MARKOS 9

1Jesusen' bcháḻjḻene' benne' ka' žónḻengake' Ḻe' tẕen, na' wnné':

—Da' li žapa' ḻe'e, zej nnita' benne' ka' nga, benne' bi gátgake' kate' ḻé'ežegekle' ža yedjnná bia' Dios yežlyó nga, na' ḻa' ḻaw yeḻa' wnná bia' ẕen chie'.

Ẕcha' kan ẕnna' ḻaw Jesús

(Mt. 17:1‑13; Lk. 9:28‑36)

2Kate' ba wdé x̱ope ža, Jesusen' bchi'e Bedw ḻen Jakob, na' Ẕwa, na' ḻégakze' jake' to ḻaw ya'a sibe, gan bcha' kan ẕnna' ḻaw Jesusen' ḻawgak yonne' ka'. 3Wyép yes baní' laže' da' nakw Jesusen', na' goken chícheḻe'e. Ẕíla'do'ze goken, na' no benne' žibe' laže' yežlyó nga, bi gak gone' laže' ẕíla'do'ze kan gok ẕen'. 4Bḻa' ḻawgak Lías, na' Moisés gan nníta'gake', ẕcháḻjḻengake' Jesusen'. 5Naž Bedon' gože' Jesusen':

—Benne' wsedle, ba nez ẕen naken chežo zoažo nga. Gona' chonne yo'o laga' nga, to chio', na' yetó che Moisés, na' yetó che Lías.

6Ki wnná Bedon' dan' bi nnezle' dan' ẕnne'. Ka' goken dan' ẕžébegak benne' wsedle ka' che Jesusen'. 7Naž wžé' to bejw da' wló'on ẕoḻ ḻégake', na' benle chi'i to benne' ẕchaḻje' ḻo bejw na', na' wnné':

—Benne' ni nake' Ẕi'na'. Nži'ila' Ḻe'. Le wzé nag chie'.

8Ḻa' bwíategake' san biž no benne' bḻé'egekle'. Toze Jesusen' zóaḻene' ḻégake'.

9Kate' ne yó'ogake' nez, žétjgake' ḻaw ya'a siben', Jesusen' bchi'le' ḻégake' bi wzéngekle' no benne' kan gok dan' bḻé'egeklen', kate' yebanže' Ḻe', Benne' Golje' Benách, ḻo yeḻa' got. 10Che ḻen bzoa chóchzegake' dan' wnné' ḻo yichj ḻáẕdo'gake', na' ḻa' ḻégakze' belnnable' ljéžgake' biẕ zejḻás dan' wnné' kate' wnné' yebane' ḻo yeḻa' got. 11Wnnábgekle' Jesusen', na' wnnágake':

—¿Biẕ chen' ẕnnagak benne' yodo' wsedle ka' žon byenen ḻa' Lías zga'ale' kate' ḻa' Benne' Criston'?

12Bechebe Jesusen', na' wnné':

—Da' li ḻa' Líasen' zga'ale', na' yecá'n chawe'e yógo'te kan žaḻa' gákgaken. Na'a, ¿biẕ chen' nyejw ḻe'e yiche la'y da' ẕnna žon byenen Benne' Golje' Benách sáka'ḻi'e, na' wzoagak benách ka' Ḻe' cheḻa'ale? 13Žapa' ḻe'e: ba bḻa' Líasen', na' béngake' chie' kan gónegekle', kan nyejw ḻe'e yiche la'y kan žaḻa' gaken chie'.

Jesús žeyone' to x̱kwide' byo yo'obe' be' x̱iwe'

(Mt. 17:14‑21; Lk. 9:37‑43)

14Kate' bežín Jesusen' ḻen benne' ka' nníta'ḻengake' Ḻe' tẕen gan zej nnita' yezíka'gak benne' wsedle chie' ka', bḻé'egekle' zej nnita' benne' zan ga na', na' benne' yodo' wsedle ka' želdíḻ diže'e ḻen benne' wsedle chie' ka'. 15Kate' benne' zan ka' bḻé'egekle' Jesusen', bebángekle', na' taríaze wzá'gake' gan zi'e, na' wdápegake' Ḻe': “Padiox̱.”

16Naž Jesusen' wnnable' benne' wsedle chie' ka', na' wnné':

—¿Biẕ dan' ẕdíḻ-ḻenle ḻégake'?

