San Juan 20

Jesús dxexebane̱' ládujla benne' gate

(Mt. 28.1-10; Mr. 16.1-8; Lc. 24.1-12)

1Zra nedxu, guxíaj María Magdalena dxu'a ba na' dxaní'sise̱', gate ne nachúl-late̱, na' blé'ene̱' québedxa naduse xiaj dxu'a ba na'. 2Nadxa bexíaj chégüe̱' naga zua Simón Pedro nen xetú benne' bse̱de Jesús, bénnea' bzri'idxe̱' Jesús, na' guzre̱' benne' ca':

―Ba belequé̱'e̱ Xránadxu lu ba na', ne quebe nézentu' ga xeajlelú'e̱ Le̱'.

3Nadxa Pedro, ne bénnea' xetú beledxúaje̱' zjaque̱' dxu'a ba na'. 4Dxúpate̱' zjaca chégüe̱' tu zren, san bénnea' xetú guzá chégudxe̱' ca Pedro, ne bzrine̱' nédxudxa dxu'a ba na'. 5Na' xeajsé̱' su dxú'ala xeajnné̱'e̱ lu ba na', na' blé'ene̱' ladxe' da buluchele̱' Jesús xu'u na na', san quebe guxú'e̱ lu ba na'. 6Ca gudé na', bzrin Simón Pedro, na' guxú'e̱ lu ba na'. Cá'anqueze le̱' blé'ene̱' ladxe' na' xu'u na na', 7ne blé'ene̱' ladxe' da buluchele̱' xichaj Jesús, quebe xu'u na tu zren nen ladxe' da bedxela na le̱'. Nadube na, dxe' na chalá'ala. 8Nadxa cá'anqueze guxú'u bénnea' xetú, bénnea' bzrin nedxu dxu'a ba na', na' blé'ene̱' ladxe' ca', ne guxéajle̱'e̱. 9Quebe ne xeléajni'ine̱' da naxúaj na lu xiche chee̱ Dios da dxenná na xebán Jesús ládujla benne' gate'. 10Nadxa benne' ca' bse̱de Jesús belexezrine̱' xu'u naga zaj zre̱'e̱.

Jesús dxulé'e lawe̱' María Magdalena

(Mr. 16.9-11)

11María begá'ane̱' dxu'a ba na', dxebezre̱'. Ca dxebezre̱' na', na' gulégüe̱' dxenné̱'e̱ lu ba na', 12na' blé'ene̱' chupa gubáz chee̱ xabáa zaj nácue̱' zra lane̱' chiche, zaj dxe'e̱ naga guxú'u Jesús. Tue̱' dxe'e̱ naga guzrúa xichaj Jesús, na' xetúe̱' dxe'e̱ zeaj zranle ga guzrúa ni'a Le̱'. 13Na' buluche̱be gubáz chee̱ xabáa ca' María na':

―Nu'ula, ¿bizr chee̱ na' dxebezru'?

Le̱' guzre̱' gubáz chee̱ xabáa ca':

―Lawe' da belú'e̱ Xrana', ne quebe nezda' ga xeajlelú'e̱ Le̱'.

14Caní dxenné̱', na' bzéchaj xíchaje̱', ne blé'ene̱' Jesús ze̱' ca'ala, san quebe nézene̱' che Jesús na'. 15Nadxa Jesús bche̱be̱' María na':

―Nú'uladau', ¿bizr chee̱ na' dxebezru'? ¿Nu dxexílaju'?

María gúquene̱' naque̱' benne' dxá'ane̱' xaga ca' zaj ze̱ na', na' guzre̱' Le̱':

―Benne', che lue' bi'u Le̱', gunná ga xeajlú'u Le̱', chee̱ cheajxezri'a Le̱'.

16Nadxa Jesús guzre̱' nu'ula na':

―María.

María na' bexéchaje̱', ne guzre̱' Le̱' nen dizra' hebreo:

―¡Raboni!

Dizra' nigá zéaje̱ na: Benne' Dxuse̱de.

17Jesús guzre̱' María na':

―Bsan neda' lawe' da quebe ne xegüéna' naga zua Xra'. Bexíaj, xeajxe̱zre bi bícha'dau' ca', benne' ca' bsé̱deda', xegüéna' naga zua Xra', ne nácaqueze̱' Xrale. Naque̱' Dios chia', ne Dios chee̱le.

