LOS HECHOS 11

Nchcui' Pedro lo'o ñati̱ ji'i̱ Jesucristo ca Jerusalén

1Cua ngujui cha' ji'i̱ quiña'a̱ ñati̱ nu ndi'i̱ loyuu su cuentya Judea, cha' lo'o ngu' xa' tsu' cua ngusñi ngu' cha' ji'i̱ Jesús; cua ngujui cha' ji'i̱ ngu' nu ngua tsa'a̱ ji'i̱ Jesucristo tya clyo, lo'o jua'a̱ cua ngujui cha' bi' ji'i̱ lcaa ñati̱ ji'i̱ Jesucristo nu ndi'i̱ ca bi'. 2Bi' cha' lo'o nguxtyu̱u̱ Pedro ñaa yu nde quichi̱ Jerusalén, ndyacua tya'a yu lo'o xi ngu' judío nu ngusñi cha' ji'i̱ Jesús, pana ña'a̱ ti tya tiji̱' ti' ngu' ji'i̱ cha' cusu'. 3Li' nchcuane ngu' ji'i̱ Pedro:

―¿Ni cha' laca ndyaa nu'u̱ slo ngu' xa' tsu'? ―nacui̱ ngu' ji'i̱ Pedro―. ¿Ni cha' laca ndyacu nu'u̱ stu'ba ti lo'o ngu' bi'?

4Li' nchcui' Pedro lo'o ngu' ñi'ya̱ nu ngua lo'o ndyaa yu slo ngu' bi':

5―Ngua sca tsa̱ nga'a̱ na' ca quichi̱ Jope ―nacui̱ Pedro―. Laja lo'o nchcui' na' lo'o ycui' Ndyosi, li' ñaa sca xcalá na'. Laja lo'o nchcui' xcalá̱, li' nguxña'a̱ na' nde cua̱; ñi'ya̱ sca tasá tlyu, jua'a̱ ña'a̱ na nu lijya̱ ndati'i̱ nde cua̱ cha' ca'ya nde lo yuu. Ca ta'a jacua jyaca̱ tasá bi' ntucua ju̱u̱, jua'a̱ tso'o ti lijya̱ tasá bi' ndati'i̱ lo yuu ca su nga'a̱ na'. 6Li' na'a̱ tsa na' ji'i̱ na nu ntsu'u ne' tasá bi', cha' na'a̱ na' cha' ntsu'u tyu̱u̱ tsa lo na'ni: ntsu'u na'ni nu ntucua quiya', ntsu'u na'ni tyaala, lo'o jua'a̱ ntsu'u cuaña, ntsu'u na'ni lu'be. 7Li' nchcui' ycui' Ndyosi lo'o na': “Pedro”, nacui̱ Ni, “cujuii clya nu'u̱ ji'i̱ na'ni cua cha' cacu nu'u̱ ji'i̱”. 8Lo'o li' nguxacui̱ na' cha' ji'i̱ Ni: “Ná nchca 'na cacu̱ na'ni nu ña'a̱ jua'a̱, Xu'na”, nacui̱ na' ji'i̱ Ni. “Ni sca quiya' bilya cacu na' ji'i̱ na'ni cuxi jua, cha' nchcui' cuare cha' ná tso'o cacu ya na'ni nu ña'a̱ jua'a̱.” 9Li' xa' nguañi nchcui' ycui' Ni nde cua̱: “Ná tso'o ñacui̱ nu'u̱ cha' laca bi' na'ni cuxi, cha' na cua nacui̱ ycui' Ndyosi cha' laca bi' na'ni lubii”. 10Sna quiya' nteje tacui cha' bi' su nga'a̱ na', li' nguxtyacui tasá bi' ndyaa nde cua̱ chaca quiya'. 11Hora ti ndyalaa sna tya'a ñati̱ ca ni'i̱ su nga'a̱ na' li'. Cua ngulo sca ngu' quichi̱ Cesarea cña ji'i̱ ngu' bi', cha' ca̱a̱ ngu' su ndi'i̱ na'. 12Nchcui' Xtyi'i ycui' Ndyosi lo'o na' li', cha' ná culacua tsa ti' na', cha' tsa'a na' lo'o ngu' bi'. Ca ta'a scua ñati̱ re ndyaa ngu' lo'o na' slo ñati̱ bi' ca quichi̱ Cesarea. 13Li' nda nu cusu' bi' cha' lo'o ya ñi'ya̱ ngua cha' bi'. Cua na'a̱ yu sca xca̱ ji'i̱ ycui' Ndyosi nu ndyatí̱ lijya̱ ni'i̱ ji'i̱ yu cha' ta sca cha' lo'o yu: “Culo nu'u̱ cña ji'i̱ msu jinu'u̱”, nacui̱ xca̱ bi' ji'i̱ nu cusu' bi', “cha' tsaa msu ca quichi̱ Jope, cha' tsaa cacha' ji'i̱ Simón Pedro cha' ca̱a̱ yu ca nde. 14La cui' Simón bi' ta cha' lo'o nu'u̱, lo'o lcaa tya'a nu'u̱, cha' caja ñi'ya̱ nu cua'ni lyaá ycui' Ndyosi ji'i̱ ma̱.” Jua'a̱ nacui̱ xca̱ bi' ji'i̱ nu cusu' bi'. 15Li' ndyalaa ya ca to' tyi ngu' bi'. Nguxana na' ngulu'u na' cha' ji'i̱ ngu', lo'o li' hora ti ngua'ya Xtyi'i ycui' Ndyosi lo ngu'. La cui' ñi'ya̱ ndyanu Xtyi'i ycui' Ni ne' cresiya ji'na nu ngua tya clyo, la cui' jua'a̱ ndyanu Xtyi'i Ni ne' cresiya ji'i̱ ngu' bi' li'. 16Ntsu'u ti' na' li', cha' tya tsubi' la nchcui' ycui' nu Xu'na na lo'o na ndi'ya̱: “Tsubi' cua ntyucuatya Juan ji'i̱ ñati̱ lo'o hitya ti”, nacui̱, “pana xa' ña'a̱ cua'ni ycui' Ndyosi cha' caca lubii cresiya ji'i̱ ma̱ nu lo'o tyanu Xtyi'i ycui' Ndyosi ne' cresiya ji'i̱ ma̱”. 17Na cua nda ycui' Ndyosi Xtyi'i ycui' Ni ji'i̱ ngu' xa' tsu' la cui' ñi'ya̱ nu nda Ni Xtyi'i ycui' Ni ji'na, nu lo'o ngusñi na cha' ji'i̱ Jesucristo nu Xu'na na; bi' cha' ná tso'o si cua'a na cña nu ndu'ni ycui' Ndyosi lacua.

