उत्पत्ती 10
10
रागी नेल्ल ङा मुर
१इतिहास १:५-२३
1ब्वाक्कु बारम नोले नोआह आ तौपुकी शेम, हाम नु यफेथमी तौपुकी थीमा बाक्त। नोआह आ तौ आन चच युइ सु सु बाक्मा बाक्त देंशा हना,
यफेथ आ चच युइ
2यफेथ आ तौ गोमेर, मागोग, मादै, यावान, तूबल, मेशेक नु तिरास बाक्मा बाक्त। इजीकीएल २७:१३-२२; इजीकीएल ३८:२; इजीकीएल ३९:१,६ 3गोमेर आ तौपुकी अश्केनज, रीफत नु तोगारमाह बाक्मा बाक्त। 4यावान आ तौपुकी एलीशाह, कित्तीम, टारशीश नु दोदानीम बाक्मा बाक्त। 5मेको मुरपुकी रे समुन्द्र आ नेक्था बाक्ब जरमेशो बाक्मा बाक्त। मेकोपुकी यफेथ आ चच युइ बाक्मा बाक्त। मेकोपुकी आंम रागीम बाक्शो बाक्मा बाक्त। मिनु आंम रागी रागीमी, आंम खिं खिं ङा मुरुमी आंम लोव़ ब्वाक्मा बाक्त।
हाम आ चच युइ
6हाम आ तौपुकी कूश, इजीप्त, पूत नु कनान बाक्मा बाक्त। 7कूश आ तौपुकी शेबा, हवीलाह, साब्ताह, रामाह नु साब्तेका बाक्मा बाक्त। रामाह आ तौ निक्शी शेबा नु देदान बाक्सा बाक्त।
निम्रोद सक्ति पाइश्शो दुम्शो
8मिनु कूशमी निम्रोद यो थिमाक्त। मेको बोल्यो नु सक्ति पाइश्शो मुर दुम्माक्त। 9मेको परमप्रभु यावे आ ङोंइती सक्ति पाइश्शो सिखारी बाक्माक्त। मोपतीके मुरुमी बोल्यो मुर का तशा “परमप्रभु यावे आ ङोंइती निम्रोद खोदेंशो सक्ति पाइश्शो सिखारी बाक्बाक्त” दे देंतीके देंमा बाक्त। मत्ती ५:५ 10मिनु आ ङोंइती ङा राज्य बेबीलोन बाक्माक्त। अरु एरेक नु अक्कद सहर बाक्मा बाक्त। मेको नेल्ल शिनार रागीम बाक्बाक्मा बाक्त। 11निम्रोद मेको रागी रे अस्सुर जाक्शा, निनवे, रेहोबोथ-इर नु कालाह सहर सेला बाक्त। 12निनवे नु कालाह सहर आस दातेमी रेसेन सहर सेला बाक्त। मेको ठेयब सहर बाक्माक्त।
13इजीप्त, लूदीम, अनामीम, लेहाबीम, नफ्तुहीम, 14पथ्रुसीम, कस्लुहीम नु काफ्तोरीम आन आफ दुम्माक्त। मेकोपुकी रे पलिस्ती ग्रूमा बाक्त।
15मिनु कनानमी आ ङोंइती ङा तौ सीदोन नु नोले हेथ थिमाक्त। 16मिनु नोले यबुसी, एमोरी, गिरगाशी, 17हिव्वी, अरकी, सिनी, 18अरवादी, सेमारी नु हमाथी थिमाक्त। नोले कनान रागी ङा मुर शुश दुम्मा बाक्त। 19कनान ङा मुर आन रागी सीदोन रे गेरार गे नु गाजा सम्म दुम्माक्त। सोदोम नु गोमोररा गे अदमाह, सेबोयीम नु लाशा सहर सम्म दुम्माक्त। 20मिनु हाम आ चच युइ आन खिं खिं ङा मुर आन लोव़, आन रू नु आन रागी बाक्मा बाक्त।
शेम आ चच युइ
21शेम यफेथ आ लोक्बमी यो तौपुकी थिमाक्त। शेम एबेर आ आल आन किकी पिपी बाक्माक्त। उत्पत्ती ११:१० 22शेम आ तौ चच युइ सु सु बाक्मा बाक्त देंशा हना, एलाम, अश्शुर, अरपक्शाद, लूद नु अराम बाक्मा बाक्त। 23अराम आ तौपुकी ऊज, हुल, गेथेर नु माश बाक्मा बाक्त। उत्पत्ती २२:२१ 24मिनु अरपक्शाद शेलाह आ आफ दुम्माक्त। शेलाह एबेर आ आफ दुम्माक्त। 25एबेरमी तौ निक्शी थिमाक्त। का आ नें पेलेग बाक्माक्त। मारदे हना मेना रागी योक्शो बाक्माक्त। पेलेग नें आ अर्थ भाग का बाक्माक्त। अर्को आ नें योकतन बाक्माक्त। उत्पत्ती ११:८-९; ब्यवस्था ३२:८ 26मिनु योकतनमी अल्मोदाद, शेलेफ, हासार-मावेथ येराह 27हदोराम, उजाल, दिकलाह, 28ओबाल, अबीमा-एल, शेबा, 29ओफीर, हवीलाह नु योबाब आन आफ दुम्माक्त। मेको नेल्ल योकतन आ तौ बाक्मा बाक्त। 30मिनु आन बाक्तीक मेशा रे पूर्ब ङा सेफार माइश्शो पहाड सम्म दुम्माक्त। 31मिनु शेम आ चच युइ आन खिं खिं ङा मुर आन लोव़, आन रू नु आन रागी बाक्मा बाक्त। 32मिनु मेको नोआह आ तौ नेल्ल आन खिं खिं ङा मुर, आन चच युइ, आन आन रागी बाक्मा बाक्त। ब्वाक्कु बारशा नोले मेकोपुकी रे रागी नेल्ल ब्रीमा बाक्त।
Currently Selected:
उत्पत्ती 10: susz
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
