Songs 20
20
Pray Dat Da King Goin Win Da War
Fo da main music guy, one David kine Song Fo God
1Eh king! Wen get big trouble
An you like yell fo Da One In Charge help you,
I like fo him help you.
I like fo God make shua notting bad happen to you, my king,
Cuz you know wat kine god him,
Da One oua ancesta guy Jacob wen pray to.
2Da God dat stay inside da place dat stay spesho fo him,
Inside Jerusalem, on top Mount Zion,
I like him go help you.
I like him make you stay strong.
3I like God no foget all da sacrifices you wen make.
I like fo him tink good bout all dose burn up kine sacrifices.
(Time out fo da music.)
4I like God give you eryting you like
Dass inside you,
An make happen
All da tings you wen plan.
5Eh King! Wen God make you win da war,
Us guys goin make big noise cuz we stay good inside,
An we goin wave flag
Cuz we know wat kine god we get.
I like Da One In Charge make eryting happen
Dat you aks him fo do.
6Dis wat I know now:
Da king dat Da One In Charge wen pick,
Da One In Charge erytime help him.
Da One In Charge, he stay inside da sky,
Da place dat stay spesho fo him,
An from dea, he lissen da king
An use his awesome powa fo get da king outa trouble.
7Some peopos trus da real plenny war wagons dey get,
Odda guys, dey trus all da horse dey get fo win da war.
But fo us guys, da One us call fo help us, az Da One In Charge,
Cuz we know wat kine god him.
8All dem odda guys, dey go down on dea knees an come wipe out,
But us guys, we help each odda fo stan up, cuz us da winnas!
9Eh! You Da One In Charge! Make oua king win!
Wen us guys yell fo him help us,
We like him lissen an help us!
Currently Selected:
Songs 20: HPB
Highlight
Share
Copy
Want to have your highlights saved across all your devices? Sign up or sign in
©2020 Hawaii Pidgin Bible Ministries
hawaiipidginbible.org
Learn More About Hawaii Pidgin Bible
