LOS HECHOS 23

1Cua ndyu'u ti'i̱ lcaa ngu' cusu' bi'. Li' ña'a̱ tsa Pablo ji'i̱ ngu' cusu' nu cua'ni cuayá' ji'i̱ yu.

―Cu'ma̱ ngu' cusu' tya'a na' ―nacui̱ Pablo ji'i̱ ngu' li'―, lcaa tsa̱ tso'o ndi'i̱ na'. Lubii cresiya jna' cuentya ji'i̱ ycui' Ndyosi.

2Ananías naa nu laca xu'na sti jo'ó bi'; li' ngulo nu Ananías bi' cña ji'i̱ ngu' nu ndu̱ cacua ti cha' quiji'i̱ ya' ngu' tu'ba Pablo.

3―La cui' jua'a̱ quiji'i̱ ycui' Ndyosi jinu'u̱ tu'ni ―nacui̱ Pablo ji'i̱ xu'na sti jo'ó bi' li'―. Cuiñi nu'u̱. ¿Ha liñi tsa ndu'ni nu'u̱ nti'? Nde ndyu'ni cuayá' ma̱ jna' cuentya ji'i̱ chacuayá' nu ntsu'u ji'na, pana cua ngulo nu'u̱ cña cha' quiji'i̱ ya' ngu' tu'ba na', masi ná ntsu'u chacuayá' cua'ni nu'u̱ jua'a̱.

4Nchcui' ngu' nu ndu̱ cacua ti lo'o Pablo li':

―¿Ha nchcui' suba' nu'u̱ lo'o xu'na sti jo'ó nu laca cña ji'i̱ ycui' Ndyosi? ―nacui̱ ngu' ji'i̱ Pablo.

5―Cu'ma̱ ngu' cusu' tya'a na' ―nacui̱ Pablo―, ná jlo ti' na' si xu'na sti jo'ó laca jua. Ná tso'o cha' nu nchcui' na' si jua'a̱, cha' cua nscua sca cha' lo quityi ji'i̱ ycui' Ndyosi ndi'ya̱: “Ná chcui' cuxi ma̱ ji'i̱ xu'na ma̱”.

6Pana ngua cuayá' ti' Pablo li' cha' nga'a̱ ngu' fariseo, lo'o jua'a̱ nga'a̱ xi ngu' saduceo laja ngu' cusu' bi'. Cui̱i̱ nchcui' Pablo chaca quiya' li':

―Cu'ma̱ ngu' cusu' tya'a na' ―nacui̱ yu ji'i̱ ngu'―, ngu' fariseo laca na' ―nacui̱ Pablo―, lo'o jua'a̱ ngu' fariseo ngua sti na'. Ndyu'ni cuayá' ma̱ jna' xqui'ya cha' jlya ti' na' cha' ntsu'u cha' tyu'ú lcaa jyo'o chaca quiya' ca nde loo la.

7Nu lo'o ndyuna ngu' cha' bi', li' nguxlyú ngu' cha' hichu̱' tya'a ngu'; ngu' fariseo nxu̱u̱ tya'a lo'o ngu' saduceo li'. 8Ná jlya ti' ngu' saduceo cha' tya taca tyu'ú sca ñati̱ chaca quiya' lo'o cua ngujuii, ni ná jlya ti' ngu' cha' ntsu'u xca̱ ji'i̱ ycui' Ndyosi, ni ná jlya ti' ngu' cha' ntsu'u cui'i̱; pana ngu' fariseo ni, jlya ti' ngu' lcaa cha' bi'. 9Bi' cha' lye tsa nxu̱u̱ tya'a ngu' bi'. Lo'o li' ndyatu̱ xi ngu' fariseo nu nslo tso'o ji'i̱ quityi ji'i̱ ycui' Ndyosi.

―Ná ngua'ni nu qui'yu re cha' cuxi ―nacui̱ ngu' bi'―. Ná tso'o xu̱u̱ tya'a na lo'o ycui' Ndyosi si chañi cha' cua nchcui' sca cui'i̱ tso'o lo'o yu re, si cua nchcui' sca xca̱ ji'i̱ ycui' Ndyosi lo'o yu.

10Lye la nxu̱u̱ tya'a ngu' xqui'ya cha' bi' li'. Ngulacua tsa ti' xu'na sendaru si cujuii ngu' ji'i̱ Pablo, bi' cha' ngulo cña ji'i̱ sendaru cha' tejeya' ngu' ji'i̱ Pablo, cha' xa' tsaa lo'o ngu' ji'i̱ yu ca to' tyi sendaru chaca quiya'.

11Lo'o ngua talya lye, li' ndyalaa ycui' nu Xu'na na slo Pablo.

―Cua'ni tlyu tyiquee nu'u̱ Pablo ―nacui̱ Ni―. Ñi'ya̱ cua nchcui' nu'u̱ cha' jna' nde quichi̱ Jerusalén re, jua'a̱ ntsu'u cha' chcui' nu'u̱ cha' jna' ca quichi̱ Roma.

