SAN MATEO 15

Na laca nu ndu'ni cha' caca cuxi tyiquee ñati̱

1Li' ndyalaa sca taju ngu' tlyu slo Jesús. Ngu' quichi̱ Jerusalén laca ngu' bi', ngu' fariseo lo'o ngu' mstru nu nclu'u cha' jo'ó ne' laa laca ngu' bi'.

2―¿Ni cha' ná tso'o ndu'ni ngu' nu ndyaca tsa'a̱ jinu'u̱? ―nacui̱ ngu' bi' ji'i̱ Jesús―. Ná stu'ba ndu'ni ngu' lo'o cha' nu cua nda jyo'o cusu' lo'o na sa'ni la, cha' tyaati̱ tso'o ya' na nu lo'o bilya cacu na. Lo'o nu ngu' nu ndyaca tsa'a̱ jinu'u̱ ni, ná ndu'ni ngu' jua'a̱ ―nacui̱ ngu' li'.

3Li' nguxacui̱ Jesús cha' ji'i̱ ngu' tlyu bi':

―Lo'o cu'ma̱ ni ―nacui̱ Jesús ji'i̱ ngu'―, ¿ni cha' laca xti la cha' ntsu'u tyiquee ma̱ ji'i̱ cña nu ngulo ycui' Ndyosi ji'na? Lo'o jua'a̱ lye tsa ndube ti' ma̱ ji'i̱ scaa cha' nu nda jyo'o cusu' lo'o na. 4Cua nchcui' ycui' Ndyosi lo'o na: “Tucuá ma̱ cña nu nchcui' sti ma̱, nu nchcui' xtya'a̱ ma̱”, nacui̱ Ni. “Lo'o jua'a̱ si chcui' ma̱ cha' cuxi ji'i̱ sti ma̱, ji'i̱ xtya'a̱ ma̱, li' ntsu'u cha' cujuii ngu' ji'i̱ ma̱”, nacui̱ Ni. 5Pana cu'ma̱ ni, xa' lo cha' nchcui' ma̱ juani. Nclyu'u ma̱ cha' tso'o tsa laca si ndi'ya̱ chcui' na lo'o sti na, lo'o xtya'a̱ na: “Cua nda na' lcaa na nu ntsu'u 'na ji'i̱ ycui' Ndyosi, bi' cha' nga'aa caca xtyucua na' ji'i̱ ma̱ juani”. 6Jua'a̱ laca cha' cuxi nu nclyu'u ma̱ ji'i̱ ngu', cha' nga'aa cua'ni tlyu ngu' ji'i̱ sti ngu', ji'i̱ xtya'a̱ ngu'; jua'a̱ nchcui' ma̱, masi xa' ña'a̱ ngulo ycui' Ndyosi cña ji'na. Nga'aa tso'o cha' nu nda ycui' Ni lo'o na, nti' ma̱; tso'o la cha' nu nda jyo'o cusu' cha' cua'ni na, nti' ma̱ cuentya ji'i̱ ma̱. 7Cuiñi tsa ma̱, cha' tucua cha' ntsu'u tyiquee ma̱. Tya sa'ni la nchcui' jyo'o Isaías cha' liñi ji'i̱ cu'ma̱. Ndi'ya̱ cha' nu nguscua jyo'o bi' lo quityi:

8Ndu'ni tlyu ngu' re jna' cha' tu'ba ti ngu', nacui̱ ycui' Ni.

Si'i tyucui tyiquee ngu' ndu'ni tlyu ngu' 'na.

9Na cuiñi tsa ngu' re, cha' nacui̱ ngu' cha' ndyu'ni tlyu ngu' 'na, masi nclu'u ngu' cha' nu nchcui' ñati̱ ti ji'i̱ tya'a ngu';

pana nacui̱ ngu' cha' nclyu'u ngu' cha' jna' ji'i̱ tya'a ngu'.

Jua'a̱ nguscua jyo'o Isaías bi' cuentya ji'i̱ ycui' Ndyosi.

