SAN MATEO 13

Cui̱i̱ ji'i̱ ñati̱ nu ndyataa si'yu

1La cui' tsa̱ bi' ndu'u Jesús toni'i̱, ndyaa yu to' tayu' bi', cha' chca'a̱ xi ca bi'. 2Li' ndyu'u ti'i̱ quiña'a̱ tsa ñati̱ slo Jesús, bi' cha' ndyatí̱ yu ne' yaca ni'i̱ piti, ndyaca'a̱ yu xi li'. Lo'o jua'a̱ ndyanu ñati̱ quiña'a̱ bi' to' hitya ti bi'. 3Lo'o li' nchcui' Jesús xi cui̱i̱ lo'o ngu', cha' ca tsa'a̱ ngu' lcaa cha' nu ngua ti' Jesús culu'u yu ji'i̱ ngu'. Ndi'ya̱ nchcui' yu:

―Ngua sca tsa̱ ndyaa sca ñati̱ cataa si'yu trigo ―nacui̱ Jesús―. 4Li' lo'o nscui̱ yu si'yu bi', ndyú xi si'yu lo yuu tacalya to' tyucui̱i̱; hora ti ñaa quiñi, ndye si'yu bi' ndyacu ni'. 5Lo'o jua'a̱ ndyalú xi si'yu bi' su lati tu'ba yuu nscua chu̱' quee. Yala ti ntyucua si'yu bi'; pana xti tsa yuu ntsu'u chu̱' quee bi', 6bi' cha' ná ngua xñi su̱u̱ chu̱' quee bi', ni ná ngua caluu tso'o. Ndye calya bi' ndyanaa, cha' tyique' tsa cua̱. 7Lo'o jua'a̱ ndyalú xi si'yu bi' su ngutu̱ lti quiche'; yala la nguluu lti quiche' bi' chaca quiya', ni ná nda bi' chacuayá' caluu calya trigo tsiya' ti. 8Lo'o jua'a̱ ndyalú xi si'yu bi' lo yuu tso'o, su tso'o tsa nguluu calya; ngutu'u tsa si'yu lo ju̱u̱ bi' li', hasta sca siyento tya'a si'yu nda sca ju̱u̱, hasta snayala tya'a si'yu nda chaca ju̱u̱, hasta calaa tyii tya'a si'yu nda chaca ju̱u̱. 9Cua'a̱ jyaca̱ ma̱ ji'i̱ cha' nu nchcui' na' lo'o ma̱ juani, si chañi cha' nti' ma̱ cuna ma̱ cha' tso'o bi'.

Ni cha' nda Jesús cui̱i̱ bi'

10Lo'o li' ndyaa ngu' nu ndyaca tsa'a̱ ji'i̱ cacua la slo Jesús. Nchcuane ngu' ji'i̱ yu li':

―¿Ni cha' ndacha' nu'u̱ cha' bi' ji'i̱ ngu' jua, ñi'ya̱ nti' si nchcui' nu'u̱ sca cña cua̱ ti? ―nacui̱ ngu' bi' ji'i̱ Jesús.

11Li' nguxacui̱ Jesús cha' ji'i̱ ngu' bi':

