SAN LUCAS 22
22
Quitemohuahque tlen ic tequitzquisque in Jesús
1Yohualahsitaya in pascuahiluitl queman in judeahtecos quicuahque in pantzin ahmo semautoc. Quitosnequi yeh in tonali den tlacalpanolistli den ángel den miquilistli. 2In tlayecancamen den tiopixcamen huan in tlamachtiyanimen den tlanahuatilten quitemohuahque quen temictisque in Jesús, huan oquinmojcaitayayahque in tlacamen.
3Oncan in ahmo cuali tlacatl oquiyolquitzqui in Judas, aquin noyojqui oquitocahhuiyayahque Iscariote. Inon se den mahtlactli huan ome tetlamachticahuan in Jesús. 4Huan yehhua oya quinita in tlayecancamen den tiopixcamen, huan in tlachixcamen den tiopantli, huan oquiniluic quen quinmactis in Jesús. 5Yehhuan opajque huan oquicocoltihque in tomin in Judas. 6Yehhua oquiseli huan oquitemo quenin quinmactis in Jesús ihcuac ahmo mayecan in tlacamen.
In tlaolichtilistli den Totecohtzin
7Yoahsico in tonali den pascuahiluitl queman quicuahque in pantzin ahmo semauqui ihuan in colelo tlen quimictiyahque ic quichihuahque cuenta den tlacalpanolistli den ángel den miquilistli. 8Oncan Jesús oquintitlaniloc in Pedro huan Juan, huan oquiniluiloc:
―Xiyacan xicyectlalican in tlacuali den pascuahiluitl.
9Yehhuan otetlahtlanihque:
―Tel, ¿canin monequi maticchihchihuacan?
10In Jesús oquinnanquililoc:
―Ihcuac nanahsitisque ipan in altepetl, mechahsis se tlacatl quihuicatas se tzotzocoli in atl. Huan inon xicuitlapanuican hasta canin ahsitiu. 11Huan xiquiluican in iteco in cali: “In Tlamachtiyani mitzualiluiya: Tel, ¿catle yeh in cuarto canin cuali ticuasque in tlacuali den pascuahiluitl ihuan notemachticahuan?” 12Oncan mechnextilis se hueyi cuarto tlayectlalili itzoncuac inon cali huan ompa xicyectlalican inon tlacuali.
13Yehhuan oyahque huan ocahsique nochin in quen Jesús oquiniluiloc. Huan oquichihchiuque in iluitlacuali.
14Ihcuac oahsic in horas, in Jesús huan in tetiotlatitlaniluan omotlaliloc inahuac in mesa. 15Oncan Jesús oquiniluiloc:
―Molui onicnec tictlaolichtisque inin iluitlacuali den pascua achto ic nimiquis. 16Tleca namechiluiya ahmo oc sepa nicchihuas hasta ihcuac matzonquisa ipan tetlatequiutilistzin Dios.
17Oncan omoan inon vaso den uvahtlayili huan omotlasohcamatiloc huan omihto:
―Xicanacan inin huan ximoxehxeluican. 18Tleca namechiluiya ahmo oc sepa niconis de inin uvahtlayili hasta ic hualahsis in tetlatequiutilistzin Dios.
19Oncan omoan in pantzin huan omotlasohcamatiloc huan omoxehxeluihque huan omoluihque:
―Inin yeh notlacayo tlen namechmactiliyahque. Ijcon xictlaolichtican ica nehhua.
20Noyojqui ijcon omochiu ica in vaso satepa den iluitlacuali. Huan omihto:
―Inin vaso den uvahtlayili yehhuatl in noyes tlen mochayahua ica namehhuan, huan yehhua in tlen ic moteixmatiltiya melahuac ica inin yancuic mononotzalistli.
21’Huan axan nica tohuan tlacua in aquin nechtemactis. 22Huan nehhua aquin Nitetiachicau ica nochin tlacatl nimiquis quen ca tlahcuiloli. ¡Huan tetlocolti in aquin nechtemactiya!
23Oncan opeuque motlahtlaniyahque ic yehhuan aquin inon yes in tlatemactiyani.
Opeuque motlatlaxiliyahque aquin ocachi hueyixtoc mochihuas
24Huan niman opeuque motlatlaxiliyahque ica yehhuan aquin ocachi hueyixtoc mochihuas. 25Huan Jesús oquiniluiloc:
―In hueyixtoque den tlalticpactli tlatequiutiyahque quen tetatahmen huan quinmahuestiliyahque in achtohque de yehhuan. 26Huan namehhuan ahmo ijcon nanquichihuasque. Oc noncua in aquin ocachi nanquimahuestilisque ic namehhuan quipiya tlen mochihuas ocachi ahmo tlen iquisca. Huan in aquin tlatequiutiya quipiya tlen mochihuas quen in aquin tlapalehuiya. 27Tel, ¿aquin in ocachi quimahuestilisque? ¿In aquin motlalis tlacuas, noso in aquin tlapalehuiya? Tel, ¿ahmo ijcon melahuac quimahuestilisque in aquin ca iixpa in mesa? Huan nehhuatl no nica namohuan quen in aquin tlapalehuiya.
