San Mateo 27

Batedreni Jesús loj Pila't

(Mr. 15:1; Lc. 23:1‑2; Jn. 18:28‑32)

1Che bianij lo guedxliuj, guiraa reni najc rebixhojz ni rnibee näjza rebeṉgool xten rexpejṉ Israel bia'nreni diidx xho gunreni ju'treni Jesús. 2Baliibrenini, guläärenini ro'c, huisa'nrenini loj Poncio Pila't, ni najc gubernadoor.

Xho gujt Judas

3Dxejcti Judas, ni bato' Jesús, che bahuiini bacuaquijreni Jesús, basiejch lajzni, guc-huin lajzni, dxejc huidzu'ni gaḻbitzuu meel pla't loj rebixhojz ni rnibee näjza loj rebeṉgool. 4Räjpni:

―Banitduxhä lo Dios sa'csi bato'ä te bejṉ ni xhet bejndi.

Dxejc räjpreni lojni:

―Xhixh gunnu. Ni'c najc xcuentlu; lujti najn.

5Dxejc bacuaa Judas meelga lo yuj neṉ guidoro, biriitini ro'c. Sas huijni, baliibni te duu guejnni, gojḻni lo te yajg, ro'cti gujtni.

6Rebixhojz ni rnibee batojpreni meelga, räjpreni:

―Di gac di guizäḻnu meelre neṉ caj gojn sa'csi najcni xcuent xtiejn te bejṉ.

7Dxejc bia'nreni diidx con meelga siireni te la' yuj xten te dade' ni runchee guejs te ro'c gucua'tzreni rebeṉzijt. 8Ni'cni ṉajli rniireni yujga: “Yurejn”. 9Si'c gusojb diidx ni gunii Jeremías, dade' ni gunii xtidx Dios galoo che räjpni: “Cua'reni gaḻbitzuu melpla'tga si'cti basoob rexi'n Israel sajc bejṉga. 10Con meelga guziireni yuj lo bejṉ ni runchee guejs, sigacni gunibee xtadnu Dios.”

Gusuj Jesús nez loj Pila't

(Mr. 15:2‑5; Lc. 23:3‑5; Jn. 18:33‑38)

11Bidzuṉnäjreni Jesús loj Pila't ni najc gubernadoor. Dxejc gunabdiidxni, räjpni lo Jesús:

―¿La luj najc ṟeii xten rexpejṉ Israel, ä?

Räjp Jesús lojni:

―Najcni si'cni najlu.

12Laḻni cabe'c rebixhojz ni rnibee näjza rebeṉgool rexquej Jesús xhetliidi guniidi Jesús. 13Dxejc räjp Pila't lojni:

―¿La di diajglu jiejn guiraa rediidx ni caniireni cagucuaquijreni luj, ä?

14Per xhetliidi diidxdi basejc Jesús, nicla xcuent tejsi diidx ni bacuaquijrenini. Ni'cni bidxeloduxh gubernadoorga.

Gunibeereni guet Jesús

(Mr. 15:6‑20; Lc. 23:13‑25; Jn. 18:38–19:16)

15Neṉ redxe lanij rajpreni costumbr rusḻaa Pila't tej bejṉ ni cue rebejṉ loj reni yu' neṉ latzguiib. 16Neṉ redxejga guyu' te bejṉ ni sääb xtiidxni ni laa Barrabás. 17Cheni tre' guiraareni ro'c, gunabdiidx Pila't lojreni:

―¿Chuni'c rlajztu gusḻaä́, la susḻaä Barrabás o Jesús ni laa Crist?

18Sa'csi najn Pila't rdxe'chlajzreni lo Jesús, ni'c bateedrenini lojni.

19Laḻ ni sobga' Pila't lo yajgxhiil cadro rujnni yäḻguxhtis, baxhaḻ chäälni diidx lojni, räjpni:

―Xhet gundilu dade'ga ni xhet bejndi, sa'csi nuchej nadxuudx gunixcaḻä xcuentni.

20Niluxh rebixhojz ni rnibee näjza rebeṉgool baquiilreni rebejṉ te gunabreni ḻaa Barrabás, näjza te guet Jesús. 21Dxejcti gunii gubernadoor stehuält, räjpni lojreni:

―¿Chu tej loj guiro'preni rlajztu gusḻaä́?

