SAN MATEO 24

Ngulala ti cati̱ laa tonu

1Lo'o li' ndu'u Jesús ne' laa tonu bi'; na cua tyaa ti, lo'o lye tsa nchcui' ngu' nu ndyaca tsa'a̱ ji'i̱ yu lo'o yu cha' ji'i̱ laa tonu bi', cha' tso'o tsa ña'a̱ lcaa ni'i̱ nu cuentya ji'i̱ laa bi'. 2Li' nguxacui̱ Jesús cha' ji'i̱ ngu' bi':

―Ña'a̱ tso'o ma̱ ji'i̱ lcaa cha' nu ntsu'u ji'i̱ laa tonu re ―nacui̱ Jesús ji'i̱ ngu' bi'―. Cha' liñi nchcui' na' lo'o ma̱ juani, cha' tye laa re cati̱ ña'a̱ cuayá' ni sca quee nu ntsu'u sii' laa re, nga'aa tyanu bi' hichu̱' tya'a.

Cha' ti'í nu caca lo'o cua tye ti chalyuu

3Li' ndyaa ngu' nde lo xlya ca'ya Olivos. Ca bi' ndyaca'a̱ Jesús, lo'o li' cuaana ti nchcui' ngu' nu ndyaca tsa'a̱ ji'i̱ lo'o yu, nchcuane ngu' ji'i̱:

―Cuacha' nu'u̱ ji'i̱ cua, ¿ni jacua' caca cha' cuxi bi' ji'i̱ laa tonu bi'? Lo'o jua'a̱, ¿ñi'ya̱ caca cha' lo'o ca̱a̱ nu'u̱, nu lo'o cua tye ti chalyuu? ―nacui̱ ngu' bi' ji'i̱.

4Li' ngulu'u la xi Jesús ji'i̱ ngu' bi':

―Cua'ni tii ti' ma̱, cui'ya ma̱ cuentya cha' ná tucui cñilo'o ji'i̱ ma̱ ―nacui̱―. 5Nde loo la ca̱a̱ tyu̱u̱ tya'a ngu' cuiñi nu ñacui̱ cha' cuentya jna' lijya̱ ngu'. “Cristo laca na'”, ñacui̱ ngu' bi' ji'i̱ ma̱, lo'o jua'a̱ cñilo'o ngu' ji'i̱ quiña'a̱ ñati̱ nu jlya ti' cha' bi'. 6Tyempo bi' cañi cha' nxu̱u̱ tya'a ngu' nasiyu̱ re lo'o ngu' xa' nasiyu̱, lo'o jua'a̱ caja cha' ji'i̱ ma̱ cha' nxu̱u̱ tya'a ngu' nasiyu̱ tyijyu'. Ná cutsi̱i̱ ma̱ li'. Ntsu'u cha' caca jua'a̱, pana tya lyiji tye chalyuu li'. 7Xu̱u̱ tya'a ñati̱ sca tsu' lo'o ngu' chaca tsu', lo'o jua'a̱ xu̱u̱ tya'a ñati̱ sca quichi̱ tlyu lo'o ñati̱ chaca quichi̱ tlyu. Li' caja jbi'ña ji'i̱ ngu', ca̱a̱ quicha nu xñi ji'i̱ lcaa ngu', lo'o jua'a̱ tyu̱u̱ se'i̱ clyacui̱ chalyuu li'. 8Pana lcaa cha' bi' caca lo'o chca nguxana ti cha' chcube' ñati̱ chalyuu, si'i na cua ndye chalyuu li'.

