उत्पत्ती 40
40
योसेफमी ङोमु आ अर्थ शेंशो
1मिनु नोले मार दुम्माक्त देंशा हना, इजीप्त ङा पिप फाराओ आ खिंमी पिप कली तूचा गेब आन ठेयब मुर नु पिप कली शोब्ले चोइब आन ठेयब मुरुमी आस प्रभु इजीप्त ङा पिप कली मरिम्शो पाम्से बाक्त। 2मिनु फाराओमी मेको तूचा गेब आन ठेयब मुर नु शोब्ले चोइब आन ठेयब मुर आस पर्बम गाइक्ता बाक्त। 3मिनु मेको निम्फा आस कली नेल्ल क्येङा ठेयब गेय पाइब आ जेल्खानमी चोक्सी बाक्त। मेकेर योसेफ यो बाक्शो बाक्माक्त। 4मिनु जेल्खान ङा कोव़ब मुरुम योसेफ कली “मेको निम्फा आस कली वारच पावो” दे अरेवा बाक्त। मिनु वारच पवा बाक्त।
5मिनु इजीप्त ङा पिप आ गेय पाइब ठेयब मुर निक्शी जेल्खानमी बाक्सानु, काबु नाक्दो निम्फामी ङोमु ताम्से बाक्त। मेको आस ङोमु आस अर्थ निक्शी बाक्माक्त। 6मिनु सुनी कना योसेफ मेको निक्शी आस कली वारच पथ, आस कोठा ओव़मेनु, निम्फा सुर्ता पा बाक्शो ताम्सी बाक्त। 7मिनु योसेफमी जेल्खानम बाक्शो फाराओ आ गेय पाइब आ ठेयब मुर निक्शी आस कली “मारदे सुर्ता पनी?” दे हिल्लो पाम्सी बाक्त। 8मिनु मेको निक्शीमी “गो ङोमु ताइतस्कु। मिनु मेको ङोमु आ अर्थ मरुप्स्कु। शेंब मुर मबा” देंसा बाक्त। मिनु योसेफमी “परमप्रभुमी मेको ङोमु मार बाक्बा दे शेंबा ममाइ ङा? लो, आं कली देनीन” दे माइक्सी बाक्त। उत्पत्ती ४१:१५-१६; दानीएल २:२७-२८ 9मिनु फाराओ कली तूचा गेब आन ठेयब मुरुमी “गो आं ङोमुमी आं ङोंइती अङगुर बोट का ताता। 10मिनु मेको अङगुर बोटमी राशी सां बाक्तेक्म। मिनु मेको कोच्वा दाप्शा, फू यो बोइक्तेक्मे। बोइश्शा ङा मिन अङगुर गेडा सिश्शा मीतेक्म। 11मिनु आं गुइमी फाराओ आ कचौरा बाक्त। मिनु गो अङगुर आ गेडा आ रस फाराओ आ कचौरामी चिम्ता। मिनु कचौरा पिप कली गेता” दे लोव़ पवा बाक्त।
12मिनु योसेफमी “इन तशो ङोमु आ अर्थ मार बाक्ब देंशा हना, मेको राशी सां नाक्ती सां बाक्नीम। 13मिनु सांबु नाक्ती फाराओम इन कली जेल्खान रे प्रोंइशा ङा मिन इन ङोंइती पशो गेय लेंशा गेब। मिनु गे ङोंइती ङा खोदेंशो पा फाराओ कली तूचा गेनीनी। लेंशा फाराओ कली कचौरा गेनीनी। इन तशो ङोमु आ अर्थ एको बाक्ब। 14इन कली रिम्शो दुम्मेनु, आं कली यो मप्रेंदीन। आं कली शिशी पने। फाराओ कली आं कली मेको जेल्खान रे ग्रुंइचा, दे लोव़ पने। 15ङोंइती आं कली हिब्रू रागी रे खुइ पा चाक्तीमी। मुल जेल्खानम चोक्तीमी। गो मारेइ मरिम्शो मपङ” देंमाक्त। उत्पत्ती ३७:२८
16मिनु फाराओ कली शोब्ले चोइब आन ठेयब मुरुम मेको ङोमु आ अर्थ रिम्शो बाक्त, देंशा, योसेफ कली “गो यो ङोमु का ताता। मेको ङोमुम पिरीङगा सां बुश शोब्ले पियाम कुरशो बाक्ती। 17नेल्ल क्येङा आ तार ङा पिरीङगामी फाराओ कली शुश खाल ङा चोशो शोब्ले बाक्तेक्मे। मेको पिरीङगा ङा शोब्ले चिक्बीम खुइ पा जाम्तेक्म” दे मदा बाक्त। 18मिनु योसेफमी “इन तशो ङोमु आ अर्थ मार बाक्ब देंशा हना, मेको पिरीङगा सां, नाक्त सां बाक्नीम। 19सांबु नाक्ती फाराओमी इन कली जेल्खान रे ग्रुंइपाइश्शा, रवाम क्याइक्पाइक्ब। मिनु चिक्बीम इन श्ये ब्वाइनीम। इन तशो ङोमु आ अर्थ एको बाक्ब” दे शेंदा बाक्त।
20मिनु आ सांबु नाक्ती फाराओ आ जरमेशो नाक्त बाक्माक्त। मिनु फाराओमी आ गेय पाइब नेल्ल आन कली भोज सेला बाक्त। मिनु आ कली तूचा गेब आन ठेयब मुर नु शोब्ले चोइब आन ठेयब मुर आस कली जेल्खान रे ग्रुंइदीम्सी बाक्त। 21मिनु आ कली तूचा गेब आन ठेयब मुर कली लेंशा ङोंइती ङा गेय पचा गेवा बाक्त। मिनु मेकोमी लेंशा फाराओ कली तूचा गेब दुम्माक्त। 22शोब्ले चोइब आन ठेयब मुर कली चहिं क्याइश्शा साइक्पदा बाक्त। योसेफमी दोदेंशो देंमे, मोदेंशो दुम्माक्त। 23तन्न फाराओ कली तूचा गेब आन ठेयब मुरुमी योसेफ कली यु प्रेंदा बाक्त।
Currently Selected:
उत्पत्ती 40: susz
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