10Lo'o li' ngusi'ya Jesús ji'i̱ nu quiña'a̱ tsa ñati̱ nu ndi'i̱ cajua cha' ca̱a̱ ngu' cacua la xi, cha' chcui' yu lo'o ngu' li':

―Cua'a̱ jyaca̱ ma̱ ―nacui̱ Jesús ji'i̱ ngu'―, cha' caca cuayá' tso'o ti' ma̱ ―nacui̱―. 11Si'i sca na nu ndacu ti ngu' nu ndu'ni cha' caca cuxi tyiquee ngu'; cha' nu ndyu'u nde tu'ba ngu', masi lcaa cha' nu nchcui' ngu' ni, xqui'ya cha' bi' caca cuayá' ti' na si ngunu'u̱ tyiquee ngu'.

12Lo'o li' ñaa ngu' nu ndyaca tsa'a̱ ji'i̱ cacua la slo Jesús.

―Ná ndiya ti' nu ngu' fariseo bi' lo'o ndyuna ngu' cha' nu nchcui' nu'u̱ ―nacui̱ ngu' bi' ji'i̱ Jesús.

13―Ycui' Ndyosi Sti na' nu ntucua nde cua̱, xcua̱a̱ Ni lcaa quixi̱' nu si'i na cuiñii nu ndyataa Ni, cha' ná tso'o quixi̱' bi' ―nacui̱ Jesús ji'i̱ ngu'―. 14Lo'o jua'a̱ ná tso'o ngu' fariseo jua cuentya ji'i̱ ycui' Ni, bi' cha' nga'a̱ cha' xtyanu ma̱ ji'i̱ ngu' bi'; ñi'ya̱ nti' ngu' cuityi̱', jua'a̱ nti' ngu' fariseo jua ―nacui̱ Jesús―. Si culu'u sca nu cuityi̱' tyucui̱i̱ ji'i̱ chaca yu tya'a cuityi̱' ti yu, tyú tyucuaa ngu' sca to' cua'a̱ li', cha' ni tsaca ngu' ná nchca ña'a̱ ngu' tyucui̱i̱ su lijya̱ ngu' li'.

15Li' nchcui' Pedro lo'o Jesús:

―Culu'u nu'u̱ ji'i̱ cua ñi'ya̱ ndyu'u cha' nu nda cui̱i̱ ji'i̱ na nu ndacu ngu' ―nacui̱―. Ná nchca cuayá' ti' ya.

16―¿Ha lo'o cu'ma̱, ná ngua cuayá' ti' ma̱? ―nacui̱ Jesús ji'i̱ ngu' bi' li'―. 17¿Ha bilya ta ma̱ cuentya? Lcaa na nu tyatí̱ nde tu'ba ngu' ni, nteje tacui na bi' nde ne' ngu'. Lo'o tsaa ngu' liya', tye lyiji cha' ji'i̱ li'. 18Pana sca cha' nu nchcui' ngu' ni, stu'ba laca bi' lo'o cha' nu ntsu'u ne' cresiya ji'i̱ ngu'; xqui'ya cha' nu nchcui' ngu', bi' cha' nchca cuayá' ti' xa' la ñati̱ si cua ngunu'u̱ tyiquee ngu' bi'. 19Ca ne' cresiya ji'i̱ ñati̱ ni, ca bi' ntsu'u su̱u̱ lcaa cha' cuxi: masi cujuii ngu' ji'i̱ tya'a ngu', masi tyu'u cha' ji'i̱ ngu' lo'o clyo'o xa' ñati̱, masi cua'ni suba' ngu' lo'o xa' ñati̱, masi cuaana ngu' na nu ntsu'u ji'i̱ tya'a ngu', masi chcui' ngu' cha' cuiñi ji'i̱ tya'a ngu', masi chcui' ngu' cuentyu ji'i̱ tya'a ngu'. 20Si ntsu'u cha' cuxi bi' ne' cresiya ji'i̱ ngu', bi' laca nu ndu'ni ñu'u̱ ji'i̱ tyiquee ngu'; pana lo'o cacu na sca na ni, masi bilya tyaati̱ tso'o ya' na, ná sca cha' cua'ni lo'o cresiya ji'na, cha' si'i jua'a̱ caca cuxi tyiquee na.

