LOS HECHOS 20

Tsaa Pablo ca Macedonia lo'o ca Grecia

1Nu lo'o cua ndye cha' ngunasi̱' ngu' quichi̱, li' ngusi'ya Pablo ji'i̱ lcaa ñati̱ ji'i̱ Jesucristo nu ndi'i̱ quichi̱ bi', cha' tya̱a̱ ngu' ca slo. Li' ngulu'u yu la xi ji'i̱ ngu'; jua'a̱ ngusalya' yu lo'o ngu', ndu'u yu ndyaa yu ca loyuu su cuentya Macedonia li'. 2Nguta'a̱ yu ca slo lcaa taju ñati̱ ji'i̱ Jesucristo nu ndi'i̱ loyuu bi', lo'o jua'a̱ tlyu ngua'ni tyiquee ngu' xqui'ya lcaa cha' nu ngulu'u yu ji'i̱ ngu' bi'. Lo'o li' ndyaa yu chaca loyuu su cuentya Grecia; 3loyuu bi' ndyanu yu sna co'. Li' cua tsaa ti yu ne' yaca ni'i̱ ca loyuu su cuentya Siria, lo'o li' ngua tii yu cha' ngua ti' tya'a ngu' judío cua'ni cuxi lo'o yu, bi' cha' xa' tyucui̱i̱ ndyaa yu li'; ndyaa yu nguxtyu̱u̱ yu tyucui̱i̱ ndyaa nde Macedonia. 4Ndya'a̱ Sópater ngu' Berea lo'o ya, lo'o jua'a̱ Aristarco lo'o Segundo ngu' Tesalónica, lo'o jua'a̱ Gayo ngu' Derbe, lo'o Timoteo bi', lo'o jua'a̱ Tíquico lo'o Trófimo ngu' Asia; ca ta'a ya ndya'a̱ ya lo'o yu li'. 5Lo'o li' lcaa ngu' tya'a ndya'a̱ Pablo bi', ndyaa ngu' nde loo la ca quichi̱ Troas; 6ndyanu Pablo lo'o na' ti (la cui' Lucas laca na' nu nscua na' quityi re). Ndyanu ya nde quichi̱ Filipos cha' tyeje tacui ta'a lo'o ndacu ngu' xlyá nu ná lo'o scua̱ tiye' ndya'. Ndu'u ya ndyaa ya li', ndyatí̱ ya ne' yaca ni'i̱ cha' tsaa ya tyacua tya'a ya lo'o ngu' bi' ca quichi̱ Troas. Ca'yu tsa̱ nguti'i̱ ya ne' yaca ni'i̱ cha' tyaala ya chaca tsu' tyujo'o bi', lo'o li' cati tsa̱ nguti'i̱ lcaa ya quichi̱ bi'.

Ndyalaa Pablo ca quichi̱ Troas

7Lo'o ngua tsa̱ domingo, li' ndyu'u ti'i̱ ngu' nu ntsu'u cha' ji'i̱ lo'o Jesús cha' stu'ba ti cacu ngu' si̱i̱. Nclyu'u Pablo cha' ji'i̱ ycui' Ndyosi ji'i̱ ngu' li'; hasta ca cla'be talya nclyu'u yu ji'i̱ ngu', xqui'ya cha' chaca tsa̱ cua tyaa ti ya li'. 8Ndyu'u ti'i̱ ya sca ba'a ni'i̱ nde cua̱ su nchca tyuna ba'a ni'i̱ bi'. Quiña'a̱ quii' ntsu'u ne' ni'i̱ bi'. 9Lo'o jua'a̱ nga'a̱ sca nu qui'yu cuañi' nu naa Eutico, nu ntucua nde tyuni'i̱ ventana. Ndyu'u tsa xcalá yu cuañi' bi', cha' tyiquee' tsa nchcui' Pablo. Li' ngua'ya xcalá yu, ndyú yu lo yuu nde liya'. Ndyaa ngu' cha' xatu̱ ngu' ji'i̱ yu, pana cua ngujuii yu. 10Li' hora ti ngua'ya Pablo lo ndyiya', ndyaa ngüityi Pablo ji'i̱ yu nu ngujuii bi', lo'o ntejeya' Pablo ji'i̱ yu bi' li'.

