LOS HECHOS 27

Nda ngu' ji'i̱ Pablo ndyaa ca quichi̱ Roma

1Lo'o li' ngua stu'ba cha' ji'i̱ ngu' lo'o tya'a ngu' cha' ta ngu' ji'i̱ Pablo tsaa yu ca loyuu su cuentya Italia. Lo'o na' nu nscua̱ quityi re, nguta'a̱ na' lo'o ngu' li'. Ngulo ngu' cña ji'i̱ sca capitán ji'i̱ sendaru nu naa Julio cha' tsaa lo'o ji'i̱ Pablo lo'o xa' preso. Julio laca capitán ji'i̱ taju sendaru nu cuentya ji'i̱ Augusto. 2Lo'o jua'a̱ ndyaa Aristarco ngu' Tesalónica lo'o ya. (Quichi̱ Tesalónica ndi'i̱ ca loyuu su cuentya Macedonia.) Ndyaa ya ndyatí̱ ya ne' sca yaca ni'i̱ nu cua tsaa ti nde tyu̱u̱ tya'a quichi̱ nde loyuu su cuentya Asia. Lo'o jua'a̱ quichi̱ tyi xu'na yaca ni'i̱ bi' naa Adramitio. 3Ndu'u ya ndyaa ya li', ca chaca tsa̱ ndyalaa ya ca quichi̱ Sidón. Tso'o tsa tyiquee nu Julio bi', nda bi' chacuayá' ji'i̱ Pablo cha' tsaa yu slo tya'a tso'o yu nu ndi'i̱ quichi̱ bi', cha' xtyucua xi tya'a yu ji'i̱ yu. 4Lo'o li' ndu'u ya ndyaa ya chaca quiya' lo'o yaca ni'i̱ bi'. Cacua ti tu'ba yuu Chipre nteje tacui ya li'; la'a tsu' coca ndyanu loyuu btyi bi', cha' ná nda cui'i̱ chacuayá' tsaa ya chaca tsu' loyuu bi'. 5Jua'a̱ ngua cha' ndyaa ya tyucui̱i̱ lo tyujo'o nu nteje tacui cacua ti tu'ba yuu Cilicia lo'o Panfilia, ña'a̱ cuayá' nu ndyalaa ya quichi̱ Mira ca loyuu su cuentya Licia.

6Ca quichi̱ bi' ngujui chaca yaca ni'i̱ ji'i̱ capitán ji'i̱ sendaru bi'. Quichi̱ tyi xu'na yaca ni'i̱ bi' naa Alejandría. Na cua tsaa ti bi' ca loyuu su cuentya Italia, bi' cha' ngulo capitán bi' cña ji'i̱ ya cha' tyatí̱ ya ne' yaca ni'i̱ bi', cha' tsaa lo'o ji'i̱ ya ndejua. 7Tyu̱u̱ tsa tsa̱ nguta'a̱ ya lo hitya li', cha' tiya' tsa ndya'a̱ yaca ni'i̱ bi'. Lqui'ya ti ndyalaa ya cacua ti quichi̱ Gnido li', cha' lye tsa ngua'a cui'i̱ ji'i̱ yaca ni'i̱ bi'. Li' nteje tacui ya cacua ti to' quichi̱ Salmón cha' tsaa ya cacua la to' yuu nu naa Creta nu ndi'i̱ cla'be tyujo'o, cha' nga'aa ndyaca lye cui'i̱ nde jua, ngua ti' ngu'. 8Tiya' tsa ndya'a̱ yaca ni'i̱ bi', laja lo'o nteje tacui cacua ti to' loyuu bi'; li' ndyalaa ya su naa Buenos Puertos, nu ndi'i̱ cacua ti quichi̱ Lasea.

9Cua quiña'a̱ tsa tsa̱ nguna' ji'i̱ ya xqui'ya cui'i̱ bi', cha' lqui'ya tsa cua nteje tacui yaca ni'i̱ lo tyujo'o tyucui̱i̱ su lijya̱ ya ca Buenos Puertos. Cua ndyatí̱ co' tlya' nu lye tsa ndyaca cui'i̱ tlya' li'; bi' cha' nchcui' Pablo lo'o ngu' nu laca loo li':

10―Nga'aa tso'o cha' tsaa la na juani, cusu' ―nacui̱ Pablo ji'i̱ ngu'―. Cua ngua tii na' cha' quiñu'u̱ yaca ni'i̱ re, chcuna' lcaa yu'ba li' ―nacui̱―, lo'o jua'a̱ ntsu'u nu cajaa lo hitya li'.

