1 Pedro 2
2
Ti Sibibiag a Bato ken ti Nasantoan a Nasion
1Iwaksiyo ngaruden ti amin a kinadakes. Awan koman ti panagulbod, panaginsisingpet, panagimon ken pammadpadakes. 2Kaskay la koma kayyanak a maladaga a kanayon a mawaw iti puro a gatas a naespirituan tapno iti yiinumyo, dumakkelkayo ket maisalakankayo. 3Kas#Sal. 34:8. kuna ti Nasantoan a Surat, “Babaen iti padasyo, natakuatanyo a manangngaasi ti Apo.”
4Umasidegkay iti Apo. Isu ti sibibiag a bato nga imbelleng dagiti agipatpatakder ta imbilangda nga awan serserbina, ngem pinili ken impateg ti Dios. 5Umasidegkayo a kas sibibiag a batbato a maaramat iti pannakabangon ti naespirituan a templo. Agserbikayo a kas nasantoan a papadi a mangipaay iti daton a naespirituan ken makaay-ayo iti Dios babaen ken Jesu-Cristo. 6Ta#Is. 28:16 (LXX). kuna ti Nasantoan a Surat:
“Pimmiliak iti napateg a bato a kas pasuli;
ikabilko ita idiay Sion.
Ket siasinoman a mamati kenkuana, pulos nga awanto pannakapaayna.”
7Napateg#Sal. 118:22. unay daytoy a bato kadakayo a mamati. Ngem kadagiti saan a mamati, kunana pay:
“Ti bato nga imbelleng dagiti agipatpatakder,
nagbalin a kangrunaan unay a bato.”
8Kuna#Is. 8:14-15. pay ti sabali a paset ti Nasantoan a Surat:
“Daytoy ti bato a pakaitibkolan,
ken pakaitublakan dagiti tattao.”
Naitibkolda agsipud ta dida namati iti sao. Kasta ti intuding ti Dios a pagbanaganda.
9Ngem#Ex. 19:5-6; Is. 43:20 (LXX); Ex. 19:5; Deut. 4:20; 7:6; 14:2; Tit. 2:14; Is. 43:21; Is. 9:2. dakayo ti napili a puli. Papadikayo nga agserbi iti Dios nga Ari. Nasionkayo a nasantoan. Tattaonakayo ti Dios. Inruarnakayo iti kasipngetan ket impannakayo iti nakaskasdaaw a lawagna. Pinilinakayo a nangipakaammo kadagiti nakaskasdaaw nga aramidna. 10Saankay#Os. 2:23. idi a tattao ti Dios, ngem ita tattaonakayon. Diyo ammo idi ti kaasi ti Dios, ngem ita inawatyon ti kaasina.
Agbiagkayo a kas Tagabu ti Dios
11Kakabsatko, kas ganggannaet ken agdaldaliasat iti daytoy a lubong, agdawatak kadakayo. Dikay paiturayan kadagiti nailasagan a tarigagay a kanayon a makiranget iti kararua. 12Agbiagkayo koma a natakneng iti imatang dagiti Hentil. Uray no kunada a managdakdakeskayo, mabigbigdanto met laeng dagiti naimbag nga aramidyo ket idaydayawdanto ti Dios inton dumteng ti Aldaw a yaayna.
13Gapu iti Apo, masapul a paiturayankayo kadagiti agtuturay nga insaad ti tao: iti Emperador a kangatoan nga agturay, 14ken kadagiti gobernador nga imbaonna a mangdusa kadagiti managdakdakes ken mangidaydayaw kadagiti agaramid iti naimbag. 15Ta kayat ti Dios a, babaen kadagiti naimbag nga aramidyo, maawanan iti gundaway dagiti maag nga agsao iti ulbod ken awan serserbina.
16Agbiagkayo a kas tattao a nawayawayaan, ngem diyo aramaten ti wayawayayo a pangkalub iti aniaman a dakes. Agbiagkayo ketdi a kas tagabu ti Dios. 17Agraemkayo kadagiti amin a tattao. Ayatenyo dagiti kakabsatyo iti pammati. Agbutengkayo iti Dios ket padayawanyo ti Emperador.
Pagulidanantayo ti Panagsagaba ni Cristo
18Dakayo a katulongan, paiturayankayo kadagiti amoyo. Ipakitayo kadakuada ti naan-anay a panagraem, saan laeng a kadagiti naasi ken mannakaawat, ngem uray pay kadagiti nauyong. 19Gunggonaannakayto ti Dios no maibturanyo ti agsagaba a saan a nainkalintegan ta ammoyo ti pagayatanna. 20Maidaydayawkayo aya no ituredyo ti dusa a kaikarianyo gapu iti dakes nga inaramidyo? Ngem no ibturanyo ti agsagaba idinto a naimbag ti aramidyo, bendisionannakayto ti Dios. 21Daytoy ti nangayaban ti Dios kadakayo, agsipud ta nagsagaba ni Cristo gapu kadakayo ket nangibati iti pagulidanan tapno surotenyo ti tugotna. 22Saan#Is. 53:9. a nagbasol. Awan ti insawangna a kinaulbod. 23Idi#Is. 53:7. nalalais, saan a nanglais. Idi nagsagaba, saan a namutbuteng. Nagtalek ketdi iti Dios, ti nalinteg nga Ukom. 24Inawit#Is. 53:5-6 (LXX). ni Cristo dagiti basbasoltayo iti krus tapno mawayawayaantay iti pannakabalin ti basol ket agbiagtay a nalinteg. Ta babaen kadagiti sugatna, naagasankayo. 25Mayarigkay idi kadagiti karnero a nayaw-awan. Ngem ita, naisublikayon a sumurot iti Pastor ken Agaywan kadagiti kararuayo.
Currently Selected:
1 Pedro 2: RIPV
Highlight
Share
Copy
Want to have your highlights saved across all your devices? Sign up or sign in
© 1996 Philippine Bible Society