Dxejc guredxa'reni, räjpreni:

―¡Barrabás!

22Gunabdiidx Pila't, räjpni:

―¿Xhi gunnää́ Jesús ni laaza Crist?

Guiraareni guredxa':

―Bacuaani lo crujz.

23Dxejc räjp Pila't lojreni:

―¿Xhi latsiaj bejnni?

Niluxh laareni guredxa'rureni, räjpreni:

―¡Bacuaani lo crujz!

24Che bahuii Pila't xlia'si caniini, alga gusloj rebejṉ cayujn te bieiduxh, cua'ni nis, gudiibni ṉaani nez lojreni, räjpni:

―Dina xcaquiä xtiejn bejṉre ni xhet bejndi. La'tu coḻhuii xho guntu. Xcuenttitu najcni.

25Dxejc guiraa rebejṉga badzu' diidxre, räjpreni:

―Suxcaquijnu xtiejnni, nuurnu näjza rexi'nnu.

26Dxejc basḻaa Pila't Barrabás, dxejc gunibeeni gudijnreni Jesús dxejc bateednini ladzṉaa rebejṉ te gucuaarenini lo crujz.

27Dxejc huinä resoldaad xten gubernadoor Jesús lo pretoor, yu' cadro rujnreni yäḻguxhtis, ro'c batojpreni guiraa resa'reni. 28Dxejc gulääreni xhajbni, bashuajcwrenini te lad xniaa. 29Dxejc bencheereni te coroṉ guejch, basäḻrenini yejcni, basäḻreni te yabixijl ṉaani, xladbeeni, sas bazuxhijbreni nez lojni guslogajc caguxhisnäjrenini, räjpreni:

―¡Coḻlä'p xpala'n ṟeii xten rexpejṉ Israel!

30Sas batiobxhejnreni lojni, cua'reni yabixijlga te ni'c batiäjlreni yejcni. 31Che gulujx baxhiznäjrenini, gulääreni lad xniaa ni najcwni. Dxejc bashuacwsacrenini lagajc xhajbni, sanätirenini te xcajni lo crujz.

Bacuaareni Jesús lo crujz

(Mr. 15:21‑32; Lc. 23:26‑43; Jn. 19:17‑27)

32Cheni sariireni, bidxaagreni te bejṉ ni siääd guedx Cirene, laani Simón, basguureni dade'ga xcrujz Jesús.

33Che bidzujṉreni te lajt ni laa Gólgota, nani säloj: dan Calabeer, 34ro'c badeedreni bin nu'ch cuanlaa te gu' Jesús. Te bocbäztisni gu'ni, dxejc naaddiruni niä'nini.

35Cheni abacuaareni Jesús lo crujz, gudzujt resoldaad yejc xhajbni, te si'c gudisreni xhajb Jesús cua'reni, te si'c guzojb diidx xten te dade' ni gunii xtidx Dios. 36Gurejtireni ro'c, gusloj canäjreni Jesús. 37Yejc crujzga bacuaareni te guijtz con letrro. Lo guijtzga rcaj xhini'c najc xtojḻ nani cayejt. Lo guijtzga caj: “Dee najc Jesús ṟeii xten rexpejṉ Israel.”

38Näjza tio'p gubaan cuaj lo stio'p crujz con laani. Tejni cuaj lo te crujz xladbee Jesús, steeni cuaj xladbäjgwni. 39Luxh renani sadejd nejzga guniyajreni Jesús, cagusniibreni yejcreni, 40cayäjpreni lojni:

―¡Ja'ä! Luj ni nutiexhlu guidoo, luxh choṉtis dxej niunchesacluni; palga gulii najclu Xi'n Dios, biäjt loj crujzga.

41Näjza rebixhojz ni rnibee, näj remastr xten leii, baxhiznäjrenini räjpreni loj sa'reni:

42―Basḻaani xhidajl bejṉ, xhoxh di gacdi gusḻaani lagajc laani. Palga najcni ṟeii xten rexpejṉ Israel, sujiäjtni lo crujz naṉaj te chalilajznu xtiidxni. 43Huinälajzni Dios, ṉaj sugusḻaa Diosni palga sanälajz Diosni; ni najni: “Narä nacä Xi'n Dios.”

44Regubaan ni caj lo recrujz sigajcza guniyajreni Jesús.