―Cua nda ycui' Ndyosi chacuayá' cha' ca cuayá' ti' ma̱ sca cha' nu ntsu'u cuaana ti ji'i̱ jyo'o cusu', ñi'ya̱ caca lo'o caca ycui' Ni loo ne' cresiya ji'i̱ ñati̱. Xa' ñati̱ nu ná ngusñi cha' ji'i̱ ycui' Ndyosi ni, ná ta ngu' cuentya lo'o cuna ngu' sca cui̱i̱ nu nchcui' na'; tucui tsa cha' bi' nti' ngu'. 12Ñati̱ nu jlya ti' cha' nu nduna ngu' ji'i̱ ycui' Ndyosi, tya ta la Ni cha' lo'o ngu' bi', cha' jua'a̱ tso'o la xñi ngu' cha' ji'i̱ ycui' Ni; pana ñati̱ nu ná jlya ti' cha' bi', nu ná nti' taquiya' ngu' ji'i̱ cha' bi', cua'ni ycui' Ni cha' ná caca ji'i̱ ngu' xñi ngu' cha' ji'i̱ ycui' Ni tsiya' ti. 13Bi' cha' nda na' cui̱i̱ bi' lo'o ngu', cha' masi ña'a̱ ngu', ná ta ngu' cuentya ñi'ya̱ tyu'u liñi cha' bi'; masi cuna ngu', ná ca cuayá' ti' ngu' ñi'ya̱ nti' ñacui̱ cha' bi', xqui'ya cha' ná ndaquiya' ngu' jna'. 14Lo'o ña'a̱ na ji'i̱ ngu' bi', li' caca cuayá' ti' na cha' chañi tsa cha' ji'i̱ ycui' Ndyosi nu nguscua jyo'o Isaías cua sa'ni la. Ndi'ya̱ nacui̱ cha' bi':

Ná tyiquee' cuna ma̱ cha' bi', pana ná caca cuayá' ti' ma̱ ñi'ya̱ nti' ñacui̱ cha' nu cua ndyuna ma̱, nacui̱ ycui' Ni.

Ná tyiquee' ña'a̱ ma̱ cha' bi', pana ná ta ma̱ cuentya tsiya' ti ni cha' laca nu cua na'a̱ ma̱.

15Tacalya tsa cresiya ji'i̱ ngu' tya'a ma̱, cha' ná nti' ngu' taquiya' ngu' jna'.

Ná nduna tso'o ngu', cha' ná ntaja'a̱ ngu' taquiya' ngu' cha' jna'.

Ná nti' ngu' ta ngu' cuentya, bi' cha' ná nchca ji'i̱ ngu' ña'a̱ tso'o ngu'.

Ná ntaja'a̱ ngu' culochu̱' ngu' cha' cuxi nu ntsu'u ji'i̱ ngu',

bi' cha' ná nchca cui'ya na' cha' clyu ti' ji'i̱ ngu' ji'i̱ cha' cuxi bi', nacui̱ ycui' Ndyosi.

Jua'a̱ nscua lo quityi ji'i̱ ycui' Ni.

16’Pana tso'o ntsu'u tyiquee ma̱ cha' tya ntucua yaala cloo ma̱, tya ntucua yaala jyaca̱ ma̱, cha' ta tso'o ma̱ cuentya ji'i̱ sca cha' nu nchcui' ycui' Ni. 17Chañi cha' nu nchcui' na' lo'o ma̱, cha' quiña'a̱ ngu' nu ngua tu'ba ji'i̱ ycui' Ndyosi sa'ni la, lo'o jua'a̱ quiña'a̱ tsa ngu' nu tso'o ntsu'u tyiquee ngu' ña'a̱ ngu' ji'i̱ ycui' Ndyosi, cua ntajatya tsa ngu' bi' ji'i̱ cha' nu ña'a̱ ma̱ juani, cha' ña'a̱ ngu' ji'i̱; cua ntajatya tsa ngu' ji'i̱ cha' nu nduna ma̱ juani, cha' cuna ngu' ji'i̱. Pana ngujuii ngu' bi' li', masi bilya ña'a̱ ngu' cha' bi', bilya cuna ngu' cha' bi' tsiya' ti.