17Bechebe to benne' zoe' ladjw benne' zan ka', na' wnné':

—Benne' wsedle, bedjwá'a x̱kwide' byodo' chia' chio' Le', dan' yo'obe' be' x̱iwe' da' žonen ga bi ẕnnabe'. 18Kate' žo'o be' x̱iwen' ḻebe', ẕžix̱ ẕḻolen ḻebe' ḻo yo, na' ẕbia bžina' zide' žoa'abe', na' žẕej láye'be'. Che ḻen zej ẕžitbe'. Wnnabla' benne' wsedle chio' ka' yebéjgake' be' x̱iwen', san bi wẕáke'gekle'.

19Bechebe Jesusen', na' wnné':

—Ḻe'e, benne' bi žejḻe'le che Dios. ¿Gáka'x̱tekze gon byenen sóaḻena' ḻe'e? ¿Gáka'x̱tekze gon byenen gaka' ẕen ḻaže' ḻen ḻe'e? Le yedjwá'-be' chia'.

20Zá'gake' zej noe'e-be' gan zoa Jesusen'. Kate' be' x̱iwen' bḻe'elen Ḻe', ḻa' bx̱izten ḻebe'. Wže'be' ḻo yo, na' bžix̱ bḻolen ḻebe', na' wžía bžina' zide' žoa'abe'. 21Naž Jesusen' wnnable' x̱a x̱kwiden', na' wnné':

—¿Gáka'x̱te ba goken žaken ki chebe'?

Wnná x̱aben':

—Na' náktebe' x̱kwíde'do' žak ki chebe'. 22Zan chi'i ẕžen' ḻebe' ḻo yi', na' ẕan nis nich goten ḻebe'. Che ḻen, cha' žako' late', beyache' ḻaže'l neto', na' gokḻen neto'.

23Jesusen' gože' ḻe':

—Cha' gak chejḻi'o che Dios, yógo'te waken cha' chejḻi'o chie'.

24Ḻa' wnnete zižje x̱a x̱kwiden', na' wnné':

—Žejḻi'a chie'. Gokḻen neda' nich chejḻe'ža' chie'.

25Kate' bḻe'el Jesusen' za'gak benne' zan ka', ẕchígake' Ḻe', gože' be' x̱iwen', na' wnné':

—Le', be' x̱iwe', be' žonen ga bi ẕnnagak, na' bi žéngekle benách ka', na'a ẕchi'la' le' yežojo' ḻo x̱kwiden', na' biž chazo' ḻebe'.

26Wžéžeya'a be' x̱iwen', na' bžix̱ bḻol-ḻe'en ḻebe'. Naž ḻa' bežojten, na' bka'nen ḻebe' ka to x̱kwide' gat. Ka' goken, bchaḻjgak benne' zan ka', na' wnnágake':

—Ba natbe'.

27Naž Jesusen' bex̱we' na'be', na' bechise'-be', na' beyás x̱kwiden'.

28Naž wyó'o Jesusen' to yo'o, na' ḻa' ḻégakze benne' wsedle chie' ka' wnnábgekle' Ḻe', na' wnnágake':

—¿Biẕ chen' bi gok yebejto' neto' be' x̱iwen'?

29Jesusen' gože' ḻégake':

—Bi gak yebejle ka'ze be' x̱iwe' ki, san toze cha' wcháḻjḻenle Dios, na' gonle wbás.

Jesús ẕḻoe'ele' da' yoble kan za' gótgake' Ḻe'

(Mt. 17:22‑23; Lk. 9:43‑45)

30Kate' bezá' Jesusen' ḻen benne' ka' žónḻengake' Ḻe' tẕen ga na', wdégake' gan nbab Galilea. Gónele Jesusen' bi nnezle no benne' gan zoe', 31dan' žsedle' benne' wsedle chie' ka'. Gože' ḻégake':

—Wdégake' neda', Benne' Golje' Benách, ḻo na'gak benne' ka' gótgake' neda', san te gata', kate' tegak chonne ža, yebana'.

32Bi bejní'igekle' da' ni da' gože' ḻégake', na' dan' ẕžébegake', bi be wnnábgekle' Ḻe'.

Nólgake' gake' benne' blo

(Mt. 18:1‑5; Lk. 9:46‑48)

33Naž bžin Jesusen' ḻen benne' ka' žónḻengake' Ḻe' tẕen ḻo yež Kapernaum, na' kate' ne nníta'gake' to yo'o, Jesusen' wnnable' ḻégake', na' wnné':

—¿Biẕ dan' wdíḻ-ḻenle lježle kate' ne yo'ole nez?

