उत्पत्ती 22
22
परमप्रभुमी अब्राहाम आ थुं नाक्शो
1मिनु नोले परमप्रभुमी “अब्राहामम आं कली टीबाक्म कों, मटीबाक्म” दे मिम्शा “अब्राहाम” दे ब्रेत्ता बाक्त। अब्राहाममी “गो एक बाक्ती” दे परमप्रभु कली मदा बाक्त। प्रस्थान १५:२५; प्रस्थान १६:४; प्रस्थान २०:२०; ब्यवस्था ८:२; ब्यवस्था १३:४; न्यायाधीस २:२२; हिब्रू ११:१७; याकूब १:१३ 2मिनु मेकोमी “इ तौ लतो। का ला बाक्शो दाक्शो इ तौ इसहाक लतो। मिनु मोरीयाह रागी लावो। मेकेर लशा, इ तौ कली चोशा चढ़ेयी। तेको डांडाम चढ़ेचा माल्नेवे, गो इ कली कोंइनन” देंमाक्त।
3मिनु अब्राहाम सुनी कना बोक्शा, चढ़ेतीकेम चोचा कली शी चेश्शा, आ गधा ठीक पवा बाक्त। मिनु ठिटा निक्शी नु आ तौ इसहाक कली लाइश्शा, परमप्रभुमी देंशो पहाड लमा बाक्त। 4लमा लमा नाक्त सां नोले परमप्रभु आ देंशो बाक्तीके ङोन रे तवा बाक्त। 5मिनु अब्राहाममी आ गेय पाइब निक्शी आस कली “एकेर गधा नु बाक्कीसे। गो आं तौ नु मिरी आइक्था लशा, चढ़ेशा, इस बाक्तीक लेत्नस्कु” देंमाक्त। 6मिनु अब्राहाममी चोशा चढ़ेतीक शी इसहाक कली कुरपदा बाक्त। मिनु मी नु चुक्ब आंमा कुरा बाक्त। मोपा निम्फा लसा बाक्त। 7मिनु इसहाकम आ आफ कली “आं आफ” देंमाक्त। मिनु अब्राहाममी “गो नेंता” देंमाक्त। मिनु इसहाकमी “गो मी नु शी ला कुरशा गाक्तस, चोशा चढ़ेतीक पाठा चहिं ते बाक्म?” दे हिल्लो पवा बाक्त। 8मिनु अब्राहाममी “चोशा चढ़ेतीक पाठा परमप्रभुमी गेब” देंमाक्त। मोपा निम्फा लसा बाक्त।
9मिनु परमप्रभुमी देंशो रागी जाक्दीस्सानु, अब्राहाममी फुल्लु चाक्शा, चढ़ेतीक सेला बाक्त। मिनु चढ़ेतीक तारी शी प्रोव़ङा बाक्त। मिनु आ तौ इसहाक कली गुइ खोइल फ्रेंशा, शी तारी वोदा बाक्त। 10मिनु अब्राहाममी आ तौ क्योरचा कली चुक्ब शोइश्शा तरेवा बाक्त। मत्ती २६:३९; याकूब २:२१ 11मिनु परमप्रभु यावे आ स्वर्ग ङा गेय पाइबमी सरीङ रे “अब्राहाम, अब्राहाम” दे ब्रेत्ता बाक्त। मिनु अब्राहाममी “गो नेंता” देंमाक्त। 12मेकोमी “इ तौ कली मक्योरो। मेको कली मारेइ मपतो। मारदे हना गे परमप्रभु कली मान पा हिंबाक्ते। गो मुल तुइक्ताक्ङ। गे इ का ला बाक्शो तौ आं कली गेचा ठीक पाप्तीवी। इ का ला तौ यो आं कली गेचा टीबाक्ते” देंमाक्त। रोमी ८:३२; हिब्रू ११:१७ 13मिनु अब्राहाममी एर गे कोव़ङानु, सांड का आ ग्रोव़ चू लहाराम रेश्शा, बाक्शो तवा बाक्त। मिनु लशा सांड चाक्शा, आ तौ आ पा ङा मेको सांड क्योरशा, चोशा चढ़ेतीक चढ़ेवा बाक्त। 14मिनु अब्राहाममी मेको डांडा कली परमप्रभु यावे यीरेह, दे नें वोदा बाक्त। मोपतीके मुल सम्म मुरपुकीम “परमप्रभु यावे आ डांडाम परमप्रभु यावेमी माल्शो गेब” देंनीम। “परमप्रभु यावे यीरेह” आ अर्थ “परमप्रभु यावेमी आं माल्शो गेब” देंशो बाक्ब। उत्पत्ती १६:१३
15मिनु परमप्रभु यावे आ स्वर्ग ङा गेय पाइबमी लेंशा सरीङ रे अब्राहाम कली 16“परमप्रभु यावेमी ‘गो आं नेंमी कसम जाता। मारदे हना गे इ तौ आं कली गेचा ठीक पाप्तीवी। प्रस्थान ३२:१३; यसैया ४५:२३; आमोस ६:८; मीका ७:२०; लूका १:७३; हिब्रू ६:१३ 17मार कसम जाता देंशा हना, गो इ कली आसीक गेनुङ। इ चच युइ आन कली सोरुल नु समुन्द्र आ नेक्था ङा बाल्वा खोदेंशो पा शुश सेल्नुङमी। मिनु मेकोपुकीमी आन जोरी सत्रु आन सहर आंम के सेल्नीम। उत्पत्ती १३:१६; हिब्रू ११:१२ 18इ चच युइ आन पर्बम रागी रागी ङा मुर नेल्ल आसीक राइनीम। मारदे हना गे आं देंशो टीब बाक्ते’ दे परमप्रभु यावेमी देंत” दे आ स्वर्ग ङा गेय पाइबम अब्राहाम कली लोव़ पवा बाक्त। उत्पत्ती १२:३; गलाती ३:१६
19मिनु अब्राहाम मेकेर रे लशा, आ गेय पाइब निक्शी आस रिम्तीके लेस्सा बाक्त। मिनु ग्रुम्शा, बेयर-शेबा माइक्तीकेम लमा बाक्त। मिनु अब्राहाम मेक उइ बाक्माक्त।
नाहोर आ चच युइ
20मिनु मेको नोले मुरुमी अब्राहाम कली “मिल्कामी यो इन लोक्ब नाहोर रे पा आल थिप्तु। उत्पत्ती ११:२९ 21आ ङोंइती जरमेशो तौ ऊज, आ लोक्ब बूज, अराम आ आफ केमुएल, 22केसेद, हाजो, पिल्दाश, यिदलाफ नु आ कान्छा बेथुएल बाक्नीम। 23बेथुएल चहिं रेबेका आ आफ बाक्त। मिल्कामी अब्राहाम आ लोक्ब नाहोर के ८ जना तौ थिप्तु। उत्पत्ती २४:१५ 24नाहोर आ कान्छी मीश आ नें रूमा बाक्माक्त। मेकोमी तेबाह, गाहाम, ताहाश नु माकाह थिमाक्त” देंमाक्त।
Currently Selected:
उत्पत्ती 22: susz
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Free Reading Plans and Devotionals related to उत्पत्ती 22
Key Chapters of Genesis
IHCC Daily Bible Reading Plan - January
Genesis Explained Part 2 | The Journey Begins