Ñi'ya̱ ndyu'u cha' ji'i̱ cui̱i̱ ji'i̱ ñati̱ nu ndyataa si'yu

18’Ndi'ya̱ laca cha' nu nda nu cui̱i̱ ji'i̱ ñati̱ nu ndyataa si'yu trigo bi': 19Lo'o cuna ñati̱ cha', ñi'ya̱ nu caca lo'o laca ycui' Ndyosi loo ne' cresiya ji'i̱ ngu', pana ná nchca cuayá' ti' ñati̱ bi' ni cha' laca bi', hora ti cua'ni xu'na cuiñaja cha' cuityi̱ cha' tso'o bi', cha' nga'aa xñi ngu' bi' cha' tso'o bi'. Laca ñati̱ bi' ñi'ya̱ laca lo'o ndyú si'yu to' tyucui̱i̱ ti. 20Lo'o si'yu nu ndyalú lo yuu lati tu'ba chu̱' quee ni, bi' laca ñi'ya̱ laca ñati̱ nu tso'o tsa ntsu'u tyiquee ngu' lo'o clyo ndyuna ngu' cha' tso'o nu ji'i̱ ycui' Ndyosi. 21Pana si lya' ti' xa' ñati̱ ji'i̱ ngu' bi', si xtyí lo'o ñati̱ ji'i̱ ngu' xqui'ya cha' tso'o nu cua ndyuna ngu' bi', ná talo ngu' li'. Laca ngu' bi' ñi'ya̱ laca lo'o ná ngusñi tso'o su̱u̱ si'yu nu ntyucua lo yuu lati tu'ba chu̱' quee bi', cha' ná ndalo calya bi', ndyanaa bi' li'. 22Si'yu nu ndyalú lo yuu su ngutu̱ lti quiche' ni, bi' laca ñi'ya̱ laca ñati̱ nu cua ndyuna cha' tso'o bi', pana ndya'a̱ tsa cha' tyiquee ngu' bi' ñi'ya̱ caca ji'i̱ ngu' nde chalyuu, cha' nti' tsa ngu' caca culiya' ngu'. Bi' cha' ná nchca ji'i̱ ycui' Ndyosi cua'ni sca cña tso'o ne' cresiya ji'i̱ ngu' bi'. 23Lo'o jua'a̱ si'yu nu ndyalú su ntsu'u yuu tso'o ni, bi' laca ñi'ya̱ laca ngu' nu cua ndyuna cha' tso'o bi', lo'o nchca cuayá' ti' ngu' cha' bi'; xcui' na ndaquiya' ngu' ji'i̱ cha' bi', lo'o li' tso'o tsa cha' nu tyu'u ne' cresiya ji'i̱ ngu' bi'. Lo'o jua'a̱ laca ngu' bi' ñi'ya̱ laca yuu tso'o bi'. Ntsu'u sca ti ju̱u̱ trigo nu nda hasta sca siyento tya'a si'yu, lo'o jua'a̱ ntsu'u ju̱u̱ nu nda snayala tya'a si'yu, lo'o jua'a̱ ntsu'u ju̱u̱ nu nda calaa tyii tya'a si'yu.

Cui̱i̱ ji'i̱ quixi̱' nu ntyucua laja xtya̱ trigo

24Lo'o li' nda Jesús chaca cui̱i̱ lo'o ngu':

