LOS HECHOS 18

Ca quichi̱ Corinto

1Li' ndu'u Pablo quichi̱ Atenas ndyaa yu ca quichi̱ Corinto. 2Quichi̱ bi' ndyacua tya'a yu lo'o sca ngu' judío nu naa Aquila, ngu' quichi̱ Ponto laca nu Aquila bi'. Nguti'i̱ ngu' nde Italia nquicha', nu Aquila bi' lo'o clyo'o nu naa Priscila; pana ndu'utsu' ngu' ndyalaa ngu' nde quichi̱ Corinto, nu lo'o ngulo rey Claudio cña cha' culo'o ngu' ji'i̱ lcaa ngu' judío nu nguti'i̱ quichi̱ Roma, quichi̱ nu laca loo ji'i̱ loyuu su cuentya Italia bi'. Toni'i̱ ji'i̱ nu Aquila bi' ndyalaa Pablo li'. 3Stu'ba ti ngua'ni Pablo cña lo'o ngu' bi' li', cha' cuityi ni'i̱ late' laca ngu'; bi' cha' ndyanu yu slo ngu' cha' cua'ni yu cña lo'o ngu'. 4Ndyaa Pablo ne' laa ji'i̱ ngu' judío lcaa tsa̱ ta'a nu ndi'i̱ cña' ngu', cha' culu'u yu cha' ji'i̱ Jesús ji'i̱ ngu' nu ndyu'u ti'i̱ li', masi ji'i̱ ngu' judío, masi ji'i̱ ngu' xa' tsu'.

5Cua ndu'u Silas lo'o Timoteo ca Macedonia, li' ndyalaa ngu' slo Pablo. Lo'o cua ndyalaa ngu' bi', li' lcaa tsa̱ lcaa hora nclyu'u Pablo cha' ji'i̱ Jesús ji'i̱ ngu' judío. Nchcui' yu cha' laca Jesús ycui' Cristo, nu ntajatya tsa ngu' ji'i̱ cha' ca̱a̱ nde chalyuu. 6Pana ngunasi̱' tsa ngu' judío bi' ji'i̱ Pablo li', suba' tsa nchcui' ngu' lo'o; bi' cha' nguscui̱ yu ste' yu slo ngu' cha' ca cuayá' ti' ngu' cha' cuxi tsa nchcui' ngu' lo'o yu.

―Nguna' tsa ndu'ni cu'ma̱ ―nacui̱ Pablo ji'i̱ ngu'―. Xqui'ya ycui' ma̱ laca; ná ntsu'u qui'ya 'na, cha' xcui' cha' liñi laca nu ngulu'u na' ji'i̱ ma̱. Cua tya'a ti na' lacua. Juani tsa'a na' cha' ta na' cha' re lo'o ngu' xa' tsu', cha' ná nduna cu'ma̱, ngu' judío.

7Li' ndu'u yu ne' laa bi', ndyaa yu ca slo sca ñati̱ nu naa Justo; cacua ti to' laa bi' ntucua tyi yu. Sca ñati̱ nu ndyu'ni tlyu ji'i̱ ycui' Ndyosi laca nu Justo bi'. 8Lo'o jua'a̱ yu Crispo ngusñi cha' ji'i̱ ycui' nu Xu'na na. Crispo laca sca nu cusu' nu laca loo ne' laa ji'i̱ ngu' judío. Jlya ti' nu Crispo bi' ji'i̱ ycui' nu Xu'na na, lo'o jua'a̱ jlya ti' lcaa ngu' nu ndi'i̱ slo. Quiña'a̱ tya'a ngu' Corinto ngusñi ngu' cha' ji'i̱ Jesús, bi' cha' ntyucuatya ngu' bi' li'. 9Lo'o li' cua na'a̱ Pablo ji'i̱ Jesús nu Xu'na na, ñi'ya̱ si na nchcui' xcalá yu ngua.

―Ná cutsi̱i̱ nu'u̱ ―nacui̱ Jesús ji'i̱ yu―. Ná ca taja ti' nu'u̱ cha' culu'u nu'u̱ cha' jna' ji'i̱ ñati̱ ―nacui̱ Ni―. 10Ndi'i̱ na' lo'o nu'u̱ cha' xtyucua na' jinu'u̱, bi' cha' nga'aa caca xñi ngu' jinu'u̱ cha' xcube' ngu' hi̱. Lo'o jua'a̱ ntsu'u tsa ngu' quichi̱ re nu taca xñi ngu' cha' jna' nde loo la, si ta nu'u̱ cha' lo'o ngu'.