Jlya ti' sca nu cuna'a̱ xa' tsu' ji'i̱ Jesús

21Lo'o li' ndu'u Jesús ndyaa nde loyuu su cuentya quichi̱ Tiro lo'o loyuu su cuentya quichi̱ Sidón; lo'o nu ngu' nu ndyaca tsa'a̱ ji'i̱ ndyaa ngu' lo'o. 22Lo'o li' ñaa sca nu cuna'a̱ ca tyi quichi̱ bi' slo Jesús, ngusi'ya tsa nu cuna'a̱ bi' ji'i̱ Jesús li':

―Cua'ni tya'na ti' nu'u̱ 'na, Xu'na ―nacui̱ nu cuna'a̱ bi' ji'i̱ Jesús―. Nu'u̱ nu laca la cui' ñati̱ tya'a ji'i̱ jyo'o cusu' David, cua'ni nu'u̱ sca cha' tso'o lo'o na'. Nxalú tsa cui'i̱ ji'i̱ sñi' na'.

23Ni sca cha' ná nguxacui̱ Jesús ji'i̱ nu cuna'a̱ bi'. Li' nchcui' ngu' nu ndyaca tsa'a̱ ji'i̱ lo'o Jesús:

―Culo nu'u̱ cña ji'i̱ nu cuna'a̱ re cha' tsaa ma' xa' se'i̱ ―nacui̱ ngu' ji'i̱ Jesús―, cha' nxi'ya tsa ji'na.

24―Nda ycui' Ni 'na lijya̱ na' nde chalyuu cha' sca ti lo'o ngu' Israel chcui' na' ―nacui̱ Jesús li'―, cha' ñi'ya̱ ndu'ni xlya' nu cua nguna', jua'a̱ ndu'ni ngu' bi' ―nacui̱.

25Li' cacua la ndyalaa nu cuna'a̱ bi', ndyatu̱ sti̱' slo Jesús.

―Xu'na ―nacui̱ ji'i̱ Jesús―, xtyucua nu'u̱ ji'i̱ cua.

26Li' nguxacui̱ Jesús cha' ji'i̱ nu cuna'a̱ bi':

―Ná tso'o si xñi ngu' tyaja nu ndyacu sñi' ngu' cha' cacu xne' ti ―nacui̱.

27―Chañi cha' nu nchcui' nu'u̱, Xu'na ―nacui̱ nu cuna'a̱ bi'―, pana tya ntsu'u chacuayá' ji'i̱ xne' cha' cacu ni' satya ti nu ndyalú to' mesa laja lo'o ndyacu xu'na ni'.

28―Chañi cha' jlya ti' nu'u̱ cha' nu nda na' lo'o nu'u̱ ―nacui̱ Jesús ji'i̱―. Caca cha' nu nti' nu'u̱ lacua ―nacui̱.

Hora ti ndyaca tso'o sñi' nu cuna'a̱ bi' li'.

Ngua'ni Jesús jo'o ji'i̱ quiña'a̱ ngu' quicha

29Lo'o li' ndu'u Jesús ndyaa, ndyalaa yu ca to' tayu' Galilea bi'. Ndya'a̱ yu xi to' tayu' bi', li' ndyacui̱ yu xi sii' ca'ya cha' chca'a̱ yu xi ndejua. 30Quiña'a̱ tsa ñati̱ ndyalaa slo yu li'; ndya'a̱ lo'o ngu' ji'i̱ quiña'a̱ tsa ngu' quicha, lo'o ngu' nu quicha quiya', lo'o ngu' cuityi̱', lo'o ngu' cu'u̱, lo'o nu cu' ya', nu cu' quiya', lcaa lo nu quicha. Nsta ngu' ji'i̱ ngu' quicha bi' lo yuu slo Jesús, lo'o ngua'ni Jesús cha' ndyaca tso'o ngu' li'. 31Ndube tsa ti' ngu' quiña'a̱ lo'o na'a̱ ngu' cha' xa' nchcui' ngu' nu ngua cu'u̱, xa' ngua tso'o tyucui ña'a̱ ya' ngu' nu ngua cu' ya', xa' ndya'a̱ ngu' nu ngua quicha quiya', xa' tyaca̱' xee ña'a̱ ngu' nu ngua cuityi̱'. Li' lye tsa ndyu'ni tlyu ngu' ji'i̱ ycui' Ni nu laca ycui' Ndyosi ji'i̱ ngu' Israel xqui'ya cha' ndyaca tso'o lcaa ngu' quicha bi'.