―Chcui' na' chaca cha' lo'o cu'ma̱, cha' caca cuayá' ti' ma̱ ñi'ya̱ caca lo'o laca ycui' Ni loo ne' cresiya ji'i̱ ñati̱ ―nacui̱ Jesús ji'i̱ ngu'―. Laca ycui' Ni ñi'ya̱ laca sca ñati̱ nu ndyataa xcui' si'yu tso'o lo xtya̱ trigo ji'i̱. 25Lo'o ngua talya, li' ngujua' ngu'. Pana laja lo'o laja' ti xu'na xtya̱ bi', li' ñaa tya'a cusu̱u̱ yu, ngusañi si'yu quixi̱' laja xtya̱ trigo ji'i̱ yu. Lo'o ndye ngusañi si'yu quixi̱' bi', ndyaa tya'a cusu̱u̱ yu bi' li'. 26Stu'ba ti ntyucua tyucuaa lo si'yu, lo'o si'yu trigo, lo'o quixi̱' bi'; tso'o tsa ndyaluu calya bi' nquicha'. Tiya' la li' na'a̱ ngu' cha' si'i xcui' si'yu tso'o nu cua ndyataa bi' nu ntyucua; tyucui ña'a̱ lo xtya̱ bi' nguixa' ntyucua trigo lo'o quixi̱'. 27Li' hora ti ndyaa msu slo xu'na xtya̱ bi', ndyaa cacha' ngu' ji'i̱ yu ñi'ya̱ ndyaca: “Cusu'”, nacui̱ ngu' ji'i̱ xu'na cña bi', “¿ha si'i xcui' si'yu tso'o ndyataa nu'u̱ lo yuu jua? ¿Ni cha' laca ntyucua tsa xa' quixi̱' laja calya juani?” 28Lo'o li' nguxacui̱ nu xu'na cha' ji'i̱ msu bi': “La cui' tya'a cusu̱u̱ na' ngua'ni cha' lya' ti' lo'o calya 'na lacua”, nacui̱ xu'na xtya̱ ji'i̱ ngu'. “¿Ha nti' nu'u̱ cha' tsaa ya scua̱a̱ ya quixi̱' bi', cusu'?” nacui̱ msu ji'i̱ xu'na xtya̱ li'. 29“Ná tso'o jua'a̱”, nacui̱ xu'na xtya̱ ji'i̱ ngu'. “¿Ñi'ya̱ ta si lo'o calya trigo scua̱a̱ ma̱ li'? 30Tso'o la jatya na xi cha' caluu tyucuaa lo, ña'a̱ cuayá' nu cumi̱ trigo bi'. Li' clyo culo na' cña ji'i̱ ngu' cha' tsaa ngu' xi'yu ngu' quixi̱', cha' tyaaca̱' cuentya yane ti cha' tyaqui̱ lo quii'; li' caca clacua, nu lo'o si'yu ngu' lcaa trigo cha' tyu'u co'o ne' ja'ba.”

Cui̱i̱ ji'i̱ si'yu cuxee

31Lo'o jua'a̱ nda Jesús chaca cui̱i̱ lo'o ngu':

―Chaca cha' chcui' na' lo'o ma̱, ñi'ya̱ caca lo'o laca ycui' Ni loo ne' cresiya ji'i̱ ñati̱ ―nacui̱ Jesús ji'i̱ ngu'―. Caca bi' ñi'ya̱ laca sca ti si'yu cuxee nu ndyataa sca ñati̱ ne' lo'o ji'i̱ yu. 32Sube tsa si'yu cuxee bi', pana tonu tsa yaca laca lo'o nguluu bi', ña'a̱ cuayá' nu ñaa quiñi cha' cuiñá ni' xlyati̱ lo yaca bi'.

Cui̱i̱ ji'i̱ scua̱ tiye'

33Lo'o jua'a̱ nda Jesús chaca cui̱i̱ lo'o ngu':

―Chaca cha' chcui' na' lo'o ma̱, ñi'ya̱ caca lo'o laca ycui' Ni loo ne' cresiya ji'i̱ ñati̱ ―nacui̱ Jesús ji'i̱ ngu'―. Caca bi' ñi'ya̱ laca sa ycu' scua̱ tiye', nu xñi sca nu cuna'a̱ cha' su'ba ji'i̱ lo sna sca' catyá xlyá; quixa' li', cha' tsa tlyu ti tyacuí̱ lcaa scua̱ bi'.

Ni cha' nda Jesús cui̱i̱ lo'o ngu'

34Ngulu'u Jesús ji'i̱ nu quiña'a̱ tsa ñati̱ nu ndi'i̱ cajua jua'a̱, cha' xcui' cui̱i̱ ti nchcui' Jesús lo'o ngu' bi'; ná ngulu'u yu ni sca cha' ji'i̱ ñati̱ bi' si ná lo'o sca cui̱i̱ nda yu. 35Cua nchcui' sca jyo'o cusu' nu ngua tu'ba ji'i̱ ycui' Ndyosi cua sa'ni la ji'i̱ cha' bi'. Ndi'ya̱ nchcui' yu:

Lo'o cui̱i̱ ti chcui' na' lo'o ngu' cha' culu'u na' sca cha' ji'i̱ ngu', nacui̱ Ni.

