2 Samuel 4
4
Mapapatay ni Isboset
1Nagbuteng ni Isboset nga anak ni Saul idi madamagna ti pannakapapatay ni Abner idiay Hebron. Nagdanag met dagiti amin nga Israelita. 2Adda dua a tattao ni Isboset, da Baana ken Recab, a pangulo dagiti bunggoy a para-raut. Annak ida ni Remmon a taga-Beerot iti tribu ti Benjamin. (Maibilang ti Beerot a paset ti Benjamin, 3ngem pimmanaw idi dagiti sigud nga agnaed ket nagkamangda idiay Gettaim a nagnaedanda manipud idin.)
4Adda#2 Sam. 9:3. pay apoko ni Saul; isu ni Mefiboset nga anak ni Jonatan. Lima idi ti tawen ni Mefiboset idi matay da Saul ken Jonatan. Idi dumteng ti damag a naggapu idiay Jezreel maipapan iti ipapatayda, binagkat ti mangaw-awir kenkuana ket intarayna nga impanaw. Ngem gapu iti panagdardarasna, naibbatanna ni Mefiboset ket napilay ti ubing.
5Simrek da Recab ken Baana iti balay ni Isboset iti tumengnga ti aldaw. Agin-inana idi ni Isboset a kas iti ar-aramidenna iti agmatuon. 6Gapu ta nakadungsa idi ti babai nga agtataep iti trigo iti ruangan bayat ti panagtaepna, nakastrek dagiti agkabsat nga awan ti nakadlaw kadakuada.#6 Maysa a kadaanan a patarus ti nakaadawan ti bersikulo 6. Iti Hebreo, Nagtartarusda iti balay a siaawit iti trigo ket dinuyokda ti tianna. Kalpasanna, naglibas da Recab ken Baana. 7Apaman a nakaunegda, napanda iti kuarto ket pinatayda ni Isboset a matmaturog. Pinutolanda ket innalada ti ulona sada naglibas. Nagpatnagda a nagna iti Tanap ti Jordan. 8Idi dimtengda idiay Hebron, napanda indatag ken ni Ari David ti ulo ni Isboset. Kinunada, “Adtoy ti ulo ni Isboset nga anak ni Saul a kabusormo a nagpanggep a mangpatay kenka. Ita nga aldaw, impalubos ti Apo a balsen ti Natan-ok nga Ari ni Saul ken dagiti kaputotanna.”
9-10Ngem#2 Sam. 1:1-16. kinuna ni David, “Idi addaak idiay Siklag, adda tao a nangipadamag kaniak iti ipapatay ni Saul. Impagarupna a naimbag ti impadamagna ngem pinatayko iti nagan ti Apo a sibibiag a nangisalakan kaniak iti amin a pakarigatak. Dayta ti gunggona nga intedko kenkuana iti naimbag a damag nga inyegna! 11Nakarkaro pay ti lak-amen dagiti managdakdakes a mangpatay iti tao nga awan basolna iti uneg ti mismo a balayna! Balsenkayo gapu iti panangpapatayyo kenkuana ket pukawenkayo iti rabaw ti daga.”
12Nagbilin ni David ket nagtungpal dagiti tattaona. Pinatayda da Recab ken Baana, pinutedda dagiti ima ken sakada sada imbitin dagitoy iti asideg ti maysa a bubon idiay Hebron. Innalada ti ulo ni Isboset ket inkalida iti tanem ni Abner idiay Hebron.
Currently Selected:
2 Samuel 4: RIPV
Highlight
Share
Copy
Want to have your highlights saved across all your devices? Sign up or sign in
© 1996 Philippine Bible Society
