Smart Guys 23
23
6
1Wen you sit down fo eat
Wit one importan govmen guy,
You betta look an see
How come he put all da grinds in front you.
2If you da kine guy dat like pig out,
Eat ony litto bit, no eat plenny.
3No ack jalike you like pig out
On all da fancy kine stuff he put in front you,
Cuz maybe da guy like bulai you.
7
4No go work hard fo come rich!
Be smart an take um easy.
5You look litto bit at rich kine stuffs
An dey disappea,
Da rich kine stuff, jalike one eagle dat get wing
An fly away to da sky.
8
6Wen one guy dat like get eryting,
Tell you fo come his place fo grind,
No go pig out
All da fancy kine stuff he put in front you.
7Cuz dat kine guy,
Wen he tell you, “Eat up! Drink plenny!”
Inside him, he tink all da time,
“How much I gotta pay fo dis guy, aah?”
He no tink bout you.
8Da litto bit you eat,
You goin bahf um back up.
Da nice tings you tell da guy,
Ony wase time.
9
9No say notting
To da kine guy dat tink he too smart
But yet he not too smart,
Cuz you know wat fo do erytime.
But you talk to him lidat,
He goin ack jalike wat you tell no mean notting.
10
10No go move da stone
Dat yoa ancesta guys wen put
Fo mark wea dea land stay.
No try fo take ova da fields
Dat some kids own
Cuz dea faddah guy mahke awready,
11Cuz God, he da One get da kuleana
Fo take kea dem,
An he real strong.
He goin talk to da judge fo dem,
An agains you.
11
12Wen somebody like teach you
Da right way fo live,
Lissen plenny bout wat dey tell!
Wen somebody talk
Bout stuff you need fo know,
Lissen wat dey tell!
12
13Wen da kids need learn
How fo live da right way,
No hold back.
Mo betta dea okole sore,
Den bumbye dey get cut off from God foeva.
14You da one fo punish um.
Bumbye you da one can get um outa trouble
Fo dem no mahke.
13
15Eh my boy, if inside you
You know wat fo do erytime,
Den I goin stay real good inside too.
16Goin make me feel real good inside
Wen I hear you talk bout wass right.
14
17No look wat da bad kine guys do,
An make jalike you like do
Wateva dey stay do.
Mo betta, go all out all da time
Fo show plenny respeck fo Da One In Charge.
18Cuz fo shua, bumbye,
Wen you come ol, yoa life goin be good.
Da tings you stay wait fo get,
You know you goin get um.
15
19Eh my boy, lissen good!
Go come da kine guy
Dat know wat fo do erytime!
Make shua
Da way you live, stay good!
20No come jalike some a da guys
Dat suck um up too much erytime,
O dat pig out to da max.
21Cuz anybody go suck um up an pig out too much,
In da end, dey no goin get notting—
Dey goin use ony da kine clotheses dat look jalike rags,
Cuz dey like sleep all da time.
16
22Lissen good to yoa faddah guy,
Cuz he da One wen give you yoa life.
An wen yoa muddah come ol,
No make jalike she not importan.
23Go learn wass true, jalike you buying um.
But no throw way wass true, jalike you selling um.
Learn how fo know wat fo do erytime,
An how fo live da way you suppose to live,
An how fo undastan stuff.
24Wen somebody boy do wass right,
His faddah guy goin feel real good inside.
Dat guy dat get one kid
Dat know wat fo do erytime,
He goin dance an sing cuz a dat.
25Good, yoa faddah-muddah guys like dance an sing lidat!
An da one dat wen born you,
I like her feel good inside bout you.
17
26Eh my boy, let me teach you how fo tink good!
Wen you watch how I stay live,
I like you stay real good inside bout wat you see.
27Cuz da wahines dat fool aroun fo money,
An da wahines dat awready stay marry odda guys,
Goin make trouble fo you!
If you hang aroun wit dem,
Jalike you goin fall down inside one deep hole
An no can get outa dea.
28Dat kine wahine,
Dey wait fo jump you
Jalike da steala guys,
An dey erytime make mo an mo guys
Broke up wit dea wife.
18
29Who yell “Bummahs”?!
Who get sore head?!
Who like beef all da time?!
Who grumble?!
Who get cut an donno how come?!
Who get red eye?!
30Da peopo dat suck um up till late,
Cuz dey go all ova fo check out
Da diffren kine wine wit spice.
Dey da ones get hard time.
31No look da kine wine dat make you like go suck um up.
No matta look nice an red,
An look sparkly inside da wine glass,
An go down real easy,
32Cuz bumbye, goin bite you jalike one snake,
An fill you up wit poison,
Jalike da kine snake dat kill you!
33Inside yoa head,
You see any kine stuff
Dat you no can handle,
An yoa head goin make you talk like you pupule.
34You goin feel jalike you stay trying fo sleep
Inside one boat inside da middo a da ocean,
An stay laying on top da mast!
35You goin talk lidis:
“Da buggahs, dey wen wack me,
But I no feel sore!
Dey wen bus me up,
An I neva know!
Wen I wake up,
I goin get anodda drink!”
Currently Selected:
Smart Guys 23: HPB
Highlight
Share
Copy
Want to have your highlights saved across all your devices? Sign up or sign in
©2020 Hawaii Pidgin Bible Ministries
hawaiipidginbible.org
Learn More About Hawaii Pidgin Bible