Chcui' na' ji'i̱ sca cha' nu ntsu'u cuatsi' ti tya lo'o ngüiñá na' chalyuu re.

Ñi'ya̱ ndyu'u cha' ji'i̱ cui̱i̱ ji'i̱ quixi̱' nu ntyucua lo xtya̱ ji'i̱ ngu'

36Lo'o li' nguxtyanu Jesús ji'i̱ nu quiña'a̱ tsa ñati̱ bi', ndyaa nde ni'i̱. Li' ndyalaa nu ngu' nu ndyaca tsa'a̱ ji'i̱ yu slo, nchcuane ngu' ji'i̱ yu li':

―Cusu', culu'u nu'u̱ ji'i̱ cua ñi'ya̱ ndyu'u cha' nu nda cui̱i̱ nu cuentya ji'i̱ quixi̱' nu ntyucua lo xtya̱ ji'i̱ ngu' ―nacui̱ ngu' ji'i̱ Jesús.

37―Tso'o ―nacui̱ Jesús ji'i̱ ngu'―. Na' nu cua nda Ni 'na lijya̱a̱ cha' caca na' ñati̱, nu lo'o nclyu'u na' ji'i̱ ñati̱ ni, ndu'ni na' ñi'ya̱ laca si ndyataa na' si'yu tso'o lo xtya̱ 'na. 38Lo'o xtya̱ 'na ni, bi' laca tyucui ña'a̱ chalyuu; lo'o jua'a̱ calya trigo nu ndyaluu lo'o ntyucua si'yu tso'o, bi' laca ñi'ya̱ laca ñati̱ nu cua nda chacuaya' cha' caca Ni loo ne' cresiya ji'i̱ ngu'. Lo'o nu quixi̱' bi' ni, bi' laca ñi'ya̱ laca ñati̱ nu ntsu'u cha' ji'i̱ lo'o nu xña'a̱, 39cha' tya'a cusu̱u̱ na' laca nu ngusañi si'yu quixi̱' bi' lo xtya̱ 'na; la cui' nu xña'a̱ laca bi'. Tsa̱ nu lo'o xana clyaja xtya̱ ni, bi' laca ñi'ya̱ laca tsa̱ tlyu lo'o tye chalyuu; lo'o ñati̱ nu si'yu quixi̱' lo xtya̱ bi' ni, bi' laca ñi'ya̱ laca xca̱ ji'i̱ ycui' Ndyosi. 40Lo'o xuti'i̱ ngu' quixi̱' cha' tyaqui̱, jua'a̱ laca ñi'ya̱ caca ji'i̱ ñati̱ lo'o tye chalyuu. 41Tsa̱ bi', na' nu cua lijya̱a̱ cha' caca na' ñati̱, ta na' ji'i̱ xca̱ 'na cha' xuti'i̱ xca̱ bi' ji'i̱ lcaa ñati̱ nu ngulu'u qui'i̱ ji'i̱ tya'a cha' cua'ni ngu' cha' cuxi; tyu'u ti'i̱ lcaa ñati̱ nu cuxi tyiquee, cha' ná ntsu'u chacuayá' tyanu ngu' bi' ca su laca ycui' Ndyosi loo. 42Li' xcua̱a̱ xca̱ ji'i̱ ngu' bi' lo quii' tlyu; xi'ya tsa ngu' ca bi' li', ca ñasi̱' tsa ngu' ña'a̱ cuayá' nu cacu la'ya ngu' cha' ñasi̱' nti' ngu' li'. 43Pana tyanu lcaa ngu' nu lubii tyiquee ca su laca ycui' Ndyosi Sti na loo; caca ndubi tsa ña'a̱ loo ngu' bi' li', ñi'ya̱ ndubi xee cuichaa, xqui'ya cha' ngua lubii cresiya ji'i̱ ngu' tsiya' ti cuentya ji'i̱ ycui' Ni. Cua'a̱ jyaca̱ ma̱ ji'i̱ cha' nu nchcui' na' lo'o ma̱, si chañi cha' nti' ma̱ cuna ma̱.

