Juan 9

Jesús quepajtejque sente tlöcatl tli otlöcat ixcocoxque

1Hua cuöc opanoac Jesús ca sie locör, oquejtaque sente tlöcatl que oyeya ixcocoxque desde cuöc otlöcat. 2Hua tiemachtejcöhua tietlajtlanejque, oquejtojque:

―ToTiemachtejcötzi, ¿öquenu otlajtlaco, ini nönca noso yejua itötajua, para otlöcat ixcocoxque?

3Onöhuatihuac Jesús:

―Nimpor ini amo otlajtlaco, nimpor itötajua. Cache omochi ini para ma moniexte tietlachihual Deus itech yaja. 4Combenierebe ma tecchihuacö tli tietlachihual de yejuatzi öque niechhualtitlanque, mientras oc tlaniese. Ompabitz yohuale, cuöc nionöque abele tli ayes. 5Mientras oncö neca ipa ini tlöltecpactle, netlöbile necaca para ca tlöltecpactlöca.

6Cuöc oquejtojque ini, ochejchaluc tlölpa. Oquechejchijque soquetl ca tiechejchal, hua oquetlölelejque ipa ixtelolojua inu ixcocoxque. 7Hua oquelfejque:

―Xebeya, xomoxömite ijtec xabie de Siloé. ―Siloé quejtusneque, Tlatitlantle.

Yecuöquenu uya inu ixcocoxque, hua omoxöme, hua cuöc hualmocuec ye hualtlajtlachixtöya. 8Yecuöquenu tli icaltech chajchönteya, hua tli ca ye niepa oquejtaque quiene motlajtlaijtlaniöya, quejtoöya:

―¿Amo yaja ini öque motlajtlaijtlaniöya?

9Seque quejtoöya:

―Yaja icaca.

Hua ocseque:

―Amo. Sabele yaja.

Yaja quejtoöya:

―Naja necaca.

10Hua oquelfejque:

―Entunses ¿quiene otetlachix?

11Onöhuat yaja hua oquejto:

―Inu tlöcatl öque tietucö Jesús, oquechejchijque soquetl, hua oquetlölejque ipa nixtelolojua, hua oniechelfejque: “Xebeya ipa Siloé, hua xomoxöme”. Hua oneya, hua onoxöme, hua onecasec notlacheales.

12Yecuöquenu oquelfejque:

―¿Cöne ica inu nieca?

Yaja oquejto:

―Amo necmate.

Inu fariseos otlajtlanque quiene opajtec

13Oquebicaque intlac fariseos inu tlöcatl tli ca ye niepa oyeya ixcocoxque. 14Hua oyeya ipa söbro cuöc Jesús oquechejchijque soquetl, hua oquetlachealtejque. Pues joriojte seme mosiebea ipa söbro. 15Oquetlajtlanejque nuyejque fariseos quiene ocasec itlacheales. Hua yaja oquemelfe:

―Oniechtlölelejque soquetl ipa nixtelolojua, hua onoxöme, hua ye netlachea.

16Yecuöquenu seque de inu fariseos oquejtojque:

―Ini nönca Jesús amo de Deus, ipampa amo quemalfea söbro.

Cache ocseque quejtoöya:

―Pero sente tlöcatl tlajtlacultec ¿quiene cuale quechihuas tietzöbetl quiename ini?

Hua amo oyejyeya de acuierdo yejua. 17Ocsajpa oquelfejque inu ixcocoxque:

―¿Taja, tli tequejtoa de inu nieca öque metztlachealte?

Yaja oquejto:

―Pues iloac tlayulepante.

18Cache joriojte amo moneltocaya de yaja, quiene oyeya ixcocoxque, hua quiene ocasec itlacheales, hasta senamo oquennutzque itötajua 19hua oquentlajtlanejque, oquemelfejque:

―¿Yaja ini nönca nemoconie, öque nemejua nenquejtoa otlöcat ixcocoxque? ¿Quiene, noso, ye tlachea öxö?

20Onöhuatque itötajua hua oquejtojque:

―Tejua tecmate yaja ini nönca toconie, hua quiema otlöcat ixcocoxque. 21Cache quiene öxö ye tlachea, amo tecmate; noso öquenu oquetlachealte, tejua amo tecmate. Yaja ye tlöcatl icaca; xomotlajtlanelicö yaja ma quejto.