34Naž ḻégake' wnníta'gake' žize dan' wdíḻ-ḻengake' ljéžgake' ḻo nezen' cha' nólgake' gake' benne' blo. 35Naž wžé' Jesusen', na' bḻiže' chežínnote benne' wsedle chie' ka', na' gože' ḻégake':

—No benne' žénele' gake' benne' blo ládjwle ḻe'e žaḻa' gake' ka to benne' kwíde'ze, na' ḻezka' žaḻa' gake' ka ni'a na'le yógo'tele.

36Naž Jesusen' bex̱we' to x̱kwide', na' bzoe'-be' gachje ḻáwe'le gan nníta'gake'. Wdeḻe'e-be', na' gože' ḻégake':

37—No benne' si' ḻo ne'e to x̱kwide' ki dan' nakbe' chia', ḻezka' si' ḻo ne'e neda', na' no benne' si' ḻo ne'e neda', kege nedza' si' ḻo ne'e, san ḻezka' si' ḻo ne'e X̱a', Bennen' bseḻe'e neda'.

Cha' bi ẕži'i to benne' chežo žo'o, žákḻene' žo'o

(Mt. 10:42; Lk. 9:49‑50)

38Naž Ẕwa gože' Jesusen':

—Benne' wsedle, bḻe'elto' to benne' žebeje' be' x̱iwe' ka' yo'ogak benne' ka', na' ẕkonle' žin lo'. Bchi'leto'-ne' biž gonen', dan' bi žónḻene' žo'o tẕen.

39Naž Jesusen' gože' ḻe':

—Bi wchí'lele-ne', dan' cha' zoa no benne' žone' to yeḻa' wak da' zan' ya'abá che Dios, na' ẕkonle' žin la', bi gak nne zi'e chia'. 40Ki naken, no benne' bi ẕži'e chežo, žakḻen bennen' žo'o. 41No benne' wneẕjwe' chele to ẕíga'do' nis da' ye'jle dan' žónḻenle neda', Benne' Criston', tẕen, si'kze' da' žeyaḻa' chie'.

Gak chežo da' ẕia cha' gonžo ga gon no benne' doḻa'

(Mt. 18:6‑9; Lk. 17:1‑2)

42Ḻezka' wnná Jesusen':

—No benne' gone' ga gon to x̱kwide' ki doḻa', x̱kwiden' žejḻe'be' chia', gakže chawe' che bennen' cha' wcheje' to yiche žotw yene', na' chejžó'n kwine' ḻo nisdo'. 43Cha' to no'o gonen ga gono' doḻa', bchogen'. Gakže chawe' chio' chejo' gan so' nbano' zoa toze no'o, kege zoa chope no'o, na' chejchó'o ḻo yi' gabíl, gan bi yoḻe yi' chen. 44Ḻo latjen' bi gatgak bzoga' ka' yo'ogak benne' gat ka', benne' ka' chejnníta'gake' ga na', na' yin' bi yoḻen. 45Ḻezka', cha' to ni'o gonen ga gono' doḻa', bchogen'. Gakže chawe' chio', chejo' gan so' nbano' zoa toze ni'o, kege zoa chope ni'o, na' chejchó'o ḻo yi' gabilen', gan bi yoḻe yi' chen. 46Ḻo latjen' bi gatgak bzoga' ka' yo'ogak benne' gat ka', benne' ka' chejnníta'gake' ga na', na' yin' bi yoḻen. 47Ḻezka' cha' to yej ḻawo' gonen ga gono' doḻa', wlejen. Gakže chawe' chio' chejo' gan ẕnna bia' Dios zoa toze yej ḻawo', kege zoa chope yej ḻawo', na' chejchó'o ḻo yi' gabilen'. 48Ḻo latjen' bi gatgak bzoga' ka' yo'ogak benne' gat ka', benne' ka' chejnníta'gake' ga na', na' yin' bi yoḻen.

49’Nich gape chi'ižo beḻa' ẕwázježon zede', na' ẕgála'žon žoa'a yi', nich bi kwia yin', na' ẕwázjegake' zede' yógo'te biado' ka' ẕzéygake'-ba' ḻo bkog la'y che Dios. Da' ni žsedlen žo'o kan ga'ngak chawe' yógo'te benách chie' ka'. 50Nak chawe' zede', san cha' yenít yeḻa' sna'a chen, ¿nakx̱ gak yeyonžon sna'a? Le gak ḻa' ḻé'ezele ka zede' chawe', na' bga'n cháwe'do' tole ḻen yetole.

Currently Selected:

MARKOS 9: zty

Highlight

Copy