9’Nu lo'o xana cha' cuxi bi', tejeya' ngu' ji'i̱ ma̱ cha' xcube' ngu' ji'i̱ ma̱, hasta ña'a̱ cuayá' nu cujuii ngu' ji'i̱ ma̱, cha' ntsu'u ngu' tyucui ña'a̱ chalyuu nu caca ti'í ti' ngu' ña'a̱ ngu' ji'i̱ ma̱ xqui'ya na'; 10bi' cha' tyu̱u̱ tya'a ngu' tya'a ma̱ caca taja ti' ngu' jna', nga'aa talo ngu' cha' xñi la ngu' cha' 'na li'. Lo'o jua'a̱ ntsu'u ngu' tya'a ma̱ nu cujuii cuañi' ngu' ji'i̱ tya'a ma̱ ya' ngu' cuxi, jua'a̱ ntsu'u ngu' tya'a ma̱ nu caca ti'í ti' ngu' ña'a̱ ngu' ji'i̱ xa' la ngu' tya'a ma̱ li'. 11La cui' jua'a̱ tyu'u tucua quiña'a̱ ngu' cuiñi, nu laca tu'ba ji'i̱ ycui' Ndyosi, ñacui̱ ngu'. Cñilo'o ngu' bi' ji'i̱ tyu̱u̱ tya'a ma̱, cu'ma̱ nu laca ma̱ ñati̱ 'na. 12Quiña'a̱ tsa cha' cuxi caca, ña'a̱ cuayá' nu quiña'a̱ tsa ngu' tya'a ma̱ nga'aa cua'ni tya'na ti' ngu' ji'i̱ xa' la ngu' tya'a ma̱. 13Pana ná cube ti' ma̱, lcaa cu'ma̱ nu talo tyiquee ma̱ ji'i̱ cha' cuxi bi', cua'ni lyaá na' ji'i̱ cu'ma̱ li', ña'a̱ cuayá' nu tye chalyuu ―nacui̱ Jesús―. 14Ntsu'u cha' culu'u ma̱ cha' jna' ji'i̱ ñati̱, lcaa cha' tso'o nu nchcui' na', ñi'ya̱ caca lo'o laca ycui' Ndyosi loo ne' cresiya ji'i̱ ñati̱; ntsu'u cha' chcui' ma̱ cha' bi' lo'o ñati̱ tyucui ña'a̱ chalyuu, cha' caca cuayá' ti' ngu' ji'i̱ cha' bi' nde lcaa nasiyu̱. Lo'o li' tye chalyuu.

15’Jyo'o Daniel nu ngua tu'ba ji'i̱ ycui' Ndyosi cua sa'ni ni, cua nchcui' yu cuentya ji'i̱ sca na nu suba' tsa, nu cua'ni ñu'u̱ ji'i̱ lcaa na lubii. (Caca cuayá' ti' cu'ma̱ ji'i̱ cha' bi' nu lo'o chcui' ma̱ lo quityi re.) Nu lo'o ña'a̱ ma̱ cha' ndu̱ na suba' bi' ca su tacati tsa ne' laa tonu bi' ―nacui̱ Jesús―, 16li' ca cuayá' ti' ma̱ cha' tso'o la si xna lcaa ma̱ nu ndi'i̱ ma̱ nde loyuu su cuentya Judea, xna ma cha' tyu'u cuatsi' ma̱ laja ca'ya. 17Si ndu̱ ñati̱ que ni'i̱ ji'i̱ tsa̱ bi', nga'aa ta tyempo tyatí̱ ngu' ni'i̱ cha' culo ngu' yu'ba nu ntsu'u ji'i̱ ngu'; nga'a̱ cha' ca'ya clya ngu' bi' nde lo yuu cha' xna clya ngu' li'. 18Lo'o jua'a̱ si ntsu'u ngu' ne' quixi̱', nga'aa ta tyempo ji'i̱ ngu' cha' xtyu̱u̱ ngu' tya̱a̱ ngu' nde to' tyi ngu', cha' squi'ya ngu' te' quicha̱' ji'i̱ ngu'; nga'a̱ cha' xna clya ngu' bi' li'. 19Lo'o jua'a̱ tya'na tsa caca ji'i̱ nu cuna'a̱ tana lo'o tyalaa tsa̱ bi', tya'na tsa ngu' cuna'a̱ nu ntsu'u cubi' cuañi' nu tya ndyati' li'. 20Tso'o si jña ma̱ cha' ji'i̱ ycui' Ndyosi cha' ná ntsu'u cha' xna ma̱ lo'o caca tyempo tlya', cha' ná ntsu'u cha' xna ma̱ tsa̱ ta'a nu ndi'i̱ cña' ngu'. 21Tyempo lo'o lye tsa chcube' ngu' caca bi', nu lo'o ntsu'u cha' xna ma̱ li'; bilya chcube' ñati̱ chalyuu jua'a̱ tya lo'o ngüiñá ycui' Ni chalyuu hasta juani, lo'o jua'a̱ nga'aa si'i jua'a̱ chcube' ñati̱ tyempo ca nde loo la. 22Pana cua nacui̱ ycui' nu Xu'na na cha' xti ti tsa̱ caca tyempo nu chcube' ngu' jua'a̱; si tyiquee' talo tyempo cuxi bi', nga'aa clyaá ni tsaca ñati̱ chalyuu li'. Pana tya'na ti' ycui' Ndyosi ña'a̱ Ni ji'i̱ ñati̱ ji'i̱ Ni, bi' cha' cua'ni Ni cha' xti ti tsa̱ caca tyempo cuxi bi'.