18Nadxa bexíaj María Magdalena, xeajzenne̱' benne' ca' bse̱de Jesús ba blé'ene̱' Jesús, na' Le̱' guzre̱' le̱' da caní.

Jesús dxulé'e lawe̱' benne' ca' bsé̱dene̱'

(Mt. 28.16-20; Mr. 16.14-18; Lc. 24.36-49)

19Lu zra ná'queze, da naca na zra nedxu chee̱ da gazre zra, na' chizrela zaj nazraga benne' ca' bse̱de Jesús, ne zaj nusézxuje̱' dxa xu'u ca' lawe' da dxelezrebe̱' judío blau ca'. Na' guxú'u Jesús, guzé̱' laduj benne' ca', na' bgape̱' benne' ca' diuzre, dxenné̱':

―Le gapa xel-la' dxebeza zri lazre'.

20Ca gudé gunná Jesús da nigá, na' blé'ene̱' benne' ca' ne̱'e̱, ne le̱'e̱ naga gudé xia na'. Benne' ca' bse̱de Jesús gulebéle̱'e̱ne̱' gate belelé'ene̱' Xránadxu. 21Nadxa Jesús guzre̱' benne' ca' xecha lasa:

―Le gapa xel-la' dxebeza zri lazre'. Cáte̱ze gusel-la Xra' neda', cá'anqueze dxusel-la' neda' le'e.

22Nadxa blube̱' lau benne' ca' ne guzre̱' le̱':

―Le si' Be' Lá'azxa chee̱ Dios. 23Benne' ca' dxunite laule le'e chee̱ dul-la zaj nabague̱' ba bnite lau Dios chee̱', na' benne' ca' quebe dxunite laule le'e chee̱ dul-la zaj nabague̱', quebe bunite lau Dios chee̱'.

Tomás dxelé'ene̱' Xránadxu ba bebane̱'

24Tomás, tu benne' chazrinnu ca' bse̱de Jesús, bénnea' le̱' Bi Lide', quebe zue̱' nen benne' ca' xezícadxa gate ble'e lau Jesús. 25Ca gudé na' gulé̱'e̱ Tomás na':

―Ba blé'entu' Xránadxu.

Gunná Tomás:

―Che quebe le'eda' ne̱'e̱ naga guledé bdiduj ca', ne gudéa' zrube na'a lu xe̱dxu chee̱ bdiduj ca', ne gudéa' na'a le̱'e̱ naga gudé xia na', québequeze chéajle̱'a.

26Ca guca xrunu' zra, benne' ca' bse̱de Jesús zaj nazrágaqueze̱' lu xu'u na' xetú lasa, na' zua Tomás nen benne' ca'. Nadxa, lácala zaj naxezxuj dxa xu'u ca', ble'e lau Jesús lau benne' ca', ne guzé̱' laduj le̱', na' bgape̱' le̱' diuzre, gunné̱':

―Le gapa xel-la' dxebeza zri lazre'.

27Nadxa Jesús guzre̱' Tomás:

―Bde zrube na'u nigá, ne gunná' na'a nigá. Be̱nna na'u, bde na le̱'a nigá. Québedxa gun chupa lazru', san guxéajle̱.

28Nadxa beche̱be Tomás:

―Xrana', ne Dios chia'.

29Jesús guzre̱' le̱':

―Tomás, na'a dxéajle̱'u lawe' da ba blé'enu' neda'. Ba neza zrente̱ naca na chee̱ benne' ca' dxeléajle̱'e̱ chia' lácala quebe ne xelelé'ene̱' neda'.

Da dxaca lazre' Juan gun xiche nigá

30Jesús be̱ne̱' da zandxa xel-la' waca zrente̱ lau benne' ca' bsé̱dene̱' da quebe zaj naxúaj na lu xiche nigá. 31Da caní zaj naxúaj na chee̱ chéajle̱le le'e chee̱ Jesús, naque̱' Cristo nasel-la Dios, ne Zri'ine Dios, ne chee̱ gápale xel-la' nabán lawe' da dxéajle̱le chee̱'.

Currently Selected:

San Juan 20: zat

Highlight

Copy