18Nu lo'o ndyuna ngu' cha' nu nchcui' Pedro lo'o ngu', nga'aa ngua chcui' tyaala ngu' bi' lo'o Pedro. Li' ngua'ni tlyu ngu' bi' ji'i̱ ycui' Ndyosi. Ndi'ya̱ nchcui' ngu' lo'o Ni li':

―Ndyosi Sti ya, tso'o tsa ndu'ni nu'u̱ lo'o ngu' xa' tsu', masi si'i ngu' judío laca ngu' bi' ―nacui̱ ngu' ji'i̱ ycui' Ndyosi―. Ndu'ni nu'u̱ cha' ca tyuju'u ti' ngu' ji'i̱ lcaa cha' cuxi nu ntsu'u ji'i̱ ngu', cha' caja chalyuu nu ná nga'a̱ cha' tye ji'i̱ ngu' bi'.

Ñati̱ ji'i̱ Jesucristo nde quichi̱ Antioquía

19Cua sa'ni xi ngua lo'o ndyujuii ngu' ji'i̱ Esteban, lo'o la cui' tyempo bi' ngua ti' ngu' xcube' ngu' ji'i̱ lcaa ngu' nu ntsu'u cha' ji'i̱ lo'o Jesús; bi' cha' tyu̱u̱ tsa tya'a ngu' bi' ndatsu' ngu' ndyaa ngu' tyijyu'. Ntsu'u ngu' nu ndyaa ca loyuu su cuentya Fenicia, ntsu'u tya'a ngu' nu ndyaa ca loyuu su cuentya Chipre, lo'o jua'a̱ ntsu'u tya'a ngu' nu ndyaa ca quichi̱ Antioquía. Lcaa su ndyaa ngu' ngulu'u ngu' cha' tso'o ji'i̱ Jesucristo ji'i̱ tya'a ngu' judío ti, ná ngulu'u ngu' cha' bi' ji'i̱ xa' ñati̱. 20Tiya' la li', ndyaa xi xa' la ñati̱ ji'i̱ Jesús ca quichi̱ Antioquía; ngu' ca tyi loyuu su cuentya Chipre lo'o jua'a̱ loyuu su cuentya Cirene laca ngu' bi'. Nchcui' ngu' bi' lo'o lcaa ngu' quichi̱, masi lo'o ngu' judío, masi lo'o xa' ñati̱; ngulu'u ngu' cha' tso'o ji'i̱ Jesucristo ji'i̱ lcaa ngu' quichi̱ bi'. 21Tlyu tsa chacuayá' ntsu'u ji'i̱ ngu' xqui'ya Jesús nu Xu'na na, bi' cha' ngusñi quiña'a̱ ñati̱ cha' ji'i̱ ycui' Ni, bi' cha' nguxtyanu ngu' cha' cuxi nu ntsu'u tsa tyiquee ngu' ji'i̱ clyo.