23’Nu lo'o caca tyempo bi', si ñacui̱ ngu': “Ña'a̱ ma̱ ña'a̱, cua ndyalaa Cristo ca nde”; jua'a̱ si ntsu'u ngu' nu chcui' ndi'ya̱: “Cua ndyalaa Cristo quichi̱ jua”, ná taquiya' ma̱ ji'i̱ cha' cuiñi nu nchcui' ngu' bi' li', 24cha' Cristo cuiñi caca nu bi'. Lo'o jua'a̱ tyu'u tucua xi ngu' cuiñi nu chcui' cha' tu'ba ji'i̱ ycui' Ndyosi laca ycui' ca ngu', nu cuiñi ti cua'ni cha' tlyu cha' cube tsa ti' xa' ñati̱; cua'ni ngu' cuiñi bi' jua'a̱, cha' nti' ngu' cua'ni ngu' ngana ji'i̱ ma̱, lo'o jua'a̱ ji'i̱ lcaa ñati̱ nu cua ngusubi ycui' Ndyosi ji'i̱. 25Cua ndacha' na' cha' bi' ji'i̱ ma̱ juani, nu tya lyiji caca cha' cuxi bi', 26cha' ná cua'a̱ jyaca̱ ma̱ ji'i̱ ngu' si ñacui̱ ngu': “Tsaa na slo Cristo. Nga'a̱ ycui' yu ne' quixi̱' jua juani.” Ná tsaa ma̱ lo'o ngu' li'. Ná taquiya' ma̱ ji'i̱ ngu' si ñacui̱ ngu' ji'i̱ ma̱: “Cuaana ti ndi'i̱ yu ne' ni'i̱ jua juani”. Ná xñi ma̱ cha' nu chcui' ngu' bi' tsiya' ti. 27Ñi'ya̱ laca lo'o ndyubii xee tyi'yu tyucui ña'a̱ nde cua̱, ña'a̱ lcaa ñati̱ ji'i̱ li'; jua'a̱ caca lo'o ca̱a̱ na' chaca quiya', la cui' na' nu cua nda Ni 'na lijya̱a̱ cha' caca na' ñati̱. 28Nu lo'o ntsiya sca na tyucu̱, hora ti tyalaa culexu slo.