22Ini nönca oquejtojque itötajua, ipampa quenmabeliöya joriojte. Pues joriojte ye omotlölejque de acuierdo que tlö canajyeca quejtus que Jesús iloac Cristo öque Deus tieixpejpenque, ma quisa para que ayecmo ma calaque ipan teopanme hua ma ayecmo quepea pörte ca icompanierojua. 23Por inu oquejtojque itötajua: “Ye tlöcatl icaca; xomotlajtlanelicö yaja”.

24Hua ca inu, ocsajpa oquenutzque inu tlöcatl tli ixcocoxque oyeya. Oquelfejque:

―Sa Deus xetiemochamöbele. Pues tejua tecmate que nieca tlöcatl icaca tlajtlacultec lalebes.

25Yecuöquenu yaja onöhuat, hua oquejto:

―Tlö lalebes tlajtlacultec, amo necmate. Pos sa ini necmate, que naja neyeya neixcocoxque, hua öxö ye netlachea.

26Hua ocsajpa oquelfejque:

―¿Tli metzchibele? ¿Quiene metztlachealte?

27Oquennönquele:

―Ye onemiechmolfele, hua amo nemocaquitea. ¿Tlica ocsajpa nemonequitea ma nemiechmolfele? ¿Nemonequitea nuyejque nemejuantzetzi nemobetztasque nentiemachtejcöhua de yejuatzi?

28Hua ocajajuaque, hua oquejtojque:

―Taja tecaca temachtejque de yaja; cache tejua teimachtejcöhua de Moisés tecate. 29Tejua tecmate que oquenunutzque Deus Moisés; cache ini nönca amo tecmate de cöne icaca.

30Onöhuat inu nieca tlöcatl, hua oquemelfe:

―Melöhuac, naja nectietzöbejta ipampa nemejuantzetzi amo nemomachitea de cöne iloac ini nönca tlöcatl, hua yejuatzi oniechtlachealtejque naja. 31Hua tecmate que Deus amo quencaquihua tlin tlajtlaculteque. Cache tlö canajyeca tiemabelea Deus, hua quechihua tli tietlanequeles, inun quiema quecaquihua yaja. 32Desde cuöc opie tlöltecpactle ayec omocac que canajyeca oquetlachealte sente tlöcatl tli otlöcat ixcocoxque. 33Tlö ini nönca tlöcatl amo iloasquiöne de Deus, abele tli ayihuasquea.

34Oquenönquelejque, hua oquelfejque:

―Ipan tlajtlacule de atiro otetlöcat, ¿hua taja tetiechmachtis tejua?

Yecuöquenu oquetojtocaque para ayecmo quiema iyös ipa teopanme.

Ixcocolestle ipa öque iyulo

35Oquecajque Jesús quiene oquetojtocaque; hua oqueniextejque. Oquelfejque:

―¿Tomoneltoca taja tieca öque omochi tlöcatl?

36Hua onöhuat yaja, oquejto:

―Pos ¿öquenu yejuatzi, Tlöcatzintle, para noneltocas ca yejuatzi?

37Oquelfejque Jesús:

―Taja ye otequejtac, pues naja öque netlajtlajtojteca ca taja, naja necaca.

38Hua yaja oquejto:

―Noneltoca, noTlöcatzintle.

Hua tieteochi.

39Hua oquejtojque Jesús:

―Naja para netlajuscörus onehuöla ipa ini tlöltecpactle: para que niecate tli amo tlajtlachea, ma tlacheacö; hua tlin tlajtlachea ma ixcocoxcöteacö.

40Hua seque de inu fariseos tli oyejyeya ca yejuatzi oquecajque ini nönca, hua otieyelfejque:

―¿Belis tequejtus que tejua nuyejque tecate teixcocoxcötzetzi?

41Oquenmelfejque Jesús:

―Tlö melöhuac nenixcocoxcötzetzi nenyene ipa nemoyulo, amo nenquepeasquiöne tlajtlacule. Cache öxö ica quiename nenquejtoa, pos nentlajtlachea. Pos por inu nemopanca nemotlajtlacul.

Currently Selected:

Juan 9: nhg

Highlight

Copy