1 TIMOTEO 3
3
Jína chrókꞌuejó tí sín tꞌe̱tue̱nhen tí ni̱nko
1Ijnko nkehe chaxín tjo̱nka. Tí nkexro tjinkaon sichꞌe xra̱ kuènte ni̱nko mé imá jína xra̱ tjinkaon chꞌán. 2Tí chꞌín chrókꞌue̱to̱an mé ntoá chrókjuakꞌe chꞌán kíxin kohya nkexro chrókꞌueka chꞌán jie̱ la ko kja̱xin chróchónta chꞌán jnkoko̱á ichjién chꞌán ó la ko kja̱xin chrókjuakꞌe chꞌán jína la ko chrókjuenka̱yáxin chꞌán jína la ko chróchónta chꞌán kjuasáyé chꞌán la ko kja̱xin jína chrónixje̱he̱ chꞌán tí nkexro tjiji nto̱e la ko kja̱xin chrókónohe chꞌán tí nkehe chrókjuako chꞌán. 3La ko kja̱xin chrókókoanhya chꞌán la ko chrókjuehya chꞌán kjuanínkaon la ko kja̱xin chrókóxrjíe̱nhya chꞌán kíxin chrókjuacha chꞌán nchónhya chichaon. A̱ ntá chrókójie̱hya chꞌán la ko kjuaxróxin chrókjuakꞌe chꞌán la ko chrókóxrjíe̱nhya chꞌán chróchónta chꞌán itsjé chichaon. 4Jehe chꞌán mé kja̱xin jína chrókꞌue̱tue̱nhen chꞌán tí sín tjejó nto̱e chꞌán la ko chrókjuentuéhe chꞌán xje̱en chꞌán kíxin tsitekaon xjan la tsjikosáyehe xjan itꞌé xjan. 5Tí tsjachahya chꞌán tsꞌe̱tue̱nhen chꞌán tí sín tjejó nto̱e chꞌán la ¿ntá nkexrí chrókꞌue̱to̱an chꞌán tí ni̱nko kuènte Dios? 6Íchá jína kíxin jehya ijnko nkexro na ntá kꞌuíxenhen chrókjuako kíxin tí nkexro na ntá kꞌuíxenhen la imá chrókjuinchehnke chꞌán la ntá chrókjuasin chꞌán jie̱ éxí kjuasin chꞌín Tsochren ijie̱ senó. 7Kja̱xin tꞌichjánxi̱n kíxin kaín xín tí sín na̱xa̱ tinkáchónkihya Ìnchéni mé tsochónta sín kjuasáyé tí chꞌín tꞌe̱to̱an a. Tí náhí la tsꞌeka sín chꞌán jie̱ ntá tí xi̱kaha la chꞌín Tsochren tsjacha tsjachròe tí chꞌín a ntá tsjasin chꞌán jie̱.
Nkexrí chrókꞌuejó tí sín tsjinki̱tsa tí xra̱ kuènte ni̱nko
8Kja̱xin tí sín diácono chꞌe xra̱ kuènte ni̱nko la kja̱xin ntoá chrókꞌuejó sín kíxin chróchóntehe sín kjuasáyé chojni. Kja̱xin tꞌichjánxi̱n kíxin chrókjuinchexiteyá sín tí nkehe ntáchro sín la ko chrókókoanhya sín la ko kja̱xin chróchóntia̱xi̱nhya sín itsjé chichaon chrókjuacha sín. 9Tꞌichjánxi̱n chrókónohe sín jína tí nkehe tinkáchónki sín kíxin jehe sín chróxraxinkaon sín á ncho̱xon tí xra̱ chꞌe sín. 10Sa̱oxín chrótsjehe kaín chojni á ninkehó jie̱ chóntahya tí nkexro la ntá tí chaxín jína jehe chꞌán la ninkehó jie̱ chóntahya chꞌán ntá jína tsꞌixenhen chꞌán tí xra̱ kuènte ni̱nko. 11La ko kja̱xin tí chojni chjin mé chrókꞌuejó sín jína kíxin chróchónta sín kjuasáyé sín. Kja̱xin chrókuinkáchónkihya sín kjuachꞌia la ko jína chrókꞌuejó sín la ko chrókjuinchexiteyá sín kaín nkehe. 12Tí sín diácono la mé chróchónta sín jnkoko̱á ichjién sín la jína chrókꞌue̱tue̱nhen sín xje̱en sín la ko jína chrókꞌue̱to̱an sín nto̱e sín. 13Tꞌichjánxi̱n ijnko xra̱ jína sichꞌe sín kíxin ntá tsjacha sín tsꞌáyéhe̱ sín ijnko nkehe jína tsjanjon ìnchéni la ko kja̱xin tso̱suèhya sín tsochrónka sín nkexrí tinkáchónki sín Cristo Jesús.
Dios mé kjuínchenoheni tí nkehe kꞌuékienxínhyani
14Tjínka̱van tjoka chrókjuasántsjaha̱ tí jaha kjánchó senó tsokjian tí xroon i. 15A̱ ntá tí tso̱xrjenna isé ntá kjónté tso̱noha nkexrí chrókꞌuejó tí sín na̱xa̱ kjéhya Dios mé tí sín tꞌóna ni̱nko̱e Dios tjechón. Jeheni kaín ni mé tjejótꞌayakonhenni tí tan chaxín ntoá. 16Ninkexró chróntáchrohya kíxin chaxínhya tí nkehe tinkáchónkini mé ijnko nkehe imá jié tíha la ninkexró kꞌuénoehya tí senó a.
Dios mé ikui kꞌóna chojni;
ikui chꞌán kjua̱ko̱xi̱n chꞌán kjua̱cha̱xién Ncha̱kuen Dios chónta chꞌán kíxin jína tí jehe chꞌán.
La ntá tí sín ángel mé kꞌuíkon sín chꞌán
la kuenté chjasintajni mé ó kuínhin sín nkehe chrónka chꞌán
ntá itsjé sín kuítekaon sín chꞌán.
Ntá Dios kꞌuáyéhe̱ tí jehe chꞌán nkaya nka̱jní.
Currently Selected:
1 TIMOTEO 3: poeNT
Highlight
Share
Copy
Want to have your highlights saved across all your devices? Sign up or sign in
© 1982, Wycliffe Bible Translators, Inc.
Learn More About Tí Nuevo Testamento cuènte Inchéni Jesucristo Cʼóna Nquìva
