaksaijome.
Currently Selected:
Apostelit Piniarningit 9: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
