LOS HECHOS 21

Tsaa Pablo ca Jerusalén

1Nguxtyanu ya ji'i̱ tya'a ya li'. Ndu'u ya ndyaa ya ne' yaca ni'i̱ ca loyuu su cuentya Cos. Ca chaca tsa̱ ndyalaa ya ca quichi̱ Rodas, lo'o li' ndyalaa ya ca quichi̱ Pátara. 2La cui' quichi̱ bi' ngujui chaca yaca ni'i̱ ji'i̱ ya nu cua tsaa ti nde loyuu su cuentya Fenicia. Ndyatí̱ ya ne' yaca ni'i̱ bi', ndu'u ya ndyaa ya li'. 3Cua nteje tacui ya cacua ti loyuu su cuentya Chipre, la'a tsu' coca ndyanu yuu btyi bi', cha' tsaa liñi ya ca loyuu su cuentya Siria. Ntsu'u cha' tsaa yaca ni'i̱ ca quichi̱ Tiro cha' tyanu yu'ba ji'i̱ ndejua. Lo'o ndyalaa ya quichi̱ bi' ndu'u ya ne' yaca ni'i̱ bi', 4ndyaa ya slo taju ñati̱ ji'i̱ Jesucristo nu ndi'i̱ quichi̱ bi'; ndyanu ya cati tsa̱ lo'o ngu' bi' li'. Nchcui' ngu' bi' lo'o Pablo cha' ná tsaa yu ca quichi̱ Jerusalén, cha' cua ngua'ni Xtyi'i ycui' Ndyosi cha' ngua cuayá' ti' ngu' bi' ñi'ya̱ nu caca ji'i̱ Pablo ca quichi̱ bi'. 5Lo'o ndye cati tsa̱, li' ndu'u ya ndyaa ya. Nguxtyucua lcaa tya'a ngu' ji'i̱ ya tyucui̱i̱ su ndyaa ya to' tyujo'o; lo'o jua'a̱ lcaa nu cuna'a̱ lo'o nu sube ji'i̱ ngu', ndyaa ngu' lo'o ya. Li' ngutu̱ sti̱' lcaa ya ca to' tyujo'o cha' stu'ba ti chcui' ya lo'o ycui' Ndyosi. 6Ngusalya' ngu' lo'o ya, ngüityi ngu' ji'i̱ ya, li' ndyatí̱ ya ne' yaca ni'i̱; cuati nguxtyu̱u̱ ngu' ya̱a̱ ngu' nde toni'i̱ ji'i̱ ngu'.

7Ndu'u ya quichi̱ Tiro ndyaa ya ca quichi̱ Tolemaida. Xa' ndu'u ya ne' yaca ni'i̱ li'; nchcuicha' ya ji'i̱ ñati̱ ji'i̱ Jesucristo tya'a na nu ndi'i̱ quichi̱ bi', jua'a̱ ndyanu ya lo'o ngu' sca talya ti. 8Ca chaca tsa̱ ndu'u ya ndyaa ya tyucui̱i̱ ca quichi̱ Cesarea; ndyalaa ya to' tyi Felipe li', la cui' Felipe nu nchcui' lo'o ngu' cha' ji'i̱ Jesucristo nu Xu'na na. Nga'a̱ Felipe ji'i̱ nu cati tya'a ngu' nu laca cña ji'i̱ ñati̱ nu ngusñi cha' ji'i̱ Jesús tya clyo. Ndyanu ya slo yu li'. 9Ntsu'u jacua tya'a sñi' Felipe, xcui' cuna'a̱ nu ntucua ycui' ti laca sñi' yu. Cua nda ycui' Ndyosi chacuayá' ji'i̱ nu cuna'a̱ bi', cha' chcui' ngu' cua ña'a̱ ca cha' nu nda ycui' Ndyosi lo'o ngu' cha' chcui' ngu' lo'o ñati̱. 10Cua nguti'i̱ ya slo ngu' tyu̱u̱ tsa̱, lo'o li' ndyalaa sca nu qui'yu nu naa Agabo; ca loyuu su cuentya Judea ndu'u yu bi'. Sca nu laca tu'ba ji'i̱ ycui' Ndyosi laca yu bi', tii tsaa yu. 11Lo'o ndyalaa yu ca slo ya, li' ngulo yu juata nu ndyaaca̱' sii' Pablo, li' ya' yu lo'o quiya' yu ngusca̱' yu lo'o juata bi'.