Ndi'ya̱ caca lo'o chaca quiya' ca̱a̱ ycui' nu cua lijya̱ cha' caca ñati̱

29’Nu lo'o cua ndye tsa̱ nu nga'a̱ cha' chcube' ngu', li' yala ti caca talya ña'a̱ xee cuichaa, lo'o jua'a̱ nga'aa tyaca̱' xee co' li'. Tyalú cuii lo'o cualya nu ntsu'u nde cua̱ ca lo yuu, lo'o jua'a̱ xquiña Ni lcaa na nu ntsu'u nde cua̱. 30Li' nde cua̱ tyu'u tucua cuayá' nu sta na' nu cua nda Ni 'na lijya̱a̱ cha' caca na' ñati̱. Lye tsa caca xñi'i̱ ti' lcaa ñati̱ chalyuu nu ndi'i̱ cua ña'a̱ ca quichi̱ tyi ngu', xi'ya tsa ngu' li'. Lo'o na' nu cua nda Ni 'na lijya̱a̱ cha' caca na' ñati̱ ni, ña'a̱ ngu' 'na cha' lijya̱ na' laja coo nu ndubi tsa ña'a̱; lye xi ña'a̱ caca li', cha' lo'o lcaa juersa 'na ca̱a̱ na' li'. 31Nu lo'o lye cañi cui' chcua̱, li' culo na' cña ji'i̱ quiña'a̱ tsa tya'a xca̱ 'na cha' ca̱a̱ xca̱ bi', cha' xuti'i̱ se'i̱ ti ji'i̱ lcaa ñati̱ nu cua ngusubi ycui' Ni ji'i̱; macala su ndi'i̱ ngu' tyucui ña'a̱ chalyuu tyu'u ngu' ca̱a̱ ngu' li'.

32’Ntsu'u sca cha' nu ca tsa'a̱ na lo'o ña'a̱ na yaca, masi yaca quityi, masi yaca ntsati̱. Nu lo'o xana tyucua sati̱, li' caluu laca' bi'; jlo ti' na cha' cua ngulala ti tyalaa ni tyo li'. 33Lo'o jua'a̱, lo'o ña'a̱ ma̱ cha' tyu'u tucua lcaa cha' nu nchcui' na' lo'o ma̱ tsa̱, li' ca cuayá' ti' ma̱ cha' cua ngulala ti tyempo lo'o tye cha' re. 34Cha' liñi chcui' na' lo'o ma̱ juani, cha' bilya cajaa lcaa ñati̱ nu lu'ú chalyuu juani lo'o caca cha' nu cua nchcui' na' ji'i̱ tsa̱. 35Masi tye lcaa na nu ntsu'u nde cua̱, masi tye chalyuu re, pana ná tye tsiya' ti cha' nu nchcui' na' re, cha' xcui' cha' liñi laca cha' nu nchcui' na'.

36’Pana tsa̱ bi' ni, ni sca ñati̱ ná jlo ti' ni tsa̱ caca, ni hora caca bi'. Ni xca̱ ji'i̱ ycui' Ndyosi ná jlo ti' ngu', ni na' nu laca̱ nu sca ti Sñi' ycui' Ni, ná jlo ti' na'; sca ti ycui' Ndyosi Sti na' jlo ti' cha' bi'.

37’Ñi'ya̱ ngua lo'o nguti'i̱ jyo'o Noé chalyuu nu ngua sa'ni, jua'a̱ caca tsa̱ nu ca̱a̱ na' nu cua nda Ni 'na lijya̱a̱ cha' caca na' ñati̱; ná ca cuayá' ti' ñati̱ ni tsa̱ caca bi'. 38Ñi'ya̱ ngua tyempo ji'i̱ Noé bi', nu lo'o bilya ca'ya tyo clyaa, jua'a̱ caca tsa̱ bi'. Ndi'ya̱ ngua sa'ni: ngua'ni ngu' ta'a, ndyacu ngu', ndyi'o ngu', ngujui clyo'o ngu'; ná ntsu'u cha' ngulacua ti' ngu' tsiya' ti, ngua ti' ngu', hasta ña'a̱ cuayá' nu ndyatí̱ Noé bi' ne' yaca ni'i̱ ji'i̱. 39Ná ngua tii ngu' hasta ña'a̱ cuayá' nu nguxana ngua'ya tyo clyaa. Li' ndye cha' ji'i̱ lcaa ngu' bi', cha' ná ndaquiya' ngu' ji'i̱ ycui' Ndyosi. La cui' jua'a̱ caca tsa̱ lo'o ca̱a̱ na' nu cua nda Ni 'na lijya̱a̱ cha' caca na' ñati̱, ná ca tii ngu' ni tsa̱ caca bi'. 40Nu tsa̱ bi' ni, si nga'a̱ tucua tya'a ñati̱ ne' quixi̱' cha' cua'ni ngu' cña, li' tyaa lo'o xca̱ ji'i̱ ycui' Ndyosi ji'i̱ tsaca ngu', tyanu chaca ngu' li'; 41jua'a̱ tsa̱ bi' si nga'a̱ tucua tya'a nu cuna'a̱ sca ni'i̱ cha' coo ngu', li' tyaa lo'o xca̱ ji'i̱ ycui' Ndyosi ji'i̱ tsaca ngu', tyanu chaca ngu' li'.

