MARKUS 11

Mori Yésus Ramé Tiban Oné Yérusalém

11:1-11

(Mat. 21:1-9; Luk. 19:28-38; Yoh. 12:12-15)

1Du Mori Yésus agu ata nungkun cai ruis Yérusalém, ruis Betfagé agu Bétania, oné ampak golo Zaitun, Mori Yésus jera sua taus ata nungkun, 2agu pedén: “Ngo méu nggere-oné béo hitut dungka méu. Du palang cai nitus méu, méu te ita muing ca keledai reba, ata toé di nggopu latay. Caca le méu keledai hitu agu aru ba cé’é ho’oy.” 3Agu émé manga ata bentang méun: “Co’o tara emin le méu, walé kaut: Sékékn Mori. Toé béhéng ba kolé cé’é ho’oy to’ong.” 4Itug kali ngod isé, agu ita lisé ca keledai reba ata ngai liwing kin bolo mai lewang, oné lupi salang, mai isé caca wasén. 5Agu pisa taus ata manga nitu bentang isé: “Caca kudut co’on le méu keledai hitu?” 6Walé lisé cama ného baté pedé de Mori Yésus. Itu kali sondang kaut lata situ. 7Og arun lisé keledai hitu nggere-oné Mori Yésus, agu lapak kaut ali towé diséy, itu kali létin Mori Yésus. 8Dod ata wisi towéd wa salang, manga kolé ata iwod ri’o saung ta’a oné mai umad. 9Ata lako bolo agu isét lut musi mai kepoks:

“Hosana!

Berkak kéta Hiat mai le ngasang de Morin,

10poro berkak koé Adak ata cai ho’o, Adak de empo dité hi Daud,

hosana oné osang langkas!”

11Du cain oné Yérusalém, Hia ngo oné Mbaru de Mori Keraéng. Nitu Hia lélo kéta taung, maik landing ali manég tana, Hia ngo oné Bétaniay cama laing agu ata nungkun situt campulusua.

Mori Yésus Mawang Haju Aray

11:12-14

(Mat. 21:18-19)

12Ného diangn, du koléd Mori Yésus agu ata nungkun oné mai Bétania, Mori Yésus doing’g darum. 13Agu ita déu main Liha pu’u ara ata manga kin saungn. Ngo ruis nitu Hia kudut lélo cala manga wuan ara hitu. Maik du cai nitun Hia, toé kéta manga wuan, hanang saungn kanang, ai toé di hitu cekengn wua ara. 14Itu kali mai taé Diha ngong haju ara hitu: “Néka manga kéta cengatan ata hang wuam tai tédéng lén!” Agu curup hitu Diha dengé taung lata nungkun.

Mori Yésus Pandé Nggeluk Mbaru de Mori Keraéng

11:15-19

(Mat. 21:12-13; Luk. 19:45-48; Yoh. 2:13-16)

15Itu kali cain Mori Yésus agu ata nungkun oné Yérusalém. Du cain Mori Yésus oné Mbaru de Mori Keraéng, wangkag Liha mbérd sanggéd ata pika agu weli oné natas Mbaru de Mori Keraéng. Sanggéd méja disét paluk séng agu sanggéd bangku disét pika tekur jawa walék taung Liha, 16agu toé sendos Liha ata pola ceca lagé natas Mbaru de Mori Keraéng. 17Itu kali Hia toing isén, mai taén: “Toé léng poli mangan tulis: Mbaru Daku te caro mbaru ngaji latang te sanggéd wa’u? Maik méu ho’o pandé ciri cewo data takoy!” 18Sanggéd imam kepala agu ata pecing Taurat dengé curup hitu, agu isé pantil kudut ala Hias, ai isé rantang Hias, ita sanggén ata do lenget kétas ali toing Diha. 19Woko manég tana, isé kolés oné mai béndar.

Haju Ara Ata Poli Dangon – Toing De Mori Yésus Latang Te Ngaji

11:20-26

(Mat. 21:20-22)

20Ného diang gulan, du Mori Yésus agu ata nungkun liba lupi haju ara hiod poli mawang Liha, ita lisé dango haéng wakén wa. 21Itu kali bet kolén li Pétrus te apa hitut poli jarin, agu mai taén ngong Mori Yésus: “Tuang Guru, lélo damang, haju ara hiot mawang Dité, dango gi.” 22Mai walé de Mori Yésus agu isé: “Imbi koé oné Mori Keraéngm! 23Aku taé agu méu: Moro matan, céing kaut ata taé ngong poco ho’o: Angkak cé’é mai ho’om, agu wanggulh nggere-oné tacik! Tama néka mbu-mbek nais, maik imbi te apa hitut curups, kudut jari tu’ungy, apa hitu te jari tu’ungy oné méu. 24Landing hitu Aku taé agu méu: apa kaut tegi de méu, agu ngajis, imbi tu’ung te poli tiban le méu, apa situ te téings oné méu. 25Agu émé hesém te ngaji, olong ampongs di le méu, émé manga ata kodo le méu oné nais kudut le hitu kolé Emas hitut éta Surga, ampong taung sanggéd ndékoks.” [26Maik émé toé ampongs le mu, nenggitu kolé Emas hitut éta Surga, toé kolé ampong sanggéd ndékok de méu.]

Réi Latang Te Kuasa De Mori Yésus

11:27-33

(Mat. 21:23-27; Luk. 20:1-8)

27Poli hitu Mori Yésus agu ata nungkun cai kolés oné Yérusalém. Du Mori Yésus lako oné natas Mbaru de Mori Keraéng, mais sanggéd imam kepala, ata pecing Taurat agu ata tu’ad, 28agu réi oné Hia: “Ali kuasa diong Ité tara pandé taung so’o? Agu céing hitut téing kuasa agu Ité, wiga Ité pandé nenggitut?” 29Mai walé de Mori Yésus agu isé: “Aku kolé kudut manga ca réig agu méu. Walé kali le méu agu Aku kudut Aku te toi oné méu. Ali kuasa diong pandéd Laku sanggéd apa situ. 30Asa néng cebong di Yohanés hitu, éta mai Surga ko oné mai manusian? Walé le méu nggere-cé’é Aku!” 31Isé bantang cama taud, agu mai taéd: “Émé nggo’o taé dité; éta mai Surgan, mai kolé taé Diha: Émé nggitu, co’o weli tara toé imbin hia le méu? 32Maik menan kolé émé nggo’o taé dité: Oné mai manusia!” Ai isé rantang ro’éng dos, ai sanggén ata pecing te hi Yohanés hitu tu’ung-tu’ung cengata nabiy. 33Itu kali walén lisé agu Mori Yésus: “Toé pecing lami.” Mai kolé taé de Mori Yésus agu isé: “Émé nggitu, Aku kolé toé gorig te tura agu méu ali kuasa apag Aku pandéd gori situ.”

Currently Selected:

MARKUS 11: BMNT

Highlight

Copy