11Li' ndyanu Pablo sca yija̱ cla'be ca quichi̱ Corinto bi', xcui' cha' ji'i̱ Jesús ngulu'u yu ji'i̱ ngu' quichi̱ bi'.

12Lo'o li' ngua Galión gobernador ji'i̱ loyuu su cuentya Acaya bi'; tyempo bi' ndyu'u ti'i̱ tyu̱u̱ tya'a ngu' judío se'i̱ ti cha' xu̱u̱ tya'a ngu' lo'o Pablo, masi tya'a ngu' judío laca yu. Li' ngusñi ngu' bi' ji'i̱ yu cha' tsaa lo'o ngu' ji'i̱ yu ca slo ngu' tisiya; 13ngusta ngu' qui'ya ji'i̱ yu ca slo nu gobernador bi' li':

―Ndya'a̱ nu qui'yu re laja quichi̱ tyi na, pana ná tso'o cha' nu nclu'u yu ji'i̱ ñati̱ ―nacui̱ ngu' ji'i̱ nu laca loo bi'―. Nclu'u yu ji'i̱ ngu' cha' xa' ña'a̱ cua'ni tlyu ngu' ji'i̱ ycui' Ndyosi, masi ná nda gobierno chacuayá' cha' cua'ni ngu' jua'a̱.

14Ngua ti' Pablo xacui̱ yu cha' ji'i̱ ngu' li', pana clyo nchcui' nu cusu' Galión bi':

―Ná tyiquee' taquiya' na' ji'i̱ cha' nu nchcui' cu'ma̱ ngu' judío, si ntsu'u sca cha' nu cuxi tsa ―nacui̱ Galión bi' ji'i̱ ngu'―. Pana si'i jua'a̱ laca cha' re ―nacui̱―. 15Cua ñasi̱' ma̱ xqui'ya cha' nclyu'u yu re xi xa' lo cha' ji'i̱ ngu'. Sca cha' ji'i̱ jo'ó cuentya ji'i̱ cu'ma̱ laca cha' re, cha' ná stu'ba cha' nu nchcui' yu lo'o cha' nu nchcui' cu'ma̱ cuentya ji'i̱ cha' cusu' nu ntsu'u ji'i̱ ma̱; bi' cha' ná ndiya ti' ma̱ cha' nclu'u yu cha' bi' ji'i̱ ngu'. Cua'ni cuayá' ycui' ca ti ma̱ ji'i̱ cha' re lacua. Ná ndu'ni cha' ca̱a̱ lo'o cu'ma̱ ji'i̱ yu ca slo na'.

16Lo'o li' ngulo gobernador cña cha' culo ngu' ji'i̱ ngu' judío nde liya'. 17Li' hora ti ndaya' lcaa ngu' quichi̱ bi' ji'i̱ nu cusu' Sóstenes, cha' laca nu cusu' bi' loo ne' laa ji'i̱ ngu' judío. Ti'í tsa ngujui'i̱ ngu' ji'i̱ nu cusu' bi' ca slo gobernador Galión; pana nu Galión bi' ni, ná ndube ti' bi' tsiya' ti.

Ngua sna quiya' lo'o ndyaa Pablo ca chaca tsu'

18Tya ndyanu Pablo quichi̱ bi' tya tyu̱u̱ tsa̱; li' ngutu'u yu ndyaa yu lo'o Aquila lo'o Priscila bi', ndyaa ngu' ne' yaca ni'i̱ ca quichi̱ Cencrea. Li' tsaa ycui' Pablo ca loyuu su cuentya Siria. Ca quichi̱ Cencrea bi' ngusi'yu ngu' quicha̱' hique Pablo, cha' caca cuayá' ti' ngu' jua'a̱ cha' ntsu'u sca cha' nu cua ngüiñi ji'i̱ yu lo'o ycui' Ndyosi tya tsubi' la. 19Ndu'u ngu' ndyaa ngu' ne' yaca ni'i̱, li' ndyalaa ngu' ca quichi̱ Efeso su tyanu Aquila lo'o Priscila. Ndyatí̱ Pablo ycui' ti ne' laa cha' chcui' yu lo'o ca ta'a ngu' judío nu ndyu'u ti'i̱ cajua. 20Ngua ti' ngu' quichi̱ bi' cha' tyanu Pablo nde quichi̱ tyi ngu', pana ná ntaja'a̱ yu. 21Ngusalya' yu lo'o ngu' bi' li':

―Ntsu'u cha' tsa'a na' ca Jerusalén cha' cua ngulala ta'a ―nacui̱ Pablo ji'i̱ ngu'―. Li' xtyu̱u̱ na' chaca quiya' nde quichi̱ re, si jua'a̱ nti' ycui' Ndyosi ―nacui̱ yu.