―Ná ca xñi'i̱ ti' ma̱, na lu'ú yu re juani ―nacui̱ Pablo ji'i̱ ngu' li'.

11Xa' ndyacuí̱ Pablo ndyaa lo ndyiya', li' ngua'ni yu si̱i̱. Lo'o li' xa' nguxana ngulu'u yu ji'i̱ ngu' ña'a̱ cuayá' nguxee chaca tsa̱. Ndu'u ya ndyaa ya li'. 12Lo'o nu yu cuañi' nu ngua tso'o ca ti ni, ndyaa lo'o ngu' ji'i̱ yu ca to' tyi yu. Tso'o tsa ntsu'u tyiquee ngu' cha' cua ndyu'ú yu chaca quiya'.

Ndu'u ngu' quichi̱ Troas, ndyaa ngu' ca Mileto

13Lo'o li' ndu'u ya ndyaa ya nde loo la, ndyatí̱ ya ne' yaca ni'i̱ cha' tsaa ya ca quichi̱ Asón, pana ndyanu ycui' Pablo cha' tsaa yu xa' tyucui̱i̱ nde lo yuu btyi. 14Xa' ndyacua tya'a yu lo'o ya ca quichi̱ Asón bi', ndyatí̱ yu ne' yaca ni'i̱ lo'o ya, ndyaa ya ca quichi̱ Mitilene li'. 15Xa' ndu'u ya ndyaa ya li', nteje tacui ya loyuu su cuentya Quío; ca chaca tsa̱ li' ndyalaa ya ca quichi̱ Samos. Nde loo la ndyanu ya xi nde quichi̱ Trogilio, lo'o jua'a̱ ca chaca tsa̱ ndyalaa ya ca quichi̱ Mileto. 16Ná ndyaa ya ca quichi̱ Efeso, cha' ná ntaja'a̱ Pablo tyanu yu tyiquee' ca loyuu su cuentya Asia bi'; ngua ti' yu tsaa clya yu ca Jerusalén cha' tyi'i̱ yu quichi̱ bi' lo'o caca tsa̱ ta'a Pentecostés, si caca ji'i̱.

Ngulu'u Pablo ji'i̱ ngu' cusu' ji'i̱ taju ñati̱ ji'i̱ Jesucristo nu ndi'i̱ quichi̱ Efeso

17Laja lo'o ndyanu ya ca Mileto bi', nda Pablo sca cha' ndyaa slo ngu' cusu' ji'i̱ taju ñati̱ ji'i̱ Jesucristo ca quichi̱ Efeso, si tya̱a̱ ngu' slo yu. 18Nu lo'o ndyalaa ngu', li' ngulu'u Pablo xi ji'i̱ ngu':

