Apostelit Piniarningit 16
16
Paulusib piniarninginik iglugasaksoarne Asiararsungmêtune, Filippimelo.
1Derbemut Listramullo pivok; ahaglo tagvane ilinniartoᴋalaukpok, Timôteusemik atilingmik; anânanga Jûdiovoᴋ okpertorlo, atâtangale Grîkiojok.
2Katangutigêt Listramiut Ikôniamiullo tâmna piloriktoᴋotigivât.
3Paulusib tâmna aiparijomagamiuk, pivâ kipivlugolo, Jûdit tagvanêtut pivlugit, ilûnatik ᴋaujimangmatta, atâtanga Grîkiongmat.
4Iglugasaksoatigut ingergaramik, Apostelillo angajoᴋâllo Jerusalemêtut perᴋojanginik unertûtivlugit malerᴋovait.
5Tagva ilagêktut okpernermut nakoksititauvut, unuksivalliavlutiglo uvlut tamaita.
6Frîgialo nunalo Galâtsia apᴋotigigamikik, Anernermut ajunginermut inertertauvut, oᴋautsinik oᴋâlaᴋonagit Asiame.
7Mîsiamulle pigamik, Bitîniakut ingergarasuarput; Anerneruble ama inerterpait.
8Mîsiale sanarᴋogamitsuk, Trôasemut atersârput.
9Unnuamelo tamattomane takotitjumik sakᴋertoᴋarpok Paulusemut: taimna angutaulaukpok Mazedôniamiok; tâpsoma nangerdlune tuksiarvigivâ oᴋarlunelo: Ikâlaurit Mazedôniamut, ikajortigullo!
10Takotitjumik tâpsominga takungmat, Mazedôniamut tagva erinesulerdluta ainasuarpogut, ᴋolarnangimat, Nâlekab taikunga ᴋaiᴋungmatigut, oᴋautsinik tusarnertunik oᴋâlavigilugit.
11Trôasemit aularluta umiaktorpogut, Samotrâzialo torârlugo tikipavut, uvlublo aipangane Neapolisemut.
12Tagvangallo Filippimut pivogut. Iglugasaksuit tâpkoa angnerpângovut Mazedôniame, Rômiunik inulit. Uvagulle iglugasaksoarne tâpkonane uvlut ilanginik piniarveᴋarpogut.
13Sabbate naliutingmat, iglugasaksuit silatânut pivogut kôngmut, tuksiarviovaktomut, ingidlutalo, arnallo tagvane katimajut oᴋâlavigilerpavut.
14Arnarlo Gûdemik opigosuktok, Lîdiamik atilik, niuverte aupaluktanik (annorânik), Tiatîramiut iglugasaksoanginit pijok, nâletsiarpok; tâpsoma ômatâ Nâlekab angmarpâ, Paulusib oᴋausingit kamagitsiarlugit.
15Baptitauleramele iglomioᴋatingillo, tâpsoma kaiblarpâtigut, oᴋarlunelo: Okperasugigupsinga Nâlekamut, iteritse iglumnut, tagvanêtsainarluse, katsungaitomiglo iterᴋovâtigut.
16Tuksiarvingmulle aitiluta, arnak kivgak uvaptingnik pâᴋsivok, anernilik pijomârtuksanik oᴋasûmik; angajoᴋânelo perᴋutinik akluitipait, sivorngagut oᴋarame pijomârtunik.
17Tâpsoma Pauluselo uvagullo ilûnânut malikpâtigut, ᴋaggudlarlunelo oᴋarpok: Gûdib ᴋotsingnerpângojub inuit ukua kivgarivait; tâpkoa oᴋautivâse apᴋomik piloringnermut.
18Taimailiorpok tâmna uvlunik unuktunik Paulusible tamanna kiksautigivâ, ᴋeviardlunelo anernek oᴋautivâ: Jêsusib Kristusib atingane anerᴋovagit ômangat. Tagvainarlo anivoᴋ.