42’Bi' cha' cua'ni tii ti' ma̱, cha' ná jlo ti' ma̱ tsiya' ti ni tsa̱ laca nu ca̱a̱ ycui' nu Xu'na ma̱. 43Ñi'ya̱ nti' sca xu'na ni'i̱ si cua ngua tii yu ni hora nde talya ca̱a̱ sca nu cuaana to' tyi yu. Ná tyiquee' cua tii ti ti' yu nga'a̱ yu ni'i̱ ji'i̱ yu li', cha' ná ta yu chacuayá' tsiya' ti tyatí̱ nu cuaana bi' ne' ni'i̱ ji'i̱ yu li'. 44Lo'o jua'a̱ lcaa tsa̱ ntsu'u cha' tii ti' tyi'i̱ ma̱ chalyuu, cha' ná tyiquee' tsa tsiya' ca tyu'u tucua na' ca̱a̱ na' nu cua nda Ni 'na lijya̱a̱ cha' caca na' ñati̱. ¿Ñi'ya̱ cua'ni ma̱ si ná ndi'i̱ ma̱ tii ti ti' ma̱ li'?

Cui̱i̱ ji'i̱ msu tso'o lo'o msu xña'a̱

45’¿Ha ntsu'u ngu' cu'ma̱ nu tyucui tyiquee ma̱ ntaja'a̱ ma̱ cua'ni ma̱ cña 'na? Ndi'ya̱ cua'ni ma̱ lacua: Sca msu nu tso'o ni, ta xu'na yu cña ji'i̱ yu cha' caca yu loo ne' ni'i̱ ji'i̱ xu'na yu; culo xu'na yu cña ji'i̱ yu cha' xacu yu ji'i̱ lcaa ngu' nu ndi'i̱ ni'i̱ bi'. 46Tso'o tsa ntsu'u tyiquee msu bi' lo'o ca̱a̱ xu'na yu chaca quiya', si chañi cha' ndyu'ni yu cña nu cua ngulo xu'na yu ji'i̱ yu. 47Cha' liñi nchcui' na' lo'o ma̱ juani, cha' tlyu la cña ta xu'na yu ji'i̱ msu bi' li', cha' caca yu loo ji'i̱ lcaa cña nu ntsu'u ji'i̱ xu'na yu bi'. 48Pana sca msu nu xña'a̱ ni, masi ntsu'u cña nu ngulo xu'na yu ji'i̱ yu, ná ndube ti' yu; “Tiya' tsa ca̱a̱ xu'na na'”, culacua ti' yu, bi' cha' hora ti ca'ya sca cha' cuxi hique yu. 49Li' xana yu bi' cua'ni xña'a̱ yu, cua'ni tyaala yu ji'i̱ tya'a msu yu; tsaa yu cacu yu, tsaa yu co'o yu lo'o tya'a cu'bi ti yu li'. 50Lo'o li' ca̱a̱ xu'na msu xña'a̱ bi' sca tsa̱ lo'o ná tii yu bi' li', cha' ná jlo ti' msu bi' ni hora tyu'u tucua xu'na yu chaca quiya'. 51Li' lye xcube' xu'na yu ji'i̱ msu xña'a̱ bi', ña'a̱ cuayá' nu cajaa msu bi'; culo xu'na yu cña ji'i̱ msu bi', cha' tsaa yu ca bilyaa su lye tsa nchcube' ngu', ca su nxi'ya tsa ngu', lo'o jua'a̱ ndacu tsa la'ya ngu' cha' ñasi̱' ngu'. Stu'ba ti tsaa yu lo'o ngu' cuiñi nu tucua cha' ntsu'u tyiquee ngu'.

Currently Selected:

SAN MATEO 24: cta

Highlight

Copy