―Cua jlo ti' ma̱ ñi'ya̱ nu ngua'ni na' lcaa tsa̱ lo'o nguti'i̱ na' ca loyuu su cuentya Asia re, su ndi'i̱ na' quichi̱ tyi ma̱ ―nacui̱ Pablo ji'i̱ ngu'―. 19Jlo ti' ma̱ cha' lcaa tsa̱ ngua'ni na' cña ji'i̱ Jesús tyucui tyiquee na'; ná ngua'ni tyucuaa ti' na' lo'o ma̱. Lo'o jua'a̱ ngusi'ya tsa na' xqui'ya ñati̱ cuxi loyuu re. Ngua quicha ti' na' nu lo'o ngua ti' nu ngu' judío tya'a na' cua'ni cuxi ngu' lo'o na'. 20Jlo ti' ma̱ cha' lcaa tsa̱ tsa cu' ti nclu'u na' lcaa cha' tso'o bi' ji'i̱ ma̱, cha' taca tyi'i̱ tso'o la cresiya ji'i̱ ma̱, masi ngulu'u na' ji'i̱ ma̱ nu lo'o ndyu'u ti'i̱ ma̱ tsa tlyu ti, masi ngulu'u na' ji'i̱ ma̱ ca to' tyi scaa ti ma̱. 21Sca ti cuaya' nchcui' na' lo'o lcaa ngu', masi lo'o ngu' judío tya'a na', masi lo'o xa' la ñati̱; sca ti cha' ngulu'u na' ji'i̱ lcaa ma̱, cha' nga'a̱ cha' culochu̱' ma̱ ji'i̱ lcaa cha' cuxi nu ntsu'u ji'i̱ ma̱ lo'o xñi ma̱ cha' ji'i̱ Jesucristo nu Xu'na na. 22Lo'o nu juani tsa'a̱ ca Jerusalén, cha' jua'a̱ cua ndatsaa Xtyi'i ycui' Ni 'na cha' tsa'a̱ ca ndacua, masi ná nchca cuayá' ti' na' ñi'ya̱ nu caca jna' lo'o tyalaa na' cajua. 23Tsa bi' ti cha' jlo ti' na' cha' lcaa quichi̱ su ndya'a̱ na' nacui̱ ngu' cha' cua tejeya' ti ngu' jna', cha' su'ba ngu' jna' ne' chcua̱; nacui̱ ngu' cha' lye tsa ca quicha ti' na' ca quichi̱ Jerusalén bi'. Tsa lo cua ti cha' jlo ti' na', cha' jua'a̱ laca cha' nu cua nda Xtyi'i ycui' Ndyosi lo'o na'. 24Pana ná ntsi̱i̱ na' xqui'ya cha' nu nchcui' ngu' bi', ná ndu'ni cha' jna' masi cujuii ngu' jna'. Sca ti cha' nti' na', cha' tso'o ti tye cña nu nda ycui' Jesús jna', cha' ta na' cha' tso'o ji'i̱ ycui' Ndyosi lo'o xa' ñati̱, cha' ntsu'u tsa tyiquee Ni ña'a̱ Ni ji'i̱ ñati̱ chalyuu.

25’Cua nguta'a̱ na' lo'o cu'ma̱, cua ngulu'u na' ji'i̱ ma̱ lcaa ña'a̱ cña nu nclyo ycui' Ni; pana juani chañi cha' nu nchcui' na' re, cha' nga'aa ña'a̱ na' ji'i̱ ma̱ chaca quiya'. 26Bi' cha' nchcui' na' lo'o ma̱ juani, cha' ná ndacui na' qui'ya si chcuna' cresiya ji'i̱ sca ñati̱ tya'a cu'ma̱. 27Cua nda na' cha' lo'o ma̱, lcaa cha nu' ngua ti' ycui' Ndyosi cua'ni Ni lo'o ma̱; ni sca cha' ná ndyu'u cuaana ti tyiquee na'. 28Nu juani ntsu'u cha' ña'a̱si̱i̱ ma̱ ji'i̱ ycui' ca ma̱, lo'o jua'a̱ ña'a̱si̱i̱ ma̱ ji'i̱ ca ta'a ñati̱ ji'i̱ Jesucristo ca quichi̱ tyi ma̱, cha' cua nda Xtyi'i ycui' Ndyosi cña ji'i̱ ma̱ cha' caca ma̱ loo ji'i̱ taju ñati̱ bi'. Tlyu tsa cña nu ngua'ni ycui' nu Xu'na na cha' ca ti̱ qui'ya nu ntsu'u ji'na tya lo'o ngujuii yu lo crusi, nu lo'o ndyalú tañi ycui' ca yu. 29Jlo ti' na' cha' nu lo'o nga'aa ndya'a̱ na' ca nde, li' ca̱a̱ ñati̱ cuiñi cha' cua'ni ñu'u̱ ji'i̱ taju ñati̱ tya'a ma̱; ñi'ya̱ ndu'ni tyaala bo'o ji'i̱ sca taju xlya', jua'a̱ cua'ni ñu'u̱ nu ngu' cuiñi bi' ji'i̱ taju ñati̱ tya'a ndya'a̱ ma̱. 30Lo'o jua'a̱ laja ycui' ngu' tya'a ma̱ tyu'u tucua xi ngu' cuiñi bi'; cha' cuiñi ti culu'u ngu' bi' ji'i̱ lcaa tya'a ñati̱ ji'i̱ Jesucristo, cha' nga'aa tyi'u ti' ngu' ni sca cha' liñi nu cua nchcui' ma̱ lo'o ngu'. 31Cui'ya ma̱ cuentya lacua. Tyi'u ti' ma̱ cha' cua ndya'a sna yija̱ ngulu'u na' ji'i̱ ma̱ tsa̱ lo'o talya, lo'o jua'a̱ ntsu'u quiya' ngusi'ya tsa na' xqui'ya cu'ma̱.