11Pana ná ndyuna capitán ji'i̱ sendaru cha' nu nchcui' Pablo lo'o; jlo la ti' ngu' nu nclya' ya' yaca ni'i̱ lo'o nu laca loo ji'i̱ yaca ni'i̱ bi', ngua ti' ngu'. 12Tyu̱u̱ tya'a ngu', ngulacua ti' ngu' cha' tso'o la si tya tsaa la yaca ni'i̱ bi' ca quichi̱ Fenice ca nde loo la xi; la cui' loyuu Creta bi' ndi'i̱ quichi̱ Fenice, pana nde loo la xi. Jlo ti' ngu' cha' nde quichi̱ Fenice tso'o la tyanu yaca ni'i̱ tyucui tyempo tlya', cha' ná ndyaca lye cui'i̱ tlya' ndejua; bi' cha' ná tso'o tyanu yaca ni'i̱ ca Buenos Puertos, ngua ti' ngu'.

Lye tsa ndyaca cui'i̱ lo tyujo'o

13Lo'o li' nguxana ndyaca sca cui'i̱ tso'o, bi' cha' ngulacua ti' ngu' cha' tso'o la masi tsaa clya ya ca quichi̱ Fenice bi'. Ndu'u ya ndyaa ya lo'o yaca ni'i̱ li'. Ndyanu ya cacua ti to' loyuu su cuentya Creta bi', 14pana tiya' la ngutsa'a̱ cui'i̱; chaca quiya' tyaala tsa ngua bi' li', cha' nde lo yuu btyi bi' lijya̱ cui'i̱. Tyaala tsa cui'i̱ nu naa Nordeste bi', 15nducuni'i̱ cui'i̱ bi' ji'i̱ yaca ni'i̱ macala su nti' tsaa lo'o ji'i̱ ya li'. 16Nteje tacui ya cacua ti su ndi'i̱ sca yuu cla'be sube ti nu naa Clauda; jo'o la xi ngua cui'i̱ sca hora ti li', bi' cha' sa cu' ti ntucua laqui ya ji'i̱ canoa cha' tyu'u bi' lo hitya, cha' xco'o ya ji'i̱ ne' yaca ni'i̱. Ntucua ju̱u̱ hique canoa bi', cha' tyucua laqui ya ji'i̱. 17Nu lo'o cua ndyu'u co'o canoa bi', li' ngüixi̱i̱ ngu' reta tonu sii' tyi'i̱ ca chu̱' yaca ni'i̱ bi', cha' ná cula'a clyoo' ji'i̱ yaca ni'i̱. Ntsi̱i̱ tsa ngu' si tyacua ya su lati hitya cla'be tyujo'o, ca lo yusi̱ nu naa Sirte, bi' cha' nda'ya ngu' tasá nu ngutacui lo yaca ni'i̱ cha' nga'aa tucuni'i̱ cui'i̱ ji'i̱ late' bi', cha' nga'aa xna lo'o lye cui'i̱ ji'i̱ yaca ni'i̱ bi' li'. 18Ca chaca tsa̱ ña'a̱ ti lye tsa ndyaca cui'i̱, lo'o jua'a̱ lye tsa ntyiji'i̱ clyoo' ji'i̱ yaca ni'i̱, bi' cha' nguxana ngu' nchcua̱a̱ ngu' yu'ba nu ntsu'u ne' yaca ni'i̱ lo hitya tyujo'o. 19Tsa̱ nchca tyuna, li' nchcua̱a̱ ya lcaa ya' xña nu ntucua ji'i̱ yaca ni'i̱ bi', nu ndu'ni ngu' cña lo'o nquicha'; lo'o ya' ycui' ya nguxcua̱a̱ ya ya' xña bi' lo hitya. 20Tyu̱u̱ tsa̱ nga'aa na'a̱ ya xee cuichaa li', nga'aa na'a̱ ya cualya lo'o cuii nu nga'a̱ nde cua̱, hasta lo'o nga'aa tyu'ú ya xqui'ya cui'i̱ tyaala bi', ngulacua ti' ya.

