SALMOS 34
34
1Wká'n ẕénteza' X̱anžo Dios dot ža, na' yele.
Góḻteza' da' we ḻawa' Ḻe'.
2Chaz ḻaža'a X̱anžo Dios.
Yéngekle benne' gax̱jw ḻaže' ka' da' ki, na' yebéḻe'egekle'.
3Le wká'n ẕen X̱anžo Dios tẕen ḻen neda',
na' tẕen we ḻawžo La la'y chie'.
4Bḻiža' X̱anžo Dios, na' Ḻe' benle' chia',
na' beslé' neda' ḻo yógo'te da' bchébegaken neda'.
5Benne' ka' bx̱en ḻáže'gake' Ḻe' bḻé'egekle' yeḻa' ẕen chie', na' bi bedoé'egekle'.
6Neda', benne' yache', bḻiža', na' benle X̱anžo, Dios chian',
na' beslé' neda' ḻo yógo'te da' wẕáka'ḻi'a.
7Wbás ka' che ya'abá che X̱anžon' zej zoe' kwit benne' ka' ẕžébegake' Ḻe',
na' žape chí'igake' ḻégake'.
8Le wia nga, na' ḻé'elele nak chawe' X̱anžo Dios.
Yeḻa' ba nez ẕen naken che bennen' žx̱en ḻaže'e Ḻe'.
9Le žebe X̱anžo Dios, ḻe'e, nakle benne' chie' ka',
dan' bi be žiážjegekle benne' ka' ẕžébegake' Ḻe'.
10Bež yíx̱e'do' ka' žiážjegeklba', na' ẕdóngakba',
san benne' ka' žx̱en ḻáže'gake' X̱anžo Dios bi be da' chawe' yážjegekle'.
11Le da, x̱kwide' ka', na' le yenle chia'.
Wsedla' ḻe'e nich žébele X̱anžo Dios.
12¿Noẕ benne' ládjwle ḻe'e žénele' soakze' nbane',
bennen' žénele' soe' yiz zan nich ḻe'ele' da' chawe'?
13Bwíakze da' ẕchaḻjo' nich bi nnio' da' ẕinnj,
na' nich bi wchaḻjo' da' wen laže'.
14Bzoa cheḻa'ale da' bi nak chawe' da' ẕchaḻjo', na' ben da' nak chawe'.
Ben byene so' ḻo yeḻa' ẕga'n chawe', na' ben ka nak chen.
15Ẕwíakze X̱anžo Dios benne' ka' zej nake' chawe',
na' ẕze nage' da' ẕnnábgekle' Ḻe'.
16Ẕža'a X̱anžo Dios benne' wen da' ẕinnj ka',
na' bi soa no benne' chejsá' ḻaže'e ḻégake'.
17Benne' chawe' ka' žḻížgake' X̱anžo Dios,
na' Ḻe' ženle' chégake',
na' žeslé' ḻégake' ḻo yógo'te da' ẕzáka'gake'.
18Gawze zoa X̱anžo Dios gan zej nnita' benne' ka', benne' žak nyache' ḻáže'gake', na' žeslé' ḻégake'.
19Da' zanḻe'e da' ẕzaka' benne' chawe',
san žeslá X̱anžo Dios ḻe' ḻo yógo'te da' ka'.
20Ḻe' žape chi'ikze' yógo'te žit yo'o bennen',
na' nitó žit chie' bi gachjwn.
21Da' ẕinnj da' žon benne' bi nake' chawe' goten ḻe',
na' kwia yi'gak benne' ka' ẕží'igake' chegak benne' chawe' ka'.
22X̱anžo Dios ẕzoa chawe'e be' da' nákgakkze benne' wen žin chie' ka',
na' yógo'te benne' ka' žx̱en ḻáže'gake' Ḻe' batkle kwia yí'gake'.
Currently Selected:
SALMOS 34: zty
Highlight
Share
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.