32’Xtyanu na' ji'i̱ cu'ma̱ ya' ycui' Ndyosi cha' xtyucua Ni ji'i̱ ma̱ juani. Taquiya' ma̱ ji'i̱ lcaa cha' nu cua nda ycui' Ndyosi lo'o ma̱, la cui' cha' laca nu ndu'ni cha' caca nguula ti' cresiya ji'i̱ ma̱, cha' tlyu tsa laca cha' ji'i̱ ycui' Ndyosi. Jua'a̱ caca cuayá' ti' ma̱ cha' quiña'a̱ tsa cha' tso'o tyacua ji'i̱ ma̱ stu'ba ti lo'o lcaa ñati̱ nu ngusubi ycui' Ndyosi ji'i̱. 33Ná ngua ti' na' xñi na' cñi ji'i̱ ngu'; ni late' nu ta ngu' 'na, ná ntaja'a̱ na' xñi na' ji'i̱. 34Jlo ti' ma̱ cha' ycui' na' ngua'ni na' cña lo'o ya' ti na' cha' caja cñi cha' tyiji̱ yu'u jna' chalyuu. Lo'o jua'a̱ tya nda na' xlya'be ji'i̱ ngu' nu ndya'a̱ lo'o na'. 35Ngua'ni na' jua'a̱ cha' culu'u na' ji'i̱ ma̱ ñi'ya̱ nu cua'ni ma̱ lo'o ngu' nu ntsu'u tsa cha' nu lyiji ji'i̱. La cui' jua'a̱ ntsu'u cha' tyi'u ti' na ji'i̱ cha' nu cua nchcui' ycui' Jesús nu Xu'na na lo'o na ndi'ya̱: “Tso'o ntsu'u tyiquee ma̱ si ta ngu' sca cha' xlya'be ji'i̱ ma̱, pana tlyu la cha' tso'o laca si ta ma̱ sca cha' xlya'be ji'i̱ tya'a ñati̱ ma̱”, nacui̱ Jesús ji'na.

36Lo'o cua ndye nchcui' Pablo lo'o ngu', li' ngutu̱ sti̱' ya cha' chcui' ya lo'o ycui' Ndyosi; stu'ba ti nchcui' lcaa ya lo'o ycui' Ni li'. 37Lo'o jua'a̱ nxi'ya tsa ngu' bi' laja lo'o ngüityi ngu' ji'i̱ Pablo, nchcuicha' ngu' ji'i̱ yu lo'o nchcui' salya' ngu' lo'o. 38Xñi'i̱ tsa ti' ngu' cha' nchcui' Pablo cha' nga'aa ña'a̱ ngu' bi' ji'i̱ yu. Li' ndyaa lo'o latya ngu' bi' ji'i̱ ya tyucui̱i̱ cha' tya̱a̱ ya ne' yaca ni'i̱ chaca quiya'.

Currently Selected:

LOS HECHOS 20: cta

Highlight

Copy