―Cua nchcui' Xtyi'i ycui' Ndyosi lo'o na' cha' ñi'ya̱ nu ndyaaca̱' ycui' na', jua'a̱ sca̱' ngu' judío tya'a na ji'i̱ ñati̱ nu ca ji'i̱ juata re ca Jerusalén ―nacui̱ Agabo ji'i̱ ya―. Tsaa lo'o ngu' ji'i̱ ñati̱ bi' slo ngu' xa' tsu' cha' xcube' ngu' ji'i̱ yu ―nacui̱.

12Ndyuna ya cha' nu nchcui' Agabo, lo'o li' ca ta'a ya lo'o ngu' Cesarea tya'a na, tya'na nchcui' ya lo'o Pablo cha' ná tsaa yu ca Jerusalén.

13―¿Ni cha' laca nxi'ya ma̱? ―nacui̱ Pablo ji'i̱ ya li'―. ¿Ni cha' laca ndyu'ni ma̱ cha' ca xñi'i̱ ti' na'? ―nacui̱―. Cua laca cha' tsa'a̱ ca Jerusalén; tyaja'a̱ na' tsa'a̱, masi lo'o sca̱' ngu' jna', masi lo'o cujuii ngu' jna' cajua xqui'ya Jesucristo nu Xu'na na.

14Ngua cuayá' ti' ya li' cha' ná ngua ji'i̱ ya cua'a ya ji'i̱ yu.

―Tso'o si caca ñi'ya̱ nu nacui̱ ycui' Ndyosi cha' caca lacua ―nacui̱ ya li'.

15Lo'o ngua'ni cho'o ya ji'i̱ ya, li' ndu'u ya ndyaa ya ca Jerusalén. 16Tyu̱u̱ tya'a ngu' tya'a na ndyaa lo'o ji'i̱ ya cha' culu'u ngu' ji'i̱ ya macala ndi'i̱ chaca yu tya'a na nu naa Mnasón. Ngu' Chipre laca nu Mnasón bi'. Cua ngusñi yu cha' ji'i̱ Jesús tya sa'ni la, lo'o nu juani ntucua tyi yu ca Jerusalén. Slo yu bi' ndyanu ya li'.

Ndyacua tya'a Pablo lo'o Jacobo

17Tso'o ntsu'u tyiquee ñati̱ ji'i̱ Jesucristo tya'a na cha' cua ndyalaa ya ca Jerusalén. 18Nguxee chaca tsa̱ ndyaa Pablo lo'o ya ca slo Jacobo. Cajua ndyu'u ti'i̱ lcaa ngu' cusu' ji'i̱ ngu' tya'a ngusñi na cha' ji'i̱ Jesucristo quichi̱ bi'. 19Nchcuicha' Pablo ji'i̱ ngu' bi', li' nchcui' yu lo'o ngu', ndacha' yu lcaa ña'a̱ cña nu ngua'ni ycui' Ndyosi lo'o nguti'i̱ ya slo ngu' xa' tsu'. 20Nu lo'o cua ndyuna ngu' cha' bi', li' ngua'ni tlyu ngu' ji'i̱ ycui' Ndyosi. Nchcui' ngu' lo'o Pablo li':

