HEBREOS 1

Dios ti' cha'le t'an cha'an ti' Yalobil

1Ti yoque ñoj oniyix Dios ti' c'ʌñʌ i ti' jini tsa' bʌ i xiq'ui yʌle' cha'an i pejcan lac yumob ti ñoj oniyix. Cabʌl bajche' ti' pejcʌyob. Ma'an jayyajlel ti' pejcʌyob.

2Dios cha'an ti' Yalobil Jesucristo ti' mele mulawil yic'ot ti pejtyelel tsa' bʌ i meleyob. Ti yotsʌ Jesús ti i yum ti pejtyelel i melbalob. Ti wi'il c'ʌlʌ wale iliyi Dios mi' pejcañonla cha'an ti i Yalobil.

3Lajal ñoj wen, ñoj ñuc i Yalobil Dios che' bajche' Dios. I tsictisʌntyelʌch Dios jini i Yalobil. Jini i Yalobil Dios ti i p'ʌtyʌlel jach i t'an mi yʌc' ti xuc'tyʌl ti pejtyelel chʌ bʌ yes an ti mulawil. Che' ñac ti ujti i xot'e' lac mul cha'an anic lac sʌc isʌntyel, ti' buchle ya' ti' ñoj Dios am bʌ ti panchan cha'an tsiquil an i ñuclel Cristo.

Más an i ñuclel i Yalobil Dios che' bajche' ajtroñelob i cha'an Dios ch'oyol bʌ ti panchan

4Yoque i c'aba'ʌch Jesucristo tsa' bʌ otsʌbenti ti Dios jiñʌch i Yalobil Dios. Tsiquil más an i ñuclel Jesucristo che' bajche' ajtroñelob i cha'an Dios ch'oyol bʌ ti panchan como más an i ñuclel jini i c'aba' tsa' bʌ aq'uenti.

5Como ma'an ba' bʌ ora ti' pejcʌ Dios ajtroñelob i cha'an ch'oyol bʌ ti panchan che' bajche' ti' pejcʌ i Yalobil. Como Dios ti' sube i Yalobil:

Calobiletyʌch. Wale ti ili bʌ q'uin chʌncol c tsictisan cha'an calobiletyʌch.

Pero ma'an ba' bʌ ora ti' sube mi junticlec ajtroñel i cha'an ch'oyol bʌ ti panchan:

I tyatyon mi quejel cajñel.

Cristo mi quejel i yajñel ti calobil.

Che' ti tyajle ti t'an Cristo ti Dios.

6Che' ñac ti c'oti i yorojlel che' ñac Dios ti' choco tyʌlel cojach bʌ i Yalobil wʌ' ti mulawil, ti yʌlʌ ya' ti yambʌ t'an:

La' i ch'ujutisañob calobil ti pejtyelel ajtroñelob c cha'an ch'oyol bʌ ti panchan.

Che' ti yʌlʌ Dios.

7Pero che' Dios mi' tyaje' ti t'an ajtroñelob i cha'an ch'oyol bʌ ti panchan mi yʌle':

An mi cʌq'uen i yajñelob che' bajche' ic'.

An je'el mi cʌq'uen i yajñelob che' bajche' c'ajc mu' bʌ ti lejmel.

Che' ti yʌlʌ Dios.

8Pero che' Dios mi' tyaje' ti t'an i Yalobil mi yʌle':

Dios, ma'an ba' bʌ ora mi quejel i jilel a we'tyel.

Bele' tyoj, bele' wen mi quejel a cha'len yumʌl.

9Ti a mulʌ chʌ bʌ wen. Ti a ts'a'q'uele mach'ʌ wen.

Jin cha'an joñon, a Dioson, mi cʌq'ueñet

más i tijicñʌyel a pusic'al che' bajche' mi yubin ti pejtyelel yaño' bʌ i yalobilo' bʌ Dios.

Chʌ'ʌch mi' tyaje' ti t'an Cristo Dios.

10Dios ti' pejcʌ i Yalobil ti i Yum je'el. Ti yʌlʌ:

C yum, jatyet ti ñoj i tyejchibal ti a mele mulawil.

Yic'ot chan i melbalʌch a c'ʌb.

11Mi quejel i jilel mulawil yic'ot chan. Pero jatyet, ma'an ba' bʌ ora mi quejel a jilel.

Jini mulawil yic'ot chan mi quejel i tsuculiyel yubil che' bajche' mi' tsuculiyel bujcʌl.

12Mi quejel a bʌle' mulawil yic'ot chan che' bajche' mi' bʌlob tsuts.

Mi quejel ti q'uextyʌntyel bajche' mi q'uextiyel bujcʌl.

Pero jatyet mach che'iqui.

Ma'an ba' bʌ ora mi quejel a q'uextiyel. Bele' junlajalet. Ma'an ba' bʌ ora mi quejel i jilel a jabilel.

Che' ti' tyaja ti t'an Cristo Dios.

13Pero ma'an ba' bʌ ora Dios ti' sube juntiquil ajtroñel i cha'an ch'oyol bʌ ti panchan:

Buchi wʌ' tic ñoj cha'an mi tsictiyel añʌch a ñuclel,

jintyo mi cʌq'ueñet ti a c'ʌb pejtyel a contrajob,

che'en. Pero Cristo chʌ'ʌch ti subenti ti Dios.

14mach che'ic ti subentiyob ajtroñelob i cha'an Dios ch'oyol bʌ ti panchan, como ajtroñelob jach. Ti chojquiyob tyʌlel wʌ' ti mulawil cha'an i cotyañonla cha'an lac wenlel joñonla mu' bʌ lac tyaje' laj cotyʌntyel ti Dios.

Currently Selected:

HEBREOS 1: ctuA

Highlight

Copy