SAN MATEO 16

Ña'a̱ cui'ya ngu' sca cha' tlyu nu cua'ni Jesús nti' ngu'

1Lo'o li' ndyalaa sca taju ngu' fariseo lo'o ngu' saduceo slo Jesús, cha' chcui' cuayá' ngu' lo'o yu, si caca tyiji̱loo ngu' ji'i̱ yu nti' ngu'. Nchcui' ngu' lo'o Jesús cha' culu'u sca cha' tlyu ji'i̱ ngu', sca cha' tlyu nu tyu'u tucua nde cua̱ chacuayá' ji'i̱ ycui' Ndyosi. 2Li' nguxacui̱ Jesús cha' ji'i̱ ngu':

―Nu cu'ma̱ ni, ndi'ya̱ nchcui' ma̱ lo'o cua tsaa ti cuichaa: “Lubii cua̱ caca la quee, cha' tso'o tsa ña'a̱ nscua coo tyubi' cua̱ juani”, nacui̱ ma̱. 3Lo'o ndi'ya̱ nchcui' ma̱ nde tlya lo'o ña'a̱ ma̱ nde cua̱: “Ca'ya tyo juani cha' lye xi ña'a̱ coo cua̱, ngata tsa ña'a̱ coo”, nacui̱ ma̱. ¿Ni cha' laca, cha' jlo tsa ti' ma̱ ñi'ya̱ caca sca tsa̱ nu lo'o ña'a̱ ti ma̱ nde cua̱? Pana ná jlo ti' ma̱ tsiya' ti ñi'ya̱ caca ji'i̱ cu'ma̱ ngu' nasiyu̱ re tyempo juani. 4Na xña'a̱ tsa tyiquee ma̱ ca ta'a ma̱ cha' xcui' nti' ma̱ cha' cua'ni na' sca cha' tlyu cha' ña'a̱ cui'ya ma̱ ji'i̱; laca ma̱ ñati̱ nu ná jlya ti' ji'i̱ ycui' Ndyosi tsiya' ti ―nacui̱ Jesús ji'i̱ ngu'―. Pana ná cua'ni na' jua'a̱. Nga'a̱ cha' tyi'u ti' ma̱ na laca nu ngua ji'i̱ jyo'o Jonás nu ngua tu'ba ji'i̱ ycui' Ndyosi cua sa'ni la.

Nga'aa nchcui' la Jesús lo'o ngu' bi' li', ndu'u yu ndyaa.

Ngu' fariseo laca ñi'ya̱ nti' scua̱ tiye'

5La cui' tsa̱ bi', cua nteje tacui ngu' lo tayu' lo'o yaca ni'i̱ bi'. Ngutu'u ngu' chaca tsu', li' ndyi'u ti' ngu' nu ndyaca tsa'a̱ ji'i̱ Jesús cha' cua ngujlyaa ti' ngu' cha' qui'ya lo'o ngu' xlyá teje' cha' cacu ngu' tyucui̱i̱. 6Lo'o li' ndi'ya̱ nchcui' Jesús lo'o ngu':

―Tii ti ti' ma̱ tyi'i̱ ma̱ ―nacui̱ Jesús ji'i̱ ngu' bi'―. Cui'ya ma̱ cuentya ñi'ya̱ ndu'ni scua̱ tiye' nu nda ngu', la cui' ngu' fariseo lo'o ngu' saduceo ―nacui̱.

7Li' nchcui' ngu' nu ndyaca tsa'a̱ ji'i̱ lo'o tya'a ngu':

―Cha' ná lo'o xlyá teje' ndya'a̱ na, bi' cha' nchcui' nu cusu' cha' ji'i̱ scua̱ tiye' lo'o na ―nacui̱ ngu'.

8Pana, ngua tii Jesús cha' ná ngua cuayá' ti' ngu' bi'.

―¿Ni cha' ndube ti' ma̱ cha' ná lo'o xlyá teje' lijya̱ ma̱? ―nacui̱ ji'i̱ ngu' bi'―. Xti tsa cha' jlya ti' ma̱ ji'i̱ ycui' Ndyosi. 9¿Ha chañi cha' bilya caca cuayá' ti' ma̱? ¿Ha ná ntsu'u ti' ma̱ ji'i̱ nu ca'yu tya'a ti xlyá teje' nu ndyacu ca'yu mil tya'a ñati̱ tsubi'? Tyu̱u̱ tya'a chcubi ngutsa'a̱ lo'o yu'be xlyá tya'a ndyanu lo'o ndye ndyacu ngu' tsa̱ bi'. 10Jua'a̱ nu cati tya'a xlyá teje' nu ndyacu nu jacua mil tya'a ñati̱ ni, la cui' ti cha'; tyu̱u̱ tya'a chcubi ngutsa'á̱ lo'o yu'be xlyá tya'a nu ndyanu lo'o ndyacu ngu' li'. 11¿Ni cha' laca nga'aa nda ma̱ cuentya, cha' ná nchcui' na' cha' ji'i̱ xlyá nu ndacu ngu' lo'o nacui̱ na' cha' ji'i̱ scua̱ tiye'? Xa' cacha' na' ji'i̱ ma̱, cui'ya ma̱ cuentya ñi'ya̱ ndu'ni scua̱ tiye' nu nda ngu', la cui' ngu' fariseo lo'o ngu' saduceo.