Ndu'u Pablo quichi̱ Efeso ndyatí̱ yu ne' yaca ni'i̱, ndyaa yu li'. 22Lo'o cua ndyalaa yaca ni'i̱ bi' ca quichi̱ Cesarea, li' ndu'u Pablo ndyaa yu ca quichi̱ Jerusalén. Tso'o ti nchcui' yu lo'o tya'a ñati̱ ji'i̱ Jesucristo cajua, lo'o li' hora ti ndyaa yu ca quichi̱ Antioquía. 23Ndyanu yu sca tucua co' ca quichi̱ bi', li' ndu'u yu ndyaa yu chaca quiya' cha' tsaa yu ca slo lcaa taju ñati̱ ji'i̱ Jesucristo nu ndi'i̱ ca loyuu su cuentya Galacia, su cuentya Frigia. Nchcui' yu lo'o ngu' cha' tyanu tachaa la cha' ji'i̱ Jesucristo tyiquee ngu'.

Ndyalaa Apolos ca quichi̱ Efeso

24La cui' tyempo ndyalaa sca nu qui'yu ngu' judío nde quichi̱ Efeso. Apolos naa yu bi', lo'o Alejandría naa quichi̱ tyi yu. Jlo tsa ti' yu lcaa cha' ji'i̱ ycui' Ndyosi nu nscua lo quityi tya sa'ni la, lo'o jua'a̱ tso'o tsa nchcui' yu cha' ji'i̱ ycui' Ndyosi lo'o ñati̱. 25Tya tsubi' la cua ngulu'u tso'o ngu' ji'i̱ yu lcaa cha' nu cuentya ji'i̱ ycui' nu Xu'na na; bi' cha' yala ti ti' yu, ná taja ti' yu tsiya' ti cha' chcui' yu cha' bi'. Tso'o tsa nclyu'u yu cha' ji'i̱ Jesús lo'o ñati̱ li'; jua'a̱ ntyucuatya yu ji'i̱ ngu' ñi'ya̱ nu ntyucuatya jyo'o Juan, cha' bilya ca cuayá' ti' yu lcaa cha' ji'i̱ Jesús. 26Ná ntsi̱i̱ yu Apolos cha' culu'u yu ji'i̱ ngu' ne' laa ji'i̱ ngu' judío, pana nu lo'o ndyuna Priscila lo'o Aquila ñi'ya̱ nu ngulu'u yu cha' ji'i̱ ngu' ne' laa, li' nchcui' ngu' lo'o yu. Liñi la ngulu'u ngu' ji'i̱ Apolos ñi'ya̱ nu xñi ngu' tyucui̱i̱ ji'i̱ ycui' Ni li'. 27Ca tiya' la ngua ti' Apolos tsaa yu ca loyuu su cuentya Acaya. Tso'o ntsu'u tyiquee tya'a ñati̱ ji'i̱ Jesucristo cha' tsaa yu cajua, bi' cha' nguscua ngu' sca quityi cha' tsaa slo tya'a ñati̱ ji'i̱ Jesucristo cajua, cha' tso'o ti chcui' ngu' lo'o yu nu lo'o tyalaa yu ca su ndi'i̱ ngu'. Ndyaa yu li', ndyalaa yu ca loyuu su cuentya Acaya bi'. Li' nguxtyucua tsa yu ji'i̱ ngu' nu ntsu'u cha' ji'i̱ lo'o Jesucristo lcaa quichi̱ su ndyaa yu. Xqui'ya cha' tso'o tsa tyiquee ycui' Ndyosi ña'a̱ Ni ji'i̱ ngu', bi' cha' cua ngusñi ngu' cha' ji'i̱ Ni. 28Ngulu'u nu Apolos bi' ji'i̱ lcaa ngu' cha' cuiñi tsa laca cha' nu nda nu ngu' judío bi', masi ñati̱ tya'a yu laca ngu'; jua'a̱ ngulu'u yu cha' ji'i̱ ycui' Ndyosi nu nscua lo quityi tya sa'ni la, nu nchcui' cha' ji'i̱ nu Cristo nu ntajatya tsa ngu' ji'i̱ bi'. Cristo laca Jesús, nacui̱ yu. Tso'o tsa nchcui' yu, bi' cha' ná tucui ngua ji'i̱ tacu̱' cha' ji'i̱ yu.

Currently Selected:

LOS HECHOS 18: cta

Highlight

Copy