―Tso'o tsa lacua ―nacui̱ ngu' ji'i̱ yu―. Juani ni, jlo ti' nu'u̱ cha' cua ntsu'u tyu̱u̱ mil tya'a ngu' judío tya'a na nu ngusñi cha' ji'i̱ Jesús tya tsubi' la. Nacui̱ ngu' cha' ntsu'u cha' taquiya' lcaa na lo'o tya'a na cua ña'a̱ ca cha' cusu' nu nguxtyanu jyo'o Moisés ji'na cua sa'ni la ―nacui̱ ngu'―. 21Lo'o jua'a̱ cua nquijeloo cha' ji'i̱ ngu' cha' ngulu'u nu'u̱ ji'i̱ ngu' judío tya'a na nu ndi'i̱ xa' quichi̱, cha' nga'aa ntsu'u cha' taquiya' ngu' bi' ji'i̱ cha' cusu' nu nguscua jyo'o Moisés bi', ni ná ntsu'u cha' xi'yu ngu' quiji̱ sñi' ngu' cha' culacua̱ ngu'; ngulu'u nu'u̱ cha' ná nga'a̱ cha' cua'ni ngu' bi' ñi'ya̱ nu ndu'ni na cha' laca na ngu' judío, nacui̱ ngu'. 22¿Na laca cua'ni na lacua? Ná tyiquee' tyu'u ti'i̱ lcaa ngu' judío tya'a na, lo'o caja cha' ji'i̱ ngu' cha' cua ndyalaa nu'u̱ quichi̱ re. 23Bi' cha' ta ya sca cui̱i̱ lo'o nu'u̱ ñi'ya̱ nu cua'ni nu'u̱ juani. Cua ndi'i̱ jacua tya'a ngu' qui'yu re nu cua ngüiñi sca cha' ji'i̱ ngu' lo'o ycui' Ndyosi. 24Tsaa lo'o nu'u̱ ji'i̱ ngu' bi', cha' stu'ba ti cua'ni lyiji ma̱ cha' nu cua ngüiñi ji'i̱ ngu' bi' lo'o ycui' Ndyosi. Nu'u̱ cui'ya lcaa na nu nga'a̱ cha' caca msta̱ ji'i̱ ngu' ne' laa. Li' taca xi'yu ngu' quicha̱' hique ngu' lo'o cua ndye cha' bi'. Caca cuayá' ti' lcaa ngu' li', cha' lo'o nu'u̱ ndaquiya' nu'u̱ ji'i̱ lcaa cha' nu nguxtyanu jyo'o cusu' ji'na, cha' si'i cha' liñi nu cua nchcui' ñati̱ jinu'u̱ li'. 25Lo'o nu ngu' xa' tsu' nu cua ngusñi cha' ji'i̱ Jesucristo ni, cua nguscua ya sca quityi cha' tsaa slo ngu' bi', cha' ca cuayá' ti' ngu' cha' ná ntsu'u cha' cua'ni ngu' lcaa lo cha' nu ntsu'u ji'i̱ ngu' judío tya'a na. Nguscua ya cha' ndi'ya̱: ná tso'o cacu ngu' cuaña' na'ni nu cua nda ngu' cha' caca msta̱ ji'i̱ jo'ó, ni ná tso'o cacu ngu' tañi, ni ná tso'o cacu ngu' na'ni nu ná ndyalú tso'o tañi ni' lo'o ndyujuii ngu' ji'i̱, ni ná tso'o chca'a̱ ngu' lo'o ñati̱ nu si'i clyo'o ngu'.

Ngusñi ngu' ji'i̱ Pablo preso to' laa tlyu

26Ca chaca tsa̱, li' ndyaa lo'o Pablo ji'i̱ nu jacua tya'a ñati̱ bi', ngua'ni lubii ngu' ji'i̱ ycui' ca ngu' cuentya ji'i̱ ycui' Ndyosi. Li' ndyaa ngu' ne' laa tlyu, cha' cacha' ngu' ji'i̱ ngu' bi' ni tsa̱ tye tyuco'o tsa̱ ji'i̱ ngu' lo'o tya'a ngu', cha' li' taca ca̱a̱ ngu' ne' laa jua, ca̱a̱ lo'o ngu' msta̱ nu ta ngu' ji'i̱ ycui' Ndyosi li'.

27Cua tya'a ti cati tsa̱, cua tye ti cña ji'i̱ ngu'. Pana cua ntsu'u xi ngu' judío nu laca tyi ca Asia, lo'o jua'a̱ cua na'a̱ ngu' bi' ji'i̱ Pablo su ndya'a̱ yu ne' laa tlyu bi'. Hora ti ngua'ni cui̱i̱ ngu' bi' sca cuentyu lo'o ngu' quichi̱, cha' caca ñasi̱' ngu' ji'i̱ Pablo li'. 28Ngusi'ya ngu' judío bi' ji'i̱ ngu' quichi̱ li':

―Cu'ma̱ ngu' Israel tya'a na ―nacui̱ ngu'―, xtyucua ma̱ ji'i̱ ya ―nacui̱ ngu'―. Cua ngulu'u nu qui'yu re ji'i̱ ngu' lcaa quichi̱ su nguta'a̱ yu cha' ná tso'o na nu laca na ngu' judío; ná tso'o cha' cua'ni tlyu na ji'i̱ cha' nu nguscua jyo'o Moisés, lo'o jua'a̱ ná tso'o laa tlyu re, nacui̱ yu re. Lo'o chaca cha' ni, cua ndyaa lo'o yu re ji'i̱ ngu' xa' tsu' ne' laa tlyu re cha' cua'ni ñu'u̱ ngu' ji'i̱ laa su ndu'ni tlyu na ji'i̱ ycui' Ndyosi.

29Nchcui' ngu' jua'a̱ cha' cua na'a̱ ngu' ji'i̱ Pablo ndya'a̱ lquichi̱ lo'o Trófimo, sca ngu' Efeso. Ngua ti' ngu' li', cha' cua ndyaa lo'o yu ji'i̱ ne' laa tlyu bi'.