Cui̱i̱ ji'i̱ sca yu'ba nu quiña'a̱ nga'a̱ nu nguatsi' ne' yuu

44’Chaca cha' chcui' na' lo'o ma̱, ñi'ya̱ caca lo'o laca ycui' Ni loo ne' cresiya ji'i̱ ñati̱; laca ñi'ya̱ laca sca yu'ba nu quiña'a̱ tsa nga'a̱. Nguxatsi' ngu' ji'i̱ yu'ba nu quiña'a̱ nga'a̱ bi' ne' yuu ne' lo'o ji'i̱ ngu'. Nde loo la, li' nquije ji'i̱ chaca ñati̱ mala ndyu'u cuatsi' bi', chaa tsa ti' yu li'; bi' cha' hora ti xa' ndacu̱' yu yuu lo su nguatsi' yu'ba bi', ndu'u yu ndyaa yu lquichi̱ cha' cujui' yu lcaa na nu ntsu'u ji'i̱ yu, cha' caja cñi ji'i̱ yu cha' cui'ya yu ña'a̱ tsaca lo'o bi' su nguatsi' yu'ba nu quiña'a̱ nga'a̱ bi'. Jua'a̱ ngua cha' ngujui yu'ba nu quiña'a̱ nga'a̱ bi' ji'i̱ yu.

Cui̱i̱ ji'i̱ sca perla nu quiña'a̱ tsa nga'a̱

45’Lo'o chaca cha' chcui' na' lo'o ma̱, ñi'ya̱ caca lo'o laca ycui' Ni loo ne' cresiya ji'i̱ ñati̱. Laca bi' ñi'ya̱ laca si nclyana tsa sca ñati̱ ji'i̱ perla nu tso'o tsa ña'a̱. Jlo ti' yu na ca nu ndyaana yu, bi' cha' tyiquee' nclyana yu ji'i̱ perla tso'o cha' cui'ya yu ji'i̱, nti' yu. 46Lo'o li' nquije sca perla nu quiña'a̱ tsa nga'a̱ ji'i̱ yu bi'; hora ti ndyujui' yu lcaa na nu ntsu'u ji'i̱ yu, cha' cui'ya nu sca ti perla bi', cha' nga'aa ntsu'u na tso'o la cui'ya yu, nti' yu.

(Cua nda Jesús tyucuaa cui̱i̱ bi' lo'o ngu', cha' ca cuayá' ti' ngu' cha' sca ti cha' bi' ndulo tsa ji'na, cha' quije chalyuu cucui su laca ycui' Ndyosi loo ne' cresiya ji'na.)

Cui̱i̱ ji'i̱ taraya nu tsaa ngu' cuta cualya lo'o

47―Lo'o chaca cha' chcui' na' lo'o ma̱, ñi'ya̱ caca lo'o laca ycui' Ni loo ne' cresiya ji'i̱ ñati̱ ―nacui̱ Jesús―. Laca ñi'ya̱ laca sca taraya tlyu nu ntucu̱ ngu' ji'i̱ lo hitya tyujo'o cha' xñi cualya, lo'o li' lcaa lo cualya ndyatí̱ ne' taraya bi'. 48Li' tyojolaqui ngu' ji'i̱ taraya ngutsa'á̱ bi' cha' tyu'u ca to' hitya, tyaca'a̱ ngu' xi cha' subi ngu' ji'i̱ lcaa cualya nu tso'o; su'ba ngu' cualya tso'o bi' ne' chcubi, xcua̱a̱ ngu' cualya nu ná tso'o bi'. 49Lo'o jua'a̱ caca tsa̱ tlyu lo'o tye chalyuu; li' ca̱a̱ xca̱ ji'i̱ ycui' Ndyosi cha' sa'be tya'a xca̱ bi' ji'i̱ lcaa ñati̱, cha' ná stu'ba tyi'i̱ ngu' nu xña'a̱ tyiquee lo'o ngu' nu lubii tyiquee. 50Xcua̱a̱ xca̱ bi' ji'i̱ ñati̱ xña'a̱ lo quii' tlyu, masi xi'ya tsa ngu' bi' li'; ca ñasi̱' tsa ngu' ña'a̱ cuayá' nu cacu la'ya ngu' cha' ñasi̱' nti' ngu' li'.