28’Namehhuan in aquin nochipa nohuan onancatcahque ic nanquitemactisque notequiu, masque onechmachilihque. 29Huan ic inon namechchihua quen tequihua ijcon quen Nohueyitahtzin onechchihualo, 30ic titlacuasque huan tiatlisque sansecnin ompa ihcuac nitlatequiutiya. Huan namechmacas in hueyilistli ic nantlixcomacasque ica in mahtlactli huan ome ololi den Israel.
In Jesús omoluic quen teixtlatis in Pedro
31Noyojqui omihto in Totecohtzin:
―Simón, Simón, xicchihua cuenta quen in ahmo cuali tlacatl mechtlahtlantoc ic mechyoltilanas ic xinechyolilcahuacan. 32Huan nehhua nimotlaitlanihtoc ica tehhua ic ahmo mamitzpolo motlaneltoquilis. Huan tehhuatl, ihcuac timoyolcuepas ica nehhua, xiquinyolchicahua in mocnihuan.
33In Simón omoluic in Jesús:
―Notecohtzin, nimotemacatoc ic niyas tehuan in telpiloyan huan hasta canin micohuas noyojqui.
34Jesús oquiluiloc:
―Pedro; nimitziluiya yeh in axan achto ic tzahtzis in pachilel, tehhuatl tinechixtlatis yexpa.
Yiahsitihuitz in tonali masque tequiyo ic tetlapanoltisque
35Oncan Jesús oquiniluiloc in tetlamachticahuan:
―Ihcuac onamechtitlan iyoca, niyan bolsa, niyan in tlen ipan moehua in tomin, niyan tecactli; tel, ¿omechpolo itlahtlen?
Yehhuan oquihtohque:
―Ahmo.
36Oncan oquiniluiloc:
―Tel, axan in aquin quipiya bolsa maquihuica, noyojqui in aquin quipiya in tlen ipan quiehua in tomin. Huan in aquin ahmo quipiya in espada, maquinemaca icóton huan maquicohua. 37Tleca namechiluiya quipiya tlen tzonquisas ica nehhua, quen quihtohua in Itlahcuiloltzin: “Huan otetlahtlacoltihque ica in oc sequin ahmo cualten.” Tleca nochin in tlen ca tlahcuiloli ica nehhua quipiya tlen tzonquisas.
38Oncan yehhuan oteiluihque:
―Totecohtzin, nicanca in ome espadas.
Huan Yehhuatzin omonanquilihque:
―San ic inon.
Jesús moyolmachtilo ipan in tlamiloli Getsemaní
39Oncan Jesús oquixohuac huan ohuilohuac ipan in tepetl Olivos quen saniman mochihua. Huan otecuitlapanuihque in tetlamachticahuan. 40Ihcuac oahxihuato ompa, oquiniluiloc:
―Ximoyolmachtican ic ahmo mamechyolquitzqui in ahmo cuali.
41Niman in Jesús ohuilohuac ocachi ompic de yehhuanten cana quen ic huehca motohuetzohua in tetl, huan ompa omotlancuaquetzaloc ic omoyolmachtiloc. 42Huan omihto:
―Nohueyitahtzin, tla monequi, nechmaquixtilos ic nitlapanos; ahmo maye ica nehhua notlanequilis, tlahmo ica Tehhuatzin.
43Oncan otemonextili se ángel den neluicac ic techicahuas. 44Huan ic tequin otlapanoloticatca, omoyolmachtiloc ocachi chicahuac. Huan in teitonil ochopinticatca quen yestli tlalpa.
45Ihcuac otlan moyolmachtilo ohuilohuac moahsihque in tetlamachticahuan. Quen otlocoxque, omahsitohque cochtoque. 46Oncan oquiniluiloc:
―Tel, ¿tleca nancochticaten? Ximehuacan huan ximoyolmachtican ic ahmo mamechyolquitzqui in ahmo cuali.
Tehuicahque tlatemactili in Jesús
47In Jesús queman oc omononotzticatcahque ihcuac oahsicohque miyac tlacamen. Inon Judas, yehhuatl inon seya den mahtlactli huan ome tetlamachticahuan, huan yehhua oquis ihcuac ocatca in tlacuali den tlaolichtilistli. Yehhuatl inon in tlayecanqui huan omopacho ic otepipitzo in Jesús. 48Oncan Jesús omoluic:
―Judas, tel, ¿ic tinechpihpitzohua, tinechtemactiya nehhua aquin Nitetiachicau ica nochin tlacatl?