21Cua ngua tyu̱u̱ tsa̱ nu nga'aa ndyacu ya tsiya' ti, bi' cha' ndatu̱ Pablo cha' chcui' yu lo'o ngu' bi' li':

―Cu'ma̱ ngu' tya'a ndya'a̱ na ―nacui̱ Pablo ji'i̱ ngu'―, tso'o la ngua si cua ngüi'ya ma̱ cuentya ji'i̱ cha' nu nchcui' na' lo'o ma̱ tya clyo, cha' tyanu na ca loyuu su cuentya Creta bi'. Juani nguna' yu'ba ji'i̱ ma̱, lo'o jua'a̱ cua ngunu'u̱ yaca ni'i̱ re. 22Pana cua'ni tlyu tyiquee ma̱ juani, taca jlya ti' ma̱ cha' ni sca ma̱ ná nscua cha' cajaa ma̱, masi chcuna' yaca ni'i̱ re. 23Jlo ti' ma̱ cha' ycui' Ndyosi laca nu Xu'na na', cha' cña ji'i̱ ycui' Ni ndyu'ni na'. Talya ti ngulu'u loo sca xca̱ ji'i̱ ycui' Ndyosi 'na; 24ndi'ya̱ nchcui' nu bi' lo'o na': “Ná cutsi̱i̱ nu'u̱, Pablo”, nacui̱ xca̱ bi' jna'. “Na cua nscua cha' tyatu̱ nu'u̱ slo rey ji'i̱ ngu' romano nu laca loo la”, nacui̱, “bi' cha' cua'ni lyaá ycui' Ndyosi ji'i̱ lcaa ngu' tya'a ndya'a̱ nu'u̱ ne' yaca ni'i̱ re xqui'ya nu'u̱, cha' nu'u̱ laca tu'ba ji'i̱ Ni.” 25Cua'ni tlyu tyiquee ma̱ lacua. Jlya ti' na' cha' nu cua nchcui' ycui' Ndyosi lo'o na'; jlo ti' na' cha' caca cha' ji'na ñi'ya̱ nu nacui̱ xca̱ ji'i̱ ycui' Ndyosi jna', 26masi clyo ntsu'u cha' tsaa lo'o cui'i̱ ji'na ca sca loyuu cla'be tyujo'o.

27Cua ndye tucua semana nu ndyaa lo'o cui'i̱ ji'i̱ ya jua'a̱ ti, ca li' ndyalaa ya sca tyujo'o su nchcui' ngu' ji'i̱, tyujo'o Adria. Ngua cla'be talya nu lo'o ngua tii ngu' nu nclya' ya' yaca ni'i̱ cha' ntsu'u yuu btyi cacua ti; 28bi' cha' ngusu'ba cuayá' ngu' ji'i̱ hitya, ni tsa lo cuayá' clyaa hitya. Li' nquije cha' ji'i̱ ngu' cha' calaa tyii ntucua scuá metro cuayá' clyaa hitya bi'. Ca nde loo la xi ngusu'ba cuayá' ngu' ji'i̱ hitya chaca quiya', calaa ntucua cati ti metro cuayá' clyaa hitya li'. 29Ntsi̱i̱ ngu' si tya'ni ca'a̱ siyu' yaca ni'i̱ chu̱' quee tlyu, bi' cha' nguxlyu'u ngu' jacua tya'a chcua̱ ngratu lo ju̱u̱ nde siyu' yaca ni'i̱, cha' nga'aa tya'a̱ la. Lo'o li' ndyutsi̱i̱ tya ngu' ndi'i̱ ngu', ntajatya ngu' ña'a̱ cuayá' nu quixee chaca tsa̱. 30Laja li' nu ngu' nu ndyala' ya' yaca ni'i̱ bi' ni, cuaana ti nda'ya ngu' ji'i̱ canoa lo hitya lo'o ju̱u̱; cha' cuiñi ti nchcui' ngu' cha' cua tsaa ti ngu' xlyu'u ngu' xa' chcua̱ ngratu nde que yaca ni'i̱, cha' ngua ti' ngu' tyaa ngu' cuaana ti ne' canoa bi'. 31Li' nchcui' Pablo lo'o sendaru, jua'a̱ lo'o capitán ji'i̱ ngu':

―Si ná tyanu ngu' nu ndyala' ya' yaca ni'i̱, cajaa lcaa ma̱ ne' hitya ―nacui̱ Pablo ji'i̱ sendaru.

