SALMOS 21
21
1Benne' ẕnna bi'e ẕžebe' yeḻa' wak chio', X̱anto' Dios,
na' ni'a che yeḻa' weslá chio' žebéḻe'ele'.
2Benno' chie' da' wdán ḻaže'e
na' bi bžono' da' wnnable' Le'.
3Wẕí' ḻo no'o ḻe', na' ben chawo'o ḻe'.
Bžio' yichje' to da' naken oro.
4Wnnable' Le' gonno' chie' yeḻa' nban,
na' bennon' chie' nich soakze' yiz zan.
5Ẕenḻe'e nak yeḻa' ẕen chie' dan' besló' ḻe'.
Benno' chie' yeḻa' ba la'ne, na' yeḻa' ẕen.
6Dan' ben chawo'o ḻe' to chi'ize,
žono' ga žebéḻe'ele' ḻawo' Le'.
7Dan' bennen' ẕnna bi'e žx̱en ḻaže'e X̱anžon',
yeyache' ḻaže'l Dios ẕente ḻe', na' bi kwe' zedle'.
8Wzetjo' yógo'te benne' ka' bi ẕḻé'egekle' Le' chawe'.
Ḻen yeḻa' wak chio' wzex̱jo' benne' ka' ẕží'igake' chio'.
9Gak chegak benne' ka' ka wnnito'o ḻégake' ḻo yi'
katen' yido' nich wchi'a ḻažo'o ḻégake'.
X̱anžon' wžía yi'e benne' ka' ḻo yeḻa' ẕža'a chie', na' yi' na' wzeyen ḻégake'.
10Yógo'te da' béngake' ḻo yežlyó nga wchinnjo',
na' wkwaso' ẕa'sógake' ka' ladjw benách ka',
11dan' wyáz ḻáže'gake' góngake' da' bi naken chawe' ḻawo' Le'.
Sa' ḻáže'gake' da' góngake' san bi be sáke'gekle' dan' wlago' ḻégake'.
12Bkwezo' yag ntóche'do' chio' ka' nich goto' ḻégake'.
13¡Ga'n ẕen Le', X̱anto' Dios, ḻo yeḻa' waḻe chio'!
Góḻtezeto', na' wká'n ẕéntezeto' Le' ni'a che yeḻa' wak chion'.
Currently Selected:
SALMOS 21: zty
Highlight
Share
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.