Cha' ji'i̱ na nu quiña'a̱ nga'a̱, masi cucui, masi cusu'

51’¿Ha ngua cuayá' ti' ma̱ lcaa cha' nu ngulu'u ca na' ji'i̱ ma̱ juani? ―nacui̱ Jesús ji'i̱ ngu' li'.

―Ngua cuayá' ti' ya ―nacui̱ ngu' ji'i̱.

52Li' xa' nguxacui̱ Jesús cha' ji'i̱ ngu' nu ndyaca tsa'a̱ ji'i̱:

―Sca mstru cha' jo'ó ni, si ngusñi yu cha' jna', si ngua tsa'a̱ yu ñi'ya̱ caca lo'o laca ycui' Ndyosi loo ne' cresiya ji'i̱ ñati̱ ―nacui̱ Jesús―, li' laca yu bi' ñi'ya̱ laca sca nu culiya' nu ntsu'u tsa cha' tso'o nu ndyu'u co'o toni'i̱ ji'i̱; tso'o tsa ntsu'u tyiquee yu, bi' cha' ntsu'u tsa cha' tso'o nu caca culu'u yu ji'i̱ xa' ñati̱, masi cha' cusu', masi cha' cucui.

Ndyalaa Jesús nde quichi̱ Nazaret

53Lo'o ndye ngulu'u Jesús lcaa cui̱i̱ bi' ji'i̱ ngu', li' ndu'u yu ndyaa yu xa' se'i̱. 54Ca tiya' la nu lo'o ndyalaa yu quichi̱ tyi yu, li' ndyatí̱ yu ne' laa ji'i̱ ngu' jua, ngulu'u yu xi ji'i̱ ngu' nu ndi'i̱ ne' laa bi'. Ndube tsa ti' ngu' bi' li':

―¿Mala ngua tsa'a̱ nu qui'yu re lcaa cha' nu nchcui' yu? ―nacui̱ ngu' ji'i̱ tya'a ngu'―. ¿Ñi'ya̱ ngua ji'i̱ yu cha' nchca ji'i̱ yu ndu'ni yu cha' tlyu? 55La cui' sñi' cuityi yaca laca yu re. ¿Ha si'i? Lo'o María laca xtya'a̱ yu; lo'o Jacobo, lo'o José, lo'o Simón, lo'o Judas, ngu' bi' laca tya'a yu re. 56Lo'o jua'a̱ nu cuna'a̱ tya'a yu ni, tya ndi'i̱ ngu' quichi̱ re. ¿Macala ngua tsa'a̱ yu cha' bi' lacua?

57Jua'a̱ ngua cha' chi̱i̱ nti' ngu' ña'a̱ ngu' ji'i̱ Jesús, bi' cha' ndi'ya̱ nchcui' Jesús lo'o ngu' li':

―Lcaa se'i̱ ndu'ni tlyu ngu' ji'i̱ sca ñati̱ nu laca tu'ba ji'i̱ ycui' Ndyosi ―nacui̱ Jesús ji'i̱ ngu'―. Sca ti quichi̱ tyi yu, ná nduna ngu' bi' cha' nu nchcui' yu tsiya' ti; ni tya'a yu, ná ndaquiya' ngu' ji'i̱ yu.

58Xti tsa cha' tlyu ngua'ni Jesús quichi̱ bi'. Ná jlya ti' ngu' ji'i̱ tsiya' ti, bi' cha' ná ngua'ni yu quiña'a̱ cha' tlyu ca bi'.

Currently Selected:

SAN MATEO 13: cta

Highlight

Copy