32Hora ti ngusi'yu sendaru ju̱u̱ nu ndyaaca̱' ji'i̱ canoa li', nguxtyú ngu' ji'i̱ jua'a̱ ti lo hitya, ndyaa li'; ná lo'o ñati̱ ndyaa.

33Cua quixee ti chaca tsa̱, li' nchcui' Pablo lo'o ngu' cha' cacu ngu' xi.

―Cua ndye tucua semana juani ―nacui̱ Pablo ji'i̱ ngu'―, lo'o ná ndyacu ma̱ tsiya' ti, ni ná ngujua' tso'o ma̱ ―nacui̱―. 34Tso'o la si cacu ma̱ xi juani cha' caja juersa ji'i̱ ma̱. Ni sca cu'ma̱ ná nscua cha' cajaa ma̱, ni ná ca quicha ma̱.

35Lo'o ndye nchcui' Pablo lo'o ngu', li' ngusñi yu sca xlyá. Ndya yu xlya'be ji'i̱ ycui' Ndyosi slo lcaa ngu', ngusa'be yu xlyá bi', ndyacu yu li'. 36Tso'o la ngua tyiquee ngu' cha' na'a̱ ngu' ñi'ya̱ nu ngua'ni Pablo, bi' cha' ndyacu lcaa ngu' xi li'; 37tucua siyento ntucua snayala tyii ntucua scuá tya'a ñati̱, tsa lo cua tya'a ya ntsu'u ya ne' yaca ni'i̱ bi'. 38Lcaa ngu' ndyacu ngu' ña'a̱ cuayá' nu nguaala' ti' ngu'. Li' ngulo ngu' yu'ba ji'i̱, ndye nguxcua̱a̱ ngu' ji'i̱ lcaa si'yu trigo bi' lo hitya, cha' ca lasa la xi yaca ni'i̱ li'.

Ndye cha' ji'i̱ yaca ni'i̱

39Lo'o nguxee chaca tsa̱, li' na'a̱ ya cha' cua ndyalaa ya sca to' yuu, pana ná ngüi'ya ngu' cuentya macala laca su ndyalaa ya. Na'a̱ ngu' su nga'a̱ xi yusi̱ to' yuu btyi bi', lo'o jua'a̱ ti̱ ti nscua hitya ca bi'. Ngua ti' ngu' cha' tso'o la si xtyii yaca ni'i̱ lo yusi̱i̱ bi', si caja ñi'ya̱ nu tyeje tacui yaca ni'i̱ cajua; 40bi' cha' ngusi'yu ngu' reta ji'i̱ chcua̱ ngratu su ndyaaca̱' yaca ni'i̱ nde siyu', ndyanu chcua̱ ngratu ne' hitya. Li' ngusati̱' ngu' ya' yaca ni'i̱, ngutacui ngu' tasá lo yaca cha' tucuni'i̱ cui'i̱ ji'i̱ yaca ni'i̱ tsaa ca bi'. 41Ndyaa ya li', ndyalaa yaca ni'i̱ sca se'i̱ su nxna tucua tya'a ya' hitya. Lati tsa hitya jua xqui'ya yusi̱, bi' cha' ndyaa scua hique yaca ni'i̱ lo yusi̱ bi' li', nguxana nclya'a clyoo' tonu ji'i̱ siyu' yaca ni'i̱ bi' li'. 42Ngulacua ti' sendaru cha' si ntsu'u cha' xcuatya ngu' lo hitya, lo'o ti xna lcaa preso ji'i̱ ngu'; bi' cha' ngulacua ti' ngu' cha' tso'o la cujuii ngu' ji'i̱ lcaa preso yala ti. 43Pana ná nda capitán chacuayá' ji'i̱ sendaru cha' cujuii ngu' ji'i̱ preso, cha' ná nti' capitán bi' cujuii ji'i̱ Pablo. Li' ngulo capitán cña ji'i̱ lcaa ngu' nu nchca ji'i̱ ngu' xcuatya ngu', cha' tsaa ngu' lo hitya cha' tyu'u tso'o ti ngu' ca loyuu btyi; 44ngu' nu ná nchca xcuatya ni, ntsu'u cha' xñi ngu' ngoca', masi xñi ngu' yu'be yaca ni'i̱ ti bi'. Lo'o jua'a̱ tso'o ti ndyalaa lcaa ya to' yuu btyi bi' li'.

Currently Selected:

LOS HECHOS 27: cta

Highlight

Copy