Genesis 29

Sumangpet ni Jacob iti Balay ni Laban

1Intuloy ni Jacob ti panagdaliasatna agingga a dimmanon iti daga ti Daya. 2Nakakita iti bubon iti taltalon. Iti aglikmutna, adda tallo nga arban ti karnero nga agin-inana, ta sadiay ti pakapainumanda. Adda dakkel a bato a kalub ti bubon 3ket sa la maikkat no maurnongen dagiti karnero. Kalpasan a mapainum dagiti agpaspastor ti arbanda, ikalubda met la ti bato.

4“Taga-anokayo, gagayyem?” sinaludsod ni Jacob kadagiti agpaspastor nga adda sadiay.

“Taga-Harankami,” insungbatda.

5“Am-ammoyo kadi ni Laban nga apoko ni Nahor?” kinunana.

“Wen, am-ammomi,” insungbatda.

6“Kumusta met ti kasasaadna?” sinaludsodna.

“Nasayaat met,” insungbatda. “Daydiay man ni Raquel nga anakna agraman dagiti karnero ni tatangna.”

7Kinuna ni Jacob, “Yantangay ta nasapa pay, ken di pay tiempo ti panagyapon, apay a diyo painumen dagiti karnero sayo ipaarab manen ida?”

8Insungbatda, “Saan a mabalin ta urayenmi pay nga adda amin ditoy dagiti karnero sakamto itulid ti bato ket painumenmi ida.”

9Makisarsarita pay laeng ni Jacob kadakuada idi dumteng ni Raquel ken dagiti ipaspastorna a karnero ni tatangna. 10Apaman a nakita ni Jacob ti balasang ken ti arban ni Laban nga ulitegna, napan iti bubon, inikkatna ti bato a naiserra sana pinainum dagiti animal. 11Inasitganna ni Raquel ket inagkanna. Uray la nagsangit ni Jacob iti ragsakna. 12Imbagana kenkuana, “Kaanakannak ni tatangmo. Siak ti anak ni ikitmo a Rebecca.”

Nagtaray ni Raquel a napan nangibaga ken ni tatangna iti daytoy. 13Idi mangngeg ni Laban ti maipapan ken ni Jacob a kaanakanna, nagtaray a napan nangsabat kenkuana. Inarakup ken inagkanna ni Jacob sana inyawid iti taengda. Sinarita ni Jacob ken ni Laban ti amin a napasamak. 14Kinuna ni Laban, “Wen, pudno nga agkabagianta!”

Makabulan a nagyan sadiay ni Jacob.

Agserbi ni Jacob tapno Maasawana da Raquel ken Lea

15Kinuna ni Laban ken ni Jacob, “Saan a gapu ta agkabagianta ket agtrabahoka kaniak nga awan tangdanmo. Manot' kayatmo a sueldo?” 16Dua ti babbalasang nga annak ni Laban: ni Lea nga inauna ken ni Raquel nga inaudi. 17Napungay dagiti mata ni Lea, ngem napintas ni Raquel ken nasippukel ti pammagina.

18Adda panagayat ni Jacob ken ni Raquel, isu a kinunana, “Agserbiak kenka iti pito a tawen no la ket ipalubosmo nga asawaek ni Raquel.”

19Insungbat ni Laban, “Kaykayatko a sika ti mangasawa ken ni Raquel ngem ti sabali a lalaki. Agyanka ditoyen.”

20Pito a tawen a nagserbi ni Jacob tapno maasawana ni Raquel. Dina napupuotan ti panaglabas dagiti tawen ta ay-ayatenna unay ni Raquel.

21Kinuna ni Jacob ken ni Laban, “Nalpasen ti pito a tawen. Ipalubosmon nga asawaek ti anakmo.”

22Ngarud, nagpaboda ni Laban ket inawisna ti amin nga agnaed iti dayta a lugar. 23Ngem iti rabii ti parambak, saan a ni Raquel ti impanna iti kuarto ni Jacob no di ket ni Lea ket isu ti kinaidda ni Jacob. (24Inted ni Laban ti tagabuna a babai nga agnagan Zilpa ken ni Lea nga anakna tapno agserbi kenkuana.)

25Sa la naammoan ni Jacob iti sumuno a bigat a ni Lea ti kinaiddana. Napan ken ni Laban ket sinidirna, “Apay a kastoy ti inaramidmo kaniak? Nagserbiak kenka tapno maasawak ni Raquel. Apay nga inallilawnak?”

26“Agpayso ti kunam ngem dimi ugali ditoy nga ipaasawa nga umun-una ti inaudi,” insungbat ni Laban. 27“Palpasem pay daytoy makalawas a rambak ti kasar. Itedkonto kenka ni Raquel no la ket agtrabahoka pay kaniak iti pito a tawen.”

28Immanamong ni Jacob ket idi malpas ti rambak, inted ni Laban kenkuana ni Raquel a kas asawana. (29Inted ni Laban ti tagabuna a babai nga agnagan Bilha ken ni Raquel tapno agserbi kenkuana.) 30Iti kasta, kinaidda met ni Jacob ni Raquel; ad-adda nga ay-ayatenna ni Raquel ngem ni Lea. Ket nagtrabaho ken ni Laban iti pito pay a tawen.

Dagiti Annak ni Jacob

31Ammo ni Yahweh a saan nga ay-ayaten unay ni Jacob ni Lea, isut' gapuna nga inikkanna iti gundaway nga aganak. Ngem nagtalinaed nga awan anak ni Raquel. 32Nagsikog ni Lea ket naganak iti maysa a lalaki. “Ammo ti Apo ti parikutko. Ita, awan duadua nga ayatennakon ti asawak,” kinunana. Isut' gapuna a pinanagananna ti maladaga iti Ruben.#32 RUBEN: Umasping ti pannakabalikasna iti makita wenno anak a lalaki ken ammona ti parikutko iti Hebreo.

33Nagsikog manen ni Lea ket naganak iti lalaki. “Inted pay kaniak ti Apo daytoy nga anak ta naammoanna a dinak ay-ayaten ti asawak,” kinunana. Isut' gapuna a pinanagananna ti maladaga iti Simeon.#33 SIMEON: Umasping ti pannakabalikasna iti naammoan iti Hebreo.

34Nagsikog manen ket naganak iti maysa pay a lalaki. “Ita, ad-adda a maisinggalut kaniakon ni asawak, ta tallo ti annakmin,” kinunana. Isut' gapuna a pinanagananna ti maladaga iti Levi.#34 LEVI: Umasping ti pannakabalikasna iti maisinggalut iti Hebreo.

35Nagsikog manen ket naganak iti maysa pay a lalaki. “Ita, idaydayawko ti Apo,” kinunana. Isut' gapuna a pinanagananna ti maladaga iti Juda.#35 JUDA: Umasping ti pannakabalikasna iti idaydayaw iti Hebreo. Manipud idin, simmardengen nga aganak.

Currently Selected:

Genesis 29: RIPV

Highlight

Copy