Songs 15
15
Wat God Like
One David kine song
1Eh! You Da One In Charge! Tell me who get da right
Fo live wit you, in da place you stay.
Who get da right fo stay long time
On top da mountain dat stay spesho fo you?
2Da One In Charge tell:
“Fo get da right fo stay wit me,
Dey gotta be da kine peopo
Dat live so dat nobody can poin finga dem.
Dey do da right ting erytime.
Dey tell da trut erytime
Cuz no mo notting inside dem dey like hide.
3Dey no talk bad bout odda peopo.
Dey no do notting fo hurt dea frenz.
Dey no talk harsh kine to dea neighba guys.
4Dey tink az bad
Wen peopo do stuff dat God tell no good.
Dey get respeck
Fo da peopo dat stay sked a Da One In Charge.
Dey stick erytime
Wit wat dey wen promise in front God,
No matta someting bad happen to dem cuz a dat.
5Dey no charge extra interes
Wen dey lend money.
Dey no take dirty money
From somebody dat like hurt one guy
Dat neva do notting bad.”
Dass wat God tell.
Dat kine peopo, dey da ones
Dat goin stan solid foeva!
Currently Selected:
Songs 15: HPB
Highlight
Share
Copy
Want to have your highlights saved across all your devices? Sign up or sign in
©2020 Hawaii Pidgin Bible Ministries
hawaiipidginbible.org
Learn More About Hawaii Pidgin Bible