Nda Jesús na nu ndyacu jacua mil tya'a ñati̱

32Lo'o li' ngusi'ya Jesús ji'i̱ ngu' nu ndyaca tsa'a̱ ji'i̱ cha' ca̱a̱ ngu' slo. Nchcui' lo'o ngu' li':

―Tya'na tsa ti' na' ji'i̱ nu ngu' quiña'a̱ re ―nacui̱ Jesús ji'i̱ ngu' bi'―. Cua sna tsa̱ ndya'a̱ ngu' lo'o na' juani, lo'o nga'aa ntsu'u na cacu ngu' tsiya' ti. Ná tso'o culo na' cña ji'i̱ ngu' re cha' tyaa ngu' ña'a̱ lo'o jbi'ña ti ndya'a̱ ngu', cha' ná talo ngu' tyucui̱i̱ jua'a̱.

33Li' nchcui' ngu' nu ndyaca tsa'a̱ ji'i̱ lo'o:

―¿Macala caja na cacu ngu' ji'na? Ne' quixi̱' nga'a̱ na re su ná ndi'i̱ ñati̱ ―nacui̱ ngu' ji'i̱ Jesús―. Lo'o jua'a̱ quiña'a̱ tsa ñati̱ ndya'a̱ lo'o na re.

34―¿Ni lcua tya'a xlyá ntsu'u ji'i̱ ma̱? ―nacui̱ Jesús ji'i̱ ngu' bi' li'.

―Cati tya'a ti xlyá teje' lo'o ji'i̱ ya ―nacui̱ ngu' ji'i̱―, lo'o ntsu'u xi cualya sube ―nacui̱ ngu'.

35Li' ngulo Jesús cña ji'i̱ nu ngu' quiña'a̱ cha' tyaca'a̱ ngu' lo yuu. 36Li' ngusñi Jesús nu cati tya'a xlyá bi' lo'o cualya bi', ndya xlya'be ji'i̱ ycui' Ndyosi xqui'ya cha' ntsu'u na cacu ngu'. Li' ngusa'be Jesús xlyá lo'o cualya bi', nda yu'be bi' ji'i̱ ngu' nu ndyaca tsa'a̱ ji'i̱ cha' ta ngu' ji'i̱ nu ngu' quiña'a̱ bi'. 37Li' ndyacu lcaa ngu' xlyá bi' ña'a̱ cuayá' nu nguaala' ji'i̱ ngu'. Lo'o nxuti'i̱ ngu' lcaa yu'be nu tya'a ndyanu su ndyacu ngu', li' ngutsa'a̱ cati tya'a chcubi lo'o yu'be bi'. 38Jacua mil tya'a nu qui'yu ndyacu tsa̱ bi', lo'o xa' cuentya ngua nu cuna'a̱ lo'o nu sube; lcaa bi' ndyacu. 39Lo'o ndye ndyacu ngu', li' nchcui' salya' Jesús lo'o nu ngu' quiña'a̱ bi', cha' tyaa ngu' to' tyi ngu'. Li' ndyatí̱ Jesús ne' yaca ni'i̱ sube, ndu'u yu ndyaa yu nde loyuu Magdala lo'o ngu' nu ndyaca tsa'a̱ ji'i̱.

Currently Selected:

SAN MATEO 15: cta

Highlight

Copy