Ngua ti' ngu' cujuii ngu' ji'i̱ Pablo

12Lo'o cua nguxee chaca tsa̱, li' ngüiñi cha' ji'i̱ ngu' judío lo'o tya'a ngu' cha' cujuii ngu' ji'i̱ Pablo. Ndi'ya̱ ngua'ni ngu' jura li':

―Ña'a̱ ycui' Ndyosi ji'na cha' chañi ca cha' ná cacu na ná co'o na tsiya' ti ña'a̱ cuayá' nu cua ndyujuii na ji'i̱ nu Pablo bi' ―nacui̱ ngu' ji'i̱ tya'a ngu'.

13Cua ntsu'u tu'ba tya'a ñati̱ nu ngua ti' cua'ni cña cuxi bi'. 14Bi' cha' ndyaa ngu', nchcui' ngu' lo'o sti jo'ó nu laca loo lo'o ngu' cusu' quichi̱ bi':

―Cua ngüiñi cha' ji'i̱ ya lo'o ycui' Ndyosi ―nacui̱ ngu' ji'i̱ ngu' nu laca loo―. Nchcui' ya lo'o Ni cha' ná cacu ya tsiya' ti ña'a̱ cuayá' nu cua ndyujuii ya ji'i̱ nu Pablo bi' ―nacui̱ ngu'―. 15Bi' cha' juani, lcaa cu'ma̱ ngu' cusu' lo'o ngu' tisiya, jña ma̱ ji'i̱ xu'na sendaru bi' cha' ca̱a̱ lo'o ngu' ji'i̱ Pablo ca slo ma̱ chaca quiya'. Ta ma̱ cha' lo'o ngu' cha' tya nti' ma̱ cua'ni cuayá' ma̱ la xi ji'i̱ yu bi'. Li' tsaa ya chca'a̱ cuaana ya to' tyucui̱i̱, cha' cujuii ya ji'i̱ yu laja lo'o tyeje tacui ngu' lo'o yu li'.

16Laja li' cua ngujui cha' ji'i̱ sñi' tya'a Pablo, ña'a̱ cha' nu nchcui' ngu' bi'. Yala ti ndyaa yu cuañi' bi' to' tyi sendaru cha' ta yu cha' lo'o chi tya'a yu. 17Li' ngusi'ya Pablo ji'i̱ sca capitán:

―Cua'ni cha' tso'o tsaa lo'o ji'i̱ yu cuañi' re ca slo xu'na ma̱ ―nacui̱ Pablo ji'i̱―. Ntsu'u sca cha' nu ta yu lo'o nu laca xu'na ma̱.

18Ndyaa lo'o capitán ji'i̱ yu cuañi' bi' slo xu'na ngu' li':

―Cua ngusi'ya Pablo jna' ―nacui̱ capitán ji'i̱ xu'na―, nu Pablo nu ntsu'u ne' chcua̱ ―nacui̱ capitán―. Nacui̱ yu 'na cha' ca̱a̱ lo'o na' ji'i̱ yu cuañi' re slo nu'u̱, cha' ntsu'u sca cha' nu nti' chcui' lo'o nu'u̱.

19Ntejeya' xu'na sendaru ya' yu cuañi' bi' li', ndyaa lo'o ji'i̱ su ná cuna xa' ñati̱ cha' nu chcui':

―¿Ha ntsu'u sca cha' nu nti' nu'u̱ chcui' lo'o na'? ―nacui̱ xu'na sendaru ji'i̱ yu cuañi' bi' li'.

20―Cua ngüiñi cha' ji'i̱ nu ngu' judío bi' lo'o tya'a ngu' cha' jña ngu' cha' clyu ti' jinu'u̱, cha' ca̱a̱ lo'o nu'u̱ ji'i̱ Pablo ca slo ngu' tisiya bi' la quee ―nacui̱ yu cuañi' bi' ji'i̱ xu'na sendaru li'―. Chcui' ngu' lo'o nu'u̱ cha' tya nti' la ngu' cua'ni cuayá' ngu' xi ji'i̱ Pablo slo ngu'. 21Cha' cuiñi laca bi'. Cua ntsu'u masi tu'ba tya'a ñati̱ nu ntajatya ngu' ji'i̱ ma̱ cuaana ti to' tyucui̱i̱ bi'; cua nchcui' ngu' bi' lo'o ycui' Ndyosi cha' ná cacu ngu' ná co'o ngu' tsiya' ti, ña'a̱ cuayá' nu cua ndyujuii ngu' ji'i̱ nu Pablo bi'. Lo'o jua'a̱ cua laca ndi'i̱ ngu' juani, ntajatya ngu' cha' chcui' ngu' lo'o nu'u̱.

22Li' ngulo xu'na sendaru cña ji'i̱ yu cuañi' bi', cha' ná cacha' ji'i̱ xa' ñati̱ cha' nu cua nda lo'o sendaru. Li' ngusalya' yu cuañi' bi' lo'o xu'na sendaru, ndu'u ndyaa.