30Nxna lijya̱ lcaa ngu' quichi̱ li', cha' tejeya' ngu' ji'i̱ Pablo. Hora ti ngulo'o ngu' ji'i̱ yu ne' laa, ndacu̱' ngu' to' laa li'. 31Ngua ti' ngu' cujuii ngu' ji'i̱ Pablo; pana ndyaa xi xa' la ngu' slo nu xu'na sendaru ngu' romano, ndyaa cacha' ngu' ji'i̱ cha' lye tsa nxu̱u̱ tya'a lcaa ngu' quichi̱. 32Bi' cha' ngulo nu xu'na sendaru bi' cña ji'i̱ capitán ji'i̱ cha' tsaa lo'o ngu' ji'i̱ ña'a̱ latya sendaru, tsaa ngu' lo'o ycui' xu'na ngu' bi' ca su ndi'i̱ ngu' quichi̱. Ngusna ngu' ndyaa ngu' su ndyu'u ti'i̱ lcaa ngu' quichi̱ li'. Nga'aa ngujui'i̱ ngu' quichi̱ ji'i̱ Pablo lo'o na'a̱ ngu' ji'i̱ sendaru lo'o xu'na sendaru bi' lijya̱. 33Li' ndyaa xu'na sendaru bi' cacua ti slo nu Pablo bi'; ngulo cña cha' tejeya' sendaru ji'i̱ yu, cha' sca̱' ngu' ji'i̱ yu lo'o tucua tya'a carena chcua̱. Li' nchcuane xu'na sendaru bi' ji'i̱ ngu' quichi̱, cha' caca cuayá' ti' ycui' tilaca laca preso bi' ji'i̱, ñi'ya̱ laca qui'ya nu ntsu'u ji'i̱ yu. 34Pana nxi'ya tsa ngu' quichi̱ ndi'i̱ ngu' li'; nxi'ya tsaca ngu' lo'o nxi'ya chaca ngu', bi' cha' ná jlo ti' xu'na sendaru bi' na laca ngua ji'i̱ ngu'. Li' ngulo cña cha' tsaa lo'o sendaru ji'i̱ Pablo ca to' tyi sendaru. 35Lo'o cua ndyalaa sendaru su tyacui̱ lo ndyiya' to' ni'i̱ ji'i̱ ngu', li' ngusñi sendaru ji'i̱ Pablo, ngüi'ya cua̱ ngu' ji'i̱ yu cha' ñasi̱' tsa ngu' quichi̱ ji'i̱ yu. 36Tlyu tsa taju ñati̱ nu ndyaa lca'a̱ ji'i̱ sendaru.

―Cujuii clya ma̱ ji'i̱ ―nacui̱ ngu' bi' ji'i̱ sendaru bi'.

Nda Pablo cha' lo'o ngu' quichi̱ ñi'ya̱ ngua ji'i̱ yu

37Cua tyatí̱ ti ngu' toni'i̱ ji'i̱ sendaru, li' nchcui' Pablo lo'o xu'na sendaru bi':

―Cusu', cua'ni cha' tso'o ta nu'u̱ chacuayá' chcui' na' xi ―nacui̱ Pablo ji'i̱.

―¿Ha nchca jinu'u̱ chcui' cha' griego? ―nacui̱ xu'na sendaru ji'i̱ Pablo li'.

―Nchca 'na ―nacui̱ Pablo.

38―¿Ha si'i nu'u̱ laca nu ngu' Egipto nu ngua loo ji'i̱ ngu' nu ngusu̱u̱ tya'a lo'o gobierno tsubi'? ―nacui̱ ji'i̱ Pablo―. ¿Ha si'i nu'u̱ ndyaa lo'o ji'i̱ jacua mil tya'a ñati̱ cuxi ca lo nati̱' btyi?

39―Si'i na' ―nacui̱ Pablo―. Ngu' judío laca na'. Tarso naa quichi̱ tyi na', la cui' sca quichi̱ tlyu xi ca loyuu su cuentya Cilicia ―nacui̱―. Cua'ni nu'u̱ cha' tso'o ta nu'u̱ chacuayá' jna' chcui' na' xi lo'o ngu' quichi̱ re juani.

40Li' nda xu'na sendaru chacuayá' chcui' Pablo, bi' cha' ndatu̱ yu lo ndyiya' quee bi' li', ngutacui ya' yu cha' ca ti̱ nu ngu' quiña'a̱ bi'. Lo'o ngua ti̱ ngu', li' cha' hebreo nchcui' Pablo lo'o ngu', cha' bi' laca cha'cña ji'i̱ ngu' judío.

Currently Selected:

LOS HECHOS 21: cta

Highlight

Copy