San Marcos 13

Ipakaammo ni Jesus ti Pannakarba ti Templo

(Mat. 24:1-2; Luc. 21:5-6)

1Idi pumampanaw ni Jesus idiay Templo, maysa kadagiti adalanna ti nagkuna kenkuana, “Maestro, kitaem! Nagpipintas ketdin dagiti bato ken dagiti patakder!”

2“Makitam dagitoy dadakkel a patakder?” insungbat ni Jesus. “Awanto ti uray maysa a bato ditoy a mabati iti yanna. Marbadanto amin.”

Dagiti Rigrigat ken Pannakaidadanes

(Mat. 24:3-14; Luc. 21:7-19)

3Idi agtugtugaw ni Jesus idiay Bantay Olivo a kasumbangir ti Templo, sililimed a napan kenkuana da Pedro, Santiago, Juan ken Andres.

4“Ibagam man kadakami no kaanonto a mapasamak daytoy?” insaludsodda kenkuana. “Anianto ti mapasamak a pakakitaan a dimtengen ti tiempo a pannakatungpal amin dagitoy?”

5Imballaag ni Jesus, “Agannadkayo! Diyo ipalubos nga adda mangallilaw kadakayo. 6Adunto ti umay ket aramatenda ti naganko a kunkunada, ‘Siak ti Cristo!’ ket adunto ti allilawenda. 7Dikay agdanag inton mangngegyo ti arimbangaw ti gubat ken damdamag maipapan kadagiti dadduma a gubgubat iti adayo. Masapul a mapasamak dagitoy, ngem dida kayat a sawen a dimtengen ti panungpalan. 8Aggugubatto dagiti nasion, kasta met dagiti pagpagarian. Addanto ginggined kadagiti nadumaduma a lugar. Umayto ti bisin. Pangrugian laeng dagitoy ti panagsagaba a kas iti panagpasikal ti agpasngay.

9“Agannadkayo.#Mat. 10:17-20; Luc. 12:11-12. Tiliwen ken idarumdakayto. Saplitendakayto iti uneg dagiti sinagoga. Maisaklangkayto kadagiti agtuturay ken ar-ari gapu kaniak tapno paneknekanyo kadakuada ti Naimbag a Damag. 10Ngem sakbay a dumteng ti panungpalan, masapul a maikasaba ti Naimbag a Damag kadagiti amin a tattao. 11No matiliw ken maidarumkayo, saanyo a pakadanagan no anianto ti sawenyo. Maipaltiing kadakayo iti dayta a kanito. Ta dagiti isaoyonto saan nga agtaud kadakayo no di ket iti Espiritu Santo. 12Dagiti tattao papapataydanto dagiti mismo a kakabsatda, ket kastanto met ti aramiden dagiti amma kadagiti annakda. Dagiti annak busorendanto dagiti nagannak kadakuada ket papapataydanto ida. 13Guraendakayto#Mat. 10:22. dagiti amin a tattao gapu kaniak. Ngem maisalakanto ti siasinoman a makaibtur agingga iti panungpalan.”

Ti Nakabutbuteng a Mangdadael

(Mat. 24:15-28; Luc. 21:20-24)

14“Makitayonto#Dan. 9:27; 11:31; 12:11; 1 Mac. 1:54; 6:7. ‘Ti Nakabutbuteng a Mangdadael’ nga adda iti di rumbeng a pagsaadanna (maawatan koma ti agbasa ti kaipapanan daytoy).#14 (maawatan koma ti agbasa ti kaipapanan daytoy.) Saan nga innayon ti nangisurat iti daytoy nga ebanghelio ket naiturong iti para-basa tapno ilawlawagna ti kaipapanan dagitoy a balikas iti kongregasion. No agnaedkayo idiay Judea iti dayta a tiempo, masapul a kumamangkayo kadagiti bambantay. 15Umulog#Luc. 17:31. a dagus ti adda iti tuktok ti balay#15 TUKTOK TI BALAY: Kadagiti a panawen, nasimpa ti atep dagiti balbalay idiay Judea ket mabalin a paginanaan ken pagpariiran. ket saanen a sumrek iti balayna a mangala iti mabalinna nga itugot. 16Ti adda iti taltalon saanen nga agawid a mangala iti kagayna. 17Kadagita nga aldaw, kakaasinto dagiti masikog ken dagiti agpaspasuso. 18Ikarkararagyo iti Dios a saan koma a mapasamak dagitoy iti tiempo ti nepnep. 19Ta#Dan. 12:1; Pal. 7:14. ti rigat kadagita nga aldaw, saan pay a napaspasamak manipud pannakaparsua ti lubong. Dinto met masunotanen iti uray kaanoman. 20Ngem pinabassit ti Apo ti bilang dagita nga aldaw, ta no saan, awan koma ti tao a makalasat. Ngem gapu kadagiti pinilina, kinissayanna ti bilang dagita nga aldaw.