19Nâlegangille tukisileramik, nerriungnitik akkilertaunermik anigormat, Pauluselo Silaselo tiguvakit uniarlugiglo niuvervingnut angajoᴋât sânganut,
20Aulatsijunullo pitipakit, oᴋarlutiglo: Inûk tâpkoa Jûdiojuk iglugasaksoarmioᴋativut tamartipait.
21Ajoᴋertuivuglo ilusiksanik ilalioraksaringitaptingnik, Rômiogapta.
22Inuillo ilûnatik pikablâtitauvut pitjutigilugik; aulatsijullo annoraijartauᴋovakit isaᴋajauᴋolâniglo.
23Angijomiglo isaᴋadlalauramikik, parngnanairsimavingmut pitipakit, parngnanairsimaviublo angajoᴋânganut udsertortautsiarᴋovakit.
24Taimâk perᴋojaugame, tâpsoma parngnanairsimavît ᴋamanênerpânganut pitipak, niungillo parngnanairsordlugit ᴋejuksoarmut.
25Unnuarle ᴋeteralermat Pauluselo Silaselo tuksiarpuk, Gûdelo nakoridlarpâk. Parngnanairsimavingmêᴋatingitalo tusarpakit.
26Tagvainarlo nuna sajukpiludlarpok, parngnanairsimaviub tungavinga aulataudlarlune; tagvainarlo upkuangit ilûnaita upkuêrtauvut, ᴋelarutillo ilunaita ᴋelarutjârput.
27Parngnanairsimaviuble angajoᴋânga siningminit tupakkame, parngnanairsimaviublo upkuangi tupkûêrsimajut takogamigit, saviksoane amuvâ, ingminiglo kapidlaromavlune, ᴋelaksorsimajut ᴋemânasugigamigit.
28Paulusele nipliadlalerpok oᴋarlunelo: Ilingnik pidlarniarnak, ilûnata ovanêgapta.
29Nannergoamigle ᴋaitauᴋojivoᴋ, itersârlunelo, sajulerdlunelo Paulusib Silasiblo itiganginut pâmakpok.
30Anitilugiglo oᴋautivak: Nâlegâkka, sumik piniartuksauvêk, piulijauᴋovlungâ?
31Oᴋarpuk: Nâlekamut Jêsuse Kristusemut okperit, tagva piulijauniarpotit iglomioᴋatitillo.
32Nâlekablo oᴋausinginik oᴋautivâk, iglomioᴋatingillo ilûnaita.
33Ingminullo pitipak, unnuab stundingane tâpsomane, kilingillo ubvarpait; baptitaulilarmelo tagvainak, ilane ilûnaita ilagilugit.
34Iglominullo itertipak, nerritilugiglo, ᴋuviasulerporlo iglomioᴋatine ilagivlugit, Gûdemut okpilerame.
35Kaulermallo aulatsijut iglugasaksuit kivgangit tilivait, oᴋarlutiglo: Inûk tâpkoa aularlik.
36Parngnanairsimaviublo angajoᴋângata oᴋautsit makkoa oᴋautigivait Paulusemut: Aulatsijut tiliklilaukput tamaunga, ᴋelarutjârtauᴋovlutik. Mâna anileritik, aularlutiglo ulapirsauteᴋarlutik.
37Paulusible oᴋautivait: Isaᴋadlalaukpâtiguk inuit takoane, kiglisiniaranuglo, Rômiôgalloartoguk, parngnanairsimavingmullo pitilunuk, mânalo sagvangitome aularᴋovâtigûk? Aukagle, nangminek anititsartorlitiguk!
38Oᴋautsit makkoa iglugasaksuit kivgangita oᴋautigivait aulatsijunut; tusaramiglo Rômiôjungnik sivôralerput,
39Kaivullo manigotijomik oᴋautivlugik anitipakit, tuksialâniglo, iglugasaksoarnit aularᴋovlugik.
40Tagva parngnanairsimavingmit anivuk, pulâriartorlutiglo Lîdiab iglunganut; ᴋatangutigêllo takolauramikit manigulaitalo, aularpuk.
Currently Selected:
Apostelit Piniarningit 16: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
