Salmos 9
9
1Xran, dute̱ lázrdawa' güe lá'ana' Lue'.
Guzenda' bénneache ca zaj naca da zrente̱ da be̱nu'.
2Wabéquezda', ne gúl-laqueza' ca naca chiu'.
Gul-la' chee̱ lau' Lue', nacu' Dios zrente̱.
3Buluzrunnuj benne' dxeledábague̱' neda'.
Xeajlechazie̱', ne belexenitie̱' lau Lue'
4lawe' da nucá'ana chawu' da xrlátaje da dxuna'.
Dxe'u lataj blau chiu', ne lu da xrlátaje dxuchi'u.
5Gudil-lu' benne' xe̱zr la xu ca',
ne bzria xi'u benne' we̱n da cale̱la ca'.
Bsulu' la benne' ca' chadía chacanna.
6Ba gulebía xi' benne' dxeledábague̱' neda'.
Chadía chacanna zaj nazrinnaj lataj chee̱ benne' ca',
ne xe̱zre chee̱' ca', da ca' bchínnuju' Lue'.
Netú benne' cheajsá lazre̱' benne' ca'.
7Xránadxu Dios súatequeze̱' chadía chacanna.
Ba nucueze̱' lataj blau chee̱' naga guchi'e̱ chee̱ bénneache.
8Lu da xrlátaje guchi'e̱ chee̱ bénneache dute̱ xe̱zr la xu,
ne chee̱ benne' xúgute̱ xe̱zre ca' lu da naca li lazre'.
9Xránadxu Dios gaque̱' ca tu lataj ga xelezrá chawe' benne' xache',
naga xelezré̱'e̱ chawe̱' gate zrin zra chee̱ da zi' da xa'.
10Benne' ca' zaj núnbe'e̱ Lue', Xran, xuluxrén lazre̱' Lue',
lawe' da quebe bsan lazru' benne' ca' belexílaje̱' Lue'.
11Le gul-la chee̱ Xránadxu, Bénnea' zue̱' xe̱zre Sión.
Le guzén benne' xe̱zre ca' ca zaj naca da ca' nune̱',
12lawe' da dxeajsá lazre̱' chee̱ benne' ca',
ne dxexebéaj lazre̱' chee̱ benne' we̱te benne'.
Quebe gul-la lazre̱' ca da dxululáwizra benne' ba xache' ca' Le̱'.
13Bexache lazre' neda', Xran.
Gunná' da dxezaca' lu ni'a na' benne' ca' dxelecuídene̱' neda'.
Dxeca'u neda' lu na' xel-la' gute,
14chee̱ guzenda' bénneache da dxue lá'ana' Lue',
naga dxu'untu' xe̱zre Sión,
ne chee̱ beda' lawe' da bseláu' neda'.
15Xeajlechaze benne' xe̱zr la xu ca' lu xe̱dxu da gule̱ne̱'.
Xeajlechu'e̱ lu xralaj da bulucueze̱'.
16Xránadxu Dios blé'ene̱' ca da zaj naque̱' ne̱ chee̱
da zi' da xa' da gudichaj be'e̱ chee̱ benne' ca' dxelune̱' da cale̱la.
Xeajchaze benne' we̱n da cale̱la na' lu da nun ni'a ná'queze̱'.
17Benne' we̱n da cale̱la ca' xeledéqueze̱' lu lataj ba xa'.
Xúgute̱ benne' ca' dxelal-la lazre̱' Xránadxu Dios.
18Quegá chadía chacanna gal-la lazre' Dios benne' xache' ca',
ne quegá tu chi'ize xenite da dxelebeza lazre̱' le̱'.
19Guxasa, Xrana' Dios.
Quebe gu'u lataj xelexegá'ana szrénqueze bénneache.
Xelelá' lau' benne' xe̱zr la xu ca' chee̱ guchi'u chee̱'.
20Xran, be̱n xelezrebe benne' ca' Lue'.
Be̱n xelexúnbea benne' xe̱zr la xu ca' zaj naque̱' bénneacheze.
Currently Selected:
Salmos 9: zat
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.