21“Daytoy ti gapuna a no adda agkuna, ‘Kitaenyo, adda ditoy ti Cristo!’ wenno ‘Kitaenyo, adda sadiay!’ diyo patpatien. 22Ta agparangto dagiti sinan-cristo ken dagiti sinan-profeta, ket agipakitadanto kadagiti pagilasinan ken datdatlag tapno yaw-awanda dagiti pinili ti Dios. 23Agannadkayo! Impakaammokon kadakay amin dagitoy sakbay a mapasamakda.”

Ti Yaay ti Anak ti Tao

(Mat. 24:29-31; Luc. 21:25-28)

24“Kadagita#Is. 13:10; Jl. 2:10, 31; 3:15; Pal. 6:12; Is. 13:10; Eze. 32:7. nga aldaw, kalpasan ti panawen ti rigat, agsipngetto ti init, dinto agraniag ti bulan, 25agtinnagto#Is. 34:4; Pal. 6:13; Jl. 2:10. dagiti bituen, ket dinto agsusurot ti urnos dagiti pannakabalin iti tangatang. 26Kalpasanna,#Dan. 7:13; Pal. 1:7. agparangto ti Anak ti Tao iti rabaw ti ulep nga umay a napnoan iti pannakabalin ken dayag. 27Ibaonnanto dagiti angheles a mapan kadagiti uppat a suli ti daga tapno ummongendanto dagiti tattao a pinili ti Dios manipud iti amin a paset ti lubong.”

Ti Maadal iti Kayo nga Igos

(Mat. 24:32-35; Luc. 21:29-33)

28“Adalenyo ti sursuro a maadaw iti kayo nga igos: no aguggot ken agrusingen dagiti bulongna, ammoyo nga agbaliwen ti panawen. 29Kasta met nga inton makitayo a mapasamak dagitoy, ammoyo nga asidegen ket dandanin mangrugi.#29 dandanin mangrugi; wenno asidegen ket dandanin umay. 30Laglagipenyo a mapasamakto amin dagitoy sakbay a matay dagiti amin a tattao iti daytoy a kaputotan. 31Mapukawto ti langit ken ti daga, ngem pulos a dinto mapukaw dagiti saok.”

Awan ti Makaammo iti Dayta nga Aldaw ken Oras

(Mat. 24:36-44)

32“Ngem#Mat. 24:36. no maipapan iti yaay dayta nga aldaw wenno oras, awan ti makaammo. Saan nga ammo dagiti angheles sadi langit wenno ti Anak. Ti laeng Ama ti makaammo. 33Agannadkayo. Agsaganakayo, ta diyo ammo no kaano a dumteng dayta a tiempo.

34“Mayarig#Luc. 12:36-38. daytoy iti maysa a tao nga agbiahe iti adayo a lugar. Sakbay a pumanaw, italekna ti balayna kadagiti adipenna. Ikkanna ti tunggal maysa iti pagrebbengan ket bilinenna nga agridam ti agaywan iti ruangan.

35“Agridamkayo ngarud, ta diyo ammo no kaano ti isasangpet ti akimbalay: mabalin nga iti sardam wenno iti tengnga ti rabii wenno iti parbangon wenno iti agsapa. 36Wen, agsaganakayo amangan no sumangpet a kellaat ket madanonnakayo a matmaturog.

37“Ti ibagak kadakayo, isaok met kadagiti amin a tattao: Agsaganakayo!”

Currently Selected:

San Marcos 13: RIPV

Highlight

Copy