Mark 3

One Guy, His One Hand No Work No Moa

(Matthew 12:9-14; Luke 6:6-11)

1Anodda time Jesus go inside da Jew church. Had one guy dea, his one hand no work no moa. 2Get some guys dea. Dey stay checking out Jesus real good, if he go make da guy come good on da Res Day, cuz dey like poin finga him.

3So Jesus tell da guy wit da hand dat no work no moa, “Eh, come hea in front erybody!” 4Den Jesus tell da peopo, “So, wat? Da Rules tell you can do good kine stuff on da Res Day, o you can do bad kine? Wat you suppose to do, kill peopo o help um? Wat da Rules tell, aah?”

But da Pharisee guys, dey neva have notting fo tell.

5Jesus look at all da peopo real good. He stay real huhu. Same time, he feel sad cuz dey hard head. Den he tell da guy, “Stick out yoa hand.” An da guy stick um out, an da hand come good.

6But da Pharisee guys, dey ony like stick wit dea rules. Dey go outside, an right den an dea dey go talk to King Herod guys, how dey goin kill Jesus.

Jesus Teach Da Peopo By Da Lake

7Den Jesus an his guys go way an stay by da lake. Plenny peopo from Galilee go wit him. An get peopo from Judea, 8Jerusalem, Idumea, from da odda side a da Jordan Riva, from Tyre side, an Sidon side. Dey all come cuz dey hear all da kine stuff Jesus stay do.

9 # Mark 4:1; Luke 5:1-3 Get choke plenny peopo, Az why Jesus tell his guys fo make ready one boat, fo him go inside um an den da peopo no squash him. 10Jesus make plenny sick peopo come good. Dass why all da odda sick peopo dea, dey go all out fo touch him. 11Had peopo ova dea wit bad kine spirits dat take ova dem. Weneva dey see Jesus, dey go down in front him, an yell, “You God Boy!” 12But Jesus tell da spirits, “You guys betta not tell nobody who me.”

Da Twelve Guys Jesus Sen

(Matthew 10:1-4; Luke 6:12-16)

13Den Jesus go to da hills. He tell da guys he like pick, “Eh, come!” An dey come. 14He pick twelve guys. He tell, “I like you guys stay by me. I like teach you guys. Laytas I goin sen you guys all ova da place, an den you guys goin teach da peopo. 15An I goin give you guys powa too fo make da bad kine spirits no bodda da peopo no moa.”

16Dis da twelve guys he pick fo sen all ova da place:

Simon, da guy Jesus call “Peter,”

17James an his braddah John, Zebedee boys. He call um “Da Thunder Guys,” cuz dey da kine guys dat like make big noise.

18Andrew, Philip, Bartolomew,

Matthew, Thomas, Alfeus boy James,

Taddeus, Simon da Jew Sovereignty guy,

19an Judas Iscariot. He da guy dat goin set up Jesus fo mahke bumbye.

Jesus An Da Bad Kine Spirits Boss

(Matthew 12:22-32; Luke 11:14-23; 12:10)

20Den Jesus go home. Plenny peopo come, jalike befo time, az why Jesus an his guys no can eat. 21Wen Jesus ohana hear dat, dey go fo take him away. Dey tell, “He wen go pupule!”

22 # Matt 9:34; 10:25 Some teacha guys dat teach da Rules From God come from Jerusalem. Dey tell, “Dis guy, da leada fo da bad kine spirits wen take ova him fo shua! Beelzebul, you know! Dass why he can make da bad kine spirits no bodda da peopo no moa!”

23Jesus tell dem, “Eh, you guys, come ova hea! I like tell you one story fo teach you guys someting. You figga Satan goin make Satan guys let go da peopo, aah? No way! 24-25Da ohana dat go agains each odda no can stay strong. Da country dat go agains each odda ony bus up dea country. 26If Satan split an go agains his guys, den he bus up Satan! He no can stay strong. He goin come wipe out!

27“Az why no good how you guys stay tink! How you figga one guy goin go bus inside one big moke house an rip off his stuffs, if he no tie up da moke firs? Den can steal eryting.

28“Dass right! An I like tell you guys dis too: God can let da peopo go an hemo dea shame fo all da bad kine stuff dey stay do, even if dey talk bad bout God. 29#Luke 12:10But if dey talk bad bout da Good An Spesho Spirit, God goin tell ‘Laytas’ to dat. So if dey talk lidat, God no goin let dem go an hemo dea shame fo dat, not now o eva!”

30Jesus tell all dat cuz da teacha guys wen tell, “He get one bad kine spirit dat wen take ova him.”

Jesus Muddah An Braddahs

(Matthew 12:46-50; Luke 8:19-21)

31-32Den Jesus muddah an braddahs come. Get plenny peopo stay sit aroun him, so his muddah an braddahs stay outside. Dey sen one guy inside fo get him. Da peopo tell him, “Eh, yoa muddah an yoa braddahs an sistahs, dey outside, an dey like talk to you.”

33He tell um, “Wat you guys figga? Who my muddah? Who my braddahs?”

34He look all da guys dat stay sit aroun him, an tell, “Look! Hea, dese guys my muddah! An dese guys, dey my braddahs an sistahs, fo real kine! 35Whoeva do wat God like, dey my braddah an sistah an muddah!”

Currently Selected:

Mark 3: HPB

Highlight

Copy