49In aquin tehuan ocatcahque in Jesús oquitaque tlen opanoticatca, huan otetlahtlanihque:
―Totecohtzin, tel, ¿tiquinmacasque ica in espada?
50Huan se de yehhuan oquinacastehtec ic iyejcan in itlaquehual in hueyixtoc den tiopixcamen. 51Huan Jesús omihto:
―Xiquincahuacan, san ic inon.
Oncan Jesús omomachili inacas inon tlaquehuali huan omopahti. 52Niman omoluihque in achtohque den tiopixcamen huan in tlixpiyanimen den tiopan huan in tetecten, inohque aquin tehuicanihque:
―Tel, ¿onanualejque namehhuan ica espadas huan cohuitl quen niyesquiyani niichtejqui? 53Ihcuac namohuan onicatca mostli ipan in tiopantli, niyan onannechquitzquihque. Huan axan inin namotonal, ihcuac mechtequiutiya in ichicahualis in ahmo cuali tlacatl.
In Pedro teixtlatiya in Jesús
54Ihcuac otequitzquihque in Jesús, huan otehuicaque tlatemactili ichan in hueyixtoc den tiopixcamen. Huan Pedro otecuitlapanuiyaya san huehca. 55Huan ompa oquitlalihque se tletl tlanepantla den quiahuactli. Huan ompa oquiyehualuihque inon tletl. Huan Pedro noyojqui ompa inuan omotlali. 56Oncan se tesqui ic oquitac ompa oyehuatoya, oquitzticatca huan oquihto:
―Noyojqui inin tlacatl ihuan onemiyaya in Jesús.
57In Pedro ahmo omocuiti huan oquihto:
―Sihuatl, nehhuatl ahmo niquixmati.
58Satepa oquitac oc seya huan oquiluic:
―Tehhuatl noyojqui tipohui inuan.
Huan Pedro oquihto:
―Ahmo nehhua, tlacatl.
59Huan cana se hora satepa, oquihtohtehuac oc seya:
―Ic nele, inin tlacatl ihuan ocatca, tleca noyojqui galileahteco.
60Oncan Pedro oquihto:
―Tlacatl, ahmo nicmati ica tlen titlahtohtica.
Huan ic oc otlahtohticatca in Pedro, otzahtzic in pachilel. 61Huan in Totecohtzin omocuitlapantlachiyaliloc huan omotac in Pedro. Yehhua oquilnamic in tlen Totecohtzin omoluihtoya: “Achto ic tzahtzis in pachilel, tinechixtlatis yexpa.” 62Oncan in Pedro oquis huan ochocac ica itlocol.
Teca mahuiltiyahque in Jesús
63In tlacamen aquin oteixpixtoyahque in Jesús teca omahuiltihque huan otehuihhuitejque. 64Oteixpiquihque huan oteixtecapanihque, huan oteiluihque:
―¡Axan xiquihto aquin omitzixtecapani!
65Huan oquihtohuayahque oc sequin tlahtoli ahmo cuali ic tepacteca.
Jesús inixpa in tequihuahmen judeahtecos
66Ic otlatuic omosentlalihque in tetecten den judeahtecos huan in achtohque den tiopixcamen huan in tlamachtiyanimen den itlanahuatil Moisés. In Jesús otehuicaque inixpa inon tequihuahmen huan ompa otetlahtlanihque:
67―Xitechilui, tel, ¿tehhuatl in Cristo?
Yehhuatzin oquinnanquililoc:
―Tla namechiluis queme, ahmo nannechneltocasque. 68Huan tla namechtlahtlanis itlahtlen, ahmo nannechnanquilisque huan niyan nannechcahcahuasque. 69Huan de axan nehhuatl aquin Nitetiachicau ica nochin tlacatl niyehuatos teyejcan in Dios Hueyicatzintli.
70Niman otetlahtlanihque nochten:
―Tel, ¿tehhuatl Ticonetzin in Dios?
Huan Jesús oquinnanquililoc:
―Queme, nehhuatl ijcon quen onanquihtohque.
71Oncan oquihtohque yehhuan:
―Tel, ¿tlen ic ticnequisque oc sequin tlatemactiyanimen? Tehhuanten yoticajque ica tlen otiquihto.
Currently Selected:
SAN LUCAS 22: ncj
Highlight
Share
Copy
Want to have your highlights saved across all your devices? Sign up or sign in
© 1979, Wycliffe Bible Translators, Inc. All rights reserved.