Che gujt Jesús

(Mr. 15:33‑41; Lc. 23:44‑49; Jn. 19:28‑30)

45Dxejcti bicäjy guideb guedxliuj läidxej hasta rcachoṉ gudxej. 46Si'cti rcachoṉ gudxej guredxa' Jesús dipduxh, räjpni:

―Elí, Elí, ¿lama sabacatani? ―dee säloj: Xtiozä, Xtiozä, ¿xhicuent gulälazlu narä?

47Yu' reni suga' ro'c, che biejn diajgreni räjpni si'c, räjpreni:

―Cabejdx Dade're Elías.

48Baxuṉgajc tejreni, huica'ni te sponj, bahuajdxnini loj binagr, bacuaanini yejc te biquii te badzugni binagrga ro' Jesús. 49Dxejc reni tre' ro'c räjp:

―Basaan; guidon la siääd Elías te gusḻaanini.

50Dxejc guredxaduxh Jesús stehuält, basḻaatini xpritni. 51Lagajc oṟga biräsya' ladro ni zääb neṉ guidoro, gujcni tio'p la' jiaali hasta lo yuj. Gujc te xuro, sas gusuj bej reguiro. 52Dxejc gubicaj reguij ni niäuu ro' rebaa, luxh gubaṉsac xhidajl xpejṉ Dios ni gujt aguc xchej. 53Dxejcti, che huäjs Jesús lo rebeṉgut, biriireni neṉ baa, baluilojreni lo xhidajl bejṉ ni rbäjz guedx Jerusalén.

54Dxejc capitán xten resoldaad näjza resoldaad ni canäj Jesús, che bahuiireni xuduxh näjza guiraa recos ni gujc ro'c, bidxejbreni, räjpreni:

―Guliipacni najc dade're Xi'n Dios.

55Zijtru tre' xhidajl regunaa ni biädnajl Jesús che biriini nez Galilee te bahuiirenini. Cadxelojtisreni guiraa ni cayajc ro'c. 56Tej regunaaga najc Marii Magdaleṉ, steeni najc Marii xnan Jacoob näjza José, steeni najc xnan rexi'n Zebedeo.

Huicua'tzreni Jesús

(Mr. 15:42‑47; Lc. 23:50‑56; Jn. 19:38‑42)

57Che gojl gudxej, bidzujṉ te beṉrajp ni siääd guedx Arimatea; laani José. Näjza dade'ga najc tej reni birinajl Jesús. 58Huij dade'ga loj Pila't, gunabni tiejxh Jesús. Dxejc gunibee Pila't gudeedrenini lojni. 59Cua'ti José tiejxh Jesús, batejbnini neṉ te bariadya, 60huitixhnini neṉ xpaapacni. Nacoob baaga, gojnni bidäänni cuä' te guilaj. Dxejc basäuni ro' baaga con guiro, dxejcti siini. 61Sobga'za Marii Magdaleṉ näjza stee Marii nez loj baa, bahuiireni biga'tzni.

Xhi räjp resoldaad ni cuanäj xpaa Jesús

62Che gudejd dxej xten ni gulec-cheereni lanij, bara yääl bidojp rebixhojz ni rnibee näjza rebejṉ ni laa refarisee, bidzujṉreni loj Pila't, 63räjpreni lojni:

―Dad, banaj laaznu xhi räjp bejṉ ni rusgueere. Räjpni: “Che ted choṉ dxej sibaṉsacni loj rebeṉgut.” 64Ni'c baxhaḻ chu chacanäj ro' baaga dxejli guisa' choṉ dxej, te di chää rexpejṉpacni chaläärenini tiejxhni, dxejc gäbreni loj rebejṉ: “Agubaṉsacni loj rebeṉgut.” Yäḻrusgueega sajc cuentroru loj ni gujc ganid.

65Räjp Pila't lojreni:

―La'tu rajptu te cuaa soldaad; coḻchäj, basäutzu'tz ro' baaga si'ctis ni sajc guntu.

66Dxejcti sääreni, basäutzu'tzreni ro' baaga; con resoldaad bacuaareni te seii lojni te rut faḻdini. Dxejc basa'nreni resoldaad canäj ro'c.

Currently Selected:

San Mateo 27: zaw

Highlight

Copy