22Li' ngujui cha' bi' ji'i̱ taju ñati̱ ji'i̱ Jesucristo nu ndi'i̱ nde Jerusalén, bi' cha' nchcui' ngu' lo'o Bernabé cha' tsaa yu ca quichi̱ Antioquía. 23Li' ndu'u Bernabé ndyaa yu, ndyalaa yu ca quichi̱ bi', na'a̱ yu ñi'ya̱ laca cha' tso'o nu ngua'ni ycui' Ndyosi lo'o ngu' bi'. Tso'o tsa ntsu'u tyiquee Bernabé li'. Nda yu sca cui̱i̱ lo'o taju ñati̱ ji'i̱ Jesucristo ca bi', cha' tyucui tyiquee ngu' cua'ni ngu' cña lcaa tsa̱, lcaa ña'a̱ cña nu nti' ycui' nu Xu'na na cha' cua'ni na. 24Tso'o tsa tyiquee Bernabé; cua ndyanu Xtyi'i ycui' Ndyosi ne' cresiya ji'i̱ yu, lo'o jua'a̱ tso'o tsa jlya ti' yu ji'i̱ Jesucristo. Bi' cha' quiña'a̱ la ñati̱ cua ngusñi ngu' cha' ji'i̱ nu Xu'na na xqui'ya nu Bernabé bi' li'.

25Lo'o li' ndu'u yu bi' ndyaa yu nde quichi̱ Tarso, ndyaana yu ji'i̱ Saulo. Lo'o nquije yu ji'i̱, li' ngutu'u yu ñaa lo'o yu ji'i̱ Saulo ca quichi̱ Antioquía chaca quiya'. 26Li' nguti'i̱ ngu' sca yija̱ lo'o taju ñati̱ ji'i̱ Jesucristo ca bi', nclu'u ngu' ji'i̱ quiña'a̱ ñati̱. Quichi̱ Antioquía bi' ngua su ngutu'u su̱u̱ cha' nu nchcui' ngu' cha' ngu' cristiano laca ñati̱ nu ngusñi cha' ji'i̱ Jesucristo.

27Tyempo bi' ndyalaa tucua sna la tya'a ñati̱ nu ngua tu'ba ji'i̱ ycui' Ndyosi. Ndu'u ngu' quichi̱ Jerusalén ndyalaa ngu' quichi̱ Antioquía li'. 28Agabo naa tsaca ngu' bi'. Cua nda Xtyi'i ycui' Ndyosi sca cui̱i̱ lo'o nu Agabo bi' cha' chcui' yu lo'o ngu'. Li' nchcui' Agabo lo'o ngu' cha' cua ca̱a̱ ti sca jbi'ña tlyu tsa tyucui ña'a̱ chalyuu. Chañi cha' jua'a̱ ngua cha' nu nda Agabo bi', pana nde loo la ngua cha' bi', nu lo'o ngua Claudio rey nu laca loo. 29Li' ngüiñi cha' ji'i̱ ñati̱ ji'i̱ Jesús lo'o tya'a ngu' cha' ta ngu' msta̱ ji'i̱ tya'a ti'i ti ngu', ngu' nu ndi'i̱ quichi̱ su cuentya Judea. 30Jua'a̱ ngua'ni ngu' li'. Nda ngu' msta̱ bi' ji'i̱ Bernabé lo'o ji'i̱ Saulo cha' tsaa lo'o ngu' ji'i̱, cha' ta ngu' cñi bi' ji'i̱ ngu' cusu' ca bi'. Li' tacha ngu' cñi bi', caja xi ndaca ti ji'i̱ tya'a ti'i ti ngu'.

Currently Selected:

LOS HECHOS 11: cta

Highlight

Copy