Nda xu'na sendaru ji'i̱ Pablo cha' tsaa yu ca slo Félix nu laca gobernador

23Lo'o li' ngusi'ya xu'na sendaru ji'i̱ tucua tya'a capitán cha' ca̱a̱ ngu' slo. Ngulo cña ji'i̱ capitán bi', cha' cua'ni cho'o ngu' ji'i̱ ngu' cha' tsaa ngu' lo'o quiña'a̱ tya'a sendaru ca quichi̱ Cesarea; nacui̱ cha' hora cua caa nde talya tsaa ngu'. Tsaa lo'o ngu' ji'i̱ tucua siyento tya'a sendaru nu tya'a̱ quiya' ti, lo'o jua'a̱ tya xna yala tyi tya'a sendaru nu tyucua hichu̱' cuayu ti, lo'o jua'a̱ tya tyucuaa siyento tya'a sendaru nu tya'a̱ lo'o clya chcua̱, tsaa lo'o ngu' ji'i̱ li'. 24Lo'o jua'a̱ ngulo cña cha' cua'ni cho'o ngu' ji'i̱ cuayu nu tyucua Pablo. Ntsu'u cha' cua'a tso'o sendaru ji'i̱ Pablo tyucui̱i̱ ña'a̱ cuayá' nu tyalaa tso'o ti yu ca slo gobernador Félix. 25Li' nguscua xu'na sendaru sca quityi cha' tsaa slo nu Félix bi'; ndi'ya̱ nchcui' quityi bi':

26“Claudio Lisias nscua quityi re cha' tsaa slo nu'u̱, gobernador Félix, cha' nu'u̱ laca loo. Xlyo ni'i̱. 27Cua ntejeya' ngu' judío ji'i̱ nu qui'yu re, cua cujuii ti ngu' ji'i̱ yu lo'o ndyalaa na' lo'o sendaru. Ngua tii na' cha' ngu' romano laca yu re, bi' cha' ngulo na' ji'i̱ yu ya' ngu' cuxi bi'. 28Lo'o li' ngua ti' na' ca cuayá' ti' na' ni qui'ya ntsu'u ji'i̱ yu lo'o ngu', bi' cha' ndyaa lo'o na' ji'i̱ yu ca slo ngu' nu laca loo ji'i̱ ngu' judío. 29Li' ngua cuayá' ti' na' cha' cua ngusta ngu' qui'ya ji'i̱ yu cuentya ji'i̱ cha' cusu' nu ntsu'u ji'i̱ tya'a ngu' judío ti, pana ná ntsu'u cha' cujuii ngu' ji'i̱ yu, ná ntsu'u cha' su'ba ngu' ji'i̱ yu ne' chcua̱. 30Li' ngua tii na' cha' cuaana ti cua ngüiñi cha' ji'i̱ tyu̱u̱ tya'a ngu' judío cha' cujuii ngu' ji'i̱ yu re, bi' cha' nda na' ji'i̱ yu lijya̱ yu slo nu'u̱ juani. Ngulo na' cña ji'i̱ nu ngu' judío bi', cha' ca̱a̱ ngu' ca slo nu'u̱ cha' sta ngu' qui'ya ji'i̱ yu re, si ntsu'u sca qui'ya ji'i̱ yu cuentya ji'i̱ ngu'. Tsa lo cua ti cha' nscua na' juani.” Jua'a̱ nguscua nu xu'na sendaru bi' lo quityi.

31Ñi'ya̱ nu ngulo xu'na sendaru cña ji'i̱ ngu', jua'a̱ ngua cha' bi' li'. Lo'o ngua talya, li' ndyaa ngu' ndyaa qui'ya ngu' ji'i̱ Pablo, ndyaa lo'o ngu' ji'i̱ yu ca quichi̱ Antípatris. 32Ca chaca tsa̱ nguxtyu̱u̱ sendaru nu ndya'a̱ quiya' ti, ñaa ngu' nde to' tyi ngu'. Tya ndyaa la ngu' nu ntucua hichu̱' cuayu bi', ndyaa lo'o ngu' ji'i̱ Pablo tyucui̱i̱. 33Ndyalaa ngu' ca quichi̱ Cesarea li', nda ngu' quityi ji'i̱ gobernador, lo'o jua'a̱ nguxtyanu ngu' ji'i̱ preso slo nu cusu' bi' li'. 34Nchcui' gobernador lo quityi bi', li' nchcuane ji'i̱ Pablo ma ngu' laca. Nguxacui̱ Pablo cha' ji'i̱ li':

―Loyuu su cuentya Cilicia ndi'i̱ quichi̱ tyi na' ―nacui̱ Pablo.

35―Ña'a̱ na' ñi'ya̱ caca cha' jinu'u̱ lo'o ca̱a̱ ngu' bi' slo na' cha' sta ngu' qui'ya jinu'u̱ ―nacui̱ gobernador ji'i̱ Pablo.

Lo'o li' ngulo nu gobernador bi' cña ji'i̱ sendaru cha' tyi'i̱ ngu' sendaru cua̱ ji'i̱ Pablo ca toni'i̱ cña su ngutucua jyo'o rey Herodes cua sa'ni la.

Currently Selected:

LOS HECHOS 23: cta

Highlight

Copy