12Ngua cuayá' ti' ngu' li' cha' nchcui' Jesús ji'i̱ lcaa cha' cuxi nu nclu'u ngu' fariseo lo'o ngu' saduceo ji'i̱ ngu', cha' nga'aa tso'o xñi ngu' cha' bi'; si'i cha' ji'i̱ scua̱ tiye' nu ndya' xlyá lo'o nu nti' Jesús chcui' tsa̱ bi'.

Ndacha' liñi Pedro cha' ycui' Cristo laca Jesús

13Lo'o ca tiya' la, li' ndyalaa ngu' loyuu su cuentya quichi̱ Cesarea de Filipo. Xa' nchcui' Jesús lo'o ngu' nu ndyaca tsa'a̱ ji'i̱, nchcuane yu ji'i̱ ngu' li':

―¿Na laca nacui̱ ñati̱ cuentya 'na? ¿Tilaca laca na' nu cua nda Ni 'na lijya̱a̱ nde cha' caca na' ñati̱? ―nacui̱ Jesús ji'i̱ ngu' bi'.

14―Ntsu'u ñati̱ nu nacui̱ cha' laca nu'u̱ jyo'o Juan nu ntyucuatya ji'i̱ ngu' tya tsubi' la ―nacui̱ ngu' ji'i̱ Jesús―. Lo'o xa' ñati̱ ni, nacui̱ ngu' cha' jyo'o Elías laca nu'u̱. Lo'o jua'a̱ ntsu'u xa' la ñati̱ nu nacui̱ cha' jyo'o Jeremías laca nu'u̱. Lo'o jua'a̱ ntsu'u ngu' nu nacui̱ cha' chaca quiya' cua ndyu'ú chaca jyo'o cusu' nu ngua tu'ba ji'i̱ ycui' Ni nu ngua sa'ni, la cui' bi' laca nu'u̱, nacui̱ ngu'.

Jua'a̱ nacui̱ ngu' nu ndyaca tsa'a̱ ji'i̱ Jesús. 15Li' nchcui' Jesús lo'o ngu' bi':

―Lo'o cu'ma̱ ni, ¿tilaca laca na' nti' ma̱?

16Hora ti nguxacui̱ Simón Pedro cha' ji'i̱ Jesús li':

―Cristo laca nu'u̱ ―nacui̱―. Sñi' ycui' Ndyosi nu lu'ú ca laca nu'u̱.

17―Tso'o ntsu'u tyiquee nu'u̱ Simón, sñi' Jonás ―nacui̱ Jesús ji'i̱ li'―. Si'i ñati̱ chalyuu ti nu ngulu'u cha' bi' jinu'u̱; pana ycui' Ndyosi Sti na' nu ntucua nde cua̱, nda Ni cha' bi' nu ngua'ya hique nu'u̱. 18Pedro naa nu'u̱, lo'o jua'a̱ caca nu'u̱ ñi'ya̱ laca sca quee quiya' ni'i̱. Nu lo'o nchcui' nu'u̱ tsa̱, cha' liñi laca nu nchcui' nu'u̱; bi' laca su̱u̱ cha' ji'i̱ ñati̱ 'na, cha' tso'o tsa ndyanu tachaa cha' nu nchcui' nu'u̱ jua'a̱. Ná taca ji'i̱ cuiñaja, ni cui'i̱ cuxi, ni jyo'o, ni tsaca ñati̱, ná taca ji'i̱ ngu' tsiya' ti tyiji̱loo ngu' ji'i̱ ñati̱ 'na, masi cajaa ñati̱ 'na xqui'ya cha' cuxi. 19Ta na' lcaa chacuayá' jna' jinu'u̱, cha' taca tyatí̱ ñati̱ 'na ca su laca ycui' Ndyosi loo. Nu lo'o ná cua'ni clyu ti' nu'u̱ ji'i̱ ñati̱ xqui'ya sca cha' cuxi nu ndyu'ni ñati̱ bi', la cui' jua'a̱ ná cua'ni clyu ti' ycui' Ndyosi Sti na' ji'i̱ ñati̱ bi' nde loo la; pana lo'o cua'ni clyu ti' nu'u̱ ji'i̱ ñati̱, la cui' jua'a̱ cua'ni clyu ti' Ni ji'i̱ ñati̱ bi'.

20Li' ngulo Jesús cña ji'i̱ ngu' nu ndyaca tsa'a̱ ji'i̱ cha' ná cacha' ngu' ji'i̱ ni sca ñati̱ cha' Cristo laca ycui' yu.

Nda Jesús cha' lo'o ngu' cha' cua cajaa ti ycui'

21Lo'o tyempo bi' nguxana Jesús ngulu'u yu ji'i̱ ngu' cha' ntsu'u cha' tsaa yu nde quichi̱ Jerusalén. Pana ca quichi̱ bi' tyacua cha' ti'í ji'i̱ yu xqui'ya cha' xcube' tsa ngu' cusu' bi' ji'i̱ yu; jua'a̱ sti jo'ó nu laca loo, lo'o mstru cha' jo'ó, lcaa ngu' bi' xcube' ngu' ji'i̱ yu ña'a̱ cuayá' nu cujuii ngu' ji'i̱ yu. Pana tyu'ú yu chaca quiya' tsa̱ nchca tyuna, nacui̱ yu. 22Li' ngusñi Pedro ya' Jesús cha' chcui' lo'o:

―Cua'ni tya'na ti' ycui' Ndyosi jinu'u̱, Xu'na ―nacui̱ Pedro ji'i̱―. Ná caca bi' ñi'ya̱ nu nacui̱ nu'u̱.

23Hora ti nguxtyacui Jesús, na'a̱ ji'i̱ nu Pedro bi'.

―Tyu'utsu' nu'u̱ Satanás, cha' nga'aa cua'a nu'u̱ 'na ―nacui̱ Jesús ji'i̱ Pedro―. Si'i ñi'ya̱ nu nclacua ti' ycui' Ndyosi nclyacua ti' nu'u̱ juani; ñi'ya̱ nu nclacua ti' ñati̱ chalyuu ti, jua'a̱ nclyacua ti' nu'u̱ juani.

24Li' ngulu'u la Jesús ji'i̱ nu ngu' nu ndyaca tsa'a̱ ji'i̱ bi':

―Si ntsu'u ñati̱ nu chañi cha' nti' ngu' tsaa ngu' lo'o na' ―nacui̱―, nga'a̱ cha' xtyanu ngu' bi' ji'i̱ lcaa cha' nu ntsu'u tsa tyiquee ngu' ji'i̱, cha' tya'a̱ ngu' lo'o na' lcaa tsa̱, masi cujuii ñati̱ ji'i̱ ngu' bi' xqui'ya na'. 25Chcuna' chalyuu ji'i̱ ñati̱ nu xcui' nclyacua tsa ti' ñi'ya̱ caca tso'o ji'i̱ ycui' ca; pana quije chalyuu ji'i̱ ngu' ca slo ycui' Ni si tyaja'a̱ ngu', masi cujuii ñati̱ ji'i̱ ngu' xqui'ya na'. 26Ná tyanu cha' tso'o ji'i̱ ngu' nu lo'o cajaa ngu', masi ngua'ni tsa ngu' ngana nde chalyuu; nguna' lcaa chalyuu ji'i̱ ngu' bi' li', cha' ná taca ta ngu' caya' cha' caja la chalyuu ji'i̱ ngu'. 27Chañi cha' chaca quiya' ca̱a̱ na' nu cua nda Ni 'na lijya̱ na' cha' caca na' ñati̱, stu'ba ti ca̱a̱ na' lo'o lcaa xca̱ ji'i̱ ycui' Ndyosi; ndubi tsa ña'a̱ loo na' lo'o xee ji'i̱ ycui' Ndyosi Sti na' li'. Lo'o li' ta na' xcaya' ngu', ni cña nu cua ngua'ni scaa ngu' lo'o ya̱a̱ ngu' chalyuu. 28Cha' liñi nchcui' na' lo'o ma̱ juani, cha' ntsu'u ngu' nu tya ndu̱ lo'o na chalyuu re juani, nu lo'o tya lyiji cajaa ngu' ca cuayá' ti' ngu' cha' cua nguxana cha' laca na' loo ne' cresiya ji'i̱ ñati̱, na' nu cua nda Ni 'na lijya̱a̱ cha' caca na' ñati̱.

Currently Selected:

SAN MATEO 16